1. Wa a som a di sitn dem we mek it aad fi wi du di sitn dem we Jeuova se wi fi du?

 YU FAIN it aad fi du di sitn dem we sumadi se yu fi du? Di king we niem Dievid did fain it aad fi du wa im fi du. So im prie tu Gad an se: “Elp mi fi waahn fi du di sitn dem we yu waahn mi fi du.” (Sa. 51:12) Dievid did lov Jeuova ino, bot somtaim im did fain it aad fi du di sitn dem we Im waahn im fi du, an a dat apm tu wi somtaim tu. Di fos ting we mek it aad a dat wi baan wid it iina wi fi fiil laik fi no du wa nobadi tel wi fi du. Di sekan ting a dat Sietan no tap chrai fi mek wi ton we fram Jeuova laik im. (2 Kor. 11:3) An di tord ting a dat wi a liv iina wan worl we di piipl dem we liv iina it waahn fi du dem uona ting an dem av “di spirit we a wok iina di piipl dem we ton we fram wa Gad waahn dem fi du.” (Ifii. 2:2) So wi afi chrai aad no fi sin. An wi afi chrai aad fi no mek Sietan an di piipl dem we de iina da worl ya mek wi no du di sitn dem we Jeuova an di wan dem we Im pik tel wi fi du.

2. Wen di Baibl se wi ‘no fi aad-iez,’ wa it miin? (Jiemz 3:17)

² Riid Jiemz 3:17. Jeuova did mek Jiemz rait an se di piipl dem we waiz, “dem no aad-iez.” Dis miin tu se wi fi wel waahn fi du di sitn dem we di wan dem we Jeuova pik tel wi fi du. Bot dat no miin tu se ef dem tel wi fi du sitn we Jeuova no waahn wi fi du wi fi stil dwi’it.​—Aks 4:18-20.

3. Wa mek Jeuova waahn wi fi du wa di wan dem we im pik tel wi fi du?

³ Wi mait-a fain it iiziya fi du wa Jeuova tel wi fi du dan wa sumadi tel wi fi du. An dis mek sens kaa Jeuova aalwiez tel wi di rait ting fi du. (Sa. 19:7) Bot di piipl dem we av di powa fi tel wi wa fi du no aalwiez tel wi di rait ting fi du. Bot wi Faada Jeuova stil waahn di mada an faada dem, an di govament dem, an di elda dem fi tel wi wa fi du. (Pr. 6:20; 1 Tes. 5:12; 1 Pii. 2:13, 14) So wen wi du wa dem tel wi fi du,  a riili Jeuova wi a lisn tu. Wi a-go luk pan ou wi kyan du wa dem tel wi fi du aal wen it mait-a aad fi wi du.

4. Wa mek uol iip a pikni no waahn fi du wa dem mada an faada tel dem fi du?

⁴ Di yong piipl dem nowadiez av wol iip a ada yong piipl roun dem we ‘naa fala wa dem mada an faada se dem fi du.’ (2 Tim. 3:1, 2) Som a dem naa du wa dem mada an faada se dem fi du kaa dem fiil se dem a ipokrit, kaa dem mada an faada waahn dem fi du wa dem naa du. Ar dem fiil se kaa dem mada an faada so uol, wa dem tel dem fi du naa no yuus tu dem. Ar dem fiil se dem tuu aad. Ef yu a wan yong sumadi, yu eva fiil da wie de? Uol iip a yong piipl fain it aad fi du wa Jeuova se wen im tel dem se: “Unu bilang tu di Laad, so unu fi du wa unu mada an faada tel unu fi du. Du it, kaaz a di rait sitn dat, an a dat [mi] waahn unu fi du.” (Ifii. 6:1) Wa kyan elp yu fi du dat?

