1. Wa a di kain-a piis we Gad gi wi, an a ou it elp wi? (Filipiyan 4:6, 7)

 YU SI di kain-a piis we Jeuova gi a sitn we piipl we iina di worl naa go riili andastan. An a kaaz wi an wi Faada Jeuova kluos klous a so kom im elp fi kaam wi aat an gi wi da piis de. An wen wi av da piis de, it elp wi fi nuo se tingz a-go aarait. (Riid Filipiyan 4:6, 7.) An wi a gud gud fren wid di ‘Gad we gi piipl piis.’ (1 Tes. 5:23) An wi get som gud fren we lov im tu. Wen wi get fi nuo wi Faada an chos iina im, an du wa im tel wi fi du, im wi gi wi piis iina wi aat an main so wi no wori wori op wiself wen wi a go chuu wi prablem dem.

2. Di piis we Gad gi wi iina wi aat an main, wa mek wi nuo fi shuor se wi kyan get dat?

² Yu tingk wi kyan riili av piis iina wi aat an main wen wi a go chuu som big prablem, laik wen som bad siknis a go roun di plies, orikien an dem ting de a gwaan, piipl a demanschriet, ar piipl a fait gens wi kaaz a wa wi biliiv iina? Eni wan a dem sitn ya kyan mek wi fiil fried. Bot Jiizas did tel im falara dem se: “No mek unu aat bada unu, an no kech unu fried.” (Jan 14:27) An it riili nais fi si se nof a wi breda an sista dem a du wa Jiizas se dem fi du. Jeuova a elp dem so dat dem kyan av piis iina dem aat an main wen dem a go chuu aal kain-a prablem.

3. Ou wen wan bad siknis a go roun wich paat wi liv, it kyan mek wi no av piis iina wi aat an main?

³ Wen wan bad siknis a go roun, it kyan mek uol iip a tingz chienj op iina wi laif. Mek wi luk pan som a di sitn dem we did apm tu uol iip a piipl wen KUOVID-19 a go roun. Wen dem did taak tu som piipl bout som a di sitn dem we apm tu dem siek-a KUOVID-19, muor dan aaf a dem se it did mek it aad fi  dem sliip a nait taim. An it did mek nof muor piipl staat fret an wori wori op demself, som piipl get sad bad, som staat jringk muor lika an tek jogz, muor fambili staat biit op dem wan aneda, an muor piipl chrai fi kil demself. Ef wan bad siknis a go roun wich paat yu liv, wa yu kyan du so dat yu no wori wori op yuself an yu kyan get di piis iina yu aat an main we Gad gi wi?

4. Kaa wi nuo wa Jiizas did se wuda apm iina di laas die dem, ou dat kyan elp wi fi av piis iina wi laif?

⁴ Jiizas did mek wi nuo se iina di laas die dem aal kain-a siknis a-go de “aal bout.” (Luuk 21:11) Kaa wi nuo dat, ou dat elp wi fi av piis iina wi laif? Wi nuo se tingz iina di worl a go di wie ou Jiizas se dem wuda go. So dat mek wi si se wi fi du wa Jiizas did se di wan dem we a liv iina di laas diez fi du. Im se: “Mek shuor se unu no fraitn yu no.”​—Mat. 24:6.

5. (a) Bies pan Filipiyan 4:8, 9, wen wan bad siknis a go roun, wa wi fi prie fa? (b) Wen yu lisn tu di Baibl rekaadin dem, ou dat kyan elp yu?

