1. A wa wan breda fi du ef im waahn tingz fi wok out gud fi im?

 DIEVID did tel Salaman se: “Gwaan tan op chrang an gwaan laik yu a man.” (1 Ki. 2:1-3) An it wuda nais ef aal a di breda dem du dis tu. Ef dem waahn tingz fi wok out gud fi dem, dem fi du di sitn dem we Gad Wod se dem fi du. An dem fi nuo ou fi yuuz di sitn dem iina di Baibl we wi kyan riizn pan iina dem laif. (Luuk 2:52) Wa mek a wan big ting fi di yong breda dem get chrang iina di sitn dem we dem biliiv iina?

2-3. Wa mek a wan big ting fi wan yong breda get chrang iina wa im biliiv iina?

² Wan man we a sorv Jeuova av nof wok fi du iina di fambili an iina di kanggrigieshan. Wi shuor se aal a unu yong breda a tingk bout di sitn dem we unu kyan du iina di fyuucha. Yu mait-a waahn fi yuuz muos a yu taim fi du Jeuova wok, an yu mait-a waahn fi ton wan ministiiriyal sorvant an afta dat wan elda, an yu mait-a aal waahn fi marid tu an av pikni. (Ifii. 6:4; 1 Tim. 3:1) Bot bifuo yu kyan get fi du aal a dem sitn ya, yu afi chrang iina wa yu biliiv iina fos. b

³ Wa kyan elp yu fi get chrang iina wa yu biliiv iina? Yu av som tingz we yu afi lorn fi du fos. Bot wa a som a di sitn dem we yu afi go lorn fi du fos bifuo yu kyan du som a di sitn dem we yu plan fi du iina di fyuucha?

4. Wich paat yu kyan fain som man we du wa Jeuova waahn dem fi du we yu kyan fala? (Luk pan di picha tu.)

⁴ Fala di piipl dem we a du wa Jeuova waahn dem fi du. Di Baibl tel wi bout wol iip a yong man we du wa Jeuova waahn  dem fi du we di yong breda dem kyan fala. Dem man de did tek kier a Jeuova piipl an du nof fi im. Aal iina yu fambili an iina yu kanggrigieshan yu kyan fain man we a du wa Jeuova waahn dem fi du an we chrang iina wa dem biliiv iina we yu kyan fala tu. (Iib. 13:7) An yu av Jiizas we did porfek we yu kyan fala tu. (1 Pii. 2:21) Wen yu stodi an si di gud wiez dem we dem man ya did av, chrai an si ou yu kyan du laik dem.​—Iib. 12:1, 2.

5. Wa kyan elp yu fi tingk bout tingz di rait wie bifuo yu dwi’it, an wa mek yu fi nuo ou fi du dis? (Saam 119:9)

⁵ “Mek shuor se yu aalwiez a tek di taim fi tingk bout tingz.” (Pr. 3:21) So wan man fi mek shuor se im aalwiez a tek di taim fi tingk bout tingz bifuo im du notn, kaa da worl ya ful a bie man we waahn fi du dem uon ting an we du tingz bies pan ou dem fiil bout sitn. (Pr. 7:7; 29:11) Dem mait-a fiil bout tingz an du tingz bies pan wa a gwaan pan di intanet an TV an dem ting de. So mek shuor se bifuo yu mek op yu main fi du notn, yu riid di Baibl an riizn pan wa it a se, an tingk bout ou Jeuova fiil bout wa yu a-go du bifuo yu du notn, an tingk bout ou it a-go mek tingz beta fi yu wen yu du di sitn dem we Jeuova waahn yu fi du. (Riid Saam 119:9.) Wen yu du aal a dem sitn ya, it a-go elp yu fi get chrang iina di sitn dem we yu biliiv iina. (Pr. 2:11, 12; Iib. 5:14) Wen yu aalwiez a tek yu taim fi tingk bout tingz, it a-go elp yu wen yu afi mek op yu main bout dem sitn ya: (1) wen yu a diil wid di sista dem iina di kanggrigieshan an (2) wen yu a mek op yu main bout wa fi wier an dem sitn de.

6. Wen wan breda tek di taim fi tingk bout tingz, a ou dat a-go elp im fi du tingz fi shuo se im rispek di sista dem?

⁶ Wen yu tek di taim fi tingk bout tingz, it a-go mek yu nuo ou fi du tingz fi shuo se yu rispek wan uman. Notn no rang ef wan breda waahn fi get fi nuo wan sista fi si ef im waahn fi marid tu ar. Bot wan breda we nuo ou fi tingk bout tingz naa go se ar rait notn ar du notn we a-go mek sumadi tingk se dem waahn fi marid tu dem wen dem no riili waahn fi marid tu dem. (1 Tim. 5:1, 2) An ef im a taak tu wan sista, im a-go mek shuor se sumadi aalwiez de de wid dem  so dat piipl na’av notn bad fi se bout ar.​—1 Kor. 6:18.

