DI LESN FI STODI 31
SANG 12 Griet Gad, Jeuova
Wa Jeuova Du Fi Siev Wi Fram Sin An Det?
“Gad lov di worl so moch dat im gi op im wan dege-dege Bwai Pikni.”—JAN 3:16.
A DIS WI A-GO LUK PAN
Wi a-go luk pan wa Jeuova a du fi elp wi fait gens sin so dat wi kyan mek im api, an wi a-go si ou im saat out tingz so dat wi kyan get fi liv fi eva an no sin.
1-2. (a) A wa a sin, an ou wi kyan fait gens it an win? (Luk pan di paat wi niem “Dis Miin Se” tu.) (b) Wa wi a-go taak bout iina da lesn ya an iina di ada lesn dem iina da Wachtowa ya? (Luk pan di paat tu we niem “Wan Mesij Tu Di Wan Dem We Riid Di Wachtowa Dem” we de iina da Wachtowa ya.)
YU WUDA laik fi nuo umoch Jeuova lov yu? Fi get di ansa fi da kwestiyan ya, yu kyan stodi bout wa im did du fi siev yu fram sin an det. Sin a a wan wikid enimi, an yu aluon kyaahn fait it. Aal a wi sin evridie, an a sin kaaz wi fi ded. (Ruo. 5:12) Bot a no it dat fi wi. Jeuova kyan elp wi fait gens sin, an wi boun fi win!
2 A uova 6,000 ier nou Jeuova a elp piipl fi fait gens sin. An im a du it kaa im lov wi fram di die im mek wi, an im go chuu wol iip fi elp wi fait gens sin. Gad nuo se a sin mek wi ded an im no waahn wi fi ded. Im waahn wi fi liv fi eva. (Ruo. 6:23) Iina da lesn ya, wi a-go get di ansa fi dem chrii kwestiyan ya: (1) Wa Jeuova du fi wi fi frii wi fram sin? (2) Wa piipl iina Baibl taim did du fi mek Jeuova api wid dem? (3) Wa Jiizas did du fi siev wi fram sin an det?
WA JEUOVA DU FI FRII WI FRAM SIN?
3. A wa did kaaz Adam an Iiv fi sin?
3 Wen Jeuova mek di fos man an uman, im did waahn dem fi api, kaa im gi dem wan priti plies fi liv, im marid dem, an im gi dem som nais wok fi du. An dem did fi av nof pikni an ful op di ort an mek di wol ort priti laik di gyaadn a Iidn. A onggl wan ting im tel dem no fi du. An im tel dem se ef dem no du wa im se, den dem a-go en op sin an ded. Wi don nuo wa gwaan aredi, se wan wikid ienjel we neva lov Gad nar dem temp dem fi sin, an dem fala wa im se kaa dem neva chos dem Faada we lov dem. So wi si se wa Jeuova did se, a dat apm. Kaa dem neva du wa im se dem fi du, bier sofarieshan tek dem, dem staat fi get uol an den dem ded.—Jen. 1:28, 29; 2:8, 9, 16-18; 3:1-6, 17-19, 24; 5:5.
4. Wa mek Jeuova iet sin so moch an a elp wi fi du wa im waahn wi fi du? (Ruoman 8:20, 21)
4 Jeuova put wa Adam an Iiv did du iina di Baibl fi mek wi andastan wa mek im iet sin so moch. Wa it du a mek wi an Jeuova no kluos an a it kaaz wi fi ded. (Aiz. 59:2) An a dat mek Sietan, di wikid ienjel we did temp Adam an Iiv, lov sin so moch, an im de de a temp wi fi sin tu. So wen im mek Adam an Iiv sin, Sietan mosi did tingk se im did mash op di plan we Jeuova av fi Adam an Iiv pikni dem. Bot im neehn chienj wa im plan fi du fi wi. So rait afta Adam an Iiv sin, Jeuova du sitn fi mek wi kyan go liv fi eva. (Riid Ruoman 8:20, 21.) Jeuova did nuo se som a Adam an Iiv pikni dem wuda mek op dem main fi lov im an waahn fi du wa im waahn dem fi du. So Jeuova saat out tingz fi elp dem wan ya fi jraa kluos tu im an fi frii dem fram sin an det. Bot a ou Jeuova du dat?
5. A wen Jeuova did mek wi nuo se im a-go get rid a Sietan an mek tingz beta fi wi? Tel wi wa mek yu se so. (Jenisiz 3:15)
5 Riid Jenisiz 3:15. Likl afta Adam an Iiv sin, Jeuova se im a-go get rid a Sietan, an dis mek wi fiil gud. So tingz a-go get beta iina di fyuucha. Jeuova se wan “pikni” a-go bi di wan fi siev piipl. An a da pikni de im a-go yuuz fi get rid a Sietan an fiks aal a di prablem dem we Sietan kaaz. (1 Jan 3:8) Bot da pikni de wuda sofa likl tu, kaaz Sietan wuda mek dem kil im, an dat ort Jeuova bad bad. Bot Jeuova did redi fi mek aal a dat gwaan so dat im kuda siev wi fram sin an det.
