1. Wa a som a di sitn dem we Jiizas du fi wi?

 NOBADI no du muor sopm fi elp ada piipl laik Jiizas. Kaa wen im did de pan ort, im yuuz im powa fi wok mirikl fi elp ada piipl. (Luuk 9:12-17) Jiizas gi op im laif fi wi an dat a di bigis ting we sumadi kyan du we shuo se dem lov sumadi. (Jan 15:13) An afta Jiizas kom bak alaiv, im du wol iip a tingz fi gwaan elp wi. Jos laik we im pramis, im beg Jeuova fi gi wi Im uoli spirit we tiich wi an osh wi. (Jan 14:16, 17; 16:13) An im gi wi wi miitn dem we mek wi nuo ou fi priich tu piipl we de aal uova di ort an fi tiich dem tu.​—Mat. 28:18-20.

 2. A uu a som a di man dem we Jiizas gi az wan gif we Ifiijan 4:7, 8 taak bout?

² Mek wi luk pan wan neda gif we Jiizas gi wi. Di apasl Paal did rait se afta Jiizas go a evn, “im ton roun an gi dem man de az wan gif tu di piipl dem.” (Riid Ifiijan 4:7, 8, NWT.) Paal mek wi nuo se Jiizas gi wi dem gif ya fi elp out iina di kanggrigieshan iina difrant difrant wie. (Ifii. 1:22, 23; 4:11-13) Som a dem ya “gif tu di piipl dem” a di ministiiriyal sorvant dem, an di elda dem, an di sorkit uovasiya dem. a Wi nuo se dem man ya no porfek, so dem a-go mek mistiek tu. (Jmz. 3:2) Bot wi Laad Jiizas Krais stil a yuuz dem fi elp wi; a dem a di gif dem we im gi wi.

 3. Tel wi wa aal a wi kyan du fi shuo se wi a sopuot di wok we di man dem we Jiizas gi wi az wan gif a du, an tel wi wa it mait-a komiin laik.

³ Jiizas gi dem man ya az “wan gif tu di piipl dem” fi bil op di kanggrigieshan dem. (Ifii. 4:12) Bot di res a wi kyan stil elp dem fi du di wok we dem get fi du. Laik tingk bout dis: Som a wi breda an sista dem get di wok fi bil Kindom Aal, bot di  res a wi kyan du ada tingz fi sopuot dem. Laik wi kyan kuk fuud fi dem, jraiv dem go wich paat dem a go, an wi kyan du ada tingz fi dem tu. A siem wie so, aal a wi kyan se an du tingz fi shuo se wi a sopuot di wok we di ministiiriyal sorvant dem, di elda dem, an di sorkit uovasiya dem a du. Mek wi luk pan ou di wok we dem breda ya a du a elp wi an ou wi kyan shuo dem an Jiizas, di wan we gi dem man de az wan ‘gif tu wi,’ se wi tangk dem fi wa dem du.

DI MINISTIIRIYAL SORVANT DEM “LOV FI ELP ADA PIIPL”

 4. A wa a som a di sopm dem we di ministiiriyal sorvant dem yuus tu du fi elp ada piipl?

⁴ Bak iina di taim wen di Baibl a rait, dem did pik som a di breda dem fi ton ministiiriyal sorvant. (1 Tim. 3:8) It luk laik se dem wan ya a di wan dem we Paal did rait bout we “lov fi elp ada piipl.” (1 Kor. 12:28) So di ministiiriyal sorvant dem yuus tu du som ada tingz so dat di elda dem kuda spen taim fi tiich an tek kier a di breda an sista dem. Laik di ministiiriyal sorvant dem mait-a did elp fi rait uova di paat a di Baibl we dem did av ar dem mait-a bai tingz fi rait it uova.

