1. Wa mek Jiizas did beg Jeuova fi gyaad im falara dem?

 DI NAIT bifuo Jiizas ded, im prie tu im faada an aks im fi gyaad im falara dem. (Jan 17:​15, 20) Ye, wi nuo se Jeuova aalwiez a gyaad im piipl dem an a gaid an protek dem tu. Bot Jiizas did nuo se Sietan a-go mek im falara dem go chuu som wikid sitn. So dem wuda niid Jeuova fi elp dem fi tan op chrang gens Sietan.

2. Azkaadn tu Saam 33:18-20, wa mek wi na’afi fried wen wi a go chuu uol iip a prablem?

² A Sietan a ron tingz iina di worl ya nou, so a bie prablem im a kaaz fi di piipl dem we a sorv Jeuova. Somtaim wi go chuu tingz we mek wi fiil laik wi kyaahn go aan no muo an wi fiil laik se it aad fi wi stik tu Jeuova. Bot iina da lesn ya, wi a-go si se wi na’afi fried a notn kaaz Jeuova a gyaad im piipl dem—im si aal a we wi a go chuu, an im redi fi elp wi fi diil wid wi prablem dem. Mek wi luk pan wa apm tuu sumadi we di Baibl tel wi bout, we mek wi si se Jeuova “a gyaad di wan dem we av nof rispek fi’im.”​—Riid Saam 33:18-20.

3. Wa a som a di taim dem wi mait-a fiil laik se wi na’av nobadi?

³ Aalduo a uol iip a wi a sorv Jeuova, somtaim wi mait-a fiil laik se wi na’av nobadi. Laik som a di pikni dem mait-a fiil laik se dem na’av nobadi wen dem wan mait-a afi tan op infront a dem klaas an taak tu dem klaasmiet dem bout we dem biliiv iina, ar wen dem muuv go a wan difrant kanggrigieshan. An som a wi wen wi fiil sad ar wi fiil laik se wi no wot notn wi mait-a fiil laik se wi na’av nobadi. An wi mait-a fried fi taak tu ada piipl bout wi prablem dem  kaaz wi tingk se dem naa go andastan wa wi a go chuu. An som a di taim dem, wi mait-a wanda ef nobadi riili kier bout wi. No mata wa mait-a kaaz wi fi fiil da wie de, it mait-a mek wi fiil laik se wi kyaahn elp wiself an mek wi staat fi wori wori op wiself. Bot Jeuova no waahn wi fi fiil da wie de. Wa mek wi kyan se so?

4. Wa mek Ilaija did se a im a di onggl prafit we lef?

⁴ Mek wi luk pan wa did apm tu Ilaija. A muo dan 40 die im did a ron fram Jezibel kaa shi did swier se shi a-go kil im. (1 Ki. 19:1-9) Im en op go aid iina wan kiev an im baal tu Jeuova an tel Im se im a di onggl prafit we lef. (1 Ki. 19:10) Bot a neehn im a di onggl prafit we did lef, kaa Obidiya did elp siev 100 a di prafit dem fram Jezibel. (1 Ki. 18:7, 13) So, wa mek Ilaija did fiil laik se im na’av nobadi? Yu tingk se a kaa im did fiil se aal di prafit dem did ded aaf? Ar yu tingk se im did fiil da wie de kaa nobadi neehn did kom sorv Jeuova wid im afta im did shuo se Bieyal no av no yuus pan Mount Karmel? Ar yu tingk se im did fiil se nobadi neehn nuo se a kil dem waahn kil im ar im did jos fiil laik se nobadi neehn kier bout wa wuda apm tu im? Di Baibl neehn tel wi egzakli wa mek Ilaija did fiil da wie de. Bot wan ting wi shuor bout a dat Jeuova did nuo wa mek Ilaija did fiil da wie de, an im did nuo wa im did a-go du fi elp im.

5. Ou Jeuova did mek Ilaija nuo se im no de pan im uon?

⁵ A uol iip a tingz Jeuova du fi elp Ilaija.Tuu taim im aks Ilaija wa im a du ya so, kaa im did waahn im fi taak op bout ou im fiil. (1 Ki. 19:9, 13) An wen Ilaija staat tel Jeuova ou im fiil, Jeuova lisn tu im. Den Im du som powaful sitn fi Ilaija si se Im de de wid im. Afta dat im mek Ilaija nuo se im av uol iip a ada piipl we a sorv im tu. (1 Ki. 19:11, 12, 18) So yu no afi aks ef Ilaija fiil beta wen im tel Jeuova ou im riili fiil an si ou Jeuova du tingz fi shuo se im kier bout im. Afta aal a dis, Jeuova gi Ilaija som difrant difrant ting fi du. Im  aks im fi go pik Azayel fi ton king iina Siriya, an Jiiyuu fi ton king iina Izrel, an Ilaisha fi ton wan prafit. (1 Ki. 19:15, 16) Kaa Jeuova gi Ilaija dem wok ya fi du, it elp im fi tingk bout som gud sitn insted-a fi a wori wori op imself. Jeuova aal gi im wan gud gud fren we niem Ilaisha. Wen yu fiil laik se yu na’av nobadi, ou Jeuova kyan elp yu?

