1. Wa gud it du wen wi taak bout wa mek wi kom iina “di chuut”?

 A NOF taim piipl mait-a aks yu: “A wa mek yu ton wan Jeuova Witnis?” Matarafak, a mait-a di fos ting wan breda ar wan sista we waahn fi nuo bout yu mait-a aks yu. Wi lov fi ier wa mek wi breda an sista dem ton wan Jeuova Witnis, an wi lov fi tel dem wa mek wi ton wan Jeuova Witnis tu. (Ruo. 1:11) An wen wi taak tu wi wan aneda bout dem sitn ya, it mek wi memba ou nais di chuut bi. Bot a no onggl dat, it mek wi fiil laik wi waahn fi gwaan “liv​—azkaadn tu di chuut”. Dat miin se wi a liv fi du di ting dem we Jeuova waahn wi fi du.​—3 Jan 4.

2. Wa wi a-go luk pan iina da lesn ya?

² Iina da lesn ya, wi a-go luk pan som a di riizn dem wa mek wi lov di chuut. Den wi a-go taak bout wa mek wi fi gwaan shuo se wi lov di chuut we wi get. Da lesn ya a-go mek wi lov an tangk Jeuova muo fi jraa wi iina di chuut. (Jan 6:44) An it a-go mek wi wel waahn fi tiich ada piipl bout di chuut tu.

3. Wa a di bigis riizn wa mek wi lov di chuut so moch?

³ Wi av nof riizn wa mek wi lov di chuut. An di bigis riizn wa mek wi lov it so moch a kaa it kom fram Jeuova Gad, we wi lov so moch. Di Baibl mek wi si se Jeuova no onggl big an powaful kaa im mek di evn an di ort, bot it mek wi si se im komiin laik wan Faada we lov wi an we  kier bout wi. (1 Pii. 5:7) Wi nuo se wi Gad “gud an kain. Im no kwik fi get beks an im a-go lov yu an stik tu yu fi eva, an im aalwiez du wa im se im a-go du.” (Eks. 34:6) Jeuova lov wen wi get jostis (Aiz. 61:8) It bon im wen im si wi a sofa, an im wel waahn get rid a di sofarieshan we wi a go chuu wen a fi im taim fi get rid a it. (Jer. 29:11) No wanda wi lov Jeuova so moch!

4-5. Wa mek di apasl Paal se di sitn dem we wi a luk faawod tu komiin laik wan angka?

⁴ Wan neda riizn wa mek wi lov di chuut so moch, a kaa wen wi nuo di chuut it du nof fi wi. Tingk bout dis, di ting dem we wi a luk faawod tu a paat a di chuut iina di Baibl. Wi si ou dat elp wi wen wi tingk bout wa di apasl Paal se bout wa wi a luk faawod tu. Im se: “Wen wi chos Gad, an wi nuo fi shuor se im a-go gi wi wa im pramis wi, dat mek wi suol chrangga, an notn we a gwaan kyaahn kom shiek wi op. Wi tan todi jos laik wen di angka fi di ship jrap a di batam a di sii so di ship tan wan plies.” (Iib. 6:19) Jos laik ou di angka mek di ship tan todi an no muuv, a siem so di ting dem we wi luk faawod tu elp wi fi kip kaam an tan todi wen wi a go chuu wi prablem dem.

⁵ Aalduo a di wan dem we get pik fi go a evn Paal did a taak bout ya so, it stil av nof fi du wid di Kristiyan dem we a-go liv fi eva iina paradais pan ort. (Jan 3:16) Ye man! Chuu wi nuo se wi a-go kyan liv fi eva, it gi wi sitn gud fi liv fa ya nou.

6-7. Wen Yvonne lorn di chuut bout wa a-go apm iina di fyuucha, ou it did elp ar?

⁶ Tingk bout wa did apm tu wan sista we niem Yvonne. Shi neva gruo op az wan Jeuova Witnis, an wen shi did a pikni shi did fried fi ded. Shi memba sitn we shi did riid we se: “Wan die wi naa go av wan neda die agen, kaa aal a wi a-go ded aaf.” An shi se: “Dem sitn de we mi riid did mek mi kyaahn sliip a nait taim, kaa mi di de a fret bout wa a-go apm iina di fyuucha. Mi tingk tu miself se ‘a kyaahn dis wi a liv fa.’ Mi neehn waahn fi ded!”