⁵ Wen wan bad siknis a go roun, wi mait-a no nuo wa fi du an wi mait-a aal a fret an wori wori op wiself. A dat did apm tu wan sista we niem Desi. b Ar ongkl, kozn, an ar dakta did ded fram KUOVID, an afta dat shi did fried se shi wuda kech it tu an den go gi ar mada we did op iina iej. Kaaz a KUOVID, shi kuda did luuz ar wok tu, so shi did a fret bout ou shi wuda bai fuud an pie ar rent. Di wie ou shi did a fret bout dem sitn ya, shi kudn iivn sliip a nait taim. Bot Desi get bak piis iina ar aat an main. A ou shi du dat? Shi prie tu Jeuova an beg im fi elp ar fi kip kaam an fi tingk bout gud tingz. (Riid Filipiyan 4:8, 9.) An shi “ier” wa Jeuova se wen shi plie di Baibl rekaadin dem. Shi se, “Di wie ou di breda dem riid, dem vais jos nais, an it elp mi fi no fret an wori wori op miself an fi memba se Jeuova gud an kain an im kier bout mi.”​—Sa. 94:19.

6. Ou it a-go elp yu wen yu gwaan du yu uona Baibl stodi an ga’a di miitn dem?

⁶ Wen wan bad siknis a go roun, it a-go chienj op di wie ou yu naamali du tingz, bot yu fi mek shuor se yu stil a gwaan du yu uona Baibl stodi an yu a ga’a yu miitn dem. Wen yu wach wi vidiyo dem an riid wi buk an pamplet dem an si di sitn dem we wi breda an sista dem a go chuu, yu a-go si ou dem stil a tan op chrang iivn duo dem a go chuu tingz we komiin laik di sitn dem we yu a go chuu. (1 Pii. 5:9) Wen yu ga’a di miitn dem, it kyan elp yu fi tingk bout di gud sitn dem we de iina di Baibl, an it wi mek yu kyan elp yu breda an sista dem fi gwaan tan op chrang an dem wi elp yu tu. (Ruo. 1:11, 12) Wen yu tingk bout ou Jeuova a gwaan elp di wan dem we a worship im we sik, ar dem fried, ar dem fiil laik dem no av nobadi, it a-go mek yu chos iina im muor an yu a-go nuo fi shuor se im wi elp yu tu.

7. Wa yu kyan lorn fram di apasl Jan?

 ⁷ Mek shuor se ya’a tek som taim fi taak tu yu breda an sista dem. Wen wan bad siknis a go roun, iivn duo wi de nier wi breda an sista dem, it mait-a miin se wi afi kip faar fram wi wan aneda. So yu mait-a fiil laik ou di apasl Jan did fiil. Im did wel waahn si im fren Gaiyos. (3 Jan 13, 14) Bot Jan did nuo se, bies pan wa did a gwaan, im kudn get fi si im fren ya nou. So Jan did du wa im kuda du; im rait Gaiyos wan leta. Ef yu fain se yu kyaahn get fi de roun di breda an sista dem, chrai an kaal dem pan di fuon, vidiyo kaal dem, ar sen dem teks mesij. Wen ya’a taak wid yu breda an sista dem, yu a-go fiil gud an yu a-go av piis iina yu aat an main. Ef yu fain se yu riili a fain it aad fi tap fret an wori wori op yuself, taak tu di elda dem an tek di elp we dem gi yu.​—Aiz. 32:1, 2.

8. Ou wen orikien an dem sitn de a gwaan, it kyan mek wi no av piis iina wi aat an main?

⁸ Ef yu eva go chuu wan flod, wan ortkwiek, ar di plies we yu did de bon dong, yu mait-a fain se lang afta it apm yu stil a fret an wori wori op yuself. Wos ef sumadi fi yu ded ar yu luuz yu ous an dem ting de, yu mait-a fiil laik se yu waahn baal, ar yu naa notn a liv fa, ar yu mait-a aal beks bad. Dis no miin se a lov yu lov moni an dem ting de ar se yu no chos iina Gad. Yu jos go chuu sitn we riili aad, an som a di taim dem tingz de mait-a mek wi tingk bout aal kain-a bad sitn. (Juob 1:11) Bot no mata ou tingz mait-a bad, yu kyan stil av piis iina yu aat an main. Ou dat?

