1. Wa di man dem fram Babilan did lov bout Daniyel?

 DI PRAFIT we niem Daniyel a did wan yong man wen dem tek im we fram Jeruusilem an kya im faar faar go a Babilan go ton im iina prizna. Bot di man dem we did tek we Daniyel did si se im difrant fram di ada man dem. Dem did onggl a si se Daniyel did luk gud an chrang an se im kom fram wan big shat fambili. (1 Sam. 16:7) An kaaz a dat, di man dem fram Babilan did chrien Daniyel fi bi wan a di big man dem we wok iina di king ous.​—Dan. 1:3, 4, 6.

2. A ou Jeuova did fiil bout Daniyel? (Iziikel 14:14)

² Jeuova neehn lov Daniyel kaaz a ou im did luk ar kaa im did av big wok iina di king ous. Bot Jeuova did lov im kaaz a di sitn dem we im a du an uu im bi. Matarafak, wen Daniyel a did roun 20 ier uol, Jeuova se im komiin laik man laik Nowa an Juob. An dem man de did spen uol iip a ier a sorv Jeuova wid aal a dem aat. (Jen. 5:32; 6:9, 10; Juob 42:16, 17; riid Iziikel 14:14.) An Jeuova did lov Daniyel fi di uol a im laif.​—Dan. 10:11, 19.

3. Wa wi a-go luk pan iina da lesn ya?

³ Iina da lesn ya, wi a-go luk pan tuu sitn we mek wi si se Daniyel a did wan gud man we speshal tu Jeuova. Fos, wi a-go luk pan di wiez dem we im did av an di difrant difrant taim dem we im shuo se im av dem wiez de. Afta dat, wi a-go luk pan wa did elp im fi av dem kain-a wiez de. An den wi a-go luk pan ou wi kyan du laik im. Aalduo da lesn ya rait fi elp di yong piipl dem, aal a wi kyan lorn fram di sitn dem we Daniyel did du.

4. Tel wi wa Daniyel did du we mek wi si se im did briev.

⁴ Piipl we briev mait-a fiil fried som a di taim, bot dem no mek dat tap dem fram du wa rait. An Daniyel did briev. Mek wi luk pan tuu a di taim wen im du sitn we shuo se im briev. Di fos taim a did bout tuu ier afta di man dem fram Babilan did mash op Jeruusilem. Di king we niem Nebikadneza, we kom fram Babilan, did jriim bout wan big stachu we did a bada im. So im se im a-go kil aaf aal a di waiz man dem ef dem no tel im wa im jriim se an wa it miin. (Dan. 2:3-5) Kaaz a dat, Daniyel did afi du wa im a du kwik kwik. So im go tu di king an aks im fi likl taim so im kuda tel im wa im jriim miin. (Dan. 2:16) An yu nuo se im did afi briev an a chos iina Gad fi du dat. An bifuo dat, wi no riid no we iina di Baibl we tel wi se Daniyel yuus tu tel piipl wa dem jriim miin. So Daniyel aks im fren dem​—Shajrak, Miishak, an Abednigo​—fi prie tu Jeuova fi elp im so dat im kyan tel di king wa di jriim miin. (Dan. 2:18) An Jeuova ansa dem prieya dem. An kaaz a dat, dem neehn kil Daniyel an im fren dem.

5. Wa els did apm we mek Daniyel did afi briev op imself?

⁵ Wan neda taim afta Daniyel tel di king bout wa di jriim miin, sitn apm agen we im did afi shuo se im briev. Nebikadneza did av wan neda jriim we a bada im. Bot da taim ya a wan big chrii im jriim bout. An Daniyel briev op imself an tel im wa it miin, kaa da taim ya Daniyel did afi tel di king se im a-go mad out an se im a-go tap ruul fi a taim. (Dan. 4:25) Di king kuda fiil se a fait Daniyel a fait gens im an kil im. Bot Daniyel briev op imself an tel im wa di jriim miin.

