Iina da ier de, di aaganaizieshan did chienj op som tingz we did elp di breda an sista dem fi worship Jeuova tugeda. An dem staat fi put iina The Watch Tower wa di skripcha we dem luk pan a di miitn miin, we dem kaal Prieya an Priez an Testimoni Miitn. Pan tap a dat, di breda an sista dem did mek wan alminak we dem av di skripcha fi di wiik pan. An dem did av wan im we dem kuda sing wen dem a du dem uona Baibl stodi an wen dem a du dem fambili Baibl stodi.

Wen dem de a dem miitn dem taim de, di breda an sista dem kuda “testifai” bout wa apm tu dem wen dem go a fiil sorvis, ar dem wuda taak bout wa dem waahn fi tangk Jeuova fa, ar dem wuda sing wan sang, an dem wuda iivn prie tu. Wan sista we niem Eva Barney, we did baptaiz iina 1923 wen shi did a 15, se: “Dem taim de, ef yu did waahn fi gi wan testimoni, yu wuda tan op an staat fi se sitn laik ‘Mi waahn fi tangk di Laad fi aal a wa im du fi mi.’” An som a di breda an sista dem did lov fi testifai. An Sista Barney se: “Yu did av wan breda we op iina iej we niem Breda Godwin, we did av wol iip a sitn fi tangk Jeuova fa. Bot wen im waif si se di Breda we did a liid di miitn did luk laik se im did wel waahn im fi don, shi wuda jraa di tiel a ar ozban lang jakit an im wuda jos sidong.”

Di kanggrigieshan dem wuda kip di Prieya an Priez an Testimoni Miitn wan taim fi di mont. The Watch Tower fi Iepril 1, 1923 tel wi bout da miitn ya. It se: “Dem fi yuuz aaf a di miitn fi mek di breda an sista dem gi dem testimoni bout tingz we apm tu dem wen dem ga’a sorvis, an yuuz it fi gwaan push di breda an sista dem fi gwaan priich. . . . Wi fiil se dis a-go mek di breda an sista dem get kluosa an kluosa.”

Charles Martin, wan 19 ier uol yuut we staat fi priich wid di breda an sista dem iina im kanggrigieshan iina Vankuuva we de iina Kyanada, se dem miitn de did elp im nof nof. Im se: “A ya-so mi lorn wa fi se wen mi go fiil sorvis. Kaa wen mi de a dem miitn de, sumadi wuda se sitn bout wa apm tu dem wen dem de a sorvis an ou dem diil wid it. So wa dem se mek mi si wa mi kyan se wen mi go a sorvis an a priich tu sumadi we no waahn mi taak tu dem.”

Wen yu av “sortn diez we aal a di kanggrigieshan kyan go iina fiil sorvis,” it mek evribadi iina di aaganaizieshan wok tugeda az wan. The Watch Tower fi Iepril 1, 1923 se: “Kaa wi  waahn evribadi fi wok tugeda . . . , Chuuzde, Mie 1, 1923 a-go bi wan sorvis die. An a di siem ting a-go apm di fos Chuuzde iina evri mont afta dis . . . Evribadi iina di kanggrigieshan dem fi go a sorvis.”

Aal di yong piipl dem we did a stodi di Baibl did a priich tu. An Hazel Burford, we did a 16, did a wan a dem. Shi se: “Dem did av sitn we niem The Bulletin we did av tingz we wi kyan se pan it we wi kuda chrai an memba. a Mi an mi granfaada wok aad iina fiil sorvis.” Bot Sista Burford did a get som fait fram som piipl we shi neva tingk wuda mek tingz aad fi ar. Shi se: “Wan breda we did op iina iej did a chrai aad fi tap mi fram taak tu piipl. Kaa dem taim de som a di breda an sista dem neehn andastan se evribadi we did a stodi di Baibl kuda priich, aal ef dem a wan ‘yong bwai ar yong gyal pikni’​—dem fi a big op di Sumadi we mek dem tu.” (Sa. 148:12, 13) Bot Sista Burford neva mek dat tap ar, an shi get fi go a di sekan klaas a di skuul we wi kaal Gilead School. An shi get fi bi wan mishineri iina Panamaa. Afta a wail, dem breda an sista de did chienj di wie ou dem fiil bout yong piipl we a priich.

Wen di breda an sista dem go a kanvenshan, it elp dem fi wok tugeda. Wen dem av nof a dem kanvenshan ya, dem wuda av som die wen dem go a sorvis. Laik di wan we dem did av a Winipeg iina Kyanada, we dem did tel evribadi we kom a kanvenshan se dem kuda go priich iina da siti de Maach 31. An dem get fi taak tu wol iip muor piipl pan dem die de. Pan Aagos 5, bout 7,000 muor piipl go a wan neda kanvenshan iina Winipeg, an da taim de a di muos piipl yu eva av a wan kanvenshan iina Kyanada.

Di kanvenshan we dem did av Aagos 18-26, 1923 iina Las Anjeliiz we de iina Kalifuoniya, did du di muos fi Jeuova piipl iina da ier de. Di wiik dem bifuo di kanvenshan, dem did taak bout it iina di nyuuzpiepa dem, an di breda an sista dem did gi out 500,000 liiflet bout it. An dem did av som puosta pan di taksi dem an so an pan dem uona kyaar dem tu.