9. Wa Jiizas did se we mek wi redi fi di bad sitn dem we a gwaan rait ya nou?

⁹ Memba wa Jiizas did se wuda apm iina fi wi taim. So wi no komiin laik som a di piipl dem iina di worl we tingk orikien an dem ting de kuda neva apm tu dem. Insted-a dat, wi nuo se muor a dem ting de wuda apm iina fi wi taim, an wi wuda go chuu som a dem tu. Jiizas did tel im falara dem se som “big ortkwiek” an som ada tingz wuda apm bifuo di worl don. (Luuk 21:11) An im did tel wi se “wikidnis a-go pred laik wail faiya,” an a dat mek wi av so moch piipl a tiif an a kil aaf dem wan aneda, an piipl a bum op di plies an dem ting de. (Mat. 24:12) A no laik se Jiizas did se dem sitn ya onggl a-go apm tu di piipl dem we Jeuova na’av notn fi du wid. Nof a dem sitn ya apm tu nof piipl we a sorv Jeuova wid aal a dem aat tu. (Aiz. 57:1; 2 Kor. 11:25) So rait ya nou, Jeuova mait-a naa wok no mirikl fi siev wi fram orikien an dem ting de, bot im a-go mek shuor se wi av evriting we wi niid so wi kyan av piis iina wi aat an main.

10. Wa mek wen wi du tingz nou fi get wiself redi bifuo orikien an dem ting de apm, a shuo wi a shuo se wi chos iina Gad? (Pravorbz 22:3)

¹⁰ Wen sitn apm we wi neehn ekspek fi apm, it a-go iiziya fi diil wid it ef wi did don plan aredi wa wi wuda du ef sitn laik dis apm. Bot wen wi tek di taim fi plan fi dem sitn ya, a shuo wi a shuo se wi no riili chos iina Jeuova? Nuo sa. Wi a shuo se wi a chos iina Jeuova an nuo se im a-go tek kier a wi. Wa mek wi se so? Kaa Gad Wod tel wi se wi fi plan wa wi a-go du wen bad sitn apm bifuo it apm. (Riid Pravorbz 22:3.) An di ting dem we wi get iina wi magaziin dem, wen wi ga’a wi miitn dem, an ada tingz we di breda dem tel wi, mek wi si se Jeuova a yuuz im aaganaizieshan fi tel wi uova an uova agen fi redi op wiself fi wen sitn we wi no ekspek fi apm, apm. c So, wi riili chos Jeuova? Ef wi riili chos Jeuova, wi a-go du wa im se nou insted-a fi wiet til sitn bad apm fi dwi’it.

11. Wa yu lorn fram wa Margaret did du?

 ¹¹ Mek wi luk pan wa did apm tu wan sista we niem Margaret. Dem did tel ar fi lef ar yaad kaaz wan big big faiya did a bon dong di ieriya wich paat shi liv. Kaa nof piipl did a ron lef dem yaad, nof kyaar did de pan di ruod an di ruod dem did jam op so nobadi kudn go no we. A uol iip a sumuok did de de til di plies did get blak blak, an Margaret kudn kum outa ar kyaar. Bot kaa Margaret did du tingz fi redi op arself bifuo dem ting ya apm, shi did aarait. Shi did kip wan map iina ar pors, so shi did nuo wich paat shi kuda go fi kom outa di ieriya, an shi did aal mek shuor se shi nuo da ruod de gud bifuo sitn laka dis apm. Kaaz Margaret did tek di taim fi redi op arself, shi did aarait an notn neehn apm tu ar.