5. Wen wi si wa Luuk 2:46-52 se, wa mek a wan big sitn se Jiizas did du wa im mada an faada se im fi du?

⁵ Wen yu luk pan di sitn dem we Jiizas did du wen im a pikni, yu kyan lorn ou fi lisn tu yu mada an faada. (1 Pii. 2:21-24) Kaa aalduo im did porfek, im mada an faada neehn porfek bot im did stil rispek dem aalduo dem mek mistiek som a di taim an dem neehn andastan im som a di taim tu. (Ek. 20:12) Laik luk pan wa did apm wen Jiizas did a 12. (Riid Luuk 2:46-52.) Im mada an faada go we lef im iina Jeruusilem an dem did fi mek shuor se aal a dem pikni dem did de wid dem wen dem a go baka dem yaad fram di festival. Wen Juozif an Mieri fain Jiizas, Mieri staat fi bliem im se a bie chobl im mek dem go chuu. Jiizas kuda mek dem si se a dem did fi mek shuor se dem neehn lef im. Bot a no dat im du, im ansa dem iina wan nais wie we mek dem si se im rispek dem. Bot Juozif an Mieri “neehn andastan wa im a se tu dem,” bot Jiizas gwaan “du evriting dem tel im fi du.”

6-7. Wa kyan elp di pikni dem fi du wa dem mada an faada se dem fi du?

⁶ Unu we a pikni, unu fain it aad fi du wa unu mada an faada se unu fi du som a di taim kaa dem mek mistiek ar dem jos no andastan yu? Ef dat apm tu yu som a di taim, si sitn ya we kyan elp yu. Fos ting, tingk bout ou Jeuova fiil. Di Baibl se wen yu lisn tu wa yu mada an faada se, “a dat di Laad lov.” (Kol. 3:20) Jeuova nuo se yu mada an faada naa go andastan yu som a di taim an se dem mait-a aks yu fi du sitn we yu no tingk so fier som a di taim tu. Bot yu si wen yu du wa dem tel yu fi du, yu a-go mek Jeuova api.

⁷ Di sekan ting a dat yu fi tingk bout ou yu mada an faada fiil. Kaa wen yu du wa dem se yu fi du, it mek dem fiil api an it mek dem chos yu muor. (Pr. 23:22-25) An yu a-go get kluosa tu dem tu. Wan breda fram Beljom we niem Alexandre se: “Wen mi staat fi du wa mi mada an faada se mi fi du muor aafn, wi get kluosa an apiya.” b Di tord ting we yu fi du, a tingk bout ou wen yu du wa dem se yu fi du, it a-go elp yu wen yu get biga. Paulo we liv iina Brazil se, “Mi get fi si se wen mi du wa mi mada an faada se mi fi du, it elp mi fi du di sitn dem we Jeuova an di ada piipl dem we Jeuova pik fi tel mi wa fi du se.” Gad Wod tel wi wa mek wi fi du wa wi mada an faada se wi fi du wen it se: “Ef unu du dat, evriting a-go  aarait wid unu an Gad wi mek unu liv api pan di ort fi wan lang lang taim.”​—Ifii. 6:2, 3.

8. Wa mek uol iip a pikni du wa dem mada an faada se dem fi du?

⁸ Uol iip a pikni fain out se kaaz dem no aad-iez, tingz wok out gud fi dem. Luiza, we kom fram Brazil, neehn nuo wa mek ar mada an faada neehn waahn ar fi av wan sel fuon an wol iip a pikni fi ar iej did av wan. Bot shi fain out se ar mada an faada onggl did a mek shuor se shi no get iina chobl. Shi se, “Wen mi du wa mi mada an faada se mi fi du, it komiin laik wen yu put aan wan siitbelt iina wan kyaar fi kip yu sief.” Wan neda yong sista we kom fram Merika we niem Ilizibet se shi stil fain it aad som a di taim fi du wa ar mada an faada se. Shi se, “Som a di taim wen mi mada an faada tel mi fi du sitn ar no fi du sitn an mi no nuo wa mek dem se wa dem se, mi chrai an memba wen dem did tel mi fi du sitn an it did wok out gud fi mi wen mi dwi’it.” An Monica we liv iina Aarmiiniya se tingz aalwiez wok out beta fi ar wen shi du wa ar mada an faada tel ar fi du dan wen shi du wa shi waahn fi du.

