1. Azkaadn tu Iibruu 12:1, wa wi fi du fi mek shuor se wi don di ries we a-go mek wi liv fi eva?

 DI BAIBL mek wi nuo se di laif we wan Kristiyan liv komiin laik wan ries. An di wan dem we don di ries a-go get fi liv fi eva. (2 Tim. 4:7, 8) An da ries ya suun don. So wi fi du evriting we wi kyan du fi ron til it don. Di apasl Paal did ron fi im ries til it don an win. An im tel wi wa wi kyan du so dat wi kyan win di ries. Im se: “Wi afi dash aaf evriting we a sluo wi dong iina da ries ya . . . an ron di ries we de infronta wi an no wier out pan di wie.”​—Riid Iibruu 12:1.

2. Wa it miin fi dash aaf “evriting we a sluo wi dong”?

² Wen Paal did se wi fi “dash aaf evriting we a sluo wi dong,” wa im did a se a dat wi niid fi dash we eniting we wi a kya we wi no niid fi a kya. Kaa ef wi a kya sitn we wi no niid fi kya, it kyan mek wi get taiyad an tap. So ef wi fi eng aan an no gi op, wi fi chrai an fain out di sitn dem we wi a kya we wi no niid fi kya we kyan mek wi staat fi ron sluo. Bot wen wi a du dat, wi no waahn fi dash we di luod dem we wi fi kyari. Kaa ef wi du dat, dat kyan mek wi no win di ries. (2 Tim. 2:5) Wa a di difrant difrant luod dem we wi fi kyari?

3. (a) Azkaadn tu Gyalieshan 6:5, wa wi fi kya fi wiself? (b) Wa wi a-go luk pan iina da lesn ya, an wa mek?

³ Riid Gyalieshan 6:5. Paal tel wi se “evribadi mos kyari dem uona luod.” Paal did a taak bout wa wi afi du fi Gad fi wiself we nobadi els kyaahn du fi wi. Iina da lesn ya, wi a-go taak bout di sitn dem we wi niid fi ‘kyari fi wiself,’ an wa a di sitn dem we wi a kya we wi no niid fi a  kya. Kaa wen wi kya wa wi niid fi kya an dash we wa wi no niid fi kya, dat a-go elp wi fi ron di ries we a-go mek wi liv fi eva an win.

4. Wa mek kaa wi pramis fi gi wi laif tu Gad it naa go bordn wi dong? (Luk pan di picha tu.)

⁴ Di pramis we wi mek wen wi gi wi laif tu Gad. Wen wi gi wi laif tu Jeuova, wi tel im se wi a-go worship im an du wa im waahn wi fi du. An wi afi du wa wi pramis im se wi a-go du. A wan big ting dis wi av fi du, bot it no miin tu se a sitn we a-go bordn wi dong. Kaa wen yu tingk bout it, Jeuova mek wi fi du wa im waahn wi fi du. (Rev. 4:11) Im mek wi wid di siem kain-a wiez dem we im av. An im mek wi so dat wi waahn fi worship im. An kaa a dat, wi kyan jraa nier tu im an wi kyan api wen wi du wa im waahn wi fi du. (Sa. 40:8) An pan tap a dat, wen wi du di sitn dem we Gad waahn wi fi du an wi a du di sitn dem we im Bwai Pikni did du tu, wi a-go fiil laik se wi a “get fi res.”​—Mat. 11:28-30.

5. Wa kyan elp yu fi du di sitn dem we yu pramis Jeuova se yu a-go du? (1 Jan 5:3)

 ⁵ Wa kyan elp yu fi kya da luod ya? Tuu sitn kyan elp yu. Fos, wok aad fi lov Jeuova muor. Yu kyan du dat wen yu sidong an tingk bout aal a di gud sitn dem we im du fi yu an aal a di gud sitn dem we im a-go du fi yu iina di fyuucha. Di muor yu lov Jeuova a di iiziya it a-go bi fi yu du di sitn dem we im se yu fi du. (Riid 1 Jan 5:3.) Di sekan ting a dat yu fi du laik Jiizas. Fi aal a Jiizas laif im did du wa Jeuova waahn im fi du kaa im prie tu Jeuova an aks im fi elp im fi dwi’it, an im tingk bout di sitn dem we Jeuova did a go du fi im iina di fyuucha. (Iib. 5:7; 12:2) So laik Jiizas, wi fi prie tu Jeuova an aks im fi gi wi di chrent fi du wa im waahn wi fi du, an wi fi aalwiez tingk bout di gud sitn dem we wi a-go get iina Paradais. Di muor yu lov Jeuova an du laik Jiizas, a dat a-go elp yu fi du wa yu pramis Jeuova se yu a-go du wen yu gi yu laif tu im.