12. Wa mek wi fi du di ting dem we dem tel wi fi du fi kip wi sief?

¹² Wen sitn bad apm iina wan ieriya, di govament mait-a put wi anda korfyuu, ar tel wi fi lef di ieriya, ar tel wi fi du som ada sitn we a-go kip piipl sief. Som piipl lie-lie an no du wa di govament se kaa dem no waahn fi lef dem sitn dem. Bot a wa di wan dem we a sorv Jeuova du wen dem tingz de apm? Di Baibl tel wi se: “Siek-a wa di Laad du, mek shuor se unu lisn di piipl dem we ruul uova unu an du wa dem se unu fi du, weda di king we a di ed, ar di govana we di king sen out.” (1 Pii. 2:13, 14) An wan neda ting a dat Jeuova aaganaizieshan tel wi tingz we a-go kip wi sief tu. Dem eva a tel wi se wi fi mek shuor se di elda dem av wi nomba an nuo wich paat wi liv so dat dem kyan kaal wi an kom luk fi wi wen dem sitn ya apm. So yu du dat aredi? An dem mait-a tel wi tingz we wi fi du laik fi tan a wi yaad, ar wi fi lef di ieriya we wi liv, ar wi fi bai op tin fuud an dem sitn de. Ar dem mait-a tel wi wa fi du an wa wi no fi du, wen it kom aan tu ou wi elp piipl iina dem taim de. Sitn bad kuda apm tu wi ar di elda dem ef wi no du wa dem se wi fi du. Memba se a dem breda ya Gad a yuuz fi tek kier a wi. (Iib. 13:17) Margaret se, “Mi nuo se a kaa mi du wa di elda dem an wa Jeuova aaganaizieshan tel mi fi du, a dat mek mi no ded.”

13. Wa elp nof a di breda an sista dem we afi ron we lef dem yaad fi kip api an fi av piis iina dem aat an main?

¹³ Nof a di breda an sista dem we afi ron we lef dem yaad kaaz a waar an orikien an dem ting de, ar kaaz piipl a demanschriet iina dem ieriya a du wa dem kyan du fi get yuus tu di nyuu plies we dem a liv, an dem no ich fi du di sitn dem we kip dem kluos tu  Jeuova. Jos laik di Kristiyan dem iina Baibl taim we did afi ron we lef dem yaad kaa dem did a fait gens dem, dem no tap “priich di gud nyuuz bout Jiizas evriwe dem go.” (Aks 8:4) Wen dem priich, it elp dem fi kip dem main pan Gad Kindom an no spen uol iip a dem taim a tingk bout di bad ting dem we dem a go chuu. An kaaz a dat, dem api an av piis iina dem aat an main.

14. Ou wen piipl a fait gens wi kaa a wa wi biliiv iina, it kyan mek wi no av piis iina wi aat an main?

¹⁴ Wen piipl a fait gens wi kaaz a wa wi biliiv iina, it kyan tek we nof a di sitn dem we mek wi av piis iina wi laif. Wen wi get fi ga’a wi miitn dem wid wi breda an sista dem, ga’a sorvis, an du di sitn dem we wi naamali du an no fried se nobadi a-go kom lak wi op, a dem sitn de mek wi api an aarait. So wen dem lak dong di wok an wi kyaahn get fi du dem sitn de, wi mait-a staat fret an wori wori op wiself bout wa mait-a apm. Notn no rang ef wi fiil da wie de, bot wi afi wach wiself. Jiizas mek wi nuo se wen piipl a fait gens wi, dat kuda mek som a im falara dem tap biliiv iina im. (Jan 16:1, 2) So wen piipl a fait gens wi, wa wi kyan du fi av piis iina wi aat an main?

