1. Wa Patifa waif did waahn Juozif fi du bot wa im du?

 PATIFA waif did mek tingz aad fi Jiekob bwai pikni we niem Juozif. Shi did se tu im se “kom sliip wid mi!”, an shi a im baas waif ino. Bot Juozif did shuo ar se im no de pan dat at aal at aal. Sumadi iina fi wi taim mait-a se, ‘Wa mek Juozif neehn did jos sliip wid ar an don?’ kaa Patifa neehn di de. An im a did dem sliev, so shi kuda did mek tingz aad fi im kaa im no sliip wid ar. Bot no mata wa shi chrai, Juozif stil mek shi nuo se im neva de pan dat an im naa go dwi’it. Ier wa mek Juozif se im wudn du it, im se: “Ou mi fi du soch a wikid sitn an sin gens Gad?”​—Jen. 39:7-12.

2. Ou kom Juozif di nuo se a wan wikid sitn fi sliip wid sumadi we im no marid tu?

² Ou Juozif did nuo se ef im sliip wid sumadi els waif it wuda bi wan “wikid sitn” iina Gad yai? Kaa memba se ino, di Laa we Gad did mek Muoziz rait dong we se: “Yu no fi sliip wid nobadi we yu no marid tu,” a bout tuu onjrid ier afta Juozif did go chuu dis Jeuova did mek Muoziz rait da Laa de. (Ek. 20:14) So Juozif shuo se im did nuo ou Jeuova luk pan tingz wen it kom aan tu dem sitn ya, kaaz im did don nuo se Jeuova mek wan man an wan uman fi marid. An im did nuo se a tuu taim Jeuova did afi du sitn fi’im griet granmada niem Siera so das wan neda man neehn did go sliip wid ar. An a siem wie im did du sitn fi elp Ribeka, dat a Aizak waif, so dat no ada man neehn sliip wid ar niida. (Jen. 2:24; 12:14-20; 20:2-7; 26:6-11) So Juozif tingk bout dem sitn ya an get fi si di ting dem we Jeuova wuda waahn im fi du an wa Jeuova no waahn im fi du. Kaaz Juozif lov Jeuova, an im lov di sitn dem we rait iina Gad yai,  im did mek op im main fi du wa Jeuova waahn im fi du.

3. Wa wi a-go luk pan iina da lesn ya?

³ Wi shuor nuo se yu lov di sitn dem we rait iina Gad yai tu. Bot kaa wi no porfek ef wi no wach wiself it iizi fi wi staat fi tingk bout tingz di wie ou di worliyan dem tingk bout tingz an fiil se it rait. (Aiz. 5:20; Ruo. 12:2) So iina da lesn ya wi a-go luk pan wa it miin fi du di sitn dem we rait iina Gad yai an ou it mek wi betaraaf wen wi lov di sitn dem we Gad se rait. Den wi a-go luk pan chrii sitn we wi kyan du we a-go mek wi lov fi du di sitn dem we rait muor.

4. Wa som piipl tingk it miin fi aalwiez a du wa rait iina Gad yai?

⁴ Wen piipl tingk bout sumadi we aalwiez a du wa rait iina Gad yai dem mait-a tingk bout sumadi we aalwiez tingk se dem beta dan ada piipl an luk don pan dem, an gwaan laik dem a du wa rait muo dan nobadi els. Bot Gad no av notn fi du wid piipl we tan so. Wen Jiizas did de pan ort, im neehn fried fi mek piipl nuo se im neehn laik ou di choch liida dem did a gwaan laik se a dem a disaid wa rait iina Gad yai. (Iik. 7:16; Luuk 16:15) Bot di sumadi we riili a du wa rait iina Gad yai no tan notn laka dat.