9. A ou uol iip a piipl fiil bout di laa dem we di govament dem gi dem?

⁹ Uol iip a piipl wuda se dem kyaahn du widout di govament dem an wi fi fala som a di laa dem we dem gi wi. (Ruo. 13:1) Bot wen taim dem sed piipl de fiil se wa di govament tel dem fi du no fier ar it luk laik se dem a aks dem fi du tu moch, dem sed wan no du wa dem se. Laik wen it kom aan fi pie taks, wen dem aks nof piipl we de iina wan konchri we de iina Yuurop ef dem fiil se “it rait fi no pie taks ef di taks dem no fier,” nof a di piipl dem se dem no fiil se dem fi pie it. An wi no fain it aad fi biliiv se a onggl likl muor dan aaf a di taks we di govament se dem fi pie dem piipl de pie.

10. Wa mek wi du wa di govament se wi fi du aal wen dem tel wi fi du tingz we wi no laik?

¹⁰ Di Baibl mek wi nuo se dem govament ya we a mek wi sofa so, a Sietan a kanchuol dem. Bot Gad suun get rid a dem. (Sa. 110:5, 6; Iik. 8:9; Luuk 4:5, 6) Bot di Baibl aal tel wi se a “di piipl we no du wa di govament se dem fi du, a go dem riili a go gens di piipl we Gad pik fi ruul.” So rait ya nou ya, Jeuova waahn wi fi du wa dem se wi fi du so dat tingz kyan ron gud. So a das wai wi a-go “pie piipl wa [wi] uo dem.” So dat miin tu se wi a-go pie wi taks dem an du tingz fi mek di govament si se wi rispek dem an se wi a du wa dem se wi fi du. (Ruo. 13:1-7) Wi mait fiil se sortn laa we dem gi wi a mek tingz aada fi wi, ar it no fier, ar it a-go tek tu moch moni fi du wa dem se. Bot wi a-go du wa Jeuova se wi fi du an du wa di govament se wi fi du az lang az wa  dem tel wi fi du naa go gens wa im tel wi fi du.​—Aks 5:29.

11-12. Azkaadn tu Luuk 2:1-6, aalduo it neehn iizi fi du wa di govament se dem fi du, wa Juozif an Mieri did du, an wa apm kaa dem did du dat? (Luk pan di picha dem tu.)

¹¹ Juozif an Mieri did redi fi du wa di govament se dem fi du aal wen it did aad fi dem, an wi kyan lorn fram dat. (Riid Luuk 2:1-6.) Wen Mieri did bout nain mont pregnant, Agostos uu a did di ruula iina Ruom, did waahn fi tek op sensos. So Juozif an Mieri wuda afi go aal di wie baka Betliyem, we did a bout 93 mail chuu di il dem. So wi nuo se dat wudn bi wan iizi ting fi dem du, speshali sins Mieri pregnant. So dem mait-a did a fret bout wa mait-a apm tu Mieri an di biebi we de iina ar beli. Laik wa ef wen shi a go a Betliyem, shi fiil laik se shi waahn fi av pikni? An pan tap a dat, di pikni we de iina ar beli wuda bi di Mesaiya. Yu tingk dat shuda mek dem fiil laik se dem no fi du wa di govament se dem fi du?

¹² Juozif an Mieri neehn mek non a dem sitn ya tap dem fram du wa di govament se dem fi du. An Jeuova did bles dem fi dat. Mieri riich a Betliyem aarait an get fi av wan nais biebi. An wa dem did du did mek wa di Baibl se a-go apm apm fi chuu.​—Mai. 5:2.