⁷ Likl afta dat wen shi did a tiinieja, Yvonne taak tu som Jeuova Witnis, an shi se: “Mi get fi si se, ye, mi kyan go liv fi eva pan ort iina paradais.” Ou di chuut we Yvonne lorn bout det an wa a-go apm iina di fyuucha did elp ar? Shi se: “Mi no op a nait taim agen a fret bout ef mi a-go ded ar wa a-go apm iina di fyuucha.” So it no aad fi yu si se afta Yvonne lorn di chuut, it did miin wol iip tu ar an it mek ar fiil gud fi tel ada piipl bout di sitn dem we shi lorn bout wa a-go apm iina di fyuucha.​—1 Tim. 4:16.

8-9. (a) Azkaadn tu Matyu 13:44, di chrezha we di man did fain, umoch it did wot tu im? (b) Umoch di chuut wot tu yu?

⁸ Wan neda ting we av fi du wid di chuut we de iina di Baibl a di gud nyuuz bout Gad Kindom. Jiizas se di gud nyuuz bout Gad Kindom komiin laik wan chrezha we dem aid. Iina Matyu 13:44, Jiizas se: “Gad kindom komiin laik wan chrezha we did aid we iina wan fiil. Sumadi fain it an aid it agen. Dem so glad, dem sel evriting we dem av an go bai di fiil.” Yu si se di man neehn a luk fi di chrezha, bot wen im fain it a wol iip im did gi op so im kuda get it. Matarafak im sel evriting we im av so im kuda get it, an im du it kaa im nuo se di chrezha wot nof. Im nuo se it wot muor dan aal a we im did afi gi op.

 ⁹ A so yu fiil bout di chuut tu? Wi nuo se a so yu fiil! Wi nuo se notn no iina dis ya worl ya we a-go mek wi api dan ef wi a sorv Jeuova an fi nuo se wi kyan go liv fi eva wen Gad Kindom a ruul. Notn no wot muor dan fi wi an Jeuova ton gud fren an notn no swiita dan wen wi “eva du di sitn dem we wi mek im api.”​—Kol. 1:10.

10-11. A wa did kaaz Maikal fi chienj op tingz iina im laif?

¹⁰ Fi mek Jeuova api wid wa wi a du, wol iip a wi gi op nof tingz. Som a wi gi op wi big jab dem an som a wi tap chrai fi get wol iip a moni an tingz. An som a wi, afta wi lorn di chuut bout Jeuova, wi chienj op wi laif. An a dis Maikal did du. Maikal neva gruo op az wan Jeuova Witnis. An fram im a pikni im did lorn ou fi du karaachi. Im se: “Mi laik wen mi badi chrang, a dem taim de wen mi fiil chrang mi fiil laik mi kyan du eniting.” Bot afta Maikal staat fi stodi di Baibl im get fi si ou Jeuova fiil bout faitin an dem ting de. (Sa. 11:5) Ier wa Maikal se bout di Jeuova Witnis ozban an waif we yuus tu stodi wid im. Im se: “Dem neva tel mi se mi fi tap du karaachi ino, dem jos gwaan tiich mi di chuut we de iina di Baibl.”

¹¹ Di muor Maikal lorn bout Jeuova a di muor im lov im. Im did riili lov se Jeuova fiil it fi di wan dem we a worship im, an im kier bout dem. Maikal did si se im afi chienj op sortn tingz we im a du iina im laif. An im se: “Mi nuo se fi tap du karaachi wuda bi wan a di aadis sitn mi eva afi du. Bot mi nuo tu se a dat wuda mek Jeuova api, an mi shuor se fi sorv Jeuova wot muor dan eniting els we mi kuda gi op fi sorv im.” So kaa di chuut wot nof tu Maikal, it push im fi chienj op im laif.​—Jmz. 1:25.

12-13. Ou di chuut we Mayli did lorn fram di Baibl did elp ar?

¹² Di Baibl mek wi si umoch chuut wot wen it tel wi se it komiin laik wan lamp we a shain iina di daaknis. (Sa. 119:105; Ifii. 5:8) Wan uman we kom fram Azabaijan we niem Mayli did api kaa shi get fi nuo di chuut we iina Gad Wod. Ar mada an faada did a go a tuu difrant choch. So ar faada did a moslim an ar mada go a di Juu piipl dem choch. Shi se: “A no se mi neva fiil se Gad no de ino, bot mi jos kudn andastan sortn tingz. Laik mi did a wanda, ‘Wa mek Gad mek piipl, an ef it mek no sens fi sumadi jos a sofa so di wol a dem laif an den ton roun go bon op iina el fi eva?’ An som piipl se evriting we apm a Gad waahn it fi apm so. So it mek mi a wanda, ‘Gad di de dis a wach wi an kanchuol wi laik wan popet pan wan chring an api fi si wen wi a sofa?’”

