1-2. Tel wi di bes wie ou fi riid an stodi Gad Wod.

 Ef yu a plan fi bai wan ous, yu wuda onggl waahn fi si wan picha a di front a di ous bifuo yu bai it? Nuo sa! Yu wuda waahn fi si evri kribis an kaana a di ous fi yuself bifuo yu bai it. Yu mait-a aal waahn fi si di jraayin we dem yuuz fi mek di ous. Yu wuda waahn fi nuo evriting bout di ous bifuo yu bai it, no chuu?

² A so wi fi du wen wi a riid an stodi di Baibl. Sumadi we go a skuul go stodi bout di Baibl se: “Di Baibl komiin laik wan big bildin we go wie op iina di ier an di foundieshan go diip dong iina di grong.” So fi get fi nuo bout aal a wa di Baibl taak bout, yu kyaahn jos riid it kwik kaa dat a-go onggl mek yu lorn ‘som likl sitn bout wa Gad se.’ (Iib. 5:12) So jos laik ou yu afi go “iina” di ous fi nuo ou it stie, a siem so yu afi go iina Gad Wod an lorn bout aal a wa it a tel yu. Wan gud sitn we yu fi du wen yu a stodi di Baibl a fi si ou di difrant paat a di Baibl kanek op wid ada paat a di Baibl. No onggl chrai fi andastan di sitn dem we yu biliiv iina, bot yu fi chrai fi fain out wa mek yu biliiv wa yu biliiv.

3. A wa di apasl Paal did tel di breda an sista dem fi du, an wa mek im tel dem fi du dat? (Ifiijan 3:14-19)

³ Fi andastan evri likl ting bout Gad Wod, wi afi andastan di ting dem we no so iizi fi wi andastan we iina Gad Wod tu. Di apasl Paal did tel di breda an sista dem fi stodi Gad Wod gud gud so dat dem kyan andastan di ting dem we iina Gad Wod “we big an braad laik di sii” an “we  so nof it riich di skai.” Ef dem du dat dem wuda “tan op chrang iina wa dem biliiv iina jos laik ou wan chrii tan op chrang wen dem ruut gaan dong diip iina di grong.” (Riid Ifiijan 3:14-19.) An a dat wi fi du tu. Mek wi si wa wi kyan du so dat wi kyan sorch evri kribis an kaana a Gad Wod an si wa it riili a se.

4. Tel wi som a di sitn dem we wi kyan du fi jraa kluos tu Jeuova.

⁴ Wi no onggl waahn fi nuo likl bit bout wa di Baibl a se. An it nais fi nuo se Gad spirit kyan elp wi fi “nuo di sitn dem we Gad a tingk we nobadi els no nuo bout.” (1 Kor. 2:9, 10) Wa yu kyan du a plan fi du yu uona Baibl stodi bout sitn we a-go mek yu jraa kluosa tu Jeuova. Laik yu kyan stodi bout wa im did du fi shuo se im lov di piipl dem we did a sorv im bak iina di die an ou dat mek yu si se im lov yu tu. Ar yu kyan luk pan ou Jeuova Gad did waahn di Izrelait dem fi worship im bak iina dem taim de an den luk pan ou wi a worship im tide. Ar yu kyan stodi bout wa di Baibl se did a-go apm tu Jiizas wen im did de ya pan di ort a priich an ting, an si ou we it se wuda apm did apm fi chuu.

5. Wa a som a di sitn dem we yu wuda waahn fi stodi an lorn muor bout?

⁵ Wi did aks som piipl we lov fi stodi di Baibl bout som tingz we iina di Baibl we dem wuda waahn fi andastan muor bout. An yu kyan si som a di ting dem we dem ansa se iina di paat we niem “ Som Tingz We Yu Kyan Stodi Bout.” Yu kyan go lov fi stodi bout dem sitn ya wen yu yuuz di Watch Tower Publications Index ar di Research Guide for Jehovah’s Witnesses. Wen yu stodi aad bout dem sitn ya, it kyan elp yu fi chos iina Jeuova muor an “yu a-go get fi nuo bout [im].” (Pr. 2:4, 5) Mek wi luk pan som a di sopm dem we iina di Baibl we aad fi wi andastan we wi kyan stodi bout.

