1. Wa kyan elp wi fi lov fi stodi bout di sitn dem we di Baibl se wuda apm bifuo dem apm?

 WAN breda we niem Ben se: “Mi lov fi stodi bout di sitn dem we di Baibl se a-go apm.” Yu lov fi du dat tu? Ar yu fried fi stodi bout dem sitn de? Ar yu mait-a fiil laik se it buorin fi sidong an stodi bout dem sitn de. Bot wen yu andastan wa mek Jeuova put dem sitn ya iina di Baibl, dat mait-a mek yu waahn fi stodi bout di ting dem we Jeuova se a-go apm bifuo dem apm.

2. Wa wi a-go luk pan iina da lesn ya?

² Iina da lesn ya, wi a-go luk pan wa mek wi fi stodi bout di sitn dem we di Baibl se a-go apm an ou wi kyan du dat. An wi a-go luk pan tuu a di sitn dem we Daniyel se wuda apm bifuo dem apm an ou it kyan elp wi wen wi andastan wa dem miin.

3. Ef wi waahn fi andastan di sitn dem we di Baibl se a-go apm, wa wi fi du?

³ Ef wi waahn fi andastan di ting dem we di Baibl se a-go apm, wi afi aks Jeuova fi elp wi. Se yu an wan a yu fren dem a go somwe we yu no nuo gud, an im nuo wich paat unu de an we unu a go. Yu wuda fiil gud se yu fren kom wid yu, no chuu? A siem so Jeuova nuo wa a gwaan iina di worl ya nou an im nuo wa a-go gwaan iina di fyuucha. So ef wi waahn fi andastan di sitn dem we di Baibl se a-go apm, wi afi ombl wiself an aks Jeuova fi elp wi.​—Dan. 2:28; 2 Pii. 1:19, 20.

4. Wa mek Jeuova mek dem rait dong tingz iina di Baibl we a-go apm bifuo dem apm? (Jerimaiya 29:11) (Luk pan di picha tu.)

 ⁴ Jos laik ou wan mada an faada waahn gud fi dem pikni, a siem so Jeuova waahn im pikni dem fi av wan api fyuucha. (Riid Jerimaiya 29:11.) Bot Jeuova no komiin laik wi mada an faada dem, kaa im kyan tel wi wa a-go gwaan iina di fyuucha. So im mek dem rait dong tingz iina di Baibl so das wi kyan nuo wa a-go apm iina di fyuucha. (Aiz. 46:10) Di fak se Jeuova mek dem rait dong dem sitn ya shuo se im lov wi. Bot ou wi kyan nuo fi shuor se di sitn dem we di Baibl se a-go apm, a-go apm fi chuu?

5. Bies pan wa did apm tu Max, wa di yong piipl dem kyan lorn?

⁵ Wi pikni dem we go a skuul av uol iip a ada pikni roun dem we no rispek di Baibl. An somtaim dem se som sitn an du som sitn we mek wi pikni dem staat fi wanda ef wa dem biliiv a chuu. Tingk bout wa did apm tu wan breda we niem Max. Im se: “Mi staat fi wanda ef mi mada an faada a tiich mi di chuut, an ef di Baibl riili kom fram Gad.” Bot ou dem did elp im? Im se: “Aalduo dem did a wori bout wa mi a se, dem neehn rosh mi an mek mi fiil bad.” An im mada an faada did yuuz di Baibl fi ansa di kwestiyan dem we im did av. Bot Max du sitn fi imself tu. Im se: “Mi stodi bout tingz we di Baibl se wuda apm bifuo dem apm an mi taak bout dem sitn de wid som ada pikni tu.” An kaaz a wa im get fi fain out, im se: “Afta dat, mi nuo fi shuor se di Baibl kom fram Gad.”

6. Ef yu no shuor se di sitn dem iina di Baibl a di chuut, wa yu fi du, an wa mek yu fi dwi’it?

⁶ Ef yu fiil laik Max an staat fi wanda ef di sitn dem iina di Baibl a chuu, yu na’afi fiil no wie, bot yu stil afi du sitn bout it. Kaa yu si wen yu staat fi wanda-wanda, it komiin laik wen aiyan staat fi get rosti. An ef sitn get rosti an yu no kliin it aaf, it a-go mash op. A siem so ef yu a wanda ef di sitn dem iina di Baibl a chuu an yu no diil wid it, it onggl a-go get wos. So yu afi go du sopm bout it. Yu kyan du sopm bout it wen yu aks yuself se, ‘Mi riili biliiv wa di Baibl se bout wa a-go gwaan iina di fyuucha?’ An yu si ef yu no shuor, den yu fi stodi bout di sitn dem we di Baibl se a-go apm we apm aredi. Bot ou yu kyan du dat?

