• “Mi fiil laik se mi ozban did a sliip wid sumadi els uova an uova agen.”

• “Mi did fiil woklis an shiem, an laik se mi neehn luk gud.”

• “Mi fiil laik se mi kudn taak tu nobadi bout it. So mi neehn mek nobadi nuo wa a gwaan so dat dem kuda elp mi.”

• “Mi fiil laik se Jeuova neehn bizniz wid mi.”

Dem sitn ya a we som waif se, kaa dem ozban did a wach bluu muuvi an dem ting de. An ef dis a sitn we wan waif ozban a du we nobadi no nuo bout fi wol iip a mont ar ier, shi mait-a fiil laik se shi kyaahn chos im at aal. Wan waif se, “Mi wanda tu miself se: ‘A uu da man ya saida mi? A wa els im a du we mi no nuo bout?’”

Da paat ya rait fi di waif dem we ozban en op a wach bluu muuvi an dem ting de. a Wi a-go luk pan som sitn iina di Baibl we a-go elp fi osh ar an mek ar nuo se Jeuova di de fi ar, an it a-go elp ar fi fiil beta an fi du di sitn dem we a-go elp ar fi jraa niera an niera tu Jeuova. b

Yu kyaahn tap yu ozban fram du wa im waahn fi du, bot yu kyan du som sitn we kyan elp yu fi no fiil so bad, an we kyan mek yu av piis iina yu main an aat. Si som sitn ya we yu kyan du an we yu no fi du.

No bliem yuself ef yu ozban a du dat. Wan waif mait-a fiil se a fi dem faalt wa mek dem ozban a du dat. Alice c did fiil laik se a sitn did rang wid ar wa mek ar ozban a wach bluu muuvi an dem ting de. An shi staat fi wanda, ‘Wa mek mi ozban waahn fi luk pan ada uman?’ An som ada waif bliem demself kaa a ou dem gwaan wen dem fain out se dem ozban a wach bluu muuvi an dem ting de kaa dem fiil se dem onggl a mek tingz wos. Danielle se, “Mi did luk pan ou mi a gwaan an it mek mi fiil se mi a mash op mi marid laif kaaz mi aalwiez beks.”

 Ef a so yu fiil, jos nuo se Jeuova no bliem yu fi wa yu ozban a du. Jiemz 1:14 se: “Bot wen sumadi fiil fi du wa rang, a siek-a di wikid sitn we iina dem aat. Di sitn dem iina dem aat presha dem fi du wa rang.” (Ruo. 14:12; Fil. 2:12) Jeuova no bliem yu, bot it wot nof tu Jeuova se yu a stik tu im.​—2 Kr. 16:9.

An yu fi memba se di fak se yu ozban lov fi wach bluu muuvi an dem ting de, dat no miin tu se yu no luk gud ar yu a du sitn rang. Kaa piipl we stodi an nuo nof bout piipl we lov fi wach bluu muuvi an dem ting de se no uman kyaahn satisfai dem piipl de.

No wori wori op yuself tu moch. Catherine se di onggl ting we shi fain arself a tingk bout evridie a se ar ozban lov fi wach bluu muuvi an dem ting de. Frances se: “Wen mi no nuo wich paat mi ozban de, mi staat fi wori nof nof.” An som ada waif se dem fiil shiem wen dem de mongks som ada breda an sista we nuo wa dem ozban a du. An som fiil se dem afi diil wid it pan dem uon kaa nobadi els no nuo wa dem a go chuu.

Notn no rang ef yu fiil dem kain-a wie ya. Bot ef yu onggl a tingk bout dem sitn ya, it onggl a-go mek yu fiil wos. Wa yu kyan du a tingk bout di sitn dem we yu kyan du we kyan mek yu jraa niera an niera tu Jeuova. An wen yu dat, it a-go mek yu fiil chrangga an chrangga iina yuself.​—Sa. 62:2; Ifii. 6:10.

It mait-a kyan elp yu ef yu riid bout som uman iina di Baibl we tingz did a bada dem an wen dem prie tu Jeuova it mek dem fiil beta. Jeuova no aalwiez du sitn bout di prablem we dem a go chuu, bot im mek dem av piis iina dem aat. Laik di Baibl tel wi bout Ana we did fiil bad bout wa did a gwaan wid ar. Bot wan a di taim shi prie tu Jeuova aad aad bout wa shi a go chuu. An shi fain se shi staat fi fain piis iina ar aat aalduo shi neehn nuo ou tingz a-go wok out.​—1 Sam. 1:10, 12, 18; 2 Kor. 1:3, 4.

Aks di elda dem iina di kanggrigieshan fi elp yu. “Dem a-go komiin laik somwe we yu kyan go tu fi kip sief fram di briiz, an dem a-go bi wan plies we yu kyan go fi kip sief fram di staam.” (Aiz. 32:2) Dem mait-a aal kyan tel yu wan sista we yu kyan go taak tu an mek dem nuo ou yu fiil, we kyan elp yu fi fiil beta.​—Pr. 17:17.

Yu mait-a kyan elp yu ozban fi no wach bluu muuvi an dem ting de. Di Baibl mek wi nuo se  “wen tuu sumadi wok tugeda” fi du sitn, it aalwiez wok out beta. (Iik. 4:9-12) Piipl we stodi an nuo nof bout piipl we wach bluu muuvi an dem ting de se wen di waif an ozban wok tugeda fi elp di wan we a wach di bluu muuvi an dem ting de, tingz wok out beta, an it elp dem fi staat chos dem wan aneda agen tu.