13. A ou wen wi no aad-iez it kyan elp wi ada breda an sista dem?

¹³ Wen wi no aad-iez an wi du wa di govament se wi fi du, it no onggl mek tingz ton out gud fi wi bot it mek tingz ton out gud fi ada piipl tu. Laik wi naa go get ponish laik di piipl dem we naa du wa di govament se dem fi du. (Ruo. 13:4) An wen wi du wa di govament se wi fi du, it kyan mek tingz wok out gud fi ada Jeuova Witnis tu. Laik uol iip a ier ago iina Naijiiriya, som suoja go iina wan Kindom Aal wen dem did a kip wan miitn fi si ef dem fain nobadi we no waahn pie dem taks. Bot di suoja we inchaaj a dem tel dem se dem kyan lef dem kaa im se “di Jeuova Witnis piipl dem pie dem taks.” So yu si se evritaim yu du wa di  govament se, yu a elp fi mek piipl taak gud bout Jeuova piipl dem, an dat mait-a mek tingz wok out gud fi Jeuova piipl wan die.​—Mat. 5:16.

14. A wa did elp wan sista fi “no aad-iez”?

¹⁴ Bot a no aal di taim wi a-go fiil laik se wi waahn fi du di sitn dem we di govament se wi fi du. Wan sista we niem Joanna we de iina Merika se, “It did aad fi mi wan a di taim fi du wa di govament se mi fi du kaa dem did du som uol iip a bad sitn tu som a di piipl dem iina mi fambili.” Bot Joanna did wok aad fi chienj di wie ou shi tingk. Di fos ting shi du a tap riid di sitn dem we piipl put panlain we taak gens di govament dem we mait-a mek ar fiil laik shi no fi rispek dem. (Pr. 20:3) An di sekan ting we shi du a prie tu Jeuova an aks im fi elp ar fi chos iina im an no mek shi fiil se ef wan difrant govament staat fi ruul, tingz a-go beta. (Sa. 9:9, 10) An di tord ting we shi du a fi riid di paat dem iina wi buk an pamplet dem we taak bout ou wi no fi get miks op iina palitiks an dem ting de. (Jan 17:16) An shi se kaa shi rispek di govament dem an du wa dem se, it mek ar ‘av piis iina ar aat an main.’

15. Wa mek it mait-a aad fi wi du sitn we Jeuova aaganaizieshan se wi fi du?

¹⁵ Jeuova tel wi se wi fi ‘lisn tu di wan dem we a liid wi’ iina di kanggrigieshan dem an du wa dem se wi fi du. (Iib. 13:17) Wi nuo se Jiizas, wi liida, porfek. Bot di wan dem we im a yuuz fi liid wi iina di kanggrigieshan no porfek. So kaaz a dat, wi mait-a fain it aad fi du wa dem se, wos ef dem aks wi fi du sitn we wi no waahn fi du. Wan a di taim, Piita neehn kwik fi du wa im did fi du. Laik di taim wen wan ienjel did tel im se im fi iit som animal we di Laa we Gad gi Muoziz se dem no fi nyam kaa dem no kliin. An a aal a chrii taim Piita se im naa nyam it. (Aks 10:9-16) Wa mek im neehn waahn fi nyam it? Im neehn waahn fi nyam it kaa wa di ienjel did a tel im did difrant fram wa im did yuus tu. So ef Piita did fain it aad fi du wa wan ienjel we porfek tel im fi du, it mait-a aada fi wi fi du wa di man dem we a liid wi iina di kanggrigieshan we no porfek se wi fi du.

16. Aalduo Paal neehn afi du wa di breda dem tel im fi du, wa im did du? (Aks 21:23, 24, 26)

¹⁶ Paal neehn aad-iez. Aal wen dem tel im fi du sitn we im mait-a did tingk se im neehn afi du, im stil dwi’it. Di Kristiyan dem we a Juu did ier piipl a se Paal a tiich di piipl dem “fi ton we fram we Muoziz tiich,” an se im na’av no rispek fi Muoziz Laa. (Aks 21:21) So wen di elda dem we iina Jeruusilem we weehn a liid di kangrigieshan dem ier dis, dem tel Paal fi tek fuor man an kyari dem go a Gad ous wid im so dat dem kyan get kliin iina Gad yai. Bot Paal did wel an nuo se di Kristiyan dem neehn afi du di sitn dem we di Laa se an se im no du notn rang. Bot Paal neehn aad-iez. “So di neks die, Paal tek di fuo man dem, an im an dem du wa di Laa se fi du fi get kliin iina Gad yai.” (Riid Aks 21:23, 24, 26.) Kaa Paal did du wa di elda dem se, it mek di wol a dem wok tugeda az wan.​—Ruo. 14:19, 21.

17. Wa wi kyan lorn fram wa did gwaan wid Stephanie?

¹⁷ Wan sista we niem Stephanie did fain it aad fi du wa di breda dem a di branch afis iina ar konchri se shi fi du. Dis a kaa shi an ar ozban did a go a wan miitn we de iina wan neda langwij iina ar konchri, bot di breda dem a di branch afis did lak dong da gruup de an tel dem fi go baka wan  kanggrigieshan we a kip miitn iina di langwij we dem a taak fram dem a pikni. Shi se, “Mi neehn api at aal at aal kaa mi neehn fiil se dem did niid muor piipl fi priich iina di langwij we mi a taak fram mi a pikni.” Bot aalduo shi did fiil so, shi stil du wa di breda dem se shi fi du. An shi se: “Likl bai likl, mi si se wa dem did se mek sens. Iina di kanggrigieshan we mi de ya nou, mi an mi ozban komiin laik mada an faada tu wol iip a di breda an sista dem we na’av no fambili iina di chuut. Rait ya nou mi a stodi wid wan sista we did tap go a miitn an fiil sorvis bot we staat fi du dem sitn de agen. An mi get muo taim fi du mi uona Baibl stodi tu.” An shi se, “Mi kanchens naa bada mi kaa mi a du aal a we mi kyan du fi du wa di breda dem se mi fi du.”

18. Ou it kyan elp wi wen wi du wa Jeuova aaganaizieshan se wi fi du?

¹⁸ Wi kyan lorn fi du di sitn dem we Jeuova waahn wi fi du. Jiizas ‘did lorn fi lisn wa Gad se an du wa Gad se im fi du’​—no wen tingz did swiit an dandi, bot ‘wen im did a go chuu sofarieshan.’ (Iib. 5:8) An jos laik Jiizas, wi kyan lorn fi du wa Jeuova waahn wi fi du wen wi a go chuu wan rof taim. Laik wen KUOVID-19 did jos staat, dem se wi no fi go a miitn a di Kindom Aal an wi no fi go priich fram ous tu ous. Yu did fain it aad no fi du dem sitn ya? Bot wen yu neehn du dem, yu did si se it did kip yu sief an mek yu an di breda an sista dem aal uova di worl wok tugeda. An dis did mek Jeuova api. An kaa wi did du wa Jeuova aaganaizieshan tel wi fi du, it wi elp wi fi redi fi fala di sitn dem we dem tel wi fi du wen taim di wos sofarieshan kom. So ef wi no waahn fi ded, wi afi mek shuor se wi du di sitn dem we dem tel wi fi du.​—Juob 36:11.

19. Wa mek yu no waahn fi aad-iez?

¹⁹ Iina da lesn ya, wi si se wen wi du di sitn dem we Jeuova se wi fi du, it a-go mek wi get wol iip a blesn. Bot a no dat a di mien riizn wa mek wi du di sitn dem we Jeuova tel wi fi du. Wi dwi’it kaa wi lov im an wi waahn im fi api. (1 Jan 5:3) An wi nuo se wi kyaahn pie bak Jeuova fi aal a di gud sitn dem we im du fi wi. (Sa. 116:12) Bot wi kyan du di sitn dem we im an di wan dem we im pik fi tel wi wa fi du se wi fi du. Ef wi no aad-iez wi shuo se wi waiz, an “di wan dem we waiz mek Jeuova api.”​—Pr. 27:11.