6. Wa yu kyan prie bout wen yu fiil laik se yu na’av nobadi? (Saam. 62:8)

⁶ Jeuova waahn yu fi prie tu im. Im si aal a di prablem dem we yu a go chuu an im waahn yu fi nuo se im a lisn tu yu enitaim yu prie tu im. (1 Tes. 5:17) Im lov fi ier wen di piipl dem we a worship im prie tu im. (Pr. 15:8) Wen yu fiil laik se yu na’av nobadi, wa yu kyan prie bout? Jos laik Ilaija, tel Jeuova ou yu fiil bout evriting. (Riid Saam 62:8.) Tel Jeuova evriting we yu a wori wori op yuself bout an ou dem sitn de mek yu fiil, an aks Jeuova fi elp yu fi no fried an wori tuu moch. Laik wen yu de a skuul an yu fried fi taak bout di sitn dem we yu biliiv iina, aks im fi mek yu nuo wa fi se an fi nuo ou fi ansa iina wan nais wie. (Luuk 21:14, 15) Ef yu a fiil laik yu no wot notn, aks Jeuova fi elp yu fi taak tu wan a di breda ar sista dem we chrang iina wa dem biliiv iina bout ou yu a fiil. Yu kyan aks im tu fi elp di sumadi we yu a taak tu fi get ou yu a fiil. Taak tu Jeuova an si ou im ansa yu prieya dem. An tek di elp we ada piipl a gi yu. A dat a-go elp yu fi no fi fiil laik se yu na’av nobadi.

7. Wa yu lorn fram Mauricio?

⁷ Jeuova gi aal a wi som impuotant wok fi du. Yu kyan nuo se Jeuova lov di wok we yu a du fi’im iina di kanggrigieshan an di wok we yu a du fi’im wen yu a priich an tiich di gud nyuuz. (Sa. 110:3) Ou wen unu du dem wok ya fi Jeuova it elp yu no fi fiil laik se yu na’av nobadi? Tingk bout wa did apm tu wan yong breda we niem Mauricio. * Likl afta im baptaiz wan a im gud gud fren ton im bak pan Jeuova. Im se: “Wen mi si ou mi fren tek im taim go we lef Jeuova, it mek mi fiil a wie kaa mi staat fi wanda ef mi kyan go stik tu Jeuova an du wa mi tel im se mi did a-go du wen mi did gi mi laif tu im so mi kyan stie iina im aaganaizieshan. Mi did staat fi fiil laik se mi na’av nobadi an laik se di breda an sista dem wudn andastan ou mi fiil.” Ier wa Mauricio did se did elp im fi tek im main aafa dem sitn de we mek im fiil laik im no wot notn. Im se: “Mi du muor iina di priichin wok an dat elp mi fi tek mi main aafa dem sitn de we mi did a  tingk bout we mek mi fiil laik se mi no wot notn. Ye man, wen mi a priich wid mi breda an sista dem, it mek mi fiil api an mi no fiil laik se mi na’av nobadi.” Iivn ef wi kyaahn go out go priich wid wi breda an sista dem, an a leta wi a rait ar a priich wi a priich tu piipl pan di fuon, dem sitn ya stil a elp wi. Ier wa els Mauricio se did elp im tu, im se: “Wan neda ting we elp mi a dat mi bizi op miself iina di kanggrigieshan an mi wok aad fi mek shuor se mi a du mi miitn paat dem gud. Dis did mek mi fiil laik mi wot nof tu Jeuova an mi breda an sista dem tu.”

