WI NUO se yu tangk Jeuova fi di sitn dem we im gi yu. Laik yu tangk im fi ou im mek yu iina wan wie so dat yu kyan mek op yu main fi yuself bout ou yu a-go enjai di sitn dem we im gi wi. An di Baibl mek wi nuo se wain a wan prezent we Gad gi wi. An it mek wi nuo tu se fuud mek wi laaf an wain mek wi api. (Iik. 10:19; Sa. 104:15) Bot som piipl no nuo ou fi kanchuol demself wen dem a jringk lika. Kaaz a ou dem gruo op an wa a gwaan roun dem, piipl fram aal uova di worl fiil difrant difrant wie bout lika. Bot a ou di Kristiyan dem fi fiil bout it?

No mata wich paat wi liv ar ou wi gruo op, ef wi mek di sitn dem we de iina Gad Wod kanchuol ou wi tingk an mek it gaid wi wen wi a mek op wi main fi du difrant difrant tingz, den it a-go mek tingz wok out gud fi wi iina di lang ron.

Yu mait-a si se nof piipl we naa worship Jeuova lov fi jringk wol iip a lika. Som a dem jringk it fi kaam demself, an som a dem jringk it fi elp dem diil wid dem prablem dem. An iina som plies dem jringk nof lika fi shuo se dem big an impuotant ar fi pruuv se dem chrang.

Jeuova mek di wan dem we a sorv im nuo wa fi du wen it kom aan tu lika. Laik im mek dem nuo di bad sitn dem we a-go apm tu dem ef dