1. Ef wi waahn get chrang iina wa wi biliiv iina wa wi afi du?

 AAL a wi fraitn fi ou wan pikni gruo kwik an ton man ar uman. Bot fi gruo an get chrang iina di sitn dem we wi biliiv iina no jos kom so. b (1 Kor. 13:11; Iib. 6:1) Fi get chrang iina di sitn dem we wi biliiv iina, wi an Jeuova afi ton gud gud fren. An wi niid im uoli spirit so dat wi kyan av som gud wiez tu. Wi fi wok aad fi lorn tingz we kyan elp wi an ada piipl. An wi niid fi du tingz we kyan elp wi fi redi fi du di sitn dem we wi plan fi du iina di fyuucha.​—Pr. 1:5.

2. Wa wi lorn fram Jenisiz 1:27, an wa wi a-go luk pan iina da lesn ya?

² Jeuova mek man an im mek uman. (Riid Jenisiz 1:27.) An im mek dem badi difrant. Bot dem difrant iina som ada wie tu. Laik im mek di uman fi du sortn tingz an di man fi du sortn tingz tu. So di difrant wiez dem we wan man an wan uman av an di ting dem we wan man ar wan uman kyan du a fi elp dem fi du di sitn dem we Jeuova mek dem fi du. (Jen. 2:18) Iina da lesn ya, wi a-go luk pan som sitn we wan sista we yong kyan du fi get chrang iina wa shi biliiv iina. An iina di neks lesn, wi a-go luk pan di sitn dem we wan yong breda kyan du.

3-4. Wich paat di yong sista dem kyan fain piipl we dem kyan fala? (Luk pan di picha tu.)

³ Di Baibl tel wi bout som wol iip a uman we did lov Jeuova an worship im. (Luk pan jw.org fi di paat we niem “Women in the Bible​—What Can We Learn From Them?”) Dem did komiin laik di uman dem we di skripcha we da lesn ya bies aafa taak bout, we it se dem “kyan kanchuol demself, no go uova buod wid notn an piipl fi kyan chos dem.” Plos, di yong sista dem kyan fain sista iina dem kanggrigieshan we chrang iina wa dem biliiv iina we dem kyan fala.

⁴ Aal a unu yong sista kyan luk iina unu kanggrigieshan fi som sista we chrang iina wa dem biliiv iina we yu kyan fala. Luk pan di gud wiez we dem av an si ou yu kyan du laik dem. Iina di neks paragraaf dem, wi a-go luk pan chrii a di wiez dem we wan sista we chrang iina wa shi biliiv iina fi av.

5. Wa mek ef wan uman chrang iina wa shi biliiv iina, shi afi ombl?

⁵ Sumadi we chrang iina wa dem biliiv iina a-go ombl. Ef wan uman ombl, shi an Jeuova an ada piipl a-go bi fren. (Jmz. 4:6) So wan uman we ombl a-go aarait wid wa Jeuova se wen im mek wi nuo se di man a di ed a di uman. (1 Kor. 11:3) Wen wi redi fi du wa dis se, it kyan elp wi iina wi fambili an iina di kanggrigieshan. c

6. Wen di yong sista dem luk an si ou Ribeka did ombl, we dem kyan lorn fram dat?

⁶ Luk pan Ribeka. Shi did a wan uman we nuo wa shi waahn, we did nuo di rait taim fi du sitn an ou fi dwi’it. (Jen. 24:58; 27:5-17) Bot shi did av wol iip a rispek fi ar ozban an shi did redi fi du wa im tel ar se. (Jen. 24:17, 18, 65) Ef yu ombl laik Ribeka an redi fi du wa Jeuova se yu fi du, yu a-go bi sumadi we yu fambili an di breda  an sista dem iina di kanggrigieshan kyan fala.

7. Ou di yong sista dem kyan fala Esta an nuo wa dem kyan du fram wa dem kyaahn du?

⁷ Sumadi we chrang iina wa dem biliiv iina a sumadi we nuo wa dem kyan du fram wa dem kyaahn du. Di Baibl tel wi se “di wan dem we waiz nuo wa dem kyan du fram wa dem kyaahn du.” (Pr. 11:2) Esta a did sumadi we did nuo wa shi kyan du fram wa shi kyaahn du, an shi did lov Jeuova tu. Kaa shi did nuo wa shi kyan du fram wa shi kyaahn du, shi neehn jomp an go du sitn we shi no fi du. An shi lisn tu ar kozn we uolda dan ar we did niem Maadikai an du wa im se. (Esta 2:10, 20, 22) Yu kyan du laik Esta an aks ada piipl wa fi du som a di taim, an du wa dem tel yu fi du.​—Taitos 2:3-5.