Bot yu onggl kyan go elp im ef im waahn elp. An wan a di ting we im afi du a aks Jeuova an di elda dem fi elp im. (2 Kor. 4:7; Jmz. 5:14, 15) An im afi du tingz fi kip we fram tingz we a-go mek im waahn fi wach bluu muuvi an dem ting de​—laik yu si im riili a chrai no fi yuuz im fuon an tablit an dem ting de sortn taim ar tu moch. (Pr. 27:12) An yu fi luk fi si ef im a tek di elp we im a get, an ef im riili a tel di chuut bout wa im a du. Ef yu si se im a du dem sitn ya, yu kyan elp im.

Bot wa yu kyan du fi elp im? Luk pan Felicia we ar ozban Ethan did lov fi wach bluu muuvi an dem ting de fram im a pikni. Felicia du tingz fi mek it iizi fi Ethan taak tu ar bout ou im fiil. Ethan se: “Mi taak tu mi waif an mek ar nuo ou mi riili fiil. An shi elp mi fi mek op mi main bout wa an wa mi a-go wach an wa mi naa go wach. An den shi chek fi si ou mi a gwaan. An aalduo mi kyan go pan di intanet, shi du tingz fi elp mi so dat mi kyaahn go pan it aal di taim.” An aalduo Felicia fiil a wie fi nuo se Ethan lov fi wach bluu muuvi an dem ting de, shi se: “Aalduo mi did fiil beks bout it, a no dat elp im fi tap dwi’it. So afta wi don diil wid fi’im prablem dem, it mek im redi fi si ou im kyan elp mi fi diil wid ou mi fiil.”

Wen wan ozban an waif taak bout tingz dem kain-a wie de, it no onggl elp di ozban fi tap wach bluu muuvi an dem ting de, bot it elp im waif fi staat fi chos im agen. An wen wan ozban tel im waif ou im riili fiil bout tingz ar mek ar nuo wich paat im de an wa im a du, im mek ar si se shi kyan riili chos im.

Yu tingk se yu kyan elp yu ozban tu? Ef yu fiil se yu kyan elp im, di tuu a unu kyan riid an taak bout da paat ya. Wen unu a riid da paat ya, yu ozban fi a dwi’it kaa im waahn fi tap wach dem sitn ya so das yu kyan staat fi chos im agen. An im niid fi tingk bout ou yu fiil bout it an wa it a du tu yu. An wen yu a riid da paat ya an a taak bout it wid im, yu fi waahn fi du evriting we yu kyan du fi elp im. An mek im nuo se yu waahn fi chos im agen. An di tuu a unu fi chrai an fain out wa mek som piipl lov fi wach bluu muuvi an dem ting de, an wa an wa piipl kyan du fi tap dwi’it. d

 An ef unu fried se wen unu a du dis unu a-go kos an galang bad, unu kyan aks wan elda we di tuu a unu aarait wid fi de de wid unu wen unu a taak bout it. An memba se aal ef im tap wach bluu muuvi an dem ting de, yu mait no staat fi chos im siem taim. Bot yu no fi gi op. Luk fi di likl sitn dem we shuo se unu a du beta. An nuo se ef unu tek unu taim wid unu wan aneda, likl bai likl tingz a-go get beta iina unu marid laif.​—Iik. 7:8; 1 Kor. 13:4.

Wa ef yu ozban did tap wach it an den im staat fi wach it agen? Dat no mos miin tu se im no fiil bad bout it an im kyaahn tap. Kaa ef a sitn we im fain aad fi tap du, a mait-a sitn we im afi go chogl wid fi di res a im laif. Im mait staat fi du it agen aal ierz afta im tap dwi’it. So ef im a-go mek shuor se dat no apm agen, im afi wok aad fi du di sitn dem we unu did plan se im did a-go du, aal wen im fiil se im gud. (Pr. 28:14; Mat. 5:29; 1 Kor. 10:12) Im afi wok aad “fi tingk iina wan nyuu wie” an fi “iet wa bad”. Dat miin tu se im fi iet bluu muuvi an dem ting de, an im fi iet fi du notn tu imself we mek im fiil laik se im a av seks. (Ifii. 4:23; Sa. 97:10; Ruo. 12:9) Ef yu si se im redi fi du dem sitn ya, dat miin tu se im kyan get elp fi tap. e

Bot wa ef it luk laik se yu ozban no waahn fi tap? Dis mait-a mek yu fiil beks an sad laik sumadi sel yu out. Bot no wori yuself, taak tu Jeuova bout it an lef im wid it. (1 Pii. 5:7) Jos gwaan stodi Gad Wod an sidong an tingk bout wa yu a riid an prie tu im, an dis wi elp yu fi gwaan jraa niera tu Jeuova. An wen yu du aal a dis, Jeuova a-go jraa niera tu yu tu. Iina Aizaiya 57:15, Jeuova mek wi nuo se im di de wid di wan dem we fiil laik se dem mash op an kyaahn go no muor. An im waahn fi mek dem fiil api agen. Chrai fi bi di bes Kristiyan yu kyan eva bi. An gwaan mek di elda dem elp yu. An nuo se yu ozban kyan stil chienj, so tingz kyan get beta iina di fyuucha.​—Ruo. 2:4; 2 Pii. 3:9.