1. Wa Jeuova pramis wi we wi a luk faawod fi get?

 JEUOVA gi aal a wi sitn nais fi luk faawod tu. Som piipl a luk faawod fi liv iina evn we dem naa go ded. (1 Kor. 15:50, 53) Bot muos a wi a luk faawod fi liv pan ort fi eva we wi naa go sik an ded an wi a-go api tu. (Rev. 21:3, 4) It no mata wich paat wi a-go liv, wi a luk faawod fi get di sitn dem we Gad pramis wi.

2. Wa it miin fi wiet pan Jeuova?

² Di Baibl mek wi nuo se Jeuova a di Gad we kaaz piipl fi “luk fa an nuo fi shuor se dem wi get wa im pramis”. So eniting we Jeuova pramis se im a-go gi wi, wi nuo se wi a-go get it. (Ruo. 15:13) Wi nuo aal a di sitn dem we Gad pramis fi gi wi, an wi nuo se Gad kyaahn lai. (Nom. 23:19) Wi nuo se im kyan du evriting we im pramis wi se im a-go du an im waahn fi du it tu. So wen wi a wiet pan Jeuova an a luk faawod tu di sitn dem we im pramis wi, wi nuo se a no Anansi stuori, dem a-go apm fi chuu.

3. Wa a som a di sitn dem wi a-go luk pan iina da lesn ya? (Saam 27:14)

³ Jeuova wi Faada we lov wi waahn wi fi chos im. (Riid Saam 27:14.) Wen wi chos Jeuova an nuo fi shuor se im a-go gi wi di sitn dem we im pramis wi, it a-go mek wi api an no fried wen wi a go chuu wi prablem dem. Wi a-go luk pan ou kaa wi a wiet pan Jeuova an a luk faawod tu di sitn dem we im pramis wi, ou it kyan elp wi. So di fos ting wi a-go luk pan iina da lesn ya a ou di sitn dem we Jeuova pramis wi we wi a luk faawod fi get komiin laik wan angka an wan elmit. An den wi a-go luk pan wa wi kyan du so dat wi no tap wiet pan Jeuova an luk faawod tu di sitn dem we im pramis wi.

4. Ou di sitn dem we Gad pramis fi gi wi we wi a luk faawod fi get komiin laik wan angka? (Iibruu 6:19)

⁴ Iina di leta we di apasl Paal rait tu di Iibruu Kristiyan dem, im se di sitn dem we Gad pramis se im a-go gi wi we wi a luk faawod fi get komiin laik wan angka. (Riid Iibruu 6:19.) An yu si bikaa Paal aalwiez a chravl iina ship, im did nuo se dem yuus tu jrap di angka dem fi mek di ship no fluot we.  Wan a di taim dem im did de pan wan ship wen wan staam did a gwaan. Wen da staam de did a gwaan, im si di man dem fling out di angka dem iina di waata so dat di staam no bluo di ship iina di big oul rakstuon dem. (Aks 27:29, 39-41) Jos laik ou wan angka elp di ship fi tan todi an no ron iina no rakstuon, a siem so wen wi wiet pan Gad, it a-go elp wi so dat wi no lef Jeuova wen wi a go chuu wi prablem dem we komiin laik wan staam, kaa wi nuo se tingz a-go get beta. An memba ino, Jiizas did tel wi se piipl a-go mek tingz aad fi wi kaa wi a fala im. (Jan 15:20) So wen wi sidong an tingk bout aal a di sitn dem we Jeuova pramis se im a-go gi wi iina di fyuucha, it elp wi fi gwaan sorv im no mata wa.

5. Aalduo Jiizas did nuo se im a-go ded, ou di sitn dem we Gad pramis im elp im fi tan op chrang?

⁵ Aalduo Jiizas did nuo se im did a-go ded bad, im stil tan op chrang an chos iina Jeuova an du wa Im waahn im fi du. Pan di die a Pentikas 33 C.E., di apasl Piita did taak bout wa did rait dong iina Saamz we tel wi bout ou Jiizas did fiil. Jiizas se: “Mi a luk fi get aal wa Gad pramis fi gi mi. Kaaz yu naa go figet mi an lef mi suol mongks di ded, an yu naa go lef yu sorvant we aalwiez du wa yu se fi ratn iina di griev. . . . An kaaz yu de ya wid mi, yu wi mek mi aat wel api.” (Aks 2:25-28; Sa. 16:8-11) Iivn duo Jiizas did nuo se im a-go ded, im did nuo fi shuor se Gad a-go mek im kom bak alaiv an se im wuda api fi go baka evn go liv wid im Faada agen.​—Iib. 12:2, 3.