8. Azkaadn tu 1 Timoti 2:9, 10, ou wen wan sista nuo wa shi kyan du fram wa shi kyaahn du it wi elp ar fi jres prapa?

⁸ Wen it kom aan tu ou wan uman fi jres, Esta did nuo wa shi kyan du fram wa shi kyaahn du. Di Baibl mek wi nuo se Esta did priti an luk gud, bot shi neehn du tingz an jres iina wan wie fi mek piipl si ar. (Esta 2:7, 15) Ou di sista dem kyan du laik Esta? Wi kyan fain wan a di wie dem iina 1 Timoti 2:9, 10. (Riid.) Di apasl Paal tel di uman dem se dem fi jres prapa. Iina di Griik langwij, di wod dem we dem yuuz fi ‘jres prapa’ miin se wan uman fi wier kluoz we wi mek ada piipl rispek ar an we shuo se shi kier bout ou ada piipl fiil bout ou shi jres ar ou shi luk. Wi waahn fi big op aal a di sista dem we chrang iina wa dem biliiv iina we nuo ou fi jres prapa!

9. Wa wi kyan lorn fram wa Abigiel did du?

⁹ Wan sista we chrang iina wa dem biliiv iina a-go kyan luk pan tingz an nuo wa rait fram wa rang so dat dem kyan du di rait ting. Luk pan Abigiel. Di sitn dem we ar ozban did mek op im main fi du did a-go mek tingz bad fi shi an di res a piipl dem iina dem ous. Bot Abigiel du sitn bout it siem taim, an wa shi du mek dem no kil ar an di res a di piipl dem iina ar ous. (1 Sam. 25:14-23, 32-35) So wen sumadi nuo wa rait fram wa rang an du di rait ting, it wi elp dem fi nuo wen dem fi taak an wen dem fi kiba dem mout. An it a-go mek wi nuo ou fi elp ada piipl an no megl-megl iina dem bizniz.​—1 Tes. 4:11.

10-11. Ou it kyan du yu an ada piipl gud wen yu lorn ou fi riid an rait gud? (Luk pan di picha tu.)

¹⁰ Wan uman we a sorv Jeuova, fi chrai an lorn fi du tingz we kyan elp ar fi di res a ar laif. An shi lorn som a dem sitn ya wen shi a pikni. Mek wi luk pan som a di ting dem we shi kyan lorn fi du gud.

 ¹¹ Lorn ou fi riid an rait gud. Iina som konchri dem no tingk se wan uman fi lorn ou fi riid an rait. Bot fi evribadi we a sorv Jeuova, dis a sitn we dem fi lorn fi du. d (1 Tim. 4:13) So no mek notn tap yu fram lorn ou fi riid an rait gud. Wen yu lorn fi riid an rait gud, it a-go mek yu kyan fain wan wok an kip it tu. An yu a-go kyan stodi Gad Wod gud. Wen yu nuo ou fi riid an rait gud, it a-go mek yu kyan tiich piipl di sitn dem we de iina Gad Wod gud. An di bigis ting a dat wen yu kyan riid Gad Wod an tingk bout wa yu riid, it a-go mek yu get kluosa an kluosa tu Jeuova.​—Jash. 1:8; 1 Tim. 4:15.