6. Wa mek wi fi du di sitn dem we Jeuova se wi fi du fi wi fambili? (Luk pan di picha tu.)

⁶ Di ting dem we wi fi du fi wi fambili. Wen wi a ron da ries ya, wi fi mek shuor se wi lov Jeuova an Jiizas muor dan ou wi lov wi fambili. (Mat. 10:37) Bot kaa yu a du di sitn dem we Jeuova waahn yu fi du, dat no miin tu se dem fi tap yu fram du di sitn dem we yu fi du fi yu fambili. So ef yu waahn Jeuova an Jiizas fi api wid wa yu a du, yu afi mek shuor se yu a du di sitn dem we yu fi du fi tek kier a yu fambili. (1 Tim. 5:4, 8) An wen wi du dat, wi a-go api. Kaa wen yu tingk bout it, a Jeuova mek di fambili iina wan wie so dat wen di ozban an di waif lov an rispek dem wan aneda, an di mada an faada dem gruo dem pikni gud an mek dem si se dem lov dem, an wen di pikni dem du wa dem mada an faada se, di uol a dem iina di fambili a-go api.​—Ifii. 5:33; 6:1, 4.

7. Wa kyan elp yu fi du di sitn dem we yu fi du iina yu fambili?

⁷ Wa kyan elp yu fi kya da luod ya? No mata uu yu bi iina di fambili, yu fi fala wa di Baibl se an no du wa yu fiil fi du, an no du wa yu si di piipl dem roun yu a du ar wa di piipl dem we kliem se dem nuo wa dem a du se yu fi du. (Pr. 24:3, 4) Wi fi yuuz op di buk an pamplet dem we wi get fram Jeuova aaganaizieshan. An wen wi du dat, it wi elp wi fi nuo ou wi kyan du wa di Baibl se. Laik di paat we niem “Help for the Family” av uol iip a sitn iina it we kyan elp di wan dem we marid, an di mada an faada dem, an di tiinieja dem tu fi diil wid di difrant difrant prablem dem we kom op iina di fambili. b Mek op yu main fi du di sitn dem we di Baibl se yu fi du aal ef ada piipl iina yu fambili naa du dem. An wen yu du dat, yu a-go mek yu fambili api an Jeuova a-go bles yu tu.​—1 Pii. 3:1, 2.

8. Wa di sitn dem we wi du iina laif kyan du tu wi?

⁸ Wi afi redi fi uon op tu di sitn dem we wi du. Jeuova mek wi iina wan wie so dat wi kyan mek op wi uona main fi wiself. An im waahn wi fi si di gud sitn dem we a apm wen wi mek op wi main fi du sitn gud. An wen wi du sitn rang, im naa go siev wi fram di bad sitn dem we mait-a  apm kaaz a wa wi du. (Gya. 6:7, 8) So wen wi se sitn we wi no fi se, ar wi du sitn bifuo wi tingk bout it, ar wi du sitn we no mek no sens, wi afi redi fi diil wid wa apm siek-a wa wi du. An somtaim, kaaz a wa wi du, wi kanchens mait-a bada wi. An dis gud kaa it kyan push wi fi tel sumadi bout di rang sitn we wi du an mek wi tap dwi’it, an it wi mek wi no dwi’it agen. An wen wi du dat, it a-go elp wi fi gwaan ron di ries.

9. Ef yu du sitn rang, wa a som sitn we yu kyan du we kyan elp yu? (Luk pan di picha tu.)

⁹ Wa kyan elp yu fi kya da luod ya? Ef yu kyaahn du notn bout di rang sitn we yu du aredi, jos nuo se a dat yu av fi diil wid an yu kyaahn chienj notn. An no spen no uol iip a taim a tel yuself se, ye, yu did afi du wa yu du, ar a bliem yuself ar ada piipl fi wa did apm. So wa yu fi du a jos uon op tu wa yu did du an du wa yu kyan du fi saat out tingz. An ef yu riili fiil bad bout di sitn we yu du, taak tu Jeuova bout it an mek im nuo se yu du sitn rang, an aks im fi paadn yu. (Sa. 25:11; 51:3, 4) An yu kyan go tu di sumadi we yu du sitn an mek dem nuo se yu sari fi wa yu du, an yu kyan go tu di elda dem tu fi mek dem elp yu. (Jmz. 5:14, 15) Chrai an lorn fram wa yu did du an chrai no fi dwi’it agen. An wen yu du dem sitn ya, yu kyan nuo se Jeuova a-go paadn yu an im a-go de de fi yu.​—Sa. 103:8-13.

10. Wa mek wen wi chrai fi du muor dan wi kyan du, it kyan mek wi fiil woklis? (Gyalieshan 6:4)

¹⁰ Wen yu a chrai fi du muor dan wa yu kyan du. Wi a-go fiil woklis ef wi aalwiez a luk pan wa ada piipl a du an a chrai fi dwi’it tu. (Riid Gyalieshan 6:4.) An ef wi aalwiez a du dat, it a-go mek wi red yai an wi afi go aalwiez a chrai fi du beta dan di ada sumadi. (Gya. 5:26) Laik ef wi aalwiez a chrai fi du sitn beta dan sumadi els, wi a-go en op a push wiself fi du muor dan wi kyan du. An di Baibl mek wi nuo se wi naa go fiil gud ef wi aalwiez afi a wiet pan sitn. (Pr. 13:12) So wi a-go fiil wosa ef wi a kil op wiself fi kyan du sitn laik ou sumadi els wuda dwi’it we wi mait-a neva eva kyan du. Ef wi a du dat, it kyan mek wi fiil laik se wi na’av no chrent fi ron di ries we a-go mek wi liv fi eva.​—Pr. 24:10.

11. Wa kyan elp yu fi no chrai du muor dan yu kyan du?

¹¹ Wa kyan elp yu fi dash we da evi sitn ya? No chrai fi du muor dan wa Jeuova waahn yu fi du, kaa im no waahn yu fi du muor dan wa yu kyan du. (2 Kor. 8:12) An nuo se Jeuova no waahn yu fi du sitn kaaz sumadi els a dwi’it. (Mat. 25:20-23) Im lov wen yu du aal a we yu kyan du fi im wid aal a yu aat, an im lov wen yu du di sitn dem we im waahn yu fi du an wen yu eng aan an no gi op. An nuo se yu mait-a kyaahn du sortn tingz kaa yu op iina iej, ar kaa yu no so aati agen, ar kaa a sortn tingz we a gwaan wid yu. Jos laik ou Baazilai neehn tek aan wa im kudn manij kaa im did op iina iej, a siem so wi no fi tek aan sortn tingz we wi nuo se wi kyaahn go manij fi du. (2 Sam. 19:35, 36) An wi fi du laik Muoziz an tek elp wen wi get it an aks ada piipl fi elp wi tu. (Ek. 18:21, 22) Wen yu nuo wa yu kyan du fram wa yu kyaahn du, yu naa go chrai fi du sitn we yu kyaahn du, an so yu naa go taiyad wen yu a ron di ries we a-go kyan mek yu liv fi eva.

12. Wi fi bliem wiself fi di bad sitn dem we piipl du? Tel wi wa mek yu se so.

 ¹² No bliem yuself fi di rang sitn dem we ada piipl du. Wi kyaahn mek ada piipl du di sitn dem we dem fi du, an wen sumadi du sopm bad, wi kyaahn tap dem fram go chuu sortn tingz we a apm tu dem kaaz a wa dem du. Laik wan pikni mait-a tap sorv Jeuova, an dat a-go mek di pikni mada an faada fiil bad. Bot dem no fi bliem demself fi wa di pikni du. A no da kain-a evi sitn ya Jeuova waahn dem fi kyari.​—Ruo. 14:12.

13. Wa di mada an faada dem fi du an memba ef dem pikni naa du wa rait?

¹³ Wa kyan elp yu fi dash we da evi sitn ya? Wi fi nuo se Jeuova mek wi iina wan wie so wi kyan mek op wi uona main fi wiself. So aal a wi afi mek op wi main fi wiself ef wi a-go sorv im ar wi naa go sorv im. Jeuova nuo se aal a unu we a mada an faada no porfek, im jos waahn unu fi du di bes we unu kyan du. Yu pikni afi mek op dem main fi demself fi du wa dem waahn fi du no wa yu waahn dem fi du. (Pr. 20:11) Bot kaa yu a wan mada ar wan faada, yu mait-a a fret bout di sitn dem we dem du rang. Ef yu fiil se dem du wa dem du kaa a wa yu did du wen yu a gruo dem, jos mek Jeuova nuo ou yu fiil an aks im fi paadn yu. Im nuo se yu kyaahn go bak go chienj wa yu did du, an im nuo se wi kyaahn tap di pikni dem fram go chuu sortn tingz kaaz a wa dem du. Bot Jeuova nuo se ef yu pikni du eniting at aal fi shuo se dem waahn kom bak tu im, im a-go redi fi tek dem bak.​—Luuk 15:18-20.

