1. Azkaadn tu 1 Tesaluoniyan 5:11, wa aal a wi fi a du tu wi wan aneda?

 YU MAIT-A memba wen yu did wok aad fi elp mek op yu Kindom Aal ar elp fi fiks it op bak. An wen yu go de fi go a miitn di fos taim yu mait-a fiil so gud dat yu kudn iivn did sing di sang di wie ou yu did fiil gud iina yu aat. Ye man, di Kindom Aal dem we wi mek op elp fi big op Jeuova. Bot yu nuo wa els big op Jeuova uol iip? A wen wi bil op wi breda an sista dem a miitn. A sitn laka dis di apasl Paal did a tingk bout wen im did a taak bout ou wi fi bil op wi wan aneda a 1 Tesaluoniyan 5:11, an a dis a wi mien skripcha.​—Riid.

2. Wa wi a-go luk pan iina da lesn ya?

² Di apasl Paal did nuo ou fi bil op im breda an sista dem, kaa im di fiil it fi dem wen dem did a go chuu wan rof taim. Iina da lesn ya wi a-go taak bout ou im did elp di breda an sista dem iina chrii wie (1) fi eng aan an tan op chrang wen dem a go chuu dem prablem dem, (2) fi liv iina piis wid dem wan aneda, an (3) fi dem chos iina Jeuova muo. Mek wi si ou wi kyan du laik Paal an bil op di breda an sista dem iina dem wie ya tu.—1 Kor. 11:1.

3. Ou Paal did fiil bout wok?

³ Paal lov im breda an sista dem laka kuk fuud. A uol iip a tingz im go chuu iina laif, so it neva aad fi’im shuo it se im fiil it fi’im breda an sista dem wen dem a go chuu uol iip a prablem. Laik wan taim.Paal neehn av no moni so im did afi luk wok fi tek kier a im an im fren dem. (Aks 20:34) Im did a chriedzman kaaz a tent im yuuz tu mek. So wen im go a Korint im go lingk op wid wan breda niem Akwila an im waif we niem Prisila, kaa dem yuuz tu mek tent tu. Bot “evri Sabat” im wuda go priich tu di Juu piipl dem an di  Griik piipl dem. So wen Sailas an Timoti kom, “Paal tap mek tent an im yuuz aal a im taim fi priich di mesij.” (Aks 18:2-5) Paal neehn figet se di bigis ting we im did afi du wid im laif afi yuuz it fi sorv Jeuova. So im wuda nuo wa fi se fi mek di breda an sista dem fiil chrangga. Im mek dem memba se dem no fi mek kaa laif aad an kaa dem a chrai main dem fambili mek dem tap fain out bout di sitn dem we rait. Dat miin tu se dem fi du evriting dem kyan du fi put Jeuova bizniz fos iina dem laif.​—Fil. 1:10.

4. Ou Paal an Timoti did elp di breda an sista dem wen piipl a fait gens dem kaa a wa dem biliiv iina?

⁴ Likl afta di kanggrigieshan iina Tesalonaika did staat op, di piipl dem did a fait gens di breda an sista dem we jos baptaiz kaaz a wa dem biliiv iina. Wen di wikid piipl dem kudn fain Paal an Sailas, dem jrag di “breda dem infronta a di siti ruula dem an baal out, ‘dem piipl ya we mek chobl evriwe, dem kom ya . . . an . . . aal a dem a go gens Siiza laa.’” (Aks 17:6, 7) Imajin ou dem breda an sista ya did shak fi nuo se di man dem we iina di siti did ton gens dem. Dem kuda get fried an tap worship Jeuova ino, bot Paal neva waahn dat fi apm at aal. So aalduo im an Sailas did afi go we lef di breda an sista dem, dem mek shuor se sumadi wuda de de fi tek kier a di breda an sista dem. Paal mek di Tesaluoniyan dem memba dis wen im tel dem se: “Wi sen [Timoti wi breda] fi bil unu op iina wa unu biliiv, an fi mek unu kyan uol aan, so dem sofarieshan ya kyaahn shiek op non a unu.” (1 Tes. 3:​2, 3) Timoti wuda nuo we dem breda an sista ya a go chuu kaaz a di siem ting did apm iina Lischra di plies we im kom fram. An im did si ou Paal did elp di breda an sista dem fi kip chrang. An kaa im did si ou Jeuova did wok out tingz im kuda mek di breda an sista dem nuo se evriting wuda aarait wid dem tu.​—Aks 14:8, 19-22; Iib. 12:2.