6. Ou wan breda did se it elp im kaa im a wiet pan Jeuova?

⁶ Kaaz uol iip a wi breda an sista dem a wiet pan Jeuova an a luk faawod tu di sitn dem we im pramis fi gi dem, it elp dem fi gwaan eng aan an tan op chrang no mata wa. An a dis wi si wid wan breda we niem Leonard Chinn we did liv iina Ingglan. Wen di Fos Worl Waar did a gwaan, dem lak im op iina prizn kaa im tel dem se im neehn did a-go jain dem aami, an tuu mont afta dat, dem put im wan iina wan sel an den dem mek im du bie aad wok. Afta dat, im rait an se: “We mi go chuu mek mi si se it impuotant fi mi gwaan wiet pan Jeuova an luk faawod tu di sitn dem we im pramis fi gi wi kaa dat a-go elp wi fi tan op chrang no mata wa. Wen wi luk pan aal a wa Jiizas an di apasl dem an di prafit dem go chuu an stil tan op chrang, an wen wi luk pan aal a di sitn dem we wi si iina di Baibl we Jeuova pramis fi gi wi, dem mek wi si se wi kyan go chuu wi prablem dem an wiet pan Jeuova kaa im a-go gi wi aal a di sitn dem we im pramis fi gi wi.” So fi Leonard, kaa im did av sitn a wiet fa, it did komiin laik wan angka we a mek im tan wid Jeuova no mata wa. A siem so kaa wi av sitn a wiet fa it wi elp wi fi tan kluos tu Jeuova.

7. Wen wi a go chuu wi prablem dem, ou dem kyan mek wi get chrangga an chrangga iina di sitn dem we wi biliiv iina? (Ruoman 5:3-5; Jiemz 1:12)

⁷ Wen wi eng aan an tan op chrang wen wi a go chuu wi prablem dem an wi si ou Jeuova elp wi an ou im api wid wa wi a du, a dis mek wi kyan gwaan wiet pan Jeuova an luk faawod tu di sitn dem we im pramis fi gi wi. (Riid Ruoman 5:3-5; Jiemz 1:12.) An wen wi du dem sitn ya, a so wi a-go get chrangga an chrangga iina wa wi biliiv. Sietan waahn wi fi fiil laik wi kyaahn manij no muor an gi op wen wi a go chuu wi prablem dem, bot wid di elp we wi a get fram Jeuova wi kyan go chuu.

8. Ou di sitn dem we Gad pramis fi gi wi we wi a luk faawod fi get komiin laik wan elmit? (1 Tesaluoniyan 5:8)

⁸ Di Baibl mek wi nuo se di sitn dem we Jeuova pramis wi we wi a luk faawod fi get komiin laik wan elmit. (Riid 1 Tesaluoniyan 5:8.) Wan suoja wier wan elmit fi protek im ed fram di lik dem we im mait-a get. Wen wi  a fait gens Sietan wi afi protek wi main fram im lik dem. Sietan fling uol iip a sitn pan wi fi chrai fi mek wi sin, an im waahn wi fi tingk bout tingz di wie ou Jeuova no waahn wi fi tingk bout tingz. Jos laik ou di elmit protek di suoja dem ed, a so wen wi wiet pan Jeuova an a luk faawod tu di sitn dem we im pramis fi gi wi, it a-go elp wi fi tingk bout di sitn dem we Jeuova waahn wi fi tingk bout an dat wi elp wi fi du di sitn dem we im waahn wi fi du.

9. Wen piipl na’av notn a liv fa wa dem staat fi du?

⁹ Kaa wi a wiet pan Jeuova fi mek wi liv fi eva it elp wi fi nuo ou fi luk pan tingz so dat wi kyan du tingz iina wan waiz wie. Bot wa wi fain a se ef wi onggl a tingk bout di sitn dem we wi waahn ya nou, dat wi mek wi no waahn wiet pan Jeuova no muor an tap luk faawod fi get di sitn dem we im pramis fi gi wi. Tingk bout som a di Kristiyan dem we did a liv iina Korint: Dem did tap biliiv se Gad wuda mek dem kom bak alaiv. (1 Kor. 15:12) Paal did rait se di wan dem we no biliiv se dem a-go kom bak alaiv onggl a-go tingk bout di sitn dem we dem waahn ya nou. (1 Kor. 15:32) Nowadiez a so nof piipl onggl a du di sitn dem we mek dem api. Bot yu si wi, wi a gwaan chos iina Gad se im a-go gi wi aal a di sitn dem we im se im a-go gi wi. Kaa wi a wiet pan Jeuova an a luk faawod tu di sitn dem we im pramis fi gi wi, a dat komiin laik wan elmit we protek wi ed. It elp wi fi tingk ou Jeuova waahn wi fi tingk an fi du wa Jeuova waahn wi fi du so dat wi an im kyan tan fren.​—1 Kor. 15:33, 34.