8. Ou it kyan mek yu fiil wen yu a go chuu uol iip a prablem?

⁸ Wi nuo se wi wudaana go chuu uol iip a prablem iina dem taim ya. (2 Ti 3:1) Bot wen dem prablem de lik wi, somtaim wi stil a-go fiil laik se wi no nuo wa fi du. Kaa somtaim aal av a sodn no moni naa ron, dakta tel wi se wi sik bad, ar sumadi ded fi wi. Wen dem sitn ya apm, it kyan mek wi fiil schres out an laik se wi kyaahn go aan no muo. Wos ef it komiin laik az wan prablem don wan neda wan staat an somtaim uol iip a prablem kom dong pan yu wan taim. Bot memba se Jeuova de de fi wi an im a wach uova wi, an so langs im a elp wi wi kyan tan op tu eni prablem an no fried.

9. Wa a som a di prablem dem we Juob did afi diil wid?

⁹ Luk pan ou Jeuova did elp wan a im sorvant we niem Juob. Iina no taim Juob did staat fi go chuu uol iip a prablem. Iina jos wan die im ier se dem kil aaf im animal dem we de pan im faam, an dem kil aaf di man dem we did a wok fi’im tu, an wosa dan dat, aal a im pikni dem ded aaf. (Juob 1:13-19) An wail im stil a diil wid dem ting de, wan torbl siknis lik im we mash im op bad. (Juob 2:7) Tingz did get so bad dat im se: “Mi se mi iet mi laif so til, mi no waahn fi liv no langga.”​—Juob 7:16.

10. Ou Jeuova did elp Juob wen im a go chuu im prablem dem? (Luk pan di picha pan di kova.)

¹⁰ Jeuova did a gyaad Juob. An kaa Jeuova lov Juob so moch im elp im fi go chuu im prablem dem. Jeuova taak tu Juob fi mek im memba se nobadi no waiz laik Im an se Im lov Im piipl dem, an Im tel im bout som animal we big an powaful tu. (Juob 38:1, 2; 39:9, 13, 19, 27; 40:15; 41:1, 2) Jeuova aal yuuz wan an im sorvant dem we niem Ilaiyuu fi osh Juob an elp im get chrang iina wa im biliiv iina. An Ilaiyuu mek im nuo se Jeuova a bles im piipl dem we a uol aan an tan op chrang no mata wa. Bot pan tap a dat, Jeuova mek Ilaiyuu shuo Juob iina wan nais wie se im neehn did a tingk di rait wie bout som tingz. Ilaiyuu elp Juob fi tap tingk bout imself an aal wa im a go chuu an mek im memba se a Jeuova im fi a tingk bout kaa a Jeuova mek evriting. (Juob 37:14) An Jeuova aal gi Juob sitn fi du, im tel im fi go prie fi di chrii man dem we did sin gens im. (Juob 42:8-10) Ou Jeuova a elp wi ya nou wen wi a go chuu uol iip a prablem?

11. Ou di Baibl elp fi osh wi wen wi a go chuu uol iip a prablem?

¹¹ Jeuova naa taak tu wi laik ou im taak tu Juob bot im a yuuz di Baibl fi taak tu wi. (Ruo. 15:4) A it im yuuz fi osh wi wen wi a go chuu prablem kaa im mek wi nuo se tingz a-go get beta. Wi a-go luk pan som sitn we di Baibl se we  kyan osh wi wen wi a go chuu wi prablem dem. Jeuova mek wi nuo se notn at aal—nat iivn ef wi a go chuu som wikid sitn—“kyan tek we di lov we kom fram Gad.” (Ruo. 8:38, 39) An im mek wi nuo se im “de nier tu aal a di wan dem we a beg im fi elp dem” wen dem prie tu im. (Sa. 145:18) Jeuova mek wi nuo se ef wi gwaan chos iina im, wi kyan go chuu eni prablem we wi av, an wi stil kyan fiil api iina wiself aal wen wi a sofa. (1 Kor. 10:13; Jmz. 1:2, 12) Gad wod mek wi memba se wen wi tingk bout aal a di prablem dem we wi a go chuu ya nuo dem naa go laas fi eva, an dem a-go komiin laik notn wen wi tingk bout di nais sitn dem we Gad a-go gi wi iina di fyuucha. (2 Kor. 4:16-18) Jeuova mek wi nuo fi shuor se im a-go get rid a Sietan​—di wan we a kaaz wi fi sofa so, an im a-go get rid a di wikid piipl dem we a fala im tu. (Sa. 37:10) Yu nuo som skripcha bai aat we kyan elp yu wen yu a go chuu uol iip a prablem?