7. Wen wan yong breda a plan wa im a-go wier, a ou it a-go elp im wen im tingk bout it fos?

⁷ Bies pan di kain-a kluoz we wan breda wier an di wie im kuom im ier, it a-go shuo ef im a tingk bout tingz di wie ou Jeuova tingk bout tingz. Kaaz muos a di piipl dem we a mek nof a di kluoz dem we a wier, a piipl we a du aal kain-a seks sin an we naa tingk bout tingz di wie ou Jeuova waahn dem fi tingk bout tingz. An so di kluoz dem we dem mek tait ar mait-a mek man luk laik uman. So wen wan breda we a get chrang iina wa im biliiv iina a plan wa fi wier im a-go tingk bout ou Jeuova an di res a breda an sista dem iina di kanggrigieshan we chrang iina wa dem biliiv iina fiil bout it. Im kyan aks imself dem kwestiyan ya: ‘Di kluoz dem we mi wier a shuo se mi a tingk bout tingz bifuo mi dwi’it? An it a shuo se mi a tingk bout ada piipl tu? An it mek ada piipl si se mi a sorv Jeuova?’ (1 Kor. 10:31-33; Taitos 2:6) A no onggl di breda an sista dem we de iina di kanggrigieshan a-go rispek wan yong breda we nuo ou fi tingk bout tingz, bot Jeuova a-go rispek im tu.

8. A ou wan yong breda kyan lorn fi du tingz so dat piipl kyan dipen pan im?

⁸ Du tingz so dat piipl kyan dipen pan yu. Wan yong breda we piipl kyan dipen pan a-go du di ting dem we im fi du. (Luuk 16:10) Tingk bout Jiizas, im neehn dong-kya, piipl kuda aalwiez dipen pan im kaa im du di wok we Jeuova tel im fi du iivn wen it did aad. An im did lov piipl​—speshali im falara dem​—so im did redi fi ded fi dem. (Jan 13:1) So yu fi du laik Jiizas an wok aad fi du eni wok we yu get fi du. Ef yu no nuo ou fi du di wok we yu get fi du, yu fi ombl yuself an aks di breda dem we chrang iina wa dem biliiv iina fi elp yu. An no bada jos du it fi du siek. (Ruo. 12:11) Bot wa yu fi du a “wok laik se a Gad [yu] a wok fa an no fi piipl.” (Kol. 3:23) An memba se yu no porfek, so ef yu du sitn we yu neehn fi du, yu fi ombl yuself an se yu rang.​—Pr. 11:2.

9. Wa mek wan yong breda fi chrai an lorn tingz we kyan elp im iina laif?

⁹ Ef yu waahn fi bi wan man we chrang iina wa im biliiv iina, yu afi lorn fi du tingz we kyan elp yu iina laif. An wen yu du dat, it a-go elp yu fi kyan du tingz iina di kanggrigieshan, an yu wi kyan kip yu wok we a-go elp yu fi tek kier a yuself an yu fambili. An it a-go elp yu fi bi gud fren wid ada piipl. Mek wi luk pan som sitn we yu fi lorn fi du gud.

10-11. Wa a som a di sitn dem we wan yong breda kyan go du iina di kanggrigieshan ef im kyan riid an rait gud? (Saam 1:1-3) (Luk pan di picha tu.)

¹⁰ Lorn ou fi riid an rait gud. Di Baibl se wan man we riid Gad Wod evridie an tingk bout wa it a se a-go api, an evriting we im  du a-go wok out gud. (Riid Saam 1:1-3.) Wen im riid di Baibl evridie, im a-go get fi nuo ou Jeuova tingk bout tingz, an a dat a-go elp im fi kyan tingk bout tingz an riizn pan it bifuo im du notn. (Pr. 1:3, 4) Bot wa mek wi niid dem kain-a man ya iina di kanggrigieshan dem?