¹³ Mayli neva tap chrai fi get di ansa dem tu ar kwestiyan dem. An so shi staat fi stodi di Baibl wid di Jeuova Witnis dem an shi lorn di chuut an ton wan Jeuova Witnis tu. Shi se: “Di sitn dem we mi lorn iina di Baibl mek sens an a dat mek mi staat fi luk pan laif difrant. An di sitn dem we mi lorn iina di Baibl mek mi api ya nou.” Jos laik Mayli, aal a wi a big op Jeuova ‘kaaz a im sed wan tek wi outa daaknis an kom put wi iina im brait brait lait.’​—1 Pii. 2:9.

14. Wa wi kyan du fi lov di chuut muor? (Luk pan di paat we niem “ Som Ada Tingz We Di Chuut Komiin Laik.”)

¹⁴ Dem sitn ya we wi jos go chuu mek wi si se di chuut wot nof. An wi shuor se  yu kyan tingk bout wol iip a ada riizn wa mek yu kyan se dat. It wuda nais ef iina yu uona Baibl stodi yu kyan luk fi som muor riizn wa mek wi fi lov di chuut. An di muor yu lov di chuut a di muor yu a-go chrai an du tingz fi shuo se yu lov it.

15. Wa a wan sitn wi kyan du fi shuo se wi lov di chuut?

¹⁵ Wen wi stodi di Baibl an di buk an pamplet dem an dem sitn de aafn, wi a du tingz fi shuo se wi lov di chuut. Kaa no mata ou lang wi iina di chuut fa, wi aalwiez a-go a lorn muor. Di fos Wachtowa we wi av did se: ‘Da worl ya ful op a wol iip a lai we mek it aad fi wi nuo di chuut. So ef yu waahn fi fain di chuut yu fi aalwiez a wach an a luk out fi it an yu afi wok aad fi get it. Yu no fi sekl wid di likl we yu nuo, bot yu fi aalwiez chrai fi lorn muor bout di chuut we de iina di Baibl.’ It no iizi fi stodi di Baibl bot wen yu dwi’it, it a-go wot it.

16. Wa a di bes wie yu fain se wok fi yu wen yu a riid an stodi di Baibl? (Pravorbz 2:4-6)

¹⁶ Som a wi no laik fi riid an stodi  notn, bot Jeuova waahn wi fi “gwaan sorch” an “gwaan dig op” fi andastan di chuut muor. (Riid Pravorbz 2:4-6.) Wen wi wok aad fi fain di chuut, tingz a-go wok out gud fi wi. Corey tel wi bout ou im du im uona Baibl riidin. Im se wen im a riid di Baibl, im riid wan vors an den im riid op som aada tingz fi get wa it a se. Ier wa im se im du, im se: “Mi riid evri said paint an mi riid evri skripcha we av fi du wid di wan we mi a riid, an mi riid op som ada tingz we av fi du wid it tu. . . . Wen mi du aal a dem sitn ya mi lorn nof nof tingz!” Wen wi a riid wi Baibl it no mata ef wi du laik wa Corey du ar wi du sitn els, bot wi fi mek shuor se wi a wok aad fi riid an stodi di Baibl. An a so wi a-go shuo se wi lov di chuut.​—Sa. 1:1-3.

17. Wa wi kyan du fi mek shuor se wi a liv azkaadn tu di chuut? (Jiemz 1:25)

¹⁷ Wi no jos waahn fi riid bout di chuut an stodi it, wi fi mek shuor se wi a du wa it se wi fi du an wi a liv di wie ou it se wi fi liv. An a dat a-go mek wi api. (Riid Jiemz 1:25) Wa wi kyan du fi mek shuor se wi a liv azkaadn tu di chuut? Wan breda se wan ting we wi kyan du a fi luk iina wiself fi si wa wi a du gud, an si wa wi kyan du beta. Di apasl Paal put it da wie ya. Im se: “Mek wi gwaan uol aan pan wa Gad mek wi nuo aredi.”​—Fil. 3:16.

18. Wa mek wi a wok aad fi “liv—azkaadn tu di chuut”?

¹⁸ Tingk bout aal a di wie dem ou it a elp wi wen wi chrai aad fi “liv—azkaadn tu di chuut”! Kaaz a di chuut wi no onggl a liv wan beta laif ya nou, bot wi a mek Jeuova api an wi a mek wi ada breda an sista dem api tu. (Prav. 27:11; 3 Jan 4) Dem ya a di bigis riizn wa mek wi fi lov di chuut an liv ou di chuut se wi fi liv!