1. Wa a som gud sitn we nof a di yong piipl dem du aredi?

 EVRI ier, wol iip a yong piipl get baptaiz. Ef yu a wan a dem, wi waahn yu nuo se di wol a yu breda an sista dem api fi yu, an Jeuova api fi yu tu! (Prav. 27:11) Jos tingk bout wa an wa yu du aredi. Iivn ef a wan lang taim it did tek yu, yu mek shuor se yu tek taim fi stodi di Baibl. An kaa yu du dis, yu get fi si se di Baibl a Gad Wod fi chuu. So yu get fi lov Jeuova muor an muor an yu gi yu laif tu im an get baptaiz. A wan nais sitn dat yu du!

2. Wa wi a-go luk pan iina da lesn ya?

 ² Yu mait-a did go chuu som wol iip a sitn fi si ef yu riil chos iina Gad bifuo yu get baptaiz. Di biga yu get, Sietan a-go chrai aad aad fi mek yu no lov Jeuova so moch agen so til yu tap sorv im. (Ifii. 4:14) Bot yu no fi mek dat apm tu yu. Wa kyan elp yu fi stik tu Jeuova an du wa yu pramis im se yu a-go du? Yu fi gwaan du tingz so yu kyan “gruo paas dem sitn de,” so yu kyan get chrang iina wa yu biliiv iina. (Iib. 6:1) Bot wa kyan elp yu fi du dat?

3. Wa wan Kristiyan fi mek shuor se im a du afta im baptaiz?

³ Afta wi baptaiz, aal a wi fi du wa Paal tel di breda an sista dem iina Efisos fi du. Im tel dem se dem fi “gruo op” an get chrang. (Ifii. 4:13) Dat miin tu se ‘wi fi gwaan get chrang iina di sitn dem we wi biliiv iina’. Jos laik ou wan  likl pikni afi gruo op, a siem so Paal a mek wi si se az wan Kristiyan wi afi gruo op iina di sitn dem we wi biliiv iina tu. Jos laik ou wen wan pikni baan im mada an faada api bad, bot dem no ekspek im fi tan biebi fi eva, dem ekspek im fi gruo op an “tap gwaan laik pikni.” (1 Kor. 13:11) A siem so it go wid Kristiyan ino. Afta wi baptaiz wi kyaahn tan wan plies, wi afi gruo op. Wi afi gwaan gruo op iina di ting dem we wi biliiv iina. Mek wi luk pan som sitn we kyan elp wi fi du dat.

4. Wa fi get chrangga an chrangga so wi an Jeuova kyan get kluosa? An wa mek yu se so? (Filipiyan 1:9)

⁴ Mek yu lov fi Jeuova gruo chrangga an chrangga. Wi nuo se yu lov Jeuova ino, bot yu afi mek shuor se da lov de a gruo chrangga an chrangga. Ou yu kyan du dat? Di apasl Paal tel wi wan wie iina Filipiyan 1:9. (Riid.) Paal did prie fi di Filipiyan breda dem ‘lov dem wan aneda muor an muor.’ So dat shuo se lov kyan gruo. So fi mek fi wi lov fi Jeuova gruo wi afi “nuo an andastan” muor bout im. An di muor wi get fi nuo im it a-go mek wi lov im muor an lov di wie ou im du tingz tu. So wi a-go wel waahn fi du di sitn dem im waahn wi fi du, an wi naa go waahn du notn fi ort im niida. Wi a-go wok aad fi fain out wa im waahn wi fi du an den wi a-go dwi’it.

5-6. Wa wi fi du fi mek wi lov fi Jeuova gruo chrangga an chrangga? An wa mek yu se so?

⁵ Wi kyan gruo fi lov Jeuova muor an muor wen wi get fi nuo im Son, kaa im av di siem wiez dem laik wa im Faada av. (Iib. 1:3) Di bes wie fi nuo bout Jiizas a fi riid di fuor Baibl buk dem we niem: Matyu, Maak, Luuk an Jan. Ef yu naa riid di Baibl evridie yet, nou a wan gud taim fi staat. An wen yu staat fi riid bout Jiizas, chrai fi tingk bout im wiez dem, kaa yu a-go si se piipl did fain it iizi fi kom tu im an taak tu im, aal di likl pikni dem tu. (Maak 10:13-16) Jiizas did mek im falara dem fiil frii fi kom taak tu im bout eniting—im an dem did a fren. (Mat. 16:22) A siem so wid im Faada Jeuova—wi kyan taak tu im bout eniting wen wi a prie tu im. So wen wi a prie tu Jeuova, wi nuo se im naa go joj wi kaa im lov wi, an im kier bout wi.​—1 Pii. 5:7.