7. Wen Daniyel did a stodi bout di ting dem we di Baibl se a-go apm, ou im did stie an ou im did dwi’it? (Daniyel 12:10) (Luk pan di picha tu.)

⁷ Daniyel stodi bout tingz we di Baibl se a-go apm fi di rait riizn, kaa im did waahn fi nuo di chuut. An a dat wi fi du tu. An wan neda ting a dat Daniyel did ombl kaa im nuo se Jeuova a-go mek di wan dem we nuo im an a liv rait andastan wa di Baibl a se. (Dan. 2:27, 28; riid Daniyel 12:10.) Daniyel aalwiez a luk tu Jeuova fi elp im, an dat mek wi si se im ombl. (Dan. 2:18) An wen im a stodi, im stodi gud gud kaa im riid an sorch op iina di paat a di Baibl  we did de bout dem taim de. (Jer. 25:11, 12; Dan. 9:2) Ou yu kyan du laik Daniyel?

8. Wa mek som piipl no waahn fi biliiv se di sitn dem we di Baibl se a-go apm a-go apm fi chuu, bot wa wi fi du?

⁸ Tingk bout wa mek yu a du wa yu a du. Laik ef yu a stodi bout tingz we di Baibl se a-go apm, yu a dwi’it kaa yu riil waahn fi nuo di chuut? Ef a dat mek yu a-go dwi’it, Jeuova a-go elp yu. (Jan 4:23, 24; 14:16, 17) Bot som piipl mait-a stodi bout di ting dem we di Baibl se a-go apm jos fi pruuv se di Baibl no kom fram Gad kaa dem no waahn Gad fi tel dem wa fi du. Bot dat a no di riizn wa mek wi fi stodi. Pan tap a dat, fi yu andastan wa di Baibl se a-go apm, yu afi ombl.

9. Ou wi fi stie ef wi waahn fi andastan di sitn dem we di Baibl se a-go apm? Wa mek yu se so?

⁹ Wi fi ombl wiself. Jeuova se im a-go elp di wan dem we ombl demself. (Jmz. 4:6) So wi fi prie tu Jeuova an aks im fi elp wi fi andastan di sitn dem we di Baibl se a-go apm. An ef wi ombl, wi a-go tek di elp we wi a get fram di waiz sorvant, kaa a di waiz sorvant Jeuova a yuuz fi mek wi nuo di sitn dem we im waahn wi fi nuo an di taim wen im waahn wi fi nuo dem. (Luuk 12:42) Jeuova lov wen tingz ron sortn an sortn wie, so it mek sens se im onggl a-go yuuz wan wie fi mek wi andastan di chuut we de iina im Wod.​—1 Kor. 14:33; Ifii. 4:4-6.

10. Wa wi kyan lorn fram wa Esta did du?

¹⁰ Wi fi stodi gud gud. Wa yu kyan du a tingk bout wan a di sitn dem we di Baibl se a-go apm we yu waahn fi lorn muor bout an stodi da wan de fos. A dat wan sista we niem Esta did du. Shi did waahn fi nuo muor bout wa di Baibl av fi se bout di Mesaiya we a-go kom. Shi se: “Wen mi did a 15, mi did staat fi sorch aad fi fain out bout di sitn dem we di Baibl se wuda apm tu Jiizas we did rait dong bifuo im kom pan di ort.” An wa shi riid bout di sitn we dem kaal Ded Sii Skruol, we dem fain som skripcha pan, did elp ar. Shi se: “Som a dem sitn ya did rait fram bifuo Jiizas did kom pan di ort, so di sitn dem we dem did se a-go apm mos did kom fram Gad.” An shi se: “Mi did afi riid dem sitn ya nof taim fi get wa dem a se.” Bot shi did api fi du dat, an shi se: “Mi si fi miself klier klier se di sitn dem we di Baibl se wuda apm a chuu.”