15. Wa mek wi no fi fried wen piipl a fait gens wi? (Jan 15:20; 16:33)

¹⁵ Gad Wod tel wi se: “Enibadi we se dem a Gad piipl an a fala Gad afi go chogl chuu nof sitn tu.” (2 Tim. 3:12) Dat a sitn we wan breda we niem Andrei did fain it aad fi biliiv wen dem did lak dong di wok iina di konchri we im liv. Im did a tingk tu imself se: ‘Luk umoch Jeuova Witnis de ya. Afta dem kyaahn lak op di uol a wi.’ Bot di wie ou im did a tingk neehn mek Andrei av no piis iina im aat an main, bot siek-a dat im eva de fret an a wori wori op imself. Di ada breda dem neva tel demself se dem wudn get lak op. Insted-a dat, dem jos chos iina Jeuova an mek wa im waahn fi apm apm. Di wie ou di ting set dem did nuo se dem kuda did get lak op, bot dem neehn a fret an wori wori op demself laik Andrei. So Andrei mek op im main fi du laik dem breda an sista de an chos iina Gad muor. Wen im du dat, im get piis iina im aat an main, an im api nou aal wen di bad sitn dem a gwaan. An di siem ting kyan apm tu wi tu. Aalduo Jiizas did tel wi se piipl a-go fait gens wi, im did mek wi nuo se wi kyan tan op chrang sed wie.​—Riid Jan 15:20; 16:33.

16. Wen piipl a fait gens wi, wa a som a di sitn dem we di breda dem mait-a tel wi fi du?

 ¹⁶ Wen dem lak dong wi wok ar se wi kyaahn du sortn an sortn tingz, di breda dem a di branch afis an di elda dem mait-a tel wi difrant difrant tingz we wi fi du ar no fi du. Dem du dat so wi kyan gwaan get di sitn dem we a-go kip wi kluos tu Jeuova, an so dat wi kyan gwaan priich tu piipl iina di wie dem ou wi kyan dwi’it, an kaaz dem waahn kip wi sief. So mek shuor se yu du wa dem se yu fi du, aal ef yu no andastan wa mek dem se so. (Jmz. 3:17) An mek shuor se yu no tel nobadi we no niid fi nuo notn bout wi breda an sista dem ar bout wi miitn dem an dem ting de.​—Iik. 3:7.

17. Jos laik di apasl dem, wa wi mek op wi main fi du?

¹⁷ Wan a di mien riizn wa mek Sietan beks wid Gad piipl an a waar gens dem a kaa dem a tel piipl bout Jiizas an a “du we Gad se dem fi du.” (Rev. 12:17) So no bada mek Sietan an di piipl dem iina da worl ya mek yu fiil fried. Wen wi priich tu piipl an tiich dem, iivn wen piipl a fait gens wi, it a-go mek wi api an gi wi piis iina wi aat an main. Iina di taim wen di apasl dem did a priich, di liida dem fi di Juu piipl dem did tel dem fi tap priich, bot dem neehn lisn tu dem. Insted-a dat, dem du wa Gad tel dem fi du. An kaa dem neehn tap priich, dat did mek dem api. (Aks 5:27-29, 41, 42) Bot wen di govament se wi kyaahn du sortn an sortn tingz wen it kom aan tu di priichin wok, wi afi wach wa wi a du. (Mat. 10:16) Bot ef wi gwaan du evriting we wi kyan du, wi a-go av piis iina wi aat an main kaa wi a mek Jeuova api, an wi a tel ada piipl sitn we kyan mek dem liv fi eva.

18. A uu a-go gi wi piis iina wi aat an main, an wa wi fi memba se?

¹⁸ Wi kyan nuo fi shuor se iivn wen tingz riili riili aad fi wi, wi kyan stil av piis iina wi aat an main. Wen dem sitn de apm, wi fi memba se wa wi waahn a di piis iina wi aat an main we a onggl Jeuova kyan gi wi. So gwaan chos iina im wen bad siknis a go roun, wen orikien an dem ting de apm, an wen piipl a fait gens wi kaa a wa wi biliiv iina. An gwaan kip kluos tu Jeuova aaganaizieshan an no tap tingk bout aal a di gud sitn dem we Jeuova a-go du fi yu. Wen yu du dem sitn de, ‘Gad, di onggl wan we kyan gi yu piis iina yu aat an main, im wi bles yu.’ (Fil. 4:9) Iina di neks lesn, wi a-go taak bout ou wi kyan elp wi breda an sista dem we a go chuu prablem fi av piis iina dem aat an main.