6. Wa mait-a did elp Daniyel fi no fried fi du di sitn dem we im du?

⁶ Wa mait-a did elp Daniyel fi bi wan briev man? Wan a di ting dem we elp im a dat wen im did yong, im lorn fram di sitn dem we im mada an faada dem du. Dem did mek shuor se dem du wa Jeuova tel dem fi du an tiich im bout  Jeuova Laa dem. (Dyuu. 6:6-9) An Daniyel neehn jos nuo di Ten Komaanment dem bot im did nuo di ada laa dem we mek di Izrelait dem nuo wa dem kuda did iit an wa dem no fi iit. b (Liv. 11:4-8; Dan. 1:8, 11-13) An Daniyel lorn bout wa did apm tu Gad piipl dem wen dem neehn du wa Im se dem fi du. (Dan. 9:10, 11) An di difrant difrant sitn dem we did apm iina Daniyel laif did mek im nuo se no mata wa, Jeuova an im powaful ienjel dem a bak im fi chuu.​—Dan. 2:19-24; 10:12, 18, 19.

7. Wa els did elp Daniyel fi no fried? (Luk pan di picha tu.)

⁷ Daniyel riid an stodi di sitn dem we Gad prafit laik Jerimaiya did rait dong. So im get fi si se dem wuda suun frii di Juu piipl dem we iina Babilan. (Dan. 9:2) An wen Daniyel si se dis apm fi chuu, it mek im chos iina Jeuova muor. So wen piipl chos iina Gad it mek dem briev. (Luk pan Ruoman 8:31, 32, 37-39.) Di bigis ting we Daniyel du a dat im prie tu im Faada Jeuova aafn. (Dan. 6:10) Im prie tu Jeuova an tel im aal a di rang sitn dem we im du an ou im fiil bout tingz, an im aks Jeuova fi elp im. (Dan. 9:4, 5, 19) A no laik se Daniyel did baan briev, kaa im a did sumadi jos laka wi, bot wa did elp im a dat im stodi Jeuova Wod an prie tu im. An im biliiv se Jeuova wuda elp im no mata wa.

8. Wa a som sitn we wi fi du so das wi kyan briev?

⁸ Wa kyan elp wi fi briev? Wi mada an faada mait-a waahn wi fi briev laik ou dem briev. Bot dem kyaahn mek wi briev laik ou dem briev, wi afi lorn fi wiself. Jos laik ou ef sumadi a tiich wi fi du sitn wi afi wach dem an du jos laik wa dem du, a siem so ef wi waahn fi briev wi afi luk pan di sitn dem we ada piipl we briev a du an du laik dem. So ef wi waahn fi briev laik Daniyel, wi fi nuo Gad Wod gud gud. An mek shuor se wi an Jeuova a gud gud fren. An wi fi prie tu im aafn an mek im nuo wa a gwaan wid wi. An wi fi biliiv se Jeuova aalwiez a-go a elp wi laik ou im did a elp Daniyel. So wen sitn apm we wuda tes fi si ef wi riili a chos iina Jeuova, wi a-go briev an shuo se wi a chos iina im.

9. Wa a som gud sitn we kyan apm kaaz wi briev?

⁹ A nof gud tingz kyan gwaan fi wi wen wi briev. Luk pan wa did apm tu Ben kaaz im did briev. Im did a go a wan skuul iina Jormani we evribadi did biliiv se a no Gad mek piipl an wa di Baibl se bout dat a jos mek op tuori. Wan die Ben did shuo se im briev wen im did get di chaans fi tan op infronta di klaas an tel dem wa mek im biliiv se Gad mek evriting. Afta im du dis, Ben se: “Mi tiicha lisn tu mi gud an im print out di sitn dem we mi yuuz fi shuo se wa mi a se a chuu. An im gi dem tu aal a di pikni dem iina di klaas. Uol iip a di pikni dem lisn tu mi. An dem big mi op chuu mi did briev.” So wa apm tu Ben mek wi si se wen wi briev it mek ada piipl av nof rispek fi wi. An it kyan mek ada piipl staat fi sorv Jeuova tu. So dis mek wi si se wi fi chrai aad an briev op wiself.

10. Wa a wan kain-a lov we di Baibl taak bout?

¹⁰ Iina di Baibl, yu av wan Iibruu wod we dem yuuz fi taak bout di kain-a lov we mek wi “stik tu” wan neda sumadi. Muor taim dem yuuz da wod ya fi taak bout di kain-a lov we Gad av fi im piipl dem. An a da siem wod ya dem yuuz fi taak bout di kain-a lov we Gad piipl dem av fi dem wan aneda tu. (2 Sam. 9:6, 7) Da lov ya kyan get chrangga an chrangga. Mek wi luk pan wa Daniyel du fi shuo se im av da kain-a lov ya fi Jeuova.

11. Wen Daniyel did op iina iej, wa dem did du fi tes fi si ef im wuda stik tu Jeuova? (Luk pan di picha pan di kova.)

¹¹ Difrant tingz apm iina Daniyel laif we tes fi si ef im wuda stik tu Jeuova. Bot wan a di bigis ting we apm tu im fi tes fi si wa im wuda du a wen im a 90 ad. Da taim de di Miid an di Porjan dem did kyapcha Babilan, an a wan king we niem Daraiyos did a ruul. Di big man dem we wok wid di king neva laik Daniyel, an dem neehn rispek Jeuova niida. So dem plan op fi kil Daniyel. So ier wa dem du: Dem plan op sitn fi si ef Daniyel wuda stik tu Jeuova ar ef im wuda stik tu di king. An aal Daniyel did afi du fi shuo se im a stik tu di king a fi du laik evribadi an tap prie tu Jeuova fi 30 die. Bot Daniyel neva du dat, an kaa a dat dem chuo im iina di plies we dem kip di laiyan dem. Bot kaa im stik tu Jeuova, Jeuova neehn mek di laiyan dem du im wan ting. (Dan. 6:12-15, 20-22) Ou wi kyan du laik Daniyel an shuo se wi a-go stik tu Jeuova no mata wa?

12. Wa did elp Daniyel fi stik tu Jeuova no mata wa?

¹² Jos laik wa wi se aredi, ef wi lov sumadi wi a-go stik tu dem. An a das wai Daniyel did stik tu Jeuova no mata wa, kaa im lov Im. An im tingk bout ou Jeuova stie an aal a di gud sitn dem we Im did du fi im. (Dan. 9:4) An Daniyel did api fi aal a di gud sitn dem we Jeuova du fi im piipl dem tu.​—Dan. 2:20-23; 9:15, 16.

13. (a) Wa a som a di sitn dem di yong piipl dem go chuu fi si ef dem a-go stik tu Jeuova? Tel wi wa did apm tu Grayam. (Luk pan di picha tu.) (b) Laik wa wi si iina di vidiyo, ou wi kyan ansa sumadi ef dem aks wi ef Jeuova Witnis bak di man dem we sliip wid man an di uman dem we sliip wid uman?

 ¹³ Jos laik Daniyel, di pikni dem av uol iip a piipl roun dem we no rispek Jeuova an wa im se rait an rang. An dem no laik nobadi we lov Jeuova. Som a dem aal chrai fi fuos di yong piipl dem fi no stik tu Jeuova an du wa im waahn dem fi du. Luk wa did apm tu Grayam c we liv iina Aschrieliya. Im go chuu som uol iip a sitn wen im did a go a ai skuul. Im tiicha aks di pikni dem wa dem wuda du ef wan a dem fren we a bwai se dem laik bwai an ef wan a dem fren we a gorl se dem laik gorl. Den di tiicha se aal a uu we wuda bak dem fren fi tan op pan wan saida di ruum, an di ada wan dem fi tan op pan di neda said. Grayam se, “Di uol klaas go tan op pan di said we shuo se dem wuda bak dem fren. Onggl mi an wan neda Jeuova Witnis did de pan di neda said.” Bot dat a no di bigis tes we Grayam go chuu fi si ef im wuda riili stik tu Jeuova. Grayam se: “Fi di res a di taim iina di klaas, di pikni dem an di tiicha did a mak wi. Mi chrai fi tel dem wa mi biliiv iina wan nais wie ino, bot dem neehn a lisn tu mi. Mi neehn laik it se dem did a mak mi ino, bot mi did api se mi kuda tel dem wa mi biliiv an se mi no du wa dem did waahn mi fi du.” d