14. Wa mek ef wi aalwiez fiil gilti dat a sitn evi we Jeuova no waahn wi kyari?

¹⁴ Wen wi fiil gilti bad. Wi nuo se som a di taim wi a-go fiil gilti kaa wi sin bot notn no rang wid dat. Bot wi no fi fiil so bad das wi fiil laik se wi kyaahn go eva get paadn. Dis a wan neda evi sitn we wi  fi dash we. Ou wi kyan nuo ef wi a kyari sitn evi we Jeuova waahn wi fi dash we? Wi kyan nuo ef wi stil a kya it ef wi taak tu Jeuova ar di elda dem bout it an wi fiil sari bout wa wi du an tap dwi’it, bot wi stil a biit op wiself bout it. (Aks 3:19) Kaa wi nuo se ef wi du aal a dem sitn ya Jeuova a-go paadn wi. An Jeuova nuo se ef wi no tap fiil gilti, a mash it a-go mash wi op. (Sa. 31:10) Kaa ef wi get tuu sad, it mait-a mek wi tap ron di ries we a-go mek wi liv fi eva.​—2 Kor. 2:7.

15. Wa kyan elp yu ef yu aalwiez fiil gilti bout sitn we yu du? (1 Jan 3:19, 20) (Luk pan di picha tu.)

¹⁵ Wa kyan elp yu fi dash we da evi sitn ya? Ef yu aalwiez a fiil gilti bout sitn we yu du, jos memba se wen Gad paadn wi, im riili paadn wi. (Sa. 130:4) An wen im paadn di wan dem we riili sari fi wa dem du an dem tap dwi’it, im pramis dem se im naa go memba wa dem du. (Jer. 31:34) So dat miin tu se Jeuova naa go av yu op kaaz a wa yu du. So ef sitn bad apm tu yu kaaz a wa yu did du, dat no miin tu se Jeuova neehn paadn yu. An ef yu kyaahn get fi du aal a wa yu wuda waahn fi du fi Jeuova kaaz a sitn we yu did du, no biit op yuself kaaz a it, kaa memba se Jeuova no de de a tingk bout yu sin dem, so yu no fi a du dat niida.​—Riid 1 Jan 3:19, 20.

16. Wa aal a wi we a ron iina da ries ya fi nuo?

¹⁶ Wen wi a ron da ries ya, wi fi “ron laik se [wi] waahn fi win.” (1 Kor. 9:24) Wi kyan du dat ef wi nuo di luod we wi fi kyari an di evi sitn dem we wi fi dash we. Iina da lesn ya, wi luk pan som a di sitn dem we wi fi kyari an we wi fi dash we. Bot yu av ada tingz de tu ino we wi fi kyari an we wi fi dash we tu. Jiizas se wi ‘no fi spen di uol a wi taim a nyam an a jringk, an a fret bout laif.’ (Luuk 21:34) Dem skripcha ya an som ada wan kyan elp yu fi si wa yu niid fi chienj op iina yu laif so das yu kyan gwaan ron di ries we a-go mek yu kyan liv fi eva.

17. Wa mek wi nuo se wi kyan win di ries we a-go mek wi liv fi eva?

¹⁷ Wi nuo se wi kyan win da ries ya kaa Jeuova a-go gi wi di chrent we wi niid fi win. (Aiz. 40:29-31) So gwaan ron di ries laik Paal. Kaa im did du evriting we im kuda du fi win di ries so dat im kuda get di praiz. (Fil. 3:13, 14) Nobadi kyaahn ron da ries ya fi yu, bot Jeuova wi elp yu fi win. So Jeuova kyan elp yu fi kyari di luod we yu fi kya an elp yu fi dash we wa yu fi dash we. (Sa. 68:19) Kaa Jeuova a elp yu, yu a-go kyan eng aan an ron da ries ya an win it tu!