12. A ou wa Pravorbz 31:26 se kyan elp wi fi lisn tu piipl an taak tu dem beta?

¹² Nuo ou fi lisn tu piipl an taak tu dem nais. Aal uu a sorv Jeuova fi nuo ou fi lisn tu piipl an taak tu dem nais. Di apasl Jiemz se: “Mi breda an sista, . . . unu mos kwik fi ier an sluo fi taak.” (Jmz. 1:19) Wen yu lisn gud tu ada piipl wen dem a taak, yu a shuo se yu a chrai fi “andastan wa unu wan aneda a go chuu.” (1 Pii. 3:8) Ef yu fiil se yu naa andastan sitn we sumadi a se, ar yu no nuo ou dem fiil bout sitn, aks dem kwestiyan we naa go mek dem fiil a wie, an den tingk bout wa dem a se bifuo yu se notn. (Pr. 15:28) Aks yuself dem kwestiyan ya: ‘Wa mi a se a chuu, an it a-go mek ada piipl fiil gud? Wen mi a taak tu piipl, mi taak tu dem iina wan nais wie?’ Yu kyan nuo ou fi du dis wen yu luk pan di sista dem we de iina yu kanggrigieshan we nuo ou fi lisn tu piipl an taak tu dem nais. (Riid Pravorbz 31:26.) Wen yu nuo ou fi lisn tu piipl an taak tu dem nais, it a-go mek yu av som gud fren.

13. Uu kyan tiich yu ou fi tek kier a tingz iina di ous? (Luk pan di picha tu.)

¹³ Lorn ou fi tek kier a tingz iina di ous. Iina wol iip a konchri, a uman du nof a di wok iina di ous. A mait-a yu mada ar wan neda sista tiich yu ou fi du tingz gud iina di ous. Wan sista we niem Cindy se: “Wan a di bes ting we mi mada eva du fi mi a dat shi tiich mi ou fi wok aad. Shi tiich mi ou fi kuk gud, ou fi kliin di ous gud, ou fi suo, an ou fi bai tingz. An kaa mi nuo ou fi du dem sitn ya, it mek tingz beta fi mi an it mek mi kyan du muor tingz fi Jeuova. An shi tiich mi ou fi chriit piipl gud wen dem kom a mi yaad. An dis mek mi get fi nuo som nais breda an sista we mi kyan luk pan ou dem du tingz an fala dem.” (Pr. 31:15, 21, 22) Ef wan uman nuo ou fi du tingz gud an ou fi chriit piipl wen dem kom a ar yaad, an shi nuo ou fi tek kier a tingz iina ar ous, ar fambili an di breda an sista dem iina di kanggrigieshan a-go lov ar.​—Pr. 31:13, 17, 27; Aks 16:15.

14. Wa wi kyan lorn fram Crystal, an wa yu fi a tingk bout fi du?

 ¹⁴ Lorn ou fi du tingz fi yuself. Aal uu a sorv Jeuova fi lorn fi du tingz fi demself. (Fil. 4:11) Wan sista we niem Crystal se: “wen mi did de a ai skuul, mi mada an faada elp mi fi pik di sobjek dem we mi fi du we wuda elp mi iina laif. Laik mi faada did tel mi fi du akountin, an dat did elp mi nof nof.” Pan tap a aal a di sitn dem we wan uman mait-a lorn fi du so dat dem kyan get wan wok fi du, dem fi lorn ou fi plan ou fi spen dem moni. (Pr. 31:16, 18) Ef yu satisfai wid di likl sitn dem we yu av iina laif, an yu no bai tingz we yu kyan du widout, yu a-go av muor taim fi du wa yu waahn fi du fi Jeuova.​—1 Tim. 6:8.

15-16. Wa di sista dem we no marid a du fi elp out ada piipl? (Maak 10:29, 30)

¹⁵ Wen yu chrai fi av som gud wiez we Jeuova lov, an yu lorn fi du sortn tingz gud, it a-go kyan elp yu iina di fyuucha. Mek wi luk pan som sitn we yu kyan du.

¹⁶ Fi nou, yu mait-a plan se yu naa marid. Jos laik wa Jiizas se, som uman plan se dem naa marid aal ef wich paat dem liv fi marid a wan big ting. (Mat. 19:10-12) An som mait-a no marid kaaz a difrant difrant riizn. Bot jos memba se Jeuova an Jiizas no tingk se yu no wot notn kaa yu no marid. Aal bout uova di worl di sista dem we no marid a du nof gud sitn iina dem kanggrigieshan dem. An kaa dem lov di breda an sista dem so moch, dem komiin laik mada an sista tu nof a di breda an sista dem iina di kanggrigieshan.​—Riid Maak 10:29, 30; 1 Tim. 5:2.