11. Wen wi get fi nuo fi wiself se di sitn dem we rait dong iina di Baibl a chuu, ou dat kyan elp wi?

¹¹ Wen wi si se som a di sitn dem we di Baibl se wuda apm apm aredi, it mek wi si se wi kyan riili chos Jeuova an wi kyan chos di wie ou im se wi fi liv wi laif. An pan tap a dat, it mek wi si se no mata wa wi a go chuu ya nou, wi kyan luk faawod tu di gud sitn dem we di Baibl se a-go apm iina di fyuucha. Mek wi luk pan tuu sitn we Daniyel rait dong bout wa a-go apm we a apm nou. Wen wi get wa dem a se, dem a-go elp wi fi du di rait ting.

12. Di fut dem we mek outa “aiyan an di klie we saaf” av fi du wid wich govament? (Daniyel 2:41-43)

¹² Riid Daniyel 2:41-43. Iina di jriim we Nebikadneza did av we Daniyel did mek im nuo wa it miin, di stachu fut dem we di king did si did mek outa ‘aiyan an klie we saaf we did miks op tugeda.’ Wen wi luk pan wa di Baibl se ya-so iina Daniyel an wa di Baibl se iina Revilieshan, wi get fi si se di fut paat a di stachu av fi du wid Britn an Merika we a ron tingz iina di worl ya nou. An wen it kom aan tu dem, Daniyel se “da govament de a-go chrang bot it a-go kain-a wiik tu.” Wa mek yu tingk se it a-go kain-a wiik tu? It se so kaa di piipl dem a di klie we saaf, an a dem a di wan dem we a-go mek di govament kyaahn du wa it waahn fi du, so dem a-go mek di govament kain-a wiik tu. b

13. Kaa wi get fi andastan wa Daniyel se wuda apm iina dem vors ya, wa a tuu big sitn wi get fi nuo ya nou?

¹³ Fram wa Daniyel se bout di stachu an di fut dem, wi lorn se: Wan, Britn an Merika we a ron tingz iina di worl ya nou chrang iina wan kain-a wie. Laik wen di fos Worl Waar an di sekan Worl Waar did a gwaan, a dem mek di said we dem de pan win. Bot dem a get wiika an wiika kaa di piipl dem we dem a ruul uova naa mek dem du aal a wa dem waahn fi du. An di sekan ting we wi lorn a dat da govament ya a-go bi di laas wan we a ron tingz bifuo Gad yuuz fi im Kindom govament fi get rid a aal a di govament dem we a ruul pan ort ya nou. An aalduo som a di taim som a di ada govament dem mait-a a gwaan laik dem big an bad, non a dem naa go tek uova fram Britn an Merika. Wi nuo dis kaa di Baibl taak bout “wan stuon” we av fi du wid Gad govament we a-go mash op di stachu fut, an wi don nuo aredi se di fut dem av fi du wid Britn an Merika we a wok tugeda laik wan govament. So dem a-go bi di laas govament we a-go a ron tingz iina da worl ya.​—Dan. 2:34, 35, 44, 45.

14. Ou kaa wi andastan we Daniyel did a se bout di stachu fut dem, it kyan elp wi fi liv wi laif di bes wie?

¹⁴ Ef yu fiil se wa Daniyel se bout di stachu fut we mek outa aiyan an klie a chuu, yu naa go liv yu laif iina wan wie fi shuo se yu lov moni an dem ting de kaa yu wuda nuo se da worl ya suun don. (Luuk 12:16-21; 1 Jan 2:15-17) An wen yu andastan wa Daniyel did a se tu, it a-go elp yu fi si se yu fi go priich tu piipl an tiich dem. (Mat. 6:33; 28:18-20) Aks yuself da kwestiyan ya, ‘Di sitn dem we mi du shuo se mi nuo fi shuor se Gad Kindom govament a-go get rid a aal a di govament dem we de pan di ort?’

15. A uu a “di king a di naat” an “di king a di sout” ya nou? (Daniyel 11:40)

¹⁵ Riid Daniyel 11:40. Daniyel chapta 11 taak bout tuu govament we a fait fi ron tingz iina di worl. Wen wi luk pan dem sitn de we Daniyel se wuda apm an ada tingz we di Baibl se wuda apm, wi get fi fain out se “di king a di naat” a Rosha an di ada govament dem we a bak im, an “di king a di sout” a Britn an Merika we  jain op tugeda fi ron tingz laik wan govament. c

16. Wa a som a di sitn dem we di breda an sista dem we liv iina di konchri dem we “di king a di naat” a ruul iina a go chuu?