6. (a) Tel wi wan riizn wa mek yu se Jeuova aalwiez a-go du wa im plan fi du. (b) Wa mek wi kyan se wa Jeuova waahn fi apm, a dat im “did plan . . . fi apm fram wie bak wen”? (Ifiijan 3:11)

⁶ Jeuova aalwiez du wa im se im a-go du. Tingk bout dis: Yu plan se yu a-go go somwe, bot wen yu riich paat wie yu si se sitn blak di ruod. It mait-a luk laik se yu kyaahn go wich paat yu waahn fi go. Bot kaa yu waahn fi go wich paat yu a go, yu a-go fain wan neda wie fi go de. Wi kyan du dis kaa wi nuo we wi a go an a no laik se a onggl da ruod de wi kyan chravl pan. A siem so wi api se Jeuova mek wi nuo wa im ‘did plan . . . fi apm fram wie bak wen’ iina di Baibl. (Ifiijan 3:11) Wi nuo se no kier wa apm, eniting we Jeuova se a-go apm a dat a-go apm. (Pr. 16:4) An we im du a-go di de fi eva. Bot wa a som a di sitn dem we Jeuova a-go du, an wa a som a di sitn dem we im chienj op so das wa im waahn fi apm apm?

7. Afta di fos man an uman ton dem bak pan Jeuova, wa im chienj op so dat wa im waahn fi apm stil apm? (Matyu 25:34)

⁷ Gad did tel di fos man an uman wa im waahn dem fi du. Im tel dem se dem “fi av nof pikni an ful op di ort wid uol iip a piipl” an se dem “fi kanchuol di uol ort an tek kier a it. An ruul uova . . . aal a di animal dem we de pan di ort.” (Jen. 1:28) Wen Adam an Iiv ton dem bak pan Gad, dem mek evribadi en op a sin bot dat naa go mek wa Jeuova waahn fi apm no apm. Im chienj op ou im a-go dwi’it, bot im stil a-go dwi’it. An wi nuo dat kaa rait afta Adam an Iiv sin, im plan fi set op im Kindom Govament iina evn. Gad a-go mek shuor se wa im waahn fi apm fi wi apm. (Riid Matyu 25:34.) An den wen im redi, im sen im fos Bwai Pikni fi kom pan ort fi tiich piipl bout Im Kindom Govament, an fi gi op im laif fi piipl so dat dem kyan get frii fram sin an no ded agen. Den im mek Jiizas kom bak alaiv an go baka evn fi bi King iina Im Kindom Govament. Bot wi av nof muor sitn fi lorn bout wa Gad waahn fi wi.

8. (a) A wa a di mien ting we di Baibl mek wi nuo bout? (b) Azkaadn tu Ifiijan 1:8-11, wa Jeuova riili waahn fi apm? (Luk pan di picha pan di kova)

⁸ Di mien ting we di Baibl mek wi nuo a dat wen Jeuova a yuuz im Kindom Govament, we Jiizas a ruul iina, fi du wa im waahn fi du fi di ort, it a-go mek evribadi nuo di chuut bout Im an Im niem. Eniting we Jeuova waahn fi apm, a dat a-go apm, notn kyaahn chienj it. (Aiz. 46:10, 11; Iib. 6:17, 18) Suun suun da ort ya a-go ton iina wan nais nais paradais we Adam an Iiv pikni dem we du wa Jeuova waahn dem fi du a-go get porfek an a-go “bi api fi eva.” (Sa. 22:26) Bot wa Jeuova riili waahn a fi aal a im ienjel dem we op iina evn an fi evribadi pan ort ton wan big fambili. So evribadi we a liv a-go a stik tu Jeuova an a du wa im waahn dem fi du. (Riid Ifiijan 1:8-11.) Yu no fiil gud fi si di nais wie ou Jeuova a get fi du wa im waahn fi du?