 5. Wa a som a di gud sitn dem we di ministiiriyal sorvant dem a du ya nou?

⁵ Mek wi luk pan som a di gud sitn dem we di ministiiriyal sorvant dem a du fi elp di breda an sista dem iina di kanggrigieshan. (1 Pii. 4:10) Dem aks som a dem fi tek kier a di moni fi di kanggrigieshan ar fi saat out di ieriya dem we di breda an sista dem fi priich iina, ar fi saat out tingz so di breda an sista dem av di buk an pamplet dem we dem niid. An dem mek wi kyan get wi vidiyo an rekaadin dem fi di miitn dem, an dem du eni ada likl ting fi mek shuor se tingz aarait wid di breda an sista dem wen dem de a di Kindom Aal, an dem elp fi tek kier a di Kindom Aal tu. Aal a dem sopm ya we dem du a tingz we fi du fi elp fi mek tingz gwaan gud iina di kanggrigieshan. (1 Kor. 14:40) An pan tap a dat, som a di ministiiriyal sorvant dem av paat fi du pan di Ou Kristiyan Fi Liv An Priich Miitn, an som a dem gi taak a di miitn we kip pan di wiiken. An som a di taim di ministiiriyal sorvant dem kyan get pik fi elp di elda we inchaaj a wan fiil sorvis gruup. An dem chrien som a dem fi elp di elda dem wen dem go luk fi wan breda ar wan sista fi yuuz di Baibl fi push dem fi gwaan tan op chrang.

 6. Wa a som a di sopm dem we di ministiiriyal sorvant dem a wok aad fi du iina di kanggrigieshan we mek wi tangk Jeuova fi dem so?

⁶ Wa dem sista ya a se, elp wi fi si ou di wok we di ministiiriyal sorvant dem a du a elp di breda an sista dem iina di kanggrigieshan. Laik Beverly, b we kom fram Boliviya se, “Mi afi tangk di ministiiriyal sorvant dem, kaa di wok we dem a du mek mi enjai di miitn dem. Ye man, dem mek mi kyan sing di sang dem an put op mi an an ansa kwestiyan wen mi go a miitn, an lisn tu di taak dem an lorn nof fram di vidiyo dem an di picha dem we dem shuo. Dem du sikyorti wok a di Kindom Aal an dem set op tingz so dat piipl kyan get miitn pan Zoom an dem ting de. An afta miitn don, a dem fos staat kliin an dem elp fi chek op di kanggrigieshan moni an dem mek shuor se wi av di buk an pamplet dem we wi niid. Bwai mi tangk Jeuova fi dem!” An Leslie, we liv iina Kolombiya uufa ozban a wan elda se, “Mi ozban dipen pan di ministiiriyal sorvant dem fi du sortn an sortn tingz. Yu si ef dem neva de ya, im wuda av nof muor sitn fi du, so mi api se dem redi fi elp out.” Yu mait-a fiil siem wie bout yu ministiiriyal sorvant dem laik dem tuu sista ya.​—1 Tim. 3:13.

 7. A ou wi kyan shuo se wi tangk Jeuova fi di ministiiriyal sorvant dem? (Luk pan di picha tu.)

 ⁷ Aalduo yu mait-a fiil api se wi av wi ministiiriyal sorvant dem, di Baibl mek wi nuo se wi fi ‘shuo se wi tangk Gad’ fi dem. (Kol. 3:15) Krystof, we a wan elda iina Finlan, shuo se im api fi dem. Im se, “Mi sen puos kyaad go gi dem ar mi rait wan teks mesij an sen tu dem. An mi wuda rait wan skripcha iina dem an taak bout wan sortn wie ou di ministiiriyal sorvant did push mi fi go aan, ar mi wuda jos tel im wa mek mi api fi wa im a du.” An Pascal an Jael, we liv iina Nyuu Kaliduoniya, se dem prie fi di ministiiriyal sorvant dem. Pascal se, “Wa wi staat fi du nou a beg Jeuova fi gwaan elp di man dem we dem pik fi elp wi iina di kanggrigieshan an wi tangk im fi dem tu.” An Jeuova a ier wi wen wi prie an it a elp evribadi iina di kanggrigieshan tu.​—2 Kor. 1:11.

