Dem wuda waak a di front paat a Gad ous fi go iina di Uoli Plies. Di Nyuu Worl Chransilieshan Baibl dem we did de bout fram bifuo 2023 mek wi nuo se da front paat de a Gad ous a did 20 kyubik lang an 20 kyubik waid an it did go op ai tu 120. (2 Kr. 3:4) An som ada Baibl se tu se da front paat de did a 120 kyubik ai, dat a 175 fut, an dat ai bad!

Bot di 2023 Nyuu Worl Chransilieshan Baibl se di front paat a Gad ous we Salaman did mek did a 20 kyubik ar 30 fut ai. a Mek wi luk pan wa mek dis did chienj.

1 Kingz 6:3 neva taak bout ou ai di front paat a Gad ous did bi. Iina da vors de, Jerimaiya did taak bout ou lang an ou waid da front paat de did bi, bot im neehn taak bout ou ai it bi. An den iina di neks chapta, im se som uol iip muor tingz bout som ada paat a Gad ous, laik im taak bout di big biesn a waata we mek outa metal, di ten waata kyaat dem, an di tuu kalom dem we mek outa kapa we de outsaida di front paat a Gad ous. (1 Ki. 7:15-37) Ef da front paat de a Gad ous a did muor dan 164 fut ai, it wuda wel aiya dan di res a Gad ous. So wa mek Jerimaiya neehn se notn bout ou ai it did bi? An som uol iip a ier afta dat, som Juu man did rait se di front paat a Gad ous neehn aiya dan di res a Gad ous we Salaman did mek.

Som man uu stodi nof bout Gad ous did a wanda ef di waal dem fi Gad ous kuda wol op di front paat ef it did a riili 120 kyubik ai. Bak iina Baibl taim, yu did av som plies we did mek outa stuon an brik, laik di front paat a som plies we di piipl dem iina Iijip yuus tu go worship fi dem gad. Dem wuda mek dem plies de naro op a di tap an den it kom dong waid dong a batam. Bot Gad ous we Salaman did mek did difrant fram dem. Kaa di man dem we stodi nof bout dis did se di waal dem fi Gad ous neehn muor dan 9 fut waid. Wan man we niem Theodor Busink we stodi nof bout ou dem mek oul taim bildin se: “Bies pan ou waid di waal dem fi di front paat a Gad ous did bi, it kudn bi 120 kyubik ai.”

Wen dem did a rait uova 2 Kranikl 3:4, dem mait-a did rait it uova rang. Som sitn we dem did rait uova di Baibl pan did se “120” iina da vors ya. Bot som ada sitn we dem did rait uova we wi kyan chos se “20 kyubik” ai, laik di sitn we niem Codex Alexandrinus we did rait muor dan 1500 ier ago, an di sitn we niem Codex Ambrosianus we did rait muor dan 1400 ier ago. Bot wa kuda kaaz sumadi we a rait uova da vors ya fi mek wan mistiek an rait “120”? Dem kuda mek wan mistiek kaa di wod fi “onjrid” an “kyubik” luk di siem wie iina di Iibruu langwij. So di sumadi we a rait uova da vors ya kuda did rait “onjrid” insted-a di wod fi “kyubik.”

Ye, wi a-go chrai fi andastan aal a dem sitn ya we wi jos taak bout an mek shuor se wi no mis notn wen wi a taak bout Gad ous we Salaman did mek. Bot wa wi riili waahn fi kip iina wi main a se Gad ous we Salaman did mek a did wan sheda fi Gad ous we wi a worship iina nou we a di riil sitn we did fi kom. An wi glad se im mek wi kyan worship im da wie ya rait ya nou!​—Iib. 9:11-14; Rev. 3:12; 7:9-17.