5. Azkaadn tu di Baibl, tel wi wa it miin fi du wa rait iina Gad yai.

⁵ Wen sumadi a du wa rait iina Gad yai a wan nais sitn dem a du. So wen di Baibl se wi fi du tingz we rait iina Gad yai it miin tu se wi a-go liv di wie ou Gad waahn wi fi liv. Laik wen Jeuova did tel im piipl dem se wen dem a wie out sitn fi sel sumadi dem fi anis an mek shuor se dem naa bak skiel an dem sitn de. (Dyuu. 25:15) Di Iibruu wod we miin “anis” kyan miin fi “du wa rait.” So wan Kristiyan we waahn fi du wa rait iina Gad yai a-go mek shuor se dem anis wen dem an piipl a du bizniz. Wan man we lov du wa rait afi fier tu, an im naa go laik wen sumadi naa chriit sumadi fier niida. An fi “mek [Jeuova] api,” sumadi we a du wa rait iina Jeuova yai afi tingk bout di tingz dem we dem a-go du bifuo dem dwi’it, kaa dem a tingk bout ou Jeuova fiil bout it.​—Kol. 1:10.

6. Wa mek wi shuor se wa Jeuova se rait an wa im se rang a di bes wie fi luk pan tingz? (Aizaiya 55:8, 9)

⁶ Di Baibl mek wi nuo se a Jeuova aluon kyan mek wi nuo di rait wie fi liv wi laif. (Jer. 50:7) Kaaz a Jeuova mek wi, im a di onggl wan we av di rait fi tel wi wa rait an wa rang. An kaa wi no porfek wi naa go aalwiez andastan wa mek Jeuova se sitn rait an wa mek im se sitn els rang. Bot Jeuova porfek, so im aalwiez nuo wa a di bes ting fi wi du. (Pr. 14:12; riid Aizaiya 55:8, 9.) Di gud ting a dat Gad mek wi wid fi’im wiez dem, so wi nuo se wi kyan liv ou im waahn wi fi liv. (Jen. 1:27) An a dat wi waahn fi du. Kaa di wie ou wi lov Jeuova so moch it push wi fi liv di wie ou im waahn wi fi liv.—Ifii. 5:1.

7. Tel wi wa mek it mek sens se wi av wan set a ruul fi wok wid?

⁷ Wen wi du di sitn dem we Jeuova se rait an no du di sitn dem we im se rang, it elp wi. An yu kyan si ou dat mek sens, no chuu? Kaa tingk bout dis: Ef evri bangk iina wan konchri disaid fi demself umoch wan moni wot, an ef evribadi we bil ous an dem ting de av dem uon wie fi meja tingz den a bie prablem dat wuda kaaz. An ef di dakta an nors dem neehn a fala di siem ruul dem fi tek kier a piipl den uol iip a piipl wuda ded aaf. So wi si se wen wi av sortn an sortn ruul fi wok wid, it elp wi. A  siem so Jeuova av fi’im wie ou im waahn wi fi du tingz, an wen wi du tingz fi’im wie, it elp wi.

8. Wa kain-a blesn di wan dem we lov fi du wa rait a-go get?

⁸ Jeuova bles di wan dem we a chrai fi du tingz di wie ou im waahn dem fi dwi’it. Di Baibl mek wi nuo se: “Di piipl dem we du wa Gad se rait, a dem a-go de pan di ort, an liv pan it fi eva.” (Sa. 37:29) Yu kyan imajin ou evribadi a-go api an a wok tugeda wen aal a dem a du wa Jeuova waahn dem fi du? A da kain-a laif de Jeuova waahn yu fi enjai ino! Ye man, aal a wi kyan si wa mek wi fi lov fi du di sitn dem we Jeuova se rait. Wa wi kyan du fi mek shuor se wi lov fi du wa rait? Wi a-go luk pan chrii tingz we wi kyan du.

9. Wa a-go elp wi fi lov di sitn dem we Jeuova se rait?

⁹ Fos wan: Lov di Sumadi we mek yu nuo wa rait fram wa rang. Fi wi fi lov di sitn dem we Gad se rait, wi afi du tingz we a-go mek wi lov Jeuova muo an muo kaaz a im a di wan we tel wi wa rait fram wa rang. Kaa wen wi lov Jeuova it a-go mek wi waahn fi du wa rait iina fi’im yai. Tingk bout dis: Ef Adam an Iiv did lov Jeuova, dem wuda lisn tu im an du wa im se.​—Jen. 3:1-6, 16-19.

10. Wa Iebriyam did du so dat im kuda andastan ou Jeuova tingk?

¹⁰ Non a wi wudn waahn fi du wa Adam an Iiv did du. Fi mek shuor se wi no du dat, wi afi gwaan lorn bout Jeuova an get fi lov di wiez dem we im av so dat wi kyan get fi nuo bout di wie ou im fiil bout tingz, an a so wi a-go get fi lov Jeuova muo an muo. Tingk bout ou Iebriyam did lov Jeuova. Iivn wen im kudn si chuu som a di tingz dem we Jeuova se im fi du, Iebriyam neehn ton gens Jeuova! Insted-a dat, im chrai fi get fi andastan Jeuova beta. Laik wen Iebriyam did fos ier se Jeuova a-go don Sadam an Gomaro, im di fried se di wan we joj di piipl dem we de pan di ort wuda kil di piipl dem we a du wa rait wid di wikid piipl dem tu. Wen Iebriyam tingk bout it, im kudn si chuu ou Jeuova kuda eva du sitn laka dat, so im staat fi kwestiyan Jeuova bout it. An Jeuova tek im taim wid im an ansa im. Iina di en, Iebriyam get fi si se Jeuova nuo wa de iina evribadi aat an im wuda neva kil aaf gud piipl wid di wikid wan dem.​—Jen. 18:20-32.

11. Ou Iebriyam did shuo se im lov Jeuova an shuo se im chos im tu?

¹¹ Afta Jeuova an Iebriyam did don taak bout Sadam an Gomaro, it mek Iebriyam luk pan Jeuova difrant kaa it mek im get fi lov an rispek Jeuova muo. Uol iip a ierz afta dat, Iebriyam did go chuu sitn els we tes fi si umoch im chos iina Jeuova fi chuu, an dat a wen Jeuova aks im fi kil im bwai pikni Aizak we im lov so moch an fi gi im op az wan sakrifais. Bai dem taim ya Iebriyam did nuo Jeuova gud gud so im neva aks im no kwestiyan. Im jos go du wa Jeuova did tel im fi du. Bot im mos did fiil it wen im did a lain op tingz fi go dwi’it. Iebriyam mos did tek som taim fi tingk bout wa im did lorn bout Jeuova aredi. An im did don nuo se Jeuova wuda neva du notn we no rait ar sitn we wuda shuo se im no lov piipl. Bies pan wa di apasl Paal did se bout im, wi nuo se Iebriyam di don riizn out se Gad kuda mek Aizak kom bak alaiv. (Iib. 11:17-19) Memba se Jeuova did don pramis se Aizak wuda did av pikni pikni kom dong, an dem taim de Aizak neehn av no pikni yet. Iebriyam did lov Jeuova bad, an a dat mek im did nuo se im Faada  Jeuova wuda aalwiez du wa rait. So iivn duo it did aad Iebriyam chos iina Jeuova an du wa im tel im fi du.​—Jen. 22:1-12.

12. Ou wi kyan du laik Iebriyam? (Saam 73:28)

¹² Wi kyan du laik Iebriyam an gwaan lorn bout Jeuova, an wen wi du dat it mek wi an Jeuova get kluosa an kluosa an wi get fi lov im muor. (Riid Saam 73:28.) Wi chrien wiself fi tingk bout tingz di wie ou Jeuova tingk bout dem. (Iib. 5:14) An kaa a dat, ef sumadi chrai fi mek wi du sitn rang wi naa go dwi’it. An so wi naa go iivn tingk bout fi du notn we wuda ort Jeuova ar mek wi an im no fren agen. Wa a wan neda wie ou wi kyan shuo se wi lov di sitn dem we Jeuova se rait?

13. Wa kyan elp wi fi chrai aad fi du wa rait? (Pravorbz 15:9)

¹³ Sekan wan: Wok aad evridie fi chrai lov di ting dem we Jeuova se rait. Jos laik ou wen wi waahn wi badi fi get chrang wi afi wok aad an eksasaiz evridie, a siem wie so ef wi waahn fi lov di sitn dem we Jeuova se rait, den wi afi wok aad fi du tingz evri die we a-go elp wi fi lov wa im se rait. A no notn aad Jeuova de aks wi fi du, kaa im wuda neva aks wi fi du sitn we im nuo se wi kyaahn du. (Sa. 103:14) Im mek wi nuo se “im lov di sumadi we a chrai aad fi du wa rait.” (Riid Pravorbz 15:9.) Duohn it ef wi waahn fi du sitn els fi Jeuova wi a-go wok aad fi dwi’it? Wel a siem wie so wen wi waahn fi du di rait ting iina Jeuova yai wi chrai an wok aad fi dwi’it tu. An Jeuova wi tek im taim wid wi an likl bai likl im a-go elp wi fi du beta.​—Sa. 84:5, 7.