DI ELDA DEM “WE A WOK AAD MONGKS UNU”

 8. Wa mek Paal kuda rait se di elda dem bak iina Baibl taim did a “wok aad”? (1 Tesaluoniyan 5:12, 13)

⁸ Di elda dem bak iina Baibl taim did a wok aad iina di kanggrigieshan. (Riid 1 Tesaluoniyan 5:12, 13; 1 Tim. 5:17) Dem did a liid di kanggrigieshan wen dem du di miitn dem an a se wa fi apm iina di kanggrigieshan. An dem tiich di breda an sista dem wen dem jraa dem op iina wan nais wie so dem kyan elp dem fi gwaan chos iina Jeuova. (1 Tes. 2:11, 12; 2 Tim. 4:2) An dem man ya did wok aad fi tek kier a dem fambili tu an dem du aal we dem kyan du so dat dem kuda gwaan tan op chrang iina wa dem biliiv iina.​—1 Tim. 3:2, 4; Taitos 1:6-9.

 9. Wa a som a di sitn dem we di elda dem a du?

⁹ Di elda dem av nof wok fi du. Dem a du evriting we dem kyan du fi priich Gad Wod. (2 Tim. 4:5) Dem a liid wi iina di priichin wok, dem saat out we wi fi priich, an dem a tiich wi ou fi priich an tiich gud. An dem karek di breda an sista dem iina di kanggrigieshan iina wan wie we shuo se dem fier. So wen wan breda ar wan sista sin bad, di elda dem du wa dem kyan du fi elp dem so dat dem an Jeuova kyan ton fren agen, kaa dem waahn fi mek shuor se di kanggrigieshan kliin iina Gad yai. (1 Kor. 5:12, 13; Gya. 6:1) Di elda dem komiin laik wan shepad, kaa di bigis ting we dem afi du a fi tek kier a di breda an sista dem iina di kanggrigieshan. (1 Pii. 5:1-3) Dem gi som gud taak we bies aafa di Baibl an dem chrai dem bes fi nuo evribadi iina di kanggrigieshan, an dem go luk fi dem an yuuz di Baibl fi push dem fi tan op chrang. Som a di elda dem elp fi bil Kindom Aal an fi tek kier a dem, an dem saat out tingz so dat di kanvenshan dem kyan gwaan gud. An dem pik som a dem fi elp wi fi tan op chrang wen di dakta dem waahn wi fi tek blod. An dem pik som a dem fi go luk fi di breda an sista dem wen dem de iina di aspital an dem gi dem ada wok fi du tu. So wi si se di elda dem a wok aad fi wi!

10. Wa a som a di sitn dem we wi elda dem a du we mek wi tangk Jeuova fi dem?

¹⁰ Jeuova did se im a gi wi shepad fi tek kier a wi so dat wi na’afi “fried a notn agen.” (Jer. 23:4) Wan sista we niem Johanna, we kom fram Finlan se wa iina da vors ya a sitn we shi si fi arself wen ar mada did sik bad. Shi se, “Aalduo mi no fain it iizi fi tel piipl ou mi fiil, wan elda we mi neehn nuo gud kom taak tu mi an tek im taim wid mi an im prie wid mi an mek mi nuo se Jeuova lov mi. Mi no memba evriting we im se, bot mi memba se mi neehn did a fret an a wori op miself wen im don taak tu mi. Mi fiil se a Jeuova sen im fi kom taak tu mi wen im kom taak tu mi, kaa mi nuo a dat a did di rait taim.” A ou di elda dem iina fi yu kanggrigieshan a elp yu?