5. Wa wan elda did du fi elp wan breda we niem Bryant?

⁵ A wa els Paal did du fi elp im breda an sista dem fi gwaan uol aan an kip chrang? Wen Paal an Baanabas go bak a di kanggrigieshan a Lischra, Aikoniyom, an Antiyak, “Paal an Baanabas pik elda gi dem fi liid dem.” (Aks 14:21-23) An yu na’afi wanda ef di elda dem did elp di breda an sista dem an osh dem, jos laik wa di elda dem iina fi wi taim a du. Luk pan wa wan breda we niem Bryant did se: “Wen mi ton 15, mi faada go we lef wi, an mi mada get put outa di kanggrigieshan. Mi did fiil laik se mi na’av nobadi an mi did fiil laik mi waahn gi op.” Bot wa did elp Bryant wen im a go chuu aal a dem prablem ya? Im se: “Wan elda we niem Tony no lef mi out, im aalwiez a taak tu mi, an im tel mi bout di wan dem we a go chuu aal kain-a prablem bot dem stil api. Im mek wi riid Saam 27:10, an im aalwiez a taak bout Ezikaiya ou im no tap chos iina Jeuova iivn duo im faada neehn chos iina Jeuova.” Ou wa Tony du did elp Bryant? “Kaa a wa Tony du, mi staat fi du nof muor fi Jeuova iina fultaim sorvis an dat did mek mi fiil api.” So aal a di elda dem fi a luk out fi si di wan dem we niid elp laik Bryant so dat dem kyan elp dem.​—Pr. 12:25.

6. Wa Paal did du fi elp di breda an sista dem fi tan op chrang an no gi op?

⁶ Paal did mek im breda an sista dem nuo se a Jeuova elp “wan kroud a piipl” fi go chuu dem prablem dem. (Iib. 12:1) Paal did nuo se wen wi tingk bout di wan dem we Jeuova elp aredi fi go chuu dem  prablem dem, it kyan elp wi fi tan op chrang an no tap tingk bout “di siti fi di Gad we mek piipl liv.” (Iib. 12:22) An a di siem ting a gwaan ya nou. No chuu se it elp yu fi uol aan chrang wen yu tingk bout ou Jeuova elp Gidiyan, Barak, Dievid, Samwel an uol iip a ada piipl iina di Baibl? (Iib. 11:32-35) An wa bout di breda dem iina fi wi taim we shuo se dem chos iina Jeuova? Di breda dem a di worl ed afis se a nof breda an sista sen iin leta fi tel dem tangks afta dem riid di tuori dem bout som a di breda an sista dem we chos iina Jeuova, an it elp dem fi si ou dem kyan chos iina Jeuova tu.

7. Wa yu lorn fram we Paal tel di breda an sista dem a Ruoman 14:19-21?

⁷ Wi a bil op wi breda an sista dem wen wi se an du tingz we elp aal a wi fi liv iina piis. Kaa aal a wi no fiil di siem wie bout tingz wi no mek it plit plit wi op. An ef wi waahn fi du sitn we sumadi els av a prablem wid bot wi na’av no prablem wid it, aalduo Jeuova no se it rang wi naa go dwi’it fi wi uona wie stil. Luk pan wa did apm iina di kanggrigieshan iina Ruom we did mek op a som Juu Kristiyan an som Kristiyan we a no Juu. Kaa dem neehn afi fala Muoziz laa agen dem kuda nyam eniting nou. (Maak 7:19) So som a di Juu Kristiyan dem fiil aarait fi nyam eniting. Bot som ada Juu Kristiyan neehn fiil laik se it aarait fi nyam eni an eniting stil. So dis did plit op plit op di breda an sista dem iina di kanggrigieshan. Paal shuo wa mek it impuotant fi dem liv iina piis wid dem wan aneda wen im se: “It gud fi no iit miit ar jrink wain ar fi du notn we wuda kaaz yu breda ar sista fi sin.” (Riid Ruoman 14:19-21.) So Paal mek dem si umoch it a ort dem an di breda an sista dem iina di kanggrigieshan. Paal did iivn redi fi tap liv sortn an sortn wie ef im nuo se it wuda kaaz ada piipl fi sin. (1 Kor. 9:19-22) A siem so wi kyan elp bil op di breda an sista dem iina di kanggrigieshan. Ef wi tap fait fi du tingz fi wi uona wie wi wudaana kip piis iina di kanggrigieshan tu.

8. Ou Paal di anggl it wen wan big prablem did kom op iina di kanggrigieshan?

⁸ Paal mek wi si ou wi kyan kip piis wid di wan dem we wi an dem no fiil di siem wie bout som big tingz. Laik ou som a di breda an sista dem iina fi’im taim did pudong dem fut an a se di Kristiyan dem we a no Juu afi go sorkomsaiz kaa dem no waahn no badi fi a se notn bad bout dem. (Gya. 6:12) Bot iivn duo Paal neva fiil di siem wie bout it laik dem, im neehn fuos dem fi dwi’it fi’im wie. We im du a aks di apasl dem an elda dem we did iina Jeruusilem fi elp dem fi saat it out, an dat shuo se im ombl. (Aks 15:1, 2) Kaaz a di wie ou im did diil wid it, it elp di ada breda an sista dem we iina di kanggrigieshan fi fiil api an liv iina piis wid dem wan aneda.​—Aks 15:30, 31.