17. Wa wan sista kyan du so das shi kyan yuuz muos a ar taim fi du Jeuova wok?

¹⁷ Yu kudaana a yuuz muos a yu taim a du nof fi Jeuova. Di uman dem we a sorv Jeuova fram aal uova di worl a du wol iip iina di priichin wok. (Sa. 68:11) Yu kyan plan fi du nof muor sitn fi Jeuova. Laik yu kyan staat fi paiyanier, elp fi bil Kindom Aal an dem ting de, ar plan fi go wok a Betel. Prie tu Jeuova an mek im nuo wa yu waahn fi du. An taak tu ada piipl we get fi du dem sitn de we yu waahn fi du. Chrai an fain out wa yu fi du an du tingz so dat yu kyan get fi du wa yu plan fi du. Wen yu get fi du wa yu plan fi du, yu a-go kyan get fi du nof muor sitn fi Jeuova.

18. Wa mek wan sista fi chrai aad fi pik wan gud breda fi marid tu? (Luk pan di picha tu.)

 ¹⁸ Yu mait-a plan fi marid. Dem sitn ya we wi jos luk pan a-go elp yu fi bi wan gud waif. Ef yu riili a plan fi get marid, mek shuor se yu a chrai aad fi pik wan gud man, kaa dis a wan a di bigis ting dem we yu a-go mek op yu main fi du. An memba se wen yu marid, a yu ozban a-go bi yu ed. (Ruo. 7:2; Ifii. 5:23, 33) So aks yuself dem kwestiyan ya: ‘Di man we mi a-go marid tu chrang iina wa im biliiv iina? Im a put Jeuova bizniz fos iina im laif? Im a du tingz we mek sens? Wen im du sitn we rang, im uon op tu it? Im rispek uman? Im a-go kyan elp mi fi gwaan sorv Jeuova? Im a-go kyan main mi, an im a-go de de fi mi no mata wa? An wen im get tingz fi du iina di kanggrigieshan, im du dem gud?’ (Luuk 16:10; 1 Tim. 5:8) Memba duo, se ef yu waahn fi get wan gud man, yu afi bi wan gud uman tu.

19. Wa mek a no wan bad sitn wen Jeuova se di waif ‘fi elp’ ar ozban?

¹⁹ Di Baibl se wan gud waif a-go elp ar ozban, an wen shi du dat a elp shi a elp im fi bi wan beta man. (Jen. 2:18) Jeuova neehn se shi fi du dat kaa im waahn ar fi fiil Iaik se shi a no notn, kaa wen Jeuova se wan waif fi elp ar ozban, a sitn gud dat shi get fi du. Matarafak, di Baibl tel wi se Jeuova “a di wan we elp” wi. (Sa. 54:4; Iib. 13:6) Wan waif we elp ar ozban wen im plan fi du sopm fi di fambili a shuo se shi a sopuot im tu. An kaa shi lov Jeuova, shi a-go du tingz fi mek ar ozban luk gud. (Pr. 31:11, 12; 1 Tim. 3:11) Wen yu du tingz we a-go mek yu lov Jeuova muor, an yu du tingz a yu yaad fi elp yu fambili, an yu du tingz fi elp di breda an sista dem we de iina yu kanggrigieshan, yu shuo se yu a redi op yuself fi bi wan gud waif.

20. A ou wan uman kyan mek di piipl dem iina ar fambili fiil?

²⁰ Yu mait-a en op av pikni. Afta yu marid, yu an yu ozban mait-a en op av pikni. (Sa. 127:3) So it mek sens fi yu tingk bout wa yu wuda du ef yu av pikni. Di sitn dem we wi jos luk pan iina da lesn ya kyan elp yu tu ef yu ton wan waif an av pikni. Kaa wen yu chriit piipl gud an yu tek taim wid dem an yu du tingz fi mek dem si se yu lov dem, it a-go mek yu pikni dem an yu ozban fiil api wen dem de a dem yaad.​—Pr. 24:3.

21. A ou wi fiil bout wi sista dem, an wa mek wi fiil so? (Luk pan di picha pan di kova.)

²¹ Wi lov aal a unu sista fi aal a wa unu du fi Jeuova an im piipl dem. (Iib. 6:10) Unu chrai aad fi av som gud wiez we Jeuova lov, an unu chrai aad fi nuo ou fi du tingz fi mek unu an di piipl dem we de roun unu api. An yu lorn fi du tingz we a-go elp yu iina di fyuucha. Wen yu du dem sitn ya, dem a-go mek yu wot nof tu di breda an sista dem iina Jeuova aaganaizieshan!