Myuuzik a did wan big ting tu di Izrelait piipl dem. Di Baibl mek wi nuo se dem yuus tu plie myuuzik an sing wol iip a sang. Matarafak, som paat a di Baibl mek op a sang, laik di buk a Saamz, Sang A Salaman, an Lamentieshan. A das wai di buk we niem Music in Biblical Life se iina di Baibl “wi si klier klier se wen di Izrelait piipl dem a go bout dem laif a du difrant difrant tingz, dem yuus tu sing sang wen dem a dwi’it.”

Myuuzik wen dem a du difrant difrant tingz iina dem laif. Di Izrelait dem yuus tu plie myuuzik an sing sang fi mek ada piipl nuo ou dem fiil. (Aiz. 30:29) Di uman dem wuda plie dem tambariin an sing sang an daans wen sumadi a ton King, an wen dem a kip festival, an wen dem win waar. (Joj. 11:34; 1 Sam. 18:6, 7; 1 Ki. 1:39, 40) Di Izrel piipl dem yuus tu sing sang tu wen dem sad bad an a baal kaa sumadi ded. (2 Kr. 35:25) So wi na’afi aks if “di Izrelait piipl dem did lov myuuzik bad bad,” jos laik wa McClintock an Strong Cyclopedia se.

Di king dem did lov myuuzik. King Saal did tel Dievid fi kom plie myuuzik fi’im. (1 Sam. 16:18, 23) An wen Dievid ton king, im mek som sitn we fi plie myuuzik, an im rait im uona sang dem, an im did av piipl we plie myuuzik iina Gad ous. (2 Kr. 7:6; Iemos 6:5) An Salaman uu a did King tu did av som man an uman we sing wich paat im liv.​—Iik. 2:8.

Di Izrelait dem did yuuz myuuzik fi worship Jeuova. Matarafak, a 4,000 man dem did yuuz fi plie myuuzik a Gad ous iina Jeruusilem. (1 Kr. 23:5) Dem yuus tu yuuz som sitn we niem simbal, aap, an chompit fi plie myuuzik. (2 Kr. 5:12) Bot iivn duo dem man ya kuda plie myuuzik gud, a no dem wan yuus tu yuuz myuuzik wen dem a worship Jeuova. Nof a di Izrelait dem sing di sang dem we de a Saamz 120–134 wen dem a go a Jeruusilem fi kip di festival dem a ier taim. An bies pan wa di Juu piipl dem rait, dem wuda sing som ada sang fram di Saamz dem a wen dem a nyam fuud wen dem a selibriet di Paasuova alidie.

Myuuzik a stil wan big ting fi Gad piipl tide. (Jmz. 5:13) Wen wi a worship Gad, wi sing sang fi big im op (Ifii. 5:19) Wi fiil kluosa tu wi breda an sista dem wen wi kom tugeda an sing sang tu Jeuova. (Kol. 3:16) An it mek wi tan op chrang wen wi a go chuu wi prablem dem iina wi laif. (Aks 16:25) Myuuzik a wan nais wie fi shuo Jeuova se wi chos iina im an se wi lov im.