9. Ou wi kyan du laik ou Paal did du?

⁹ Ef wan siiros prablem kom op iina di kanggrigieshan, wi kyan kip piis ef wi get elp fram di wan dem we Jeuova pik fi tek kier a di kanggrigieshan fi nuo wa fi du. An wi kyan nuo wa fi du tu ef wi luk iina di buk an pamplet dem we wi get fram Jeuova aaganaizieshan, an wen wi du di ting dem we dem tel wi fi du. So ef wi du we dem tel wi fi du insted-a we wi waahn fi du, wi a-go a mek piis rien iina di kanggrigieshan.

10. Wa a wan neda ting Paal did du fi elp di breda an sista dem liv iina piis wid dem wan aneda?

 ¹⁰ Wan neda ting we Paal did du fi kip di piis iina di kanggrigieshan a dat im aalwiez a taak bout di gud wiez dem we di breda an sista dem av insted-a di bad wiez dem we dem av. Wi si se im did du dis wen im did sen di leta dem tu di breda an sista dem iina Ruom. Im rait dong som a dem niem an im rait bout di gud wiez dem we dem av an som ada nais tingz we im nuo bout dem. So wi kyan du laik Paal an taak bout di gud wiez dem we di breda an sista dem av. Wen wi du dat, it mek it iiziya fi di breda an sista dem lov dem wan aneda an get kluos tu dem wan aneda, an dat wi bil op di kanggrigieshan.

11. Wa wi kyan du fi mek shuor se wi a liv gud wid wi breda an sista dem iina di kanggrigieshan?

¹¹ Somtaim aal di Kristiyan dem we chrang iina wa dem biliiv iina mait-a no grii wid dem wan aneda bout evriting an somtaim dem en op a aagyu bout tingz tu. A dat did apm tu Paal an im gud fren we niem Baanabas. Di tuu a dem did a aagyu kaa wan a dem did fiil se dem fi kyari Maak wen dem a-go du dem mishaneri wok an di neda wan neehn aarait wid dat. Kaaz a dat, “Paal an Baanabas kech op an tingz get so bad dat dem kudn sekl it” so dem tap paar wid dem wan aneda. (Aks 15:37-39) Bot Paal, Baanabas, an Maak did mek op bak wid dem wan aneda fi shuo se dem nuo se it impuotant fi kip di piis iina di kanggrigieshan. So Paal neehn fiil no wie fi taak gud bout Baanabas an Maak lietaraan. (1 Kor. 9:6; Kol. 4:10) A di siem wie wi fi mek op wid wi breda an sista dem enitaim wi an dem av prablem an gwaan tingk bout di gud wiez dem we dem av. Da wie de wi kyan gwaan liv iina piis wid wi wan aneda.​—Ifii. 4:3.

12. Wa a som a di prablem dem we wi breda an sista dem afi a diil wid?

¹² Wi bil op wi breda an sista dem wen wi elp dem fi chos iina Jeuova muor. Som a wi breda an sista dem av piipl we a chobl dem an mek tingz aad fi dem kaa dem a worship Jeuova, laik som a dem fambili we naa sorv Jeuova ar piipl we dem go a skuul wid ar piipl we dem a wok wid. Som a wi ada breda an sista dem mait-a sik bad ar dem mait-a fain it aad fi paadn piipl we ort dem. An yu av ada breda an sista we baptaiz lang lang taim an dem fiil se di worl wuda don aredi. Aal a dem sitn ya kyan mek it aad fi dem chos iina Jeuova. Di breda an sista dem iina Paal taim yuuz tu av dem siem prablem ya tu. So wa Paal did du fi elp im breda an sista dem chos iina Jeuova muo?

13. Wa Paal did du fi elp di breda an sista dem fi nuo ou fi ansa di piipl dem we did a chobl dem kaaz a wa dem biliiv iina?

¹³ Paal yuuz Gad Wod fi elp di breda an sista dem chos iina Jeuova muo. Laik wan taim di Juu Kristiyan dem mait-a neva nuo wa fi se tu dem fambili uu did biliiv se di wie ou di Juu piipl dem worship beta dan di wie ou di Kristiyan dem worship. Wi na’afi aks ef wen Paal don rait di leta tu di Iibruu Kristiyan dem it did elp dem fi chos iina Jeuova muo. (Iib. 1:5, 6; 2:2, 3; 9:24, 25) An wen dem si ou Paal riizn pan tingz, dat wuda elp dem fi nuo we dem kyan se tu di piipl dem we a chobl dem an a mek tingz aad fi dem. A siem so iina fi wi taim wi kyan elp di breda an sista dem we piipl a chobl an a mek tingz aad fi dem chuu dem a worship Jeuova, fi yuuz op di buk an pamplet dem we bies pan di Baibl fi riizn wid dem bout we dem biliiv  iina. Ef wi av wi pikni dem we a go a skuul an piipl an chobl dem kaa dem biliiv se a Gad mek evriting, den wi kyan yuuz di pamplet we niem Was Life Created? ar di wan we niem The Origin of Life—Five Question Worth Asking, fi elp dem fi si ou dem kyan ansa dem.