14. A wa a di sitn dem we rait iina Gad yai we kyan protek wi laik ou wan suoja “aiyan ves” protek im ches, an wa mek wi niid it?

¹⁴ Jeuova mek wi nuo se di sitn dem we im se rait no aad fi wi du. (1 Jan 5:3) So di sitn dem we Jeuova tel wi fi du a fi wi uona gud, an wi kyaahn du widout dem. Memba di aami kluoz dem we di apasl Paal did taak bout. (Ifii. 6:14-18) A wa di suoja did yuuz fi protek im ches? A wan “aiyan ves” di suoja did yuuz fi protek im ches, an da aiyan ves de a di sitn dem we rait iina Gad yai we elp fi protek wi aat. Jos laik ou di aiyan ves did protek di suoja aat, a siem so  di sitn dem we rait iina Jeuova yai elp fi protek fi wi aat, so dat wi kyan du di sitn dem we im waahn wi fi du. Dat miin se wi afi mek shuor se wen wi put aan fi wi aami kluoz dem wi eva a wier di aiyan ves we protek wi aat!​—Pr. 4:23.

15. Ou yu kyan put aan di aiyan ves we komiin laik di sitn dem we rait iina Gad yai?

¹⁵ Ou yu kyan put an di aiyan ves we komiin laik di sitn dem we rait iina Gad yai? Wen yu tek di taim fi tingk bout di sitn dem we Gad se rait bifuo yu du tingz a so yu put it aan. Wen yu a tingk bout di sitn dem we yu a-go taak bout, wa kain-a myuuzik yu a-go lisn tu, wa kain-a shuo an dem ting de yu a-go wach, ar wa kain-a buk yu a-go riid, aks yuself dem kwestiyan ya: ‘A wa mi riili a tek iina mi aat? Mi riili tingk se Jeuova wuda laik da sitn ya? It a big op tingz laik seks sin, piipl we jos a tingk bout demself ar we waahnti-waahnti, ar it a push waar an bie badnis an dem tingz de we Jeuova se no rait?’ (Fil. 4:8) Ef di sitn dem we yu du a tingz we mek Jeuova api, den yu wudaana yuuz di sitn dem we im se rait fi protek yu aat fram di bad sitn dem.

16-17. Ou wa iina Aizaiya 48:18 elp wi fi si se wi kyan du di sitn dem we Jeuova waahn wi fi du fi eva?

¹⁶ Yu eva a wanda ef evri die yu a-go aalwiez kyan du wa Jeuova waahn yu fi du? Wi kyan tingk bout sitn we Jeuova se iina Aizaiya 48:18. (Riid.) Jeuova did pramis se wen wi du wa rait it a-go komiin “laik di wiev dem we de iina di sii.” Jos tingk bout dis: Se yu tan op pan di sii said an a luk out an yu si di wiev dem jos a kom iin an a kom iin so. Yu eva tingk se di taim a-go kom wen dem wiev de naa go kom iin, dem a-go tap? Nuo sa! Kaaz yu nuo se a uol iip a ierz nou wiev a du dat, an it naa go tap.

¹⁷ Wen yu a du wa Jeuova se rait it komiin laik di wiev we a kom iin pan di sii said. Kaa wen yu afi mek op yu main fi du sitn, di fos ting yu fi du a tingk bout wa Jeuova waahn yu fi du an den mek shuor se a dat yu du. Yu si jos laik ou di wiev dem a-go kom pan di sii said an no tap, a siem wie so wi kyan du wa Gad se rait an no tap. Yu nuo wa mek wi nuo dat? Wi nuo dat kaa Jeuova a-go de de fi elp wi fi aalwiez du di rait ting, no mata ou aad it bi fi wi mek op wi main. So wi fi tingk bout wa Jeuova waahn wi fi du an den dwi’it. Iina da wie de nou, wi a-go aalwiez du wa Jeuova se rait an tap du wa im se rang.​—Aiz. 40:29-31.