⁶ Jiizas did fiil it fi piipl. Di apasl we did niem Matyu mek wi nuo se: “Wen im si di kroud a piipl dem, im did sari fi dem, kaa aal saat a sitn did a bada dem, dem did kanfyuuz an dem kudn elp demself. Dem did komiin laik shiip we naa nobadi fi tek kier a dem.” (Mat. 9:36) Ef a so Jiizas fiil bout it, ou yu tingk Jeuova fiil? Jiizas tel wi ou Jeuova fiil wen im se: “Unu Faada we iina evn no waahn dem likl wan ya fi go chrie.” (Mat. 18:14) Dis mek yu fiil gud iina yu aat, no chuu? So wen yu get fi nuo Jiizas beta, a so wi lov fi Jeuova a-go gruo muor an muor.

7. Ou it kyan elp yu wen yu spen taim wid di breda an sista dem we chrang iina wa dem biliiv iina?

⁷ Wan neda ting we kyan mek wi lov gruo an mek wi get kluosa tu Jeuova a fi get fi nuo an spen taim wid di breda an sista dem we chrang iina wa dem biliiv iina. Yu mait-a si ou api dem bi an dem no sari se dem a sorv Jeuova. Yu kyan aks dem fi tel yu bout som a di sitn dem we dem go chuu iina laif an ou Jeuova elp dem. An wen yu fi mek op yu main fi du sortn tingz yu kyan aks dem wa dem tingk bout it. Kaa memba ino, di Baibl se “tingz wi wok out gud wen dem chek wid nof piipl we waiz.”​—Prav. 11:14

8. Wa yu fi du ef yu a wanda ef wa di Baibl se a chuu?

 ⁸ No if-an-bot an wanda-wanda. Jos laik wa  paragraaf 2 se, Sietan a-go chrai fi no mek yu get chrang iina di sitn dem we yu biliiv iina. Wan a di ting we im mait-a chrai fi du a fi mek yu staat wanda ef wa di Baibl tiich a so it go fi chuu. Laik yu mait ier piipl se a no Gad mek wi, wi kom fram sitn els, laka mongki an dem sitn de. Bot dis a no wa di Baibl tiich. Wen yu likl yu mait no tingk bout it, bot wen yu get biga an dem a tiich yu bout it a skuul, yu mait-a staat tingk bout it ar fiil se di tiicha dem riili nuo wa dem a taak bout. Bot som a di tiicha dem mait-a neva iivn tingk bout ef a Gad mek wi fi chuu. Bot memba wa di Baibl tel wi a Pravorbz 18:17 wen it se: “Wen yu ier fram di fos sumadi we kom tel yu bout sitn we apm, yu mait-a fiil se a so it go fi chuu, bot wen di neda sumadi kom kwestiyan im, yu si se a no so it go at aal.” So no biliiv evriting we yu ier a skuul. Wa yu fi du a luk aad aad iina Gad Wod an tingk bout di chuut we iina it, an riid op bout it iina wi buk an pamplet dem. An yu kyan taak tu di breda an sista dem tu uu yuus tu biliiv se a no Gad mek wi. Aks dem wa mek dem tap biliiv wa dem yuus tu biliiv an staat biliiv se a Gad mek wi an im lov wi. An wen yu taak tu dem, it a-go elp yu fi tingk bout wa riili mek sens.

9. Wa yu lorn fram wa Melissa did du?

⁹ Wan sista we niem Melissa did glad se shi did riid di buk an pamplet dem fi fain out ef a Gad mek wi fi chuu. * Shi se: “Wen mi de a skuul dem mek it luk laik se a no aks dem a aks nobadi notn—kaa dem kliem se dem nuo aredi se a no Gad mek wi. An di fos taim mi ier it mi did fried se ef mi did dig op dig op tu moch mi wuda fain se a no Gad mek wi fi chuu an wa dem did a tiich did rait. Bot mi nuo se Jeuova waahn wi fi sorv im kaa wi nuo se wa wi biliiv iina a chuu. So mi mek op mi main fi fain out tingz fi miself. So mi staat fi riid di buk we niem Is There a Creator Who Cares About You? an di pamplet dem we niem Was Life Created an The Origin of life—Five Questions Worth Asking. Mi sari se mi neehn du dis fram lang taim.”