¹¹ Wi breda an sista dem niid som man we chrang iina wa dem biliiv iina fi yuuz di Baibl fi mek dem nuo wa Jeuova waahn dem fi du. (Taitos 1:9) Ef yu kyan riid an rait gud, yu a-go kyan du tingz we a-go elp yu fi gi som gud taak. An yu a-go kyan ansa kwestiyan wen yu de a di miitn dem we a-go elp fi mek yu ada breda an sista dem get chrang iina wa dem biliiv iina. Plos yu kyan go rait dong tingz we yu ier a di miitn dem, di sorkit miitn dem an wi kanvenshan dem. An wen yu dat, yu a-go av di ting dem we yu rait dong we kyan mek yu chos iina Jeuova muor an yu kyan go yuuz it fi push di ada breda an sista dem fi gwaan chos iina Jeuova tu.

12. Wa yu fi du so dat yu kyan nuo ou fi lisn tu piipl an taak tu dem gud?

¹² Nuo ou fi lisn tu piipl an taak tu dem nais. Wan breda fi lorn ou fi lisn tu piipl an taak tu dem nais. Wen im nuo ou fi du dis, im a-go nuo ou fi lisn tu piipl an tingk bout ou dem fiil bifuo im du notn. (Pr. 20:5) Im a-go kyan lisn tu ou sumadi a taak, an luk pan ou dem mek op dem fies wen dem a taak, an im a-go kyan luk pan wa dem a du wid dem badi wen dem a taak tu, an dat a-go mek im nuo ou dem fiil bout sopm. Sumadi kyaahn lorn ou fi du dis ef dem no spen nof taim wid piipl. So ef yu aalwiez a yuuz yu fuon an tablit an dem ting de fi taak tu piipl, laik fi iimiel an teks dem, yu naa go nuo ou fi lisn tu piipl an taak tu dem gud. So chrai aad fi de roun piipl so dat yu kyan taak tu dem.​—2 Jan 12.

13. Wa a sopm we wan yong breda fi lorn fi du? (1 Timoti 5:8) (Luk pan di picha tu.)

¹³ Yu fi nuo ou fi wok so dat yu kyan tek kier a yuself. Wan breda fi a du tingz so das im kyan main imself an im fambili. (Riid 1 Timoti 5:8.) Iina som konchri, wan man faada ar sumadi iina dem fambili mait-a tiich dem ou fi du sopm we dem kyan yuuz fi tek kier a dem fambili. An iina som ada konchri, di yong man dem mait-a lorn wan chried ar ou fi du wan neda kain-a wok wen dem a go a ai skuul. No mata wich paat yu lorn fi du sitn, it a-go kyan elp yu fi get wok. (Aks 18:2, 3; 20:34; Ifii. 4:28) Du tingz so dat piipl kyan nuo yu az sumadi we wok aad an se yu naa go lef wa yu a du til yu don it. Ef a so yu stie, yu a-go kyan get  wan wok an kip it. Ef wan breda kyan du dem sopm ya it a-go kyan elp im iina di fyuucha wen im get ada tingz fi du. Mek wi luk pan som a di ada sitn dem we im mait-a av fi du iina di fyuucha.

14. Wa a som sitn we wan yong breda kyan du ef im waahn fi bi sumadi we yuuz muos a dem taim fi du Jeuova wok?

¹⁴ Sumadi we yuuz muos a dem taim fi du Jeuova wok. Uol iip a breda we chrang iina wa dem biliiv iina a yuuz muos a dem taim fi du Jeuova wok fram dem yong. Ef wan breda a paiyanier, it kyan elp im fi lorn ou fi du difrant difrant tingz. Laik it kyan elp im fi lorn ou fi wok gud wid ada piipl, an it kyan mek im nuo ou fi spen moni gud tu. (Fil. 4:11-13) Ef sumadi waahn fi yuuz muos a dem taim fi du Jeuova wok, dem kyan staat fi agzilari paiyanier fos. Nof piipl agzilari paiyanier fos an den dem staat fi regila paiyanier afta dat. Wen sumadi staat paiyanier, it mek dem kyan get fi du nof muo ada tingz fi Jeuova. Laik dem kyan elp fi bil Kindom Aal an dem ting de ar dem kyan go wok a Betel.

15-16. Wa a som sitn we wan breda fi du ef im waahn fi ton wan ministiiriyal sorvant ar wan elda?