14. Iivn duo Paal did a du nof iina di priichin wok, wa els im mek shuor se im du?

¹⁴ Paal elp di breda an sista dem fi shuo lov an “fi du di gud sitn dem.” (Iibru. 10:24) Paal no onggl se tingz fi elp di breda an sista dem bot im du tingz fi elp dem tu. Laik wen fuud did shaat iina Judiya Paal did elp di breda an sista dem fi get fuud. (Aks 11:27-30) Aal wen Paal did a du nof iina di priichin wok im did stil a chrai elp di wan dem we puor. (Gya. 2:10) So wen im elp dem out, im mek dem si se Jeuova a-go de de fi dem. Wen orikien an dem ting de gwaan an wi elp out di breda an sista dem, dat wi elp dem fi chos iina Gad muor. A siem so wen wi gi moni an ada tingz fi di worl waid wok wi a elp di breda an sista dem fi nuo se Jeuova a-go de de fi dem, im naa go lef dem.

15-16. Ou wi fi chriit di breda an sista dem we naa chos iina Gad so moch agen?

¹⁵ Paal neva rait aaf di wan dem we neehn did a chos iina Gad so moch agen. Paal shuo se im fiil it fi dem breda an sista ya an im waahn fi elp dem an im taak tu dem iina wan nais wie. (Iib. 6:9; 10:39) Laik iina di leta we im rait tu di Iibruu breda an sista dem im yuuz di wod “wi” an dat shuo se im nuo se im did niid fi du di sitn dem we im a rait an tel dem fi du tu. (Iib. 2:1, 3) So wi fi fala Paal an elp di wan dem we naa chos iina Gad so moch agen. Wi fi du tingz fi mek dem si se wi kier bout dem, an a so dem a-go si se wi lov dem. An  wen wi taak tu dem iina wan nais wie it wi elp dem fi chos iina Jeuova muor tu.

¹⁶ Paal did mek di breda an sista dem nuo se Jeuova si di gud sitn dem we dem a du. (Iib. 10:32-34) Wen wi a elp di breda an di sista dem we naa chos iina Gad so moch agen, wi kyan du di siem ting tu. Wi kyan aks dem ou dem kom iina di chuut an wi kyan aks dem fi tel wi som a di taim dem wen dem si se Jeuova did de de fi dem. An wi kyan mek dem nuo se Jeuova naa figat aal a wa dem du fi’im fi shuo se dem lov im, an im naa go eva lef dem niida. (Iib. 6:10; 13:5, 6) Wen wi taak bout dem sitn ya wid di wan dem we naa du so moch fi Jeuova agen, it a-go elp fi push dem fi gwaan sorv Jeuova.

17. Wa wi fi a du muo an muo so wi kyan get beta an beta?

¹⁷ Jos laik ou wan man we bil ous aal di wail, di muo im bil ous a di beta im a-go kyan dwi’it. A siem so wi get beta an beta di muo wi bil op wi wan aneda. Wi kyan elp di breda an sista dem fi tan op chrang iina di fiet wen dem a go chuu prablem wen wi tel dem ou Jeuova did elp ada piipl fi go chuu dem prablem dem, wen wi taak bout di gud wiez dem we wi breda an sista dem av, an wen wi du tingz fi kip di piis iina di kanggrigieshan. Pan tap a dat, wi kyan elp wi breda an sista dem fi chos iina Jeuova muo wen wi yuuz Gad Wod fi elp dem, wen wi du tingz fi shuo se wi kier bout dem, an wen wi elp di breda an sista dem we no chos iina Jeuova so moch agen fi chos iina im muo.

18. Wa yu mek op yu main fi du?

¹⁸ Di wan dem we go bil Kindom Aal an Asembli Aal an dem plies de, dem fiil gud wen dem don mek dem. A siem so wi a-go fiil gud wen wi elp fi bil op di breda an sista dem iina di kanggrigieshan. Bot a wan ting duo, wen wi bil op di bildin dem dem a-go mash op agen, bot wen wi bil op wi breda an sista dem iina di kanggrigieshan, we yu du fi bil dem op mait-a elp dem fi eva! So gwaan “taak di sitn dem fi elp unu wan aneda get chrang . . . an gwaan bil op unu wan aneda.”—1 Tes. 5:11.