Pan Satde, Aagos 25, Breda Rutherford gi wan taak we niem “Di Shiip Dem An Di Guot  Dem,” an iina it im mek it klier klier se di “shiip dem” a di wan dem we a du di sitn dem we Gad waahn dem fi du we a-go get fi liv iina Paradais. An im taak bout sitn we evribadi fi du we im kaal “Wan Waanin” we did rait pan som liiflet. Dat did a fi mek evribadi si se di choch dem naa du wa Jeuova waahn dem fi du an so dem fi kom outa dem. Di Baibl kaal dem choch ya “Powaful Babilan.” (Rev. 18:2, 4) Afta da kanvenshan de, di breda an sista dem we de aal uova di worl, wok aad fi gi out wol iip a da liiflet ya we mek piipl nuo se dem fi kom outa dem choch de.

Pan di laas die a di kanvenshan, muor dan 30,000 breda an sista did de de, an dem ier di taak we Breda Rutherford did gi we niem “Aal A Di Konchri Dem A Maach Go Aamagedan, Bot A Wol Iip A Piipl We A Liv Nou Naa Go Ded.” Kaa dem did nuo se a nof piipl a-go kom, di breda an sista dem did rent out di nyuu stiediyom we de a Las Anjeliiz. An fi mek shuor se evribadi kuda ier di taak dem, di breda dem yuuz di loud spiika dem we de a di stiediyom, an dat a did sitn nyuu dem taim de. An nof muor piipl get fi ier di kanvenshan pan di riediyo.

Iina 1923, wi get fi staat priich nof muor iina Afrika, Yuurop, Indiya, an Sout Amerika. Iina Indiya, wan breda we niem A. J. Joseph, did staat fi elp print di buk an pamplet dem iina Indi, Tamil, Telugu, an Ordu. An im did a du aal a dis wen im did a tek kier a im waif an siks pikni dem.

Tuu breda iina Siera Liyuon we niem Alfred Joseph an Leonard Blackman did rait wan leta tu di breda dem we de a di worl ed afis iina Bruklin we de iina Nyuu Yaak, an dem did a aks dem fi sen sumadi fi kom elp dem wid di priichin wok. An dem get di ansa Iepril 14, 1923. Alfred se: “Liet wan Satde nait, wi get wan kaal we wi neehn ekspek.” Im ier wan man wid wan chrang vais se: “A yu did rait wan leta tu di Watch Tower Society a aks fi sumadi fi elp unu fi priich?” Alfred ansa an se, “Ye.” Den di sumadi se: “A mi dem sen.” A did wan breda we niem William R. Brown did a taak. A da siem die de im did kom fram wan a di Kyaribiyan ailan dem wid im waif we niem Antonia, an im tuu yong daata we niem Louise an Lucy. An it neehn tek lang fi di breda an sista dem miit dem.

Alfred se: “Di neks maanin wen mi an Leonard a du wi Baibl stodi, wi si wan big chraptin man tan op a di duor. An wen wi luk, no Breda Brown. An kaa im lov di chuut so moch, im did wel waahn fi gi wan taak di neks die.” An  bifuo di mont don, Breda Brown gi out aal a di buk an pamplet dem we im di kya wid im. Afta dat, im get 5,000 muo buk, an dem did stil waahn muor buk afta dat. Alduo Breda Brown did a gi out so moch buk, di piipl dem neehn nuo im az jos wan man we a sel buk. Kaa fi di wol iip a ier dem we im a priich, im wuda aalwiez a yuuz di Baibl wen im a gi im taak dem. Dat mek dem kaal im Baibl Brown.

Wen aal a dat a gwaan, tu moch piipl did a liv a di branch afis we de a Barmen iina Jormani, an di konchri we niem Frans we did de nier Barmen did a plan fi kom tek it uova. So di breda an sista dem fain wan bildin we de a Majborg, an it did luk nais fi dem yuuz fi gwaan print dem buk an pamplet dem de. Pan Juun 19, di breda dem did don pak op di mashiin dem we dem yuuz fi print di buk an pamplet dem, an ada tingz, an muuv go a di nyuu Betel we de a Majborg. Yu si di neks die afta dem mek di breda dem a di worl ed afis nuo se dem don muuv, di nyuuzpiepa dem did a se Frans did tek uova Barmen. A so di breda dem did si se Jeuova riili did a bles an protek dem wen dem muuv go a Majborg.

Wan breda we niem George Young, uu did priich iina difrant difrant konchri aal uova di worl, did go a Brazil an set op wan nyuu branch afis, an elp fi staat print The Watch Tower iina Puotugiiz. An iina kopl mont, im plies muor dan 7,000 difrant difrant buk an pamplet. An wen Breda Young go a wan uman yaad we niem Sarah Ferguson an gi ar The Watch Tower dem we rait iina Puotugiiz, aalduo bifuo dat shi did a riid The Watch Tower dem fram 1899, shi neehn gi ar laif tu Gad an get baptaiz. Bot likl afta shi did staat fi riid The Watch Tower dem iina Puotugiiz, shi an ar fuor pikni dem baptaiz.

Wen di ier bout fi don, The Watch Tower fi Disemba 15, 1923 did taak bout ou di breda an sista dem did a du wa dem fi du fi worship Jeuova az wan. It se: “Yu kyan si’it fi chuu se di difrant difrant kanggrigieshan dem . . . did a gwaan gud. . . . Mek wi put aan wi aami kluoz we Gad gi wi an gwaan du aal we wi kyan du iina di neks ier, an mek wi api a dwi’it tu.”

Di neks ier, 1924, a did wan big ier fi di breda an sista dem. Fi wol iip a mont, di breda dem a Betel did a wok aad fi redi op wan piis a lan uova Statn Ailan fi mek wan bildin uova de, an da plies de neehn faar fram di ed afis iina Bruklin. An dem don mek it iina di fos paat a 1924. An di wok we dem du de did mek di breda an sista dem wok tugeda, an it elp dem fi priich bout di gud nyuuz iina som wie we dem kudn du bifuo.