14. Wa a wan sitn we wi kyan du we a-go mek wi lov Jeuova an stik tu im no mata wa?

¹⁴ Ef wi lov Jeuova bad wi a-go stik tu im no mata wa jos laik ou Daniyel did stik tu im. An wi get fi lov Jeuova da kain-a wie de wen wi get fi nuo di wiez dem we im av. An wan ting we kyan elp wi fi du dat a wen wi stodi an get fi nuo bout di ting dem we im mek. (Ruo. 1:20) Ef yu waahn fi lov an rispek Jeuova muor, yu kyan luk pan di sitn dem iina di paat we niem “A Sumadi Did Mek It?” an yu kyan riid di pamplet dem we niem Was Life Created? an The Origin of Life​—Five Questions Worth Asking. Dis a wa wan yong sista we kom fram Denmaak we niem Esta se bout dem pamplet ya, shi se: “Di wie ou dem taak bout tingz iina it mek sens. Di pamplet dem no tel wi wa wi fi biliiv bot dem jos tel wi ou it go fi mek wi mek op wi main fi wiself ef Gad de fi chuu.” An Ben we wi did taak bout aredi se: “Dem pamplet ya elp mi fi chos iina Gad muor an dem mek mi nuo se a Gad riili mek evriting.” Wen wi stodi dem sitn ya we tel wi bout ou laif kom bout, it a-go mek wi si se wa di Baibl se a chuu wen it se: “Ana an rispek tu yu, wi Laad an wi Gad, yu fi get di priez an ana an powa, kaaz yu mek evriting.”​—Rev. 4:11. e

15. Wa a wan neda ting we wi kyan du so dat wi kyan get fi lov Jeuova muor?

¹⁵ Wan neda ting we kyan mek wi lov Jeuova muor a wen wi luk pan ou Jiizas did liv im laif. A dat wan yong sista we niem Samira we kom fram Jormani did du. Shi se: “Kaa mi get fi nuo Jiizas, a dat mek mi get fi nuo Jeuova beta.” Wen shi a pikni, shi neva andastan ou dem se Jeuova kyan fiil it fi wi, bot shi kuda andastan ou Jiizas kuda du dat. Shi se: “Mi did laik Jiizas kaa im did lov di pikni dem  an laik fi spen taim wid dem.” An di muor shi get fi nuo bout Jiizas a di muor shi get fi lov Jeuova. Shi se: “Likl bai likl mi get fi si se Jiizas du tingz laik im Faada, an kaa a dat di tuu a dem komiin laka wan sumadi. So mi get fi si se wan a di riizn we mek Jeuova sen Jiizas kom pan di ort a dat wi kyan get fi nuo im Jeuova beta.” (Jan 14:9) So ef yu waahn fi get fi lov Jeuova muor, yu niid fi tek di taim fi lorn muor bout Jiizas, an ef yu du dat yu a-go get fi nuo Jeuova muor an yu a-go stik tu im tu.

16. Wen wi nuo ou fi stik tu sumadi, ou it elp wi? (Saam 18:25; Maika 6:8)

¹⁶ Piipl we dem an dem fren a gud fren fram lang taim, a kaa dem nuo ou fi stik tu dem wan aneda. (Ruut 1:14-17) Pan tap a dat, di piipl dem we a stik tu Jeuova kyan fiil gud iina demself kaa dem nuo se Jeuova a-go stik tu dem tu. An a dat im pramis wi se im a-go du. (Riid Saam 18:25; Maika 6:8.) It no mek yu fiil gud fi nuo se di Gad we mek evriting waahn fi lov yu an stik tu yu no mata wa? An wen im du dat, nobadi, no chraiyal, nat iivn ef yu ded, dat a-go mek im tap lov yu! (Dan. 12:13; Luuk 20:37, 38; Ruo. 8:38, 39) So wi fi du lak Daniyel an stik tu Jeuova no mata wa.

17-18. Wa a som ada tingz wi kyan lorn fram Daniyel?

¹⁷ Iina da lesn ya, a jos tuu a Daniyel wiez dem wi did luk pan, bot a uol iip a ada sitn wi kyan lorn fram im. Laik Jeuova gi im uol iip a difrant difrant vijan an jriim, an wen Jeuova jriim sumadi, Jeuova mek im kuda tel di sumadi wa dem jriim miin. Nof a di sitn dem we Daniyel se wuda apm, apm aredi. An im mek wi nuo som a di sitn dem we a-go apm iina di fyuucha tu. Dem sitn ya av fi du wid evribadi we de pan di ort.

¹⁸ Iina di neda lesn, wi a-go luk pan tuu a di sitn dem we Daniyel se wuda apm. Wen wi get fi andastan wa dem sitn ya miin, it no mata ef wi yong ar uol, it a-go elp wi fi nuo di rait ting fi du, an it a-go elp wi fi briev an stik tu Jeuova no mata wa apm tu wi iina di fyuucha.