10. Kaa wi a luk faawod tu di sitn dem we Jeuova pramis fi gi wi, ou dat a-go elp wi fi no lisn tu di lai dem?

¹⁰ Wen wi wiet pan Jeuova an a luk faawod tu di sitn dem we im pramis fi gi wi, it a-go protek wi laik ou wan elmit protek wan suoja ed, kaa it a-go mek wi no tingk se it no mek no sens wi chrai fi du tingz di wie ou Jeuova waahn wi fi du it kaa wi fiil se wi naa go eva kyan du tingz di wie ou im waahn wi fi du it, an a das wai som piipl se dem no tingk dem a-go kyan liv fi eva. Memba se a dis wan a Juob frenimi dem we did niem Elifaz did waahn im fi biliiv se tu. Elifaz did se ef “sumadi kyan riili liv kliin di wie ou Gad waahn dem fi liv.” Den ier wa im se bout Gad no, im se: “Luk ya! Nat iivn im ienjel dem im no chos, an nat iivn di evn dem no kliin iina fi’im yai.” (Juob 15:14, 15) Wat a piis a lai im tel pan Gad iihn! Memba se a Sietan waahn wi fi fiil so. Sietan nuo se ef a so wi fiil den wi naa go wiet pan Jeuova. So wi fi mek shuor se wi no biliiv di uol iip a lai dem we Sietan a tel, bot wi fi biliiv se Jeuova a-go gi wi aal a di gud sitn dem we im pramis fi gi wi an a dem sitn de wi fi tingk bout. Nuo se Jeuova waahn yu fi liv fi eva, an im a-go elp yu fi du di sitn dem we yu fi du so dat yu kyan liv fi eva.​—1 Tim. 2:3, 4.

11. Wa mek wi fi gwaan wiet pan Jeuova fi im gi wi di sitn dem we im pramis fi gi wi?

¹¹ Wi nuo se it no aalwiez iizi fi gwaan wiet pan Jeuova kaa wi mait-a fiil se im a tek tuu lang fi du wa im se im a-go du. Bot memba se Jeuova aalwiez de bout, so wa mait-a luk laik wan lang taim tu wi a wan likl bit a taim tu im. (2 Pii. 3:8, 9) Bot wi nuo se im a-go du wa im waahn fi du, bot im naa go du it wen wi waahn it fi apm, im a-go du it wen im waahn it fi apm an iina di bes wie tu. Bot wa kyan elp wi fi gwaan wiet pan Jeuova an luk faawod fi get di sitn dem we im pramis fi gi wi?​—Jmz. 5:7, 8.

12. Azkaadn tu Iibruu 11:1, 6, ou wen wi chos iina Gad it elp wi fi gwaan wiet pan im?

¹² Kaa Jeuova a di wan we pramis fi gi wi aal a dem nais sitn ya, ef wi tan kluos tu im wi wi gwaan wiet pan im. Wi kyan se so kaa di Baibl mek wi nuo se di muor wi chos “se Gad de fi chuu, an dat im a-go du som uol iip a gud sitn fi di wan dem we luk fi im aad  aad,” a di muor wi a-go wiet pan im. (Riid Iibruu 11:1, 6.) Wen wi nuo se Jeuova de fi chuu a di muor wi a-go nuo se wi a-go get aal a di sitn dem we im pramis wi. So mek wi luk pan som tingz we wi kyan du so dat wi kyan get kluosa tu im.

13. Wa wi fi du so dat wi kyan gwaan jraa nier tu Gad?

¹³ Prie tu Jeuova an riid im Wod. Aalduo wi kyaahn si Jeuova wi kyan stil jraa nier tu im, kaa wen wi prie tu im a taak wi a taak tu im an wi shuor se im a lisn tu wi. (Jer. 29:11, 12) An wi a lisn tu wa Jeuova a se wen wi riid im Wod an tingk bout wa it a se. Wen wi riid di Baibl an si ou Jeuova did tek kier a di wan dem we stik tu im, it mek wi waahn gwaan wiet pan Jeuova an luk faawod tu di sitn dem we im pramis fi gi wi, kaa “evriting we rait dong iina Gad wod, rait dong fi tiich wi an fi elp push wi fi tan op chrang an no gi op so dat wi kyan gwaan luk fi get di sitn dem we Gad pramis wi.”​—Ruo. 15:4.