11. Wa wi kyan du fi mek di elda dem si se wi tangk dem fi aal a wa dem a du? (Luk pan di picha tu.)

 ¹¹ Jeuova waahn wi fi mek di elda dem nuo se wi tangk dem “siek-a aal we dem du”. (1 Tes. 5:12, 13) Henrietta, we liv iina Finlan se, “Di elda dem redi fi elp mi, bot dis no miin tu se dem av muo chrent an taim muo dan nobadi els. An a no laik se dem no av no prablem iina fi dem laif tu. Somtaim mi jos tel dem se, ‘Mi uop se yu nuo se yu a wan gud elda.’” An wan sista we iina Torkiyie c we niem Sera se, “Di elda dem niid di ‘push’ fi gwaan du wa dem a du. So wi kyan gi dem wan kyaad, ar invait dem fi kom nyam som fuud wid wi, ar wok wid dem iina sorvis.” Yu av wan elda iina yu kanggrigieshan we yu riili tangk fi di wok we dem a du? Yu kyan chrai fi si wa yu kyan du fi mek dem nuo se yu tangk dem fi di wok we dem a du.​—1 Kor. 16:18.

DI SORKIT UOVASIYA DEM NIID WAN LIKL PUSH FI GO AAN TU

12. A wich ada set a man Jiizas did yuuz fi mek di kanggrigieshan get chrangga? (1 Tesaluoniyan 2:7, 8)

¹² Jiizas Krais gi dem man ya az wan gif tu di kanggrigieshan, an dem du som difrant difrant kain-a wok iina di kanggrigieshan dem. A im did mek di elda dem iina Jeruusilem sen out Paal an Baanabas an som ada man fi bi sorkit uovasiya. (Aks 11:22) A di siem riizn wa mek im mek di kanggrigieshan dem av ministiiriyal sorvant an elda iina dem. Dem man ya elp bil op di kanggrigieshan tu. (Aks 15:40, 41) Dem man ya gi op nof tingz we wuda mek laif iiziya fi dem an som a dem aal nieli ded so dat dem kyan get fi kom tiich an push di ada breda an sista dem fi go aan.​—Riid 1 Tesaluoniyan 2:7, 8.

13. Wa a som a di sitn dem we di sorkit uovasiya dem av fi du?

 ¹³ Di sorkit uovasiya dem aalwiez av sitn fi du. Som a dem chravl wol iip a mail fi go a di difrant difrant kanggrigieshan dem. An evri wiik wan sorkit uovasiya wuda gi som taak, go luk fi di ada breda an sista dem so dat dem kyan yuuz di Baibl fi push dem fi tan op chrang, an dem av miitn wid di paiyanier dem, an wid di elda dem, an dem kip som miitn fi fiil sorvis tu. An dem gi taak a di sorkit miitn dem an a di kanvenshan dem tu, an dem mek shuor se tingz a ron laik ou Jeuova waahn it fi ron. Dem tiich a di paiyanier skuul dem, an av wan speshal miitn wid di paiyanier dem iina di sorkit. An som taim di breda dem a di branch afis gi dem som ada tingz fi du we dem afi go du siem taim.

14. Wa a som a di riizn dem we mek di breda an sista dem lov di sorkit uovasiya dem so moch?

¹⁴ Di sorkit uovasiya dem, we Jeuova gi di kanggrigieshan dem az a wan gif, a elp di breda an sista dem nof nof. Laik wan breda fram Torkiyie se, “Evritaim di sorkit uovasiya kom a di kanggrigieshan, it push mi fi waahn fi du muor fi elp di breda an sista dem. A wol iip a sorkit uovasiya mi nuo, an non dem neva mek mi fiil laik se mi kyaahn kom taak tu dem ar laik se dem na’av no taim fi mi.” Johanna, we wi did taak bout aredi, did wok wid wan sorkit uovasiya iina sorvis wan a di taim an dem neehn fain nobadi a non a di yaad dem fi taak tu. Bot shi se, “Mi naa go figet da die de, kaa mi tuu sista dem did jos muuv an mi did mis dem bad. An di sorkit uovasiya taak tu mi an mek mi si se aalduo dem de faar fram mi nou, it naa go bi fi eva, kaa iina paradais wi a-go av wol iip a taim fi spen wid wi wan aneda, an it did mek mi fiil beta.” A dem kain-a ting ya di sorkit uovasiya dem a du we mek di breda an sista dem lov dem so moch.​—Aks 20:37–21:1.