9. Ou faar iina di fyuucha wi kyan si wen wi riid di Baibl?

⁹ Afta Adam an Iiv sin, luk pan wa Jeuova se wuda apm a Jenisiz 3:15. b Luk pan wa Jeuova se wuda apm wol iip a touzn a ier bifuo it apm an ou it wuda  mek wa im waahn fi apm apm. Wan a di ting dem we im se wuda apm a dat Jiizas wuda kom fram Iebriyam pikni pikni dem. (Jen. 22:15-18) Wan neda ting we im se wuda apm we apm iina 33 C.E., a dat Jiizas get lik iina im fut bak. (Aks 3:13-15) An di laas ting we da skripcha ya se wuda apm a dat Sietan wuda get wan big lik iina im ed we wuda mek it mash out; an wi stil av muor dan touzn ier fi wiet fi dat apm. (Rev. 20:7-10) An di Baibl tel wi wol iip muor bout wa a-go apm bifuo Jeuova get rid a Sietan an im aaganaizieshan, we a fait gens Jeuova an fi im aaganaizieshan.

10. (a) A wa a som a di sitn dem we di Baibl se a-go apm suun suun? (b) Wa wi kyan du fi get wiself redi? (Luk pan di said paint.)

¹⁰ Tingk bout dem big sitn ya we di Baibl se wuda apm. Fos it tel wi se di konchri dem a-go se “wi av piis an evriting sief.” (1 Tes. 5:2, 3) An “braps,” di wos sofarieshan a-go staat wen di konchri dem ton pan di choch dem we naa sorv Gad di rait wie. (Rev. 17:16) Den afta dat, yu mait-a aal si tingz we apm iina di skai we no naamal wen “di Man we Gad Pik a kom pan kloud we kom outa evn, an im a-go av powa.” (Mat. 24:30) An a da taim de Jiizas a-go joj evribadi an put di shiip dem pan wan said an di guot dem pan wan neda said. (Mat. 25:31-33, 46) Bot Sietan naa go wies no taim. Kaa im so wikid, im a-go mek som konchri gyang op gens Jeuova piipl dem we a worship Jeuova. Di Baibl kaal dem konchri ya Gag we kom fram Miegag. (Izii. 38:2, 10, 11) An den Jeuova a-go tek op di wan dem we get pik fi go a evn we de pan di ort fi go elp Jiizas an im ienjel dem fait iina di Aamagedan waar, we a-go bi di laas paat a di wos sofarieshan we a-go gwaan. c (Mat. 24:31; Rev. 16:14, 16) An den di Touzn Ier we Jiizas a-go ruul fa a-go staat.​—Rev. 20:6.

11. Wen yu a liv fi eva, wa a som a di sitn dem yu kyan go du? (Luk pan di picha tu.)

¹¹ Tingk bout wa a-go apm afta di Touzn  Ier. Di Baibl mek wi nuo se Jeuova “mek [wi] so dat [wi] wuda waahn fi liv fi eva.” (Iik. 3:11) Di buk we niem Draw Close to Jehovah, pan piej 319 mek wi si ou wi an Jeuova a-go get kluos. It se: “Afta wi liv fi ou lang, aal fi wol iip a miliyan a ier, wi a-go nuo nof muor sitn bout Jeuova dan wa wi nuo nou, bot wi a-go stil nuo se wi av wol iip muor sitn fi lorn. . . . Wen wi a liv fi eva wi a-go av wol iip a difrant difrant nais sitn fi du, an di bigis ting a dat wi a-go get kluosa an kluosa tu Jeuova.” Az wi gwaan luk iina evri kribis an kaana a Gad Wod, wa a som ada sitn we wi kyan fain out muor bout?

