Wen di Izrelait dem did de iina di wildanes fi faati ier, a mana a did di mien fuud we dem did av fi iit. (Ek. 16:35) An tuu taim Jeuova did gi dem wan bod we niem kwiel fi iit tu. (Ek. 16:12, 13; Nom. 11:31) Bot dem did av likl bit a som ada fuud de fi iit tu.

Laik som a di taim, Jeuova wuda kya im piipl dem go a som plies we dem kuda fain fuud fi nyam an waata fi jringk. (Nom. 10:33) Wan a di plies dem we im wuda kya dem go did niem Iilim, an a 12 spring an 70 paam chrii did de de-so. (Ek. 15:27) An dem paam chrii ya a mait-a did di paam we dem kaal diet paam. An wan buk we niem Plants of the Bible se di diet paam “gruo aal uova di plies, . . . so it wuda bi di mien paam chrii we uol iip a miliyan a piipl yuuz fi get ail an fuud, an a it dem wuda yuuz fi mek somwe fi liv tu.”

Di Izrelait dem did av som ada paat iina di wildanes we waata did de, so dem kuda tap de an get waata an fuud fi nyam. Wan a dem plies de did niem Feran. Feran a did paat a wan jrai riva kuos we dem kaal Wadi Feran. a Di buk we niem Discovering the World of the Bible se da riva kuos ya “a did a bout 81 mail lang, an it did priti an nais. An nof piipl did nuo se da riva kuos ya did de a Sainai. An wich paat di riva kuos miit di sii aal di wie dong tu di plies we dem kaal Feran a bout 28 mail. Da plies de a bout 3 mail lang, an it bout 2,000 fut aiya dan di sii. Di plies so priti dat dem se it komiin laik di gyaadn a Iidn. Kaa dem av so moch diet paam de fram dem taim til nou, uol iip a piipl wuda go de go liv.”

Wen di Izrelait dem did a kom outa Iijip, dem did kya flowa we miks op aredi an sitn fi niid it iina tu. An dem mait-a kya som kain-a grien an ail tu. Bot wi nuo se dem wudn av dem sitn ya wid dem fi wan lang taim. Dem aal kya difrant difrant animal wid dem tu. (Ek. 12:34-39) Bot kaa tingz did so rof iina di wildanes, som a di animal dem wuda ded aaf, an di Izrelait dem wuda nyam som a dem, an dem wuda gi op som a dem fi sakrifais. An dem mait-a did aal sakrifais som a dem tu som faalz gad tu. b (Aks 7: 39-43) Bot dem stil did a riez animal, an wi nuo dis kaa a wa Jeuova did se tu di Izrelait dem wen dem neehn a chos iina im. Im did mek dem nuo se dem pikni dem a-go ton shepad iina di wildanes fi 40 ier. (Nom. 14:33) So dat miin tu se som a di taim dem, dem kuda get milk an miit fi nyam aalduo it mait-a neehn inof fi di chrii miliyan a dem we did de iina di wildanes fi di 40 ier. c

Bot a wich paat di animal dem yuuz tu get fuud an waata fram? d Dem taim de uol iip muor rien yuus tu faal, so yu did av muor tingz a gruo iina di wildanes we dem kuda nyam. Insight on the Scriptures, Volume 1, se 3,500 ier ago, “dem did av nof muor waata iina Ariebiya dan we dem av nou. Rait ya nou Ariebiya av nof riva kuos we jrai, an dat shuo se bak iina di die dem plies ya did ful op a waata kaa nof muor rien yuus tu faal.” Bot aalduo dem did av nof muor waata de, it stil a neehn wan nais plies fi dem bi, an dem neehn av nof tingz de. (Dyuu. 8:14-16) So ef Jeuova neehn wok mirikl fi gi dem fuud an waata, dem an dem animal dem wuda ded aaf.​—Ek. 15:22-25; 17:1-6; Nom. 20:2, 11.

Muoziz did mek di Izrelait dem nuo se Jeuova gi dem mana fi iit so dat dem nuo se piipl no onggl fi liv pan bred wan, bot a wen dem du evriting we Jeuova se dem fi du dem a-go aarait.​—Dyuu. 8:3.