10-11. Wa kyan elp yu fi liv iina wan gud an kliin wie? (1 Tesaluoniyan 4:3, 4)

 ¹⁰ Tan we fram aal kain-a seks sin. Wen yu a tiinieja, yu mait-a fiil laik se yu wel waahn fi av seks, an ada piipl mait-a a presha yu fi av seks tu. An a dat Sietan wuda waahn yu fi du. Wa kyan eljp yu fi liv wan gud an kliin laif? (Riid 1 Tesaluoniyan 4:3, 4.) Wen yu de prie yu fi tel Jeuova ou yu riili fiil an aks im fi di chrent fi du wa rait. (Mat. 6:13) Memba yu no, se a elp Jeuova waahn fi elp yu, an a no rait im waahn fi rait yu aaf. (Sa. 103:13, 14) An wen yu riid Gad Wod it kyan elp yu tu. Tingk bout Melissa we wi taak bout aredi. Shi did fain it aad fi tap tingk bout tingz we av fi du wid seks sin. Shi se: “Kaa mi riid mi Baibl evridie a dat did elp mi no fi gi op. It mek mi memba se a Jeuova mi bilang tu an mi waahn im iina mi laif.”​—Sa.119:9.

¹¹ Nobada chrai diil wid it pan yu uon. Taak tu yu mada an faada bout it. An wi nuo se it no iizi fi taak bout dem sitn de, bot it beta wen yu du it. Melissa se: “Mi prie tu Jeuova fi gi mi di chrent fi taak tu mi faada bout it. Afta dat, mi fiil beta. Mi nuo se Jeuova did fiil gud bout wa mi du.”

12. Wa kyan elp yu fi du di rait ting?

¹² Liv bai di sitn dem we yu lorn iina di Baibl. Alduo yu mada an faada mait-a lou yu fi staat du muor tingz fi yuself iina laif, yu fi stil memba se yu no nuo evriting. Wa kyan elp yu fi no du notn fi mek yu an Jeuova no bi fren agen? (Prav. 22:3) Wan sista we niem Kari se wa elp ar fi nuo wa fi du a das shi get fi si se di breda an sista dem we chrang iina wa dem biliiv iina no afi get wan ruul pan evriting we dem av fi du. Shi se: “Mi did av fi riizn pan tingz we mi lorn iina di Baibl an get wa it a se fi nuo wa fi du insted-a fi a get ruul pan evriting bout wa fi du.” Wen yu a riid di Baibl, yu fi aks yuself dem kwestiyan ya: ‘Wa da paat ya a tel mi bout ou Jeuova luk pan tingz? It av notn iina it we mi kyan riizn pan fi nuo wa fi du? An ef mi si sitn iina it we mi fi du, ou it a-go elp mi ef mi du it?’ (Sa. 19:7; Aiz. 48:17, 18) Wen wi riid di Baibl an tingk bout wa it a se, an si ou it elp wi fi riizn pan tingz, it a-go iiziya fi wi du di ting dem we a-go mek Jeuova api. Di muor yu du tingz fi yu an Jeuova get kluosa an kluosa yu a-go si se yu na’afi get no wol iip a ruul fi nuo wa fi du kaa yu a-go get fi nuo ou Jeuova luk pan tingz.

13. Wa mek wen yu kip gud fren it kyan elp yu? (Pravorbz 13:20)

¹³ Pik fren we lov Jeuova. Jos laik wa wi si aredi, di taip a fren dem we yu kip kyan iida mek yu ton wan beta Kristiyan ar mek yu wosaraaf. (Riid Pravorbz 13:20.) Wan sista we niem Siera neehn so api wid ou tingz a wok out iina ar laif agen. Den ges wa apm. Shi se: “Mi get som gud fren di rait taim. Mi an wan yong sista staat fi stodi Di Wachtowa tugeda evri wiik. An wan neda fren elp mi fi staat ansa kwestiyan a di miitn dem. An kaa a ou dem fren ya tan, mi staat tek mi uona Baibl stodi siiros an mi staat prie muor tu. So kaaz a aal a dis, mi staat fiil kluosa tu Jeuova an staat fi fiil api iina mi laif agen.”

14. Ou Julien did get som gud fren?

¹⁴ Wa kyan elp yu fi ton gud fren wid piipl we a-go elp yu fi du di rait ting? Wan elda we niem Julien se: “Wen mi did likl mi get som gud fren wen mi wok iina sorvis. Dem fren ya did lov fi priich an dem elp mi fi si se it nais wen yu go out go  priich tu piipl. An kaa a dis mi did wel waahn paiyanier, so mi disaid se a dat mi a-go du. An mi get fi si se di riizn wa mek mi neva av wol iip a gud fren a chuu mi did onggl a luk fren fram di wan dem we did bout fi mi iej. An wen mi go a Betel mi get som gud fren de tu. An wen mi luk pan di wie ou dem liv dem laif it elp mi fi mek shuor se di ting dem we mi a du fi enjai miself, laik wen mi a wach shuo an dem ting de, mi no du notn we Jeuova no waahn mi fi du, an dat did mek mi an Jeuova get kluosa.”