15. (a) Wa 3 Jan 5-8 shuo se wi kyan du fi mek di sorkit uovasiya dem si se wi api fi av dem? (Luk pan di picha tu.) (b) Wen it kom aan tu aal a di man dem we Jeuova gi wi az gif, wa mek wi fi shuo se wi api fi wa dem waif a du tu, an ou wi kyan du dat? (Luk pan di paat we niem “ Memba Di Waif Dem.”)

 ¹⁵ Di apasl Jan did tel Gaiyos fi luk aafa di breda dem we kom a di kanggrigieshan. Im tel im tu se im fi “sen dem pan dem wie jos laik ou yu nuo Gad wuda waahn yu fi du.” (Riid 3 Jan 5-8.) Wan a di wie ou wi kyan du dis a fi invait di sorkit uovasiya fi kom a wi yaad kom iit som fuud wid wi. An wan neda wie we wi kyan du it a fi go out iina sorvis wid dem wen dem kom a wi kanggrigieshan. Leslie, we wi did taak bout aredi, du som ada tingz fi mek di sorkit uovasiya dem si se shi tangk dem fi wa dem a du. Shi se: “Mi prie fi Jeuova gi dem di ting dem we dem niid,” an shi se, “Mi an mi ozban rait leta tu dem fi mek dem nuo se dem elp wi nof nof wen dem kom a wi kanggrigieshan.” An memba ino, di sorkit uovasiya dem a no suupaman. Som taim dem get sik tu, ar dem mait-a wori an fret bout sopm, ar tingz mait aal mek dem sad tu. So wen yu se sopm nais tu dem ar gi dem wan likl prezent, it mait-a bi sitn we dem did a prie fa an dem get it di rait taim.​—Pr. 12:25.

WI NIID DI MAN DEM WE A “WAN GIF”

16. Wen wi si wa Pravorbz 3:27 se, wa a som a di kwestiyan dem we di breda dem kyan aks demself?

¹⁶ Aal uova di worl, wi niid muo an muo a wi breda dem fi bi “wan gif tu di piipl dem.” Ef yu baptaiz an yu a wan breda, “yu kyan du sitn fi elp”? (Riid Pravorbz 3:27.) Yu wuda waahn fi du di sitn dem we kyan mek yu ton wan ministiiriyal sorvant? Yu tingk yu kuda ton wan elda d so dat yu kyan du muo sitn fi elp di breda an sista dem? Yu tingk yu kuda chienj op som tingz iina yu laif so dat yu kyan sain op fi go a di School for Kingdom Evangelizers? Afta yu go a da skuul de, Jiizas a-go kyan yuuz yu fi du nof muor tingz. Ef yu fiil tu se yu kyaahn du muor wen it kom aan tu dem ting ya, jos prie tu Jeuova. Jos aks im fi gi yu im uoli spirit fi elp yu fi du eniting we yu get fi du.​—Luuk 11:13; Aks 20:28.

17. Wa di breda dem we a “wan gif tu di piipl dem” mek wi nuo bout wi King, Krais Jiizas?

¹⁷ Di breda dem we Jiizas pik fi bi “wan gif tu di piipl dem” mek wi nuo se a im a di wan we a liid wi ya nou til taim don. (Mat. 28:20) Duohn wi api se wi av wan King we lov wi, we kain tu wi, an we a luk out fi wi an we gi wi di breda dem we kyan tek kier a wi? Ef a so yu fiil bout dem breda ya we a wok aad fi elp wi, chrai an si wa yu kyan du fi mek dem si se yu tangk dem fi aal a di wok we dem a du. An memba se yu fi tangk Jeuova tu, kaaz a im a di wan we gi wi “evri gud sitn​—di sitn dem we no av notn bad bout dem.”​—Jmz. 1:17.