WA PIIPL IINA BAIBL TAIM DID DU FI MEK JEUOVA API?
6. A wa Iebl an Nowa an ada piipl we chos iina Gad du so dat dem kuda jraa nier tu Jeuova?
6 Afta Jeuova se wa im did a-go du fi wi iina Jenisiz 3:15, likl bai likl im staat fi mek wi nuo klier klier wa im a-go du fi wi so dat wi kyan get kluos tu im agen. Adam an Iiv sekan bwai pikni, we niem Iebl, did a di fos sumadi fi chos iina Jeuova afta wa apm iina Iidn. Kaa Iebl did lov Jeuova an did waahn fi mek im api an waahn fi jraa nier im, im gi op sakrifais tu Jeuova. An Iebl a did wan shepad, so im tek som a im biebi shiip dem an kil dem an gi op sakrifais tu Jeuova. An Jeuova “did api wid Iebl an fi im aafrin we im gi op.” (Jen. 4:4) An wen piipl laik Nowa did aafa op sakrifais tu Jeuova, kaa dem lov im an chos iina im, im did api wid dem sakrifais tu. (Jen. 8:20, 21) Yu si kaa Jeuova did api wid dem sakrifais ya, it shuo se iivn duo wi a sina, wi kyan mek Jeuova api an jraa nier tu im. b
7. Kaa Iebriyam did redi fi gi op im bwai pikni laik wan sakrifais, wa dat tiich wi?
7 Jeuova did tel Iebriyam fi gi op im son Aizak laik wan sakrifais, bot dis did aad fi im du. Bot kaa im chos iina Jeuova nof, im did redi fi du wa Jeuova se. Bot Jeuova tap im jos bifuo im kil Aizak. So dis mek wi si se Jeuova wuda redi fi gi op im Bwai Pikni, we im lov so moch, laik wan sakrifais fi aal a wi. Ye man, dat mek wi si umoch Jeuova lov wi.—Jen. 22:1-18.
8. Di sakrifais dem we di Izrelait dem did gi op did shuo se Jeuova wuda gi op wa? (Livitikos 4:27-29; 17:11)
8 Wen Jeuova gi di Izrelait dem di Laa fi dem fala, im tel dem se dem fi gi op animal sakrifais so dat dem kyan get paadn fi dem sin. (Riid Livitikos 4:27-29; 17:11.) Dem sakrifais de did shuo se Jeuova wuda gi op wan biga sakrifais fi siev piipl fram sin. A da biga sakrifais de Gad did mek im prafit dem rait bout wen dem taak bout di pikni we wuda sofa an ded. Dem wuda kil da speshal Bwai Pikni de laik ou dem kil wan shiip we dem sakrifais. (Aiz. 53:1-12) Tingk bout it: Jeuova wuda gi op im wan dege-dege Bwai Pikni laik wan sakrifais fi siev piipl fram sin an det. An memba se dis miin yu tu!
A WA JIIZAS DID DU FI SIEV WI?
9. A wa Jan di Baptis did se bout Jiizas? (Iibruu 9:22; 10:1-4, 12)
9 Wan die iina 29 C.E., Jan di Baptis si Jiizas an se: “Unu luk! Si Gad Biebi Shiip de! A im a di wan we a-go mash op an tek we sin fram outa di worl!” (Jan 1:29) Wa di Baibl se ya-so shuo se a Jiizas a di pikni we Gad did taak bout fram lang taim. So wen Jiizas gi op im laif, a da taim de im gi op di sakrifais we Gad did taak bout. An a da taim de wi kuda nuo fi shuor se wan die sin a-go get mash op an don we wid.—Riid Iibruu 9:22; 10:1-4, 12.
10. A ou Jiizas did shuo se im “kom ya” fi piipl we a sin bad?
10 Yu si di piipl dem we fiil laik se sin a bordn dem dong, a dem wan de Jiizas did luk fa an beg dem fi kom ton im falara. Im did nuo se a sin kaaz piipl fi sofa. So im did redi fi elp di man an di uman dem we piipl did nuo se a liv iina sin. Fi elp wi fi andastan wa mek im diil wid piipl we a sin bad da wie de, im se: “Piipl we no sik no niid no dakta, a onggl sik piipl niid dakta.” An im se: “Mi neehn kom ya fi tel piipl we du rait fi ton fram dem rang, a piipl we du rang mi kom ya fa.” (Mat. 9:12, 13) An a dat Jiizas did du fi chuu. Im did tek taim wid di uman we did a wash im fut wid ar yai waata an paadn ar sin dem. (Luuk 7:37-50) An memba se Jiizas did nuo se di Samaritan uman we im taak tu a di wel did a liv wid wan man we shi neehn marid tu, bot a shi im did tiich som speshal tingz fram Gad Wod. (Jan 4:7, 17-19, 25, 26) An memba tu se a sin mek piipl ded, bot Gad gi Jiizas powa fi mek ded piipl kom bak alaiv no mata ef dem a did man, ar uman, uol sumadi, ar likl pikni.—Mat. 11:5.