12. Tel wi ou wi kyan nuo nof bout wa a gwaan iina evn.

¹² Di Baibl gi wi wan likl prips a wa a gwaan iina evn. (Aiz. 33:5) It tel wi nof tingz bout Jeuova an di ienjel dem we de iina evn. (Aiz. 6:1-4; Dan. 7:9, 10; Rev. 4:1-6) Laik di Baibl tel wi bout di ting dem we Iziikel did si wen im get som vijan fram Gad.​—Izii. 1:1.

13. Azkaadn tu Iibruu 4:14-16, wa a som sitn we mek yu api se a Jiizas a ruul uova wi?

¹³ Tingk bout wa Jiizas, wi King an Liida fi di priis dem, a du iina evn fi wi rait ya nou. A kaaz a im mek wi kyan prie tu di wan “we shuo wi lov iivn duo wi no dizorv it,” so wi kyan prie an aks im fi paadn wi an fi “elp wi enitaim wi niid di elp.” (Riid Iibruu 4:14-16.) Wen wi luk pan aal a wa Jeuova an Jiizas, we de a evn, du aredi an a du fi wi ya nou, wi wi get fi si umoch dem lov wi an it a-go push wi fi du aal a wa wi kyan du fi worship Jeuova.​—2 Kor. 5:14, 15.

14. A wa a wan a di bes ting wi kyan du fi mek Jeuova an Jiizas si se wi tangk dem fi wa dem a du fi wi? (Luk pan di picha dem tu.)

¹⁴ Wan a di bes ting we wi kyan du fi  shuo Jeuova an Jiizas se wi api fi wa dem du fi wi a fi go priich an tiich, so dat ada piipl kyan kom sorv Jeuova an ton wan a Jiizas falara tu. (Mat. 28:19, 20) Dis a wa di apasl Paal did du, kaa im did tangk Jeuova an Jiizas fi wa dem du fi im. Im nuo se Jeuova “waahn evribadi fi get siev an fi nuo di chuut.” (1 Tim. 2:3, 4) Kaaz a dat, im wok aad ‘so dat im kuda du aal a we im kuda du fi siev som piipl.’​—1 Kor. 9:22, 23.

15. Azkaadn tu Saam 1:2, ef wi riili waahn fi api wa wi fi du?

¹⁵ Wan a di man dem we rait wan a di Saam dem se di sumadi we api “a Jeuova Wod mek im api . . . an [im] tingk bout it die an nait.” (Sa. 1:1-3) Wan man we niem Juozif Rotherham, we rait uova di Baibl iina difrant langwij, rait wan buk we niem Studies in the Psalms. Iina it wen im a taak bout Saam 1:1-3, im se: “Evribadi shuda so api so dat dem chrai an fain out wa Gad waahn dem fi du an chrai an andastan wa mek Im waahn dem fi dwi’it an spen taim fi tingk bout it tu.” An sumadi we lov fi riid di Baibl wuda fiil laik se “di die dis paas an gaan so an dem no get fi du notn ef dem no fain out muor bout wa it a se.” It kyan mek yu api wen yu stodi di Baibl an get fi nuo aal a di sitn dem we iina it an yu a get fi andastan wa di difrant difrant buk dem iina di Baibl av fi du wid dem wan aneda. It a-go riili mek yu api wen yu get fi luk iina evri kribis an kaana a Gad Wod!

16. Wa wi a-go luk pan iina di neks lesn?

¹⁶ Wi kyan get fi andastan di nais sitn dem we Jeuova a tiich wi iina di Baibl. Iina di neks lesn wi a-go luk pan Gad ous we Paal did taak bout wen im did rait di leta tu di Iibruu Kristiyan dem. Wi uop se unu a-go api fi stodi dem sitn ya we no so iizi fi andastan.