15. Wa Paal did waan Timoti bout? (2 Timoti 2:20-22)

¹⁵ Wa ef yu si se sumadi iina di kanggrigieshan a no gud fren fi yu kip? Paal did waan Timoti bout som a dem breda an sista de iina di kanggrigieshan, kaa im nuo se dem neva did a gwaan laik ou Kristiyan fi gwaan. So im tel Timoti se im no fi iina notn wid dem. (Riid 2 Timoti 2:20-22.) Fi nuo se wi an Jeuova a fren a di bes ting dat. So wi no fi mek nobadi kom bitwiin wi an Jeuova kaa wi wok aad aad fi wi an im ton fren.​—Sa. 26:4.

16. Wa a som a di sitn dem we yu fi plan fi du?

¹⁶ Plan fi du tingz we a-go kip yu kluos tu Jeuova. Yu afi mek shuor se yu plan fi du tingz we a-go mek yu get chrangga iina wa yu biliiv iina an we a-go mek yu ton wan beta sumadi. (Ifii. 3:16) Laik yu mait-a plan fi du yu uona Baibl stodi muo aafn an fi riid di Baibl evri die. (Sa. 1:2, 3) Yu mait-a si se yu fi prie muor aafn tu Jeuova an mek shuor se it a kom fram yu aat. Ar yu mait-a si se yu afi wach di kain-a ting dem we yu a du fi enjai yuself, ar wach wa ya a du wid yu taim. (Ifii. 5:15, 16) An wen Jeuova a si se yu a wok aad fi du di ting dem we a-go mek yu kluosa tu im, im a-go api wid yu.

17. Ou it mek yu fiil wen yu elp ada piipl?

¹⁷ Wen yu elp ada piipl it mek yu get kluosa an kluosa tu Jeuova Gad. Jiizas did se: “Ef yu gi sumadi sopm, it mek yu muo api dan ef sumadi gi yu sopm.” (Aks 20:35) Nou das yu yong ef yu yuuz som a yu taim an yu chrent fi elp ada piipl it  a-go elp yu. Wan ting we yu kyan du a se yu kyan plan fi elp di uol piipl dem an di wan dem we sik we de iina yu kanggrigieshan. So yu kyan go a shap fi dem an yu kyan elp dem fi yuuz dem fuon an tablit an dem ting de. An ef yu a wan breda yu kyan plan fi ton wan ministiiriyal sorvant. Da wie de yu kyan go elp yu breda an sista dem muor. (Fil. 2:4) An yu mek ada piipl si se yu lov dem wen yu tel dem bout Gad Kindom an wa it a-go du fi dem. (Mat. 9:36, 37) An ef yu kyan du it, plan fi du muor fi Jeuova iina wan speshal wie, laik fi ton wan paiyanier an dem ting de.

18. Wen yu a du nof fi Jeuova iina wan speshal wie, ou dat kyan elp yu?

¹⁸ Wen yu staat du nof fi Jeuova iina wan speshal wie laik fi paiyanier, it kyan mek yu get fi du wol iip a ada tingz fi Jeuova. Yu kyan get fi go a di School for Kingdom Evangelizers, ar yu mait-a kyan get fi go a Betel ar get fi go bil Kindom Aal an dem ting de. Wan yong sista we a paiyanier we niem Kaitlyn se: “Wen mi spen taim wid di breda an sista dem we a du nof fi Jeuova, it push mi fi du muor fi Jeuova afta mi baptaiz. Kaaz a dem, mi du tingz fi nuo muor bout di Baibl an mi staat yuuz di Baibl fi tiich piipl beta.”

19. Wa kain-a blesn yu a-go get wen yu du tingz fi get kluosa an kluosa tu Jeuova?

¹⁹ Ef yu gwaan du tingz we a-go mek yu get kluosa an kluosa tu Jeuova, yu a-go get wol iip a blesn. Yu naa go yuuz yu chrent an taim fi a du tingz we no wot notn. (1 Jan 2:17) An yu naa go fiil bad kaaz a di sitn dem we yu du iina laif. Insted-a dat, yu a-go fiil api kaa yu fain se a di bes ting yu did du wid yu laif. (Prav. 16:3) An kaa a ou yu liv yu laif, yu breda an sista dem, weda dem yong ar uol, a-go fiil gud an it a-go push dem fi du muor fi Jeuova. (1 Tim. 4:12) An di bigis ting a das yu a-go fiil gud fi nuo se yu a du tingz fi mek Jeuova api, an yu a-go api kaa yu an im a fren.​—Prav. 23:15, 16.