11. Wa mek di piipl dem we did a liv iina sin did laik Jiizas an waahn fi de roun im tu?
11 So it no fi sopraiz wi se iivn piipl we did a liv iina sin did laik Jiizas an neehn fried fi de roun im niida, kaa im did fiil it fi dem an did waahn fi du sitn fi elp dem. (Luuk 15:1, 2) An yu si piipl laik dat, eniting we dem did du fi shuo se dem a chos iina im, Jiizas wuda big dem op an du tingz fi dem tu. (Luuk 19:1-10) Di wie ou Jiizas did gud an kain tu piipl, it mek wi si se a siem so im Faada tan tu. (Jan 14:9) Di sitn dem we Jiizas se an du shuo se im Faada lov piipl an waahn fi elp evri wan a dem fi fait gens sin an win tu. Di wie ou Jiizas did diil wid piipl, we a liv iina sin, did mek dem waahn fi chienj op dem laif an fala im.—Luuk 5:27, 28.
12. Tel wi som tingz we Jiizas did tiich bout ou im wuda ded an wa wuda apm afta im ded?
12 Jiizas did nuo se di taim did a kom fi dem sel im out an kil im pan di wudn puos. An a muo dan wan taim im did tel im falara dem se dat wuda apm tu im. (Mat. 17:22; 20:18, 19) Im did nuo se wen im gi op im laif laik wan sakrifais, a so im wuda mash op an tek we sin fram outa di worl jos laik wa Jan an di ada prafit dem did taak bout. Wan neda ting we Jiizas did tiich a dat afta im gi op im laif, a da taim de im wuda ‘mek aal kain-a piipl kom tu im.’ (Jan 12:32) So piipl we a liv iina sin we did waahn fi mek Jeuova api wuda afi tek Jiizas az fi dem Laad an fala iina fi im futstep. An ef dem du dat, Gad wuda ‘frii dem fram di powa we sin av uova dem.’ (Ruo. 6:14, 18, 22; Jan 8:32) A das wai Jiizas did redi fi gi op im laif an im neehn fried se im did afi go sofa an ded.—Jan 10:17, 18.
13. Wa a som a di sopm dem we Jiizas did go chuu bifuo im ded, an wa dat mek wi nuo bout Jeuova Gad? (Luk pan di picha tu.)
13 Dem sel out Jiizas, ares im, kos im out, tel lai pan im, se im a kriminal, an aal mek im sofa bad tu. Afta aal a dat, di suoja dem kya im wich paat dem did a-go niel im op pan wan wudn puos an kil im. Iivn duo Jiizas did a sofa chuu aal a dat, Jeuova Gad did a fiil muo pien dan im. Jeuova go chuu dat an neva yuuz im powa fi tap wa a gwaan. Wa mek im wuda sidong an wach im Bwai Pikni go chuu aal a dat? Jiizas se: “Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.”—Jan 3:16.
Wen Jeuova lou dem fi kil im Bwai Pikni, im go chuu di wos kain-a pien fi frii wi fram sin an det (Luk iina paragraaf 13)
14. Kaa Jeuova lou Jiizas fi ded fi wi, wa wi kyan lorn fram dat?
14 Di gi we Jiizas gi op im laif fi wi a di bigis ting we kuda apm fi Jeuova shuo umoch im lov Adam an Iiv pikni dem. It shuo umoch Jeuova lov yu. Im did lou imself fi go chuu di wos kain-a pien so dat im kuda siev yu fram sin an det. (1 Jan 4:9, 10) A chuu man, im waahn fi elp evri wan a wi fi fait gens sin an win tu!
15. Ef wi a-go jraa nier tu Jeuova an get paadn fi wi sin dem, wa wi afi du?
15 Jeuova mek Jiizas kom ded fi wi so dat wi kyan get paadn fi wi sin dem. Bot ef Jeuova a-go paadn wi, wi afi du sitn. Jiizas an Jan di Baptis tel wi wa fi du. Dem se: “Ton we fram unu sin, kaa di die suun kom wen evn a-go ruul uova di worl iina evri wie.” (Mat. 3:1, 2; 4:17) So ef wi waahn Jeuova fi paadn wi a wi sin dem an ef wi a-go jraa nier tu im, wi afi ton we fram wi sin dem. Bot ou wi kyan shuo se wi riili ton we fram wi sin dem, an ou dat kyan elp wi fi mek Jeuova api wid wi aalduo wi a sina? A dat wi a-go luk pan iina di neks lesn.
SANG 18 Tangk Jeuova Fi Sen Im Son Fi Wi
a DIS MIIN SE: Iina di Baibl wen wi si di wod “sin,” it mait-a a taak bout di bad sitn dem we sumadi du, ar wen dem no du wa Jeuova waahn dem fi du. Bot som a di taim “sin” kyan miin se wi no porfek kaaz a wa wi get fram Adam. An a dat mek wi en op ded tu.
