Nuo sa. Bot iivn duo im neehn tingk so, wa im did rait se a dat a-go apm.

Luk pan wa im did rait iina da vors de an som ada wan. Im se im a-go sing an big op Jeuova niem fi eva an evridie im a-go du wa im did pramis Jeuova se im did a-go du. Im se agen: “Mi priez yu, Jeuova mi Gad, wid aal a mi aat, an mi a-go big op yu niem fi eva.” An im se im a-go big op Jeuova niem fi eva an eva.​—Sa. 61:8; 86:12; 145:1, 2.

A no laik se Dievid did tingk se im wudn ded, kaa im did nuo se Jeuova did se kaa piipl sin dem a-go ded, an Dievid did rait se im a sina. (Jen. 3:3, 17-19; Sa. 51:4, 5) Im did nuo se aal di man dem we did a du wa Jeuova waahn dem fi du, laik Iebriyam, Aizak an Jiekob did ded, an Dievid kuda si se im wuda ded wan die tu. (Sa. 37:25; 39:4) Bot wa im did rait a Saam 61:8 did shuo se im did mek op im main fi big op Gad fi eva. So dat miin se, wans im no ded im a-go a big op Jeuova.​—2 Sam. 7:12.

Wen wi riid di likl rait op we dem rait a di tap a Saam 18, 51, an 52, dem a mek wi nuo se dem Saamz ya a tel wi bout Dievid laif dem taim de. Iina Saam 23, Dievid tel wi se Jeuova komiin laik wan shepad we a tel wi wa fi du, an a tek kier a wi, an a mek wi fiil nais. Dievid did a wan shepad laik dat an im did waahn fi sorv Jeuova til im ded.​—Sa. 23:6.

Wi fi memba tu ino, se a Jeuova did mek Dievid nuo wa fi rait se. Dievid did aal rait dong som sitn we wuda aal apm iina di fyuucha. Laik iina Saam 110, Dievid did rait bout se im Laad wuda sidong pan Gad rait-an-said iina evn an im wuda get nof powa. Wa im wuda get da powa de fi du? Im get it fi fait aaf Gad enimi dem an fi joj an ponish di konchri dem we de pan di ort. Di Mesaiya, uu a di wan we a-go ruul a evn an im a-go bi wan priis fi eva, kom fram Dievid fambili. (Sa. 110:1-6) Jiizas did mek wi nuo se yes, wa Dievid did rait a Saam 110, a im Jiizas it did a taak bout an it a-go apm iina di fyuucha.​—Mat. 22:41-45.

Ye man, Jeuova did mek Dievid rait bout di taim wen im did de pan di ort an bout wa a-go apm wen im kom bak alaiv an api kaa im a get fi big op Jeuova fi eva. So wen wi riid Saam 37:10, 11, 29, wi get fi andastan se it no jos a taak bout wa did gwaan iina Izrel bak iina Dievid taim bot it a taak bout wa a gwaan iina di fyuucha wen Gad a-go du wa im se im wuda du fi wi.​—Luk iina paragraaf 8 iina di lesn we niem “Yu A-Go De Wich Paat Mi De Iina Paradais” we de iina da Wachtowa ya.

Saam 61:8 an som ada vors we komiin laik it mek wi si se Dievid did waahn fi big op Jeuova til im ded. An im mek wi si tu se wen Jeuova mek Dievid kom bak alaiv iina di fyuucha, a da taim de Dievid a-go kyan get fi big op Jeuova niem fi eva.