¹⁶ Jeuova piipl we liv iina di konchri dem we di “king a di naat” a ruul dem, a mek tingz aad fi dem kaa a wa dem biliiv iina. Dem a biit op som a dem, an fling dem iina prizn. Bot di breda an sista dem no mek wa dem a du mek dem fried, bot wa “di king a di naat” a du a mek dem chos iina Jeuova muor. Wi se dat kaa di breda an sista dem nuo se dis a gwaan kaa a wa Gad did mek Daniyel rait dong se wuda apm tu im piipl dem. d (Dan. 11:41) Kaa wi nuo aal a dis, it mek wi gwaan chos iina Jeuova muor an muor an du wa im waahn wi fi du.

17. Wa a som a di sitn dem we Jeuova piipl dem we liv iina di konchri dem we “di king a di sout” a ruul uova a go chuu?

 ¹⁷ Wan taim “di king a di sout” did a mek tingz aad fi Jeuova piipl dem tu ino. An wi si dis wen Worl Waar 1 an 2 did a gwaan wen dem put nof a wi breda an sista dem iina prizn kaa dem neehn a tek no said. An dem tap som a di Jeuova Witnis pikni dem fram kom a skuul kaa dem neehn a tek no said niida. Bot nowadiez Jeuova piipl dem we a liv iina di konchri dem we “di king a di sout” a ruul iina a go chuu som difrant kain-a tes. Laik aalduo dem naa go vuot wen ilekshan a gwaan, dem mait-a fiil laik dem waahn fi bak wan a di paati dem kaa iina dem aat dem mait-a laik wan a di paati dem muor dan di neda wan. Bot wi si se wi no fi tek no said wen it kom aan tu palitiks an dem ting de, nat iivn iina wi aat.​—Jan 15:18, 19; 18:36.

18. Ou wi fi fiil wen wi si “di king a di naat” an “di king a di sout” a fait gens dem wan aneda? (Luk pan di picha tu.)

¹⁸ Di piipl dem we no biliiv iina wa di Baibl se a-go apm mait-a fiil fried wen dem si “di king a di sout” an “di king a di naat” a “fait”. (Dan. 11:40) Dem tuu said a govament ya av inof sitn fi kil aaf evribadi we de pan di ort. Bot wi na’afi fried kaa wi nuo se Jeuova naa go mek dem get fi du dat. (Aiz. 45:18) So wen wi si wa dem a du wid dem wan aneda, it onggl mek wi chos iina Jeuova muor an it mek wi nuo se da worl ya suun don.

19. Wen it kom aan tu di ting dem we di Baibl se a-go apm, wa wi afi go jos nuo se?

¹⁹ Som a di sitn dem we di Baibl se a-go apm, wi no nuo ou dem a-go apm. An a siem so Daniyel neehn andastan evriting we im did rait dong niida. (Dan. 12:8, 9) So jos bikaa wi no andastan ou sitn we di Baibl se a-go apm a-go apm no miin tu se it naa go apm fi chuu. Bot wi nuo fi shuor se Jeuova a-go mek wi nuo wa wi niid fi nuo di rait taim jos laik ou bak iina di die im mek im piipl dem nuo wa dem fi nuo di rait taim.​—Iemos 3:7.

20. Wa a som big sitn we di Baibl se a-go apm we suun apm, an wa wi fi gwaan du?

²⁰ Piipl a-go staat fi se “wi av piis an evriting sief.” (1 Tes. 5:3) Da taim de, di govament dem a-go ton pan di choch dem we naa sorv Gad di rait wie an get rid a dem. (Rev. 17:16, 17) An den dem a-go ton pan Gad piipl tu. (Izii. 38:18, 19) An afta dat di Aamagedan waar a-go gwaan. (Rev. 16:14, 16) An wi nuo se dem sitn ya suun apm. Bot til da taim de kom, mek wi gwaan du tingz fi mek Jeuova we lov wi si se wi tangk im, an wi du dat wen wi gwaan lorn bout wa di Baibl se a-go apm an elp ada piipl fi lorn bout it tu.