18. Wa mek wi no fi joj piipl an gwaan laik se wi a du rait muo dan nobadi els?

¹⁸ Tord wan: Mek Jeuova bi di wan fi joj piipl. Aalduo wi chrai aad fi du evriting we Jeuova waahn wi fi du, wi no fi tingk se wi beta dan ada piipl an nuo muo dan dem, an gwaan laik se wi a du wa rait muo dan nobadi els niida. Kaa wa wi fi memba a dat Jeuova a di wan we a joj di piipl dem we de pan di ort. ( Jen. 18:25) Jeuova no aks wi fi joj nobadi fi im. Matarafak, Jiizas tel wi plien plien se: “No joj piipl laik se Gad kyaahn paadn dem, so di siem sitn wi no riich unu.”​—Mat. 7:1. *

19. Ou Juozif did shuo se im nuo se a Jeuova av di rait fi joj piipl?

¹⁹ Tingk bout Juozif, we im breda dem did chriit bad an sel im ton sliev an den tel dem faada se im ded. Wen di taim did kom  wen im kuda chriit dem bad an joj dem im neehn du dat. Uol iip a ier afta dat im an im breda dem bok op agen bot bai da taim ya im did a wan big ruula iina Iijip. Im kuda did rof op im breda dem an chriit dem bad an chrai fi du dem bak sitn kaaz a wa dem di du tu im. An ges wa, Juozif breda dem did tingk se Juozif wuda dwi’it tu iivn duo dem did sari fi wa dem did du tu im. Bot dis a wa Juozif tel dem se fi mek dem nuo se dem na’afi wori demself. Im se: “No bada fried man. Unu riili tingk se a joj mi de ya fi joj unu laik se mi a Gad?” (Je. 37:18-20, 27, 28, 31-35; 50:15-21) So Juozif did lou Jeuova fi joj dem kaa Juozif did nuo se a Jeuova av di rait fi joj dem.

20-21. Ou wi kyan mek shuor se wi naa gwaan laik wi a du wa rait muo dan nobadi els?

²⁰ So jos laik Juozif, wi no joj nobadi, wi mek Jeuova joj dem. So wi no tingk se wi nuo wa mek wi breda an sista dem du sortn tingz ar wa mek dem gwaan sortn wie. Kaa wi kyaahn nuo wa gwaan iina dem aat, onggl Jeuova kyan nuo wa mek dem du sortn tingz. (Pr. 16:2) Jeuova lov aal kain-a piipl, it no mata wich paat dem kom fram ar ou dem du tingz. An Jeuova waahn wi fi “lov . . . wid evriting we de iina wi aat.” (2 Kor. 6:13) So wi chrai fi lov aal a di breda an sista dem, wi no chrai fi joj dem.

²¹ Dis miin se wi no fi a joj di piipl dem we a no Jeuova Witnis tu. (1 Ti. 2:3, 4) Wen it kom aan tu wan a yu fambili we a no wan Jeuova Witnis, yu wuda luk pan dem an se, “Uu im? Dat de man de wuda neva tek di chuut!” Nuo sa, yu wudn du dat, kaa dat wuda miin se wi wuda a paas wi plies an a gwaan laik se wi a du wa rait muo dan nobadi els. Jeuova Gad stil a gi “evribadi evriwe di chaans fi ton we fram dem sin” dem an staat fi sorv im. (Aks 17:30) An memba se di sumadi we tingk se dem aalwiez a du wa rait muo dan nobadi els dem naa du wa rait iina Gad yai.

22. Wa mek yu a-go chrai aad fi lov di tingz dem we Jeuova se rait?

²² Wen wi lov di sitn dem we Jeuova se rait, it a-go mek wi api an it a-go mek ada piipl kyan fala di gud sitn dem we dem si wi a du. An it a-go mek dem lov wi an Jeuova muo. Wi fi aalwiez mek shuor se wi “waahn du wa rait iina Gad yai so bad, dat it komiin laik se a ded [wi] a ded fi onggri an [wi] chuot jrai laik se [wi] no jringk waata ou lang.” (Mat. 5:⁠6) An memba se Jeuova a si evriting we yu a du wen yu a wok aad fi du wa im waahn yu fi du. Di muo yu si piipl iina da worl ya a du di tingz dem we Jeuova se rang jos memba se Jeuova lov di wan dem we a du wa rait.​—Sa. 146:8.