¹⁵ Wan ministiiriyal sorvant ar wan elda. Wan breda fi du di sitn dem we im niid fi du so das im kyan ton wan elda, an dat wi mek im kyan du nof muo tingz fi di breda an sista dem iina di kanggrigieshan. Di Baibl mek wi nuo se ef wan breda waahn fi du dis, a wan “gud sopm.” (1 Tim. 3:1) Bifuo wan breda kyan ton wan elda, im afi bi wan ministiiriyal sorvant. Wan ministiiriyal sorvant a sumadi we elp di elda dem fi du nof tingz. Di elda dem an di ministiiriyal sorvant dem du nof sitn fi tek kier a di breda an sista dem iina di kanggrigieshan, an dem spen nof taim iina fiil sorvis tu. Aal ef wan breda no riich 20 yet im kyan ton wan ministiiriyal sorvant. An wen im a 20 ad, ef im a gwaan gud an a du wa im fi du fi ton elda, im kyan ton wan elda tu.

¹⁶ Ef wan breda waahn fi ton wan ministiiriyal sorvant ar wan elda, di Baibl tel dem som a di sitn dem we dem fi a du. Laik it tel dem se dem fi lov Jeuova an dem fambili an di breda an sista dem iina di kanggrigieshan. (1 Tim. 3:1-13; Taitos 1:6-9; 1 Pii. 5:2, 3) So wan breda fi chrai an nuo di sitn dem we im fi du so dat im kyan ton wan ministiiriyal sorvant ar wan elda. An im fi prie an aks Jeuova fi elp im fi du dem sitn ya. c

17. Wa wan yong breda kyan du ef im waahn fi bi wan ozban? (Luk pan di picha tu.)

 ¹⁷ Wan ozban a di ed fi im fambili. Jiizas did se som man we chrang iina wa dem biliiv iina naa go plan fi get marid. (Mat. 19:12) Bot ef yu plan fi marid, yu a-go bi di ed a wan fambili. (1 Kor. 11:3) An Jeuova ekspek se wan ozban a-go lov im waif an tek kier a ar, an im a-go bi ar fren, an im a-go elp ar fi stie kluos tu Jeuova tu. (Ifii. 5:28, 29) Di ting dem we wi taak bout iina da lesn ya a-go elp wan man fi nuo ou fi tingk bout tingz iina di rait wie, an fi nuo ou im kyan du tingz fi shuo se im av nof rispek fi uman, an fi bi sumadi we piipl kyan dipen pan. Ef im nuo ou fi du dem sitn ya, it a-go elp im wen im marid.

18. Wa wan breda kyan du fi redi op imself fi ton wan faada?

¹⁸ Wan faada. Afta yu marid yu mait-a av pikni. Jeuova tel yu ou yu kyan bi wan gud faada. (Ifii. 6:4) Jeuova tel im Bwai Pikni Jiizas se im lov im an Im api wid di sitn dem we im a du. (Mat. 3:17) So ef yu a wan faada, yu fi mek shuor se yu aalwiez a tel yu pikni dem se yu lov dem an mek dem nuo se yu api wid di gud sitn dem we dem a du. Di faada dem we a du laik Jeuova elp dem pikni dem fi get chrang iina di sitn dem we dem biliiv iina. So yu kyan redi op yuself ya nou fi dis wen yu chriit di piipl dem iina yu fambili an di breda an sista dem iina yu kanggrigieshan gud, an wen yu du tingz fi shuo se yu lov dem an yu mek dem nuo se yu api wid di sitn dem we dem a du. (Jan 15:9) Dis naa go onggl mek yu bi wan gud ozban an faada, bot it a-go mek Jeuova an di breda an sista dem an yu fambili api wid yu nou, an Jeuova a-go kyan yuuz yu fi du nof sitn.

19-20. Wa kyan elp di yong breda dem fi get chrang iina wa dem biliiv iina? (Luk pan di picha pan di kova.)

¹⁹ Aal a unu yong breda, a no laik se unu a-go dis git op an bi wan breda we chrang iina wa im biliiv iina. Unu afi fala piipl we chrang iina di sitn dem we dem biliiv iina, an nuo ou fi tingk bout tingz iina di rait wie fi unuself, an bi sumadi we piipl kyan dipen pan, an lorn ou fi du tingz we a-go kyan elp unu iina laif nou an iina di fyuucha.

²⁰ Wen yu tingk bout aal a di sitn dem we yu waahn fi du iina di fyuucha, it mait-a komiin laik dem tu moch fi yu. Bot jos nuo se yu kyan go du dem, an memba se Jeuova wel waahn fi elp yu fi du dem. (Aiz. 41:10, 13) Di breda an sista dem iina di kanggrigieshan wi elp yu tu. Wen yu get chrang iina di sitn dem we yu biliiv iina, yu a-go api an yu laif a-go nais. Wi lov aal a unu an wi a prie se Jeuova wi bles aal a unu wen unu a du aal a wa unu kyan du fi get chrang iina wa unu biliiv iina.​—Pr. 22:4.