14. Wa mek wi fi tingk bout di sitn dem we Jeuova du aredi fi ada piipl?

¹⁴ Tingk bout ou Jeuova aalwiez du wa im se im a-go du. Luk pan wa im did du fi Iebriyam an Siera: Kaa di tuu a dem did uol, dem kudn av no pikni. Bot aalduo dem did uol, Jeuova did tel dem se im did a-go mek dem av wan pikni, an a dat im du. (Jen. 18:10) Ou Iebriyam did fiil bout dat? Di Baibl se: “Im biliiv se Gad wuda mek im di faada fi nof difrant piipl fram aal uova di worl.” (Ruo. 4:18) Aalduo it mait-a luk laik dem did tuu uol fi av wan pikni, Iebriyam did nuo se Jeuova kuda du wa Im se Im did a-go du, an Jeuova did du it. (Ruo. 4:19-21) Wen wi riid bout dem tuori ya iina di Baibl, no mata ou di sopm luk laik se it kyaahn apm, dem mek wi si se eniting we Jeuova se im a-go du, im a-go dwi’it.

15. Wa mek yu fi tingk bout di sitn dem we Jeuova du fi yu aredi?

¹⁵ Tingk bout di sitn dem we Jeuova du fi yu.  Yu fi tingk bout di tingz dem we Jeuova du fi yu aredi we im se im wuda du we rait dong iina im Wod. Laik wen Jiizas did pramis se im Faada wuda gi yu wa yu niid fi liv. (Mat. 6:32, 33) An im mek yu nuo se ef yu aks Jeuova fi Im uoli spirit Im a-go gi yu. (Luuk 11:13) An Jeuova du aal a wa im se im wuda du. An yu mait-a kyan tingk bout som ada sitn we Jeuova se im wuda du we yu si se im a du fi yu. Laik im se im wuda paadn yu, osh yu wen yu sad, an gi yu di ting dem we yu niid fi kip kluos tu im. (Mat. 6:14; 24:45; 2 Kor. 1:3) Wen yu tingk bout aal a di gud sitn dem we Jeuova du fi yu aredi, it a-go mek yu gwaan wiet pan im.

16. Wa mek wi se a wan prezent fram Jeuova fi a wiet pan im an luk faawod tu di sitn dem we im pramis fi gi wi?

¹⁶ Fi nuo se wi kyan liv fi eva a wan prezent fram Jeuova. Wi a luk faawod fi da taim de kaa wi nuo se it a-go apm. Wen wi gwaan wiet pan Jeuova, it komiin laik wan angka we elp wi fi tan todi an gwaan eng aan wen wi a go chuu wi prablem dem, an it elp wi wen piipl a mek tingz aad fi wi kaa wi a sorv Jeuova, aal wen dem chretn wi se dem a-go kil wi. An jos laik ou wan elmit protek wan suoja ed, a siem so wen wi gwaan wiet pan Jeuova it elp wi fi tingk ou im waahn wi fi tingk, an du di sitn dem we im waahn wi fi du. Aal a di sitn dem we Jeuova pramis fi gi wi mek wi jraa niera tu im an mek wi si ou moch im lov wi. So it a-go du wi uol iip a gud wen wi gwaan wiet pan Jeuova.

17. Wa mek wi a-go api wen wi gwaan wiet pan Jeuova?

¹⁷ Iina di leta we Paal rait tu di breda dem iina Ruom, im tel dem se: “Wail unu wiet fi di sitn dem we Gad pramis fi gi unu, unu mos api kaaz unu nuo se unu a-go get it.” (Ruo. 12:12) Paal kuda api kaaz im nuo se ef im did gwaan chos iina Gad an du wa im se im fi du im wuda get fi liv iina evn fi eva. Wi kyan api tu kaa wi shuor se Jeuova a-go gi wi di sitn dem we im pramis fi gi wi. Wan a di man we did rait wan a di Saamz dem se: “Di sumadi we a wiet pan Jeuova we a fi’im Gad an a luk faawod fi get aal a di sitn dem we im pramis fi gi dem a-go api. . . . Im a di Wan we aalwiez du wa im se im a-go du.”​—Sa. 146:5, 6.