12. Wa Jeuova waahn wi fi du so dat im Wod kyan elp wi?

¹² Jeuova waahn wi mek taim fi riid di Baibl an dig iina it fi wiself, an tingk bout wa wi a riid. Wen wi a du wa di Baibl se wi fi du, a da taim de wi a-go chos iina Jeuova muo an muo an a da taim de wi an Jeuova a-go get kluos kluos. An kaa a dat wi a-go kyan fain di chrent fi go chuu wi prablem dem. An di wan we a dipen pan im Wod fi nuo wa fi du, im a-go gi dem im uoli spirit an it a-go mek it iizi fi wi si “se a no wi av di powa bot a im riili av aal a di powa” we a elp wi fi go chuu wi prablem dem.​—2 Kor. 4:7-10.

13. Ou di buk an pamplet dem an di ada sitn dem we “di waiz sorvant” gi wi, elp wi fi go chuu wi prablem dem?

¹³ Jeuova a elp di “waiz sorvant” fi gi wi aal kain-a buk an pamplet, an vidiyo, an sang an dem ting de we a-go elp wi fi chos iina Jeuova muo an muo, an fi elp wi fi nuo wa di tingz dem we a gwaan roun wi afi du wid im Wod. (Mt. 24:45) Wi fi chrai an yuuz op aal a dem sitn ya we dem gi wi. Wan sista fram Merika se shi tangk Jeuova fi aal a di sitn dem we im mek di waiz sorvant gi wi. Dis a wa shi se: “A 40 ier nou mi a sorv Jeuova an a uol iip a taim mi afi tan op fi di sitn dem we mi biliiv iina.” A wol iip a tingz shi go chuu: wan jongkin man bongks dong ar granfaada, ar mada an faada get sik bad an  ded, an a tuu taim nou shi av kyansa. A wa elp ar fi go chuu aal a dem sitn ya? Ier wa shi se: “Jeuova aalwiez de de a tek kier a mi. A di buk an pamplet an ada tingz dem we di waiz sorvant gi wi elp mi fi go chuu. Kaaz a aal a dem sitn ya we mi go chuu mi fiil laik ou Juob did fiil wen im se: ‘Mi raada ded fos dan ton mi bak pan Gad!’”​—Juob 27:5.

14. Ou Jeuova yuuz di breda a sista dem fi elp wi wen wi a go chuu wi prablem dem? (1 Tesaluoniyan 4:9)

¹⁴ Jeuova a tiich im piipl dem fi lov dem wan aneda an fi osh dem wan aneda wen dem a go chuu prablem. (2 Kor. 1:3, 4; riid 1 Tesaluoniyan 4:9.) Jos laik ou Ilaiyuu did redi fi elp Juob, a so wi breda an sista dem redi fi elp dem wan aneda fi tan op chrang wen dem a go chuu dem prablem dem. (Aks 14:22) A so di breda an sista dem did elp Diane fi tan op chrang wen ar ozban did sik bad. Shi se: “It did rof yu si! Bot wen wi did a go chuu dem taim de wi did fiil laik se Jeuova de de wid wi a og wi op. Di breda an sista dem did de de fi wi. Dem kom luk fi wi, dem kaal wi pan di fuon, dem og wi op, an dem gi wi evriting we wi did niid fi go chuu. An chuu mi no jraiv, wen mi fi go miitn an fiil sorvis di breda dem kom pik mi op an kyari mi.” A wan blesn fi bi paat Jeuova fambili.

15. Wa mek wi nuo se wi kyan go chuu eni kain-a prablem?

¹⁵ Aal a wi a-go go chuu aal kain-a prablem. Bot laik wa wi lorn aredi, wi naa go go chuu dem pan wi uon. Jos laik wan faada we lov im pikni dem, Jeuova a-go aalwiez de de fi lisn tu wi an im redi fi wach uova wi an elp wi. (Aiz. 43:2) So wi nuo se wi kyan go chuu eni kain-a prablem kaaz Jeuova gi wi evriting we wi niid fi go chuu dem. Im mek wi kyan prie tu im, im gi wi di Baibl, an im gi wi uol iip a buk an pamplet an ada tingz we kyan elp wi jraa kluos tu im, an im gi wi di breda an sista dem tu fi elp wi wen wi niid elp.

16. Wa wi kyan du so dat Jeuova gwaan tek kier a wi?

¹⁶ Wi fi glad se wi av wan faada op a evn we a wach uova wi! It mek“ wi fiil gud iina wi aat.” (Sa. 33:21) Wi shuo Jeuova se wi tangk im fi tek kier a wi wen wi tek di elp we im gi wi. An wi fi du aal a wa wi fi du so dat Jeuova gwaan tek kier a wi. Ar wi kyan put it da wie ya, ef wi gwaan du wi bes fi du wa Jeuova waahn wi fi du, den im a-go wach uova wi fi eva!​—1 Pii. 3:12.