WEN Worl Waar 2 did a gwaan, wan Natsi suoja did baal aafa som Jeuova Witnis an se: “Ef unu no go fait iina di waar gens Frans ar Inglan, aal a unu fi ded!” An aalduo som a di Natsi suoja dem did de de a wiet wid dem gon fi di breda dem, aal di breda dem did tan op chrang an no du wa di suoja dem waahn dem fi du. Wa dem breda ya du mek wi se ou Jeuova Witnis fiil bout waar. Dem no fait iina di waar dem we a gwaan iina di worl. Aal ef dem se dem a-go kil dem, dem stil naa go tek no said.

1. GAD PIIPL DEM DID KOM FRAM WAN KONCHRI

Iina dem diez de, a di Izrelait dem Jeuova did pik fi bi im piipl. Outa aal a di ada piipl dem, im se dem piipl ya a fi’im piipl. (Ek. 19:5) An a Gad did gi dem somwe fi liv. So wen im tel dem fi go fait gens no ada konchri, dem wudn en op a fait ar a kil sumadi we a worship di siem Gad laik dem. *

Iina fi wi taim, di piipl dem we worship Jeuova “kom fram evri konchri, chraib, an piipl we chat aal kain-a langwij.” (Rev. 7:9) So ef Gad piipl dem did fi go a ada konchri go fait waar ya nou, dem wuda en op a fait an kil piipl we a worship di siem Gad laik dem.

2. JEUOVA DID TEL DI IZRELAIT DEM FI GO WAAR

Iina dem diez de, a Jeuova yuus tu tel dem wen dem fi ga’a waar an wa mek dem fi go. Laik ou  im did tel dem se dem fi go fait gens di Kienanait dem an get rid a dem kaa dem did a worship Sietan, an dem did a du aal kain-a seks sin, an dem did a bon dem pikni dem iina faiya fi mek sakrifais. So Jeuova tel dem se fi get rid a dem wikid piipl de fram outa di plies so dat ada piipl no staat fi fala dem. (Liv. 18:24, 25) An afta di Izrelait piipl dem staat fi liv iina di plies we Gad did pramis fi mek dem liv, im tel dem se dem fi go fait gens dem enimi dem we a fait gens dem. (2 Sam. 5:17-25) Enitaim dem tek op demself an ga’a waar go fait an a neehn Jeuova sen dem, nof taim di piipl dem don dem.​—Nom. 14:41-45; 2 Kr. 35:20-24.

Iina fi wi taim, Jeuova no tel nobadi fi go fait no waar. An di konchri dem we go waar go fait, dem go fait fi wa dem waahn, no fi wa Gad waahn. Kaa dem a fait fi get ada piipl lan, ar fi get rich, ar dem a fait gens piipl we no de pan fi dem said, ar dem a fait fi tingz go di wie ou fi dem konchri tingk se tingz fi a gwaan. Bot wa bout di wan dem we kliem se dem a fait so das dem kyan get fi worship Gad di wie ou dem waahn fi worship im, ar dem se dem a fait fi kil aaf Gad enimi dem? Memba se a Jeuova a-go tek kier a di wan dem we a worship im di rait wie an a im a-go kil aaf im enimi dem iina di waar we niem Aamagedan. (Rev. 16:14, 16) An iina da waar de, a no di piipl dem we a worship im Gad a-go yuuz fi fait it, bot a im ienjel dem we de iina evn im a-go yuuz fi fait it.​—Rev. 19:11-15.

3. DI IZRELAIT DEM NEEHN KIL DI WAN DEM WE A CHOS IINA GAD

Iina dem diez de, di Izrelait suoja dem wudn du notn fi ort di piipl dem we a du tingz fi shuo se dem a chos iina Gad, a onggl di piipl dem we Jeuova se fi ded dem wuda kil. Laik wen Jeuova did tel di Izrelait dem se dem fi go get rid a di piipl dem iina Jeriko, dem neehn kil aaf Rieyab an ar fambili kaa dem did chos iina Jeuova. (Jash. 2:9-16; 6:16, 17) An afta dat, Jeuova neehn kil aaf di piipl dem we kom fram Gibiyan, kaa dem did du tingz fi shuo se dem rispek im an no waahn du notn fi ort im.​—Jash. 9:3-9, 17-19.

 Iina fi wi taim, di konchri dem we a fait gens dem wan aneda no bizniz ef nobadi de iina di ada konchri we rispek Gad. Dem aal kil aaf piipl we no miks op iina dem waar tu.

4. WEN IT KOM AAN TU WAAR DI IZRELAIT PIIPL DEM WUDA AFI DU WA JEUOVA SE DEM FI DU

Iina dem diez de, Jeuova did ekspek di suoja dem iina Izrel fi fait waar di wie ou im se dem fi fait it. So laik wan a di taim im did tel dem se dem fi chrai fi mek piis wid wan a di plies dem we dem did a-go waar gens. (Dyuu. 20:10) An wen it kom aan tu di suoja dem we did iina Izrel, Jeuova did ekspek se dem a-go kip demself an evriting roun dem kliin an dem naa go du no seks sin an dem sitn de. (Dyuu. 23:9-14) Iina di ada plies dem, wen di suoja dem go iina ada piipl plies go waar gens dem, nof taim dem riep aaf di uman dem, an dis a sitn we Jeuova did tel di suoja dem iina Izrel se dem no fi du. Matarafak, dem kudn iivn marid wan a di uman dem we dem did tek we til wan mont afta dem did tek dem we.​—Dyuu. 21:10-13.

Iina fi wi taim, uol iip a di konchri dem sain piepa so dat dem no dis git op an staat fait gens dem wan aneda so. Aalduo dem du dem sitn ya so dat wan konchri no kil aaf aal a di ada piipl dem iina di ada konchri, muor taim dem no du dem sitn ya we dem sain di piepa an se dem wuda du.

5. GAD DID FAIT FI DI IZRELAIT DEM

Iina dem diez de, wen Jeuova a fait fi di Izrelait dem, im wok mirikl fi mek dem win. Laik ou im did elp dem fi win di waar iina Jeriko wen im tel di Izrelait dem fi shout out, an wen dem shout out di waal dis faal dong so, an it mek it iizi fi di Izrelait suoja dem go iina di siti go tek it uova. (Jash. 6:20) An a so Jeuova did yuuz mirikl wen dem did a fait gens di Amorait piipl dem. Jeuova fling som ielstuon outa di skai pan dem. Matarafak, di ielstuon did kil muor suoja dan wa di Izrelait suoja dem did kil.​—Jash. 10:6-11.

CHUU KRISTIYAN LOV FI MEK PIIS

So wi si se tingz wel difrant nou fram bak iina Baibl taim wen Gad did a fait waar fi di Izrelait piipl dem. Bot a no onggl dem riizn ya we wi dis luk pan we mek Gad piipl no fait waar nowadiez. Wi av ada riizn we mek wi no dwi’it. Wan neda riizn a kaa Gad did se iina di laas die dem fi’im piipl dem we im a tiich naa go lorn waar no muor. So ef dem naa go lorn waar no muor dem naa go fait iina it niida. (Aiz. 2:2-4) An wan neda riizn a dat Jiizas did se im falara dem no “komiin laka di piipl dem iina di worl,” so dat miin tu se dem wudn tek no said an get miks op iina di waar dem we a gwaan iina di worl.​—Jan 15:19.

Bot Jiizas did du muor dan dat, im tel im falara dem se dem no fi av no bad wiez we a-go mek dem av op nobadi iina dem aat, an dem no fi beks op beks op wid dem wan aneda an waar gens dem wan aneda tu. (Mat. 5:21, 22) Im aal tel im falara dem se Gad bles aal a uu elp piipl fi liv iina piis an di wan dem we lov dem enimi tu.​—Mat. 5:9, 44.

An wa bout wi? Wi mait no waahn fi go waar go fait, bot wi kyan aks wiself ef wi av op nobadi iina di kanggrigieshan iina wi aat we mek wi fiil laik se dem a wi enimi. Ef a so wi fiil, mek wi gwaan wok aad so dat wi no fiil so bout wi breda an sista dem.​—Jmz. 4:1, 11.

Wi no get miks op an fait iina di waar dem we di konchri dem a gwaan wid, bot wi du tingz fi shuo se wi lov wi wan aneda an wi waahn fi liv iina piis wid wi wan aneda. (Jan 13:34, 35) So wi fi mek op wi main se no mata wa’a gwaan wi naa go tek said iina di waar dem we a gwaan iina di worl. Wi a luk faawod tu di taim wen Jeuova a-go tap di waar dem we a gwaan aal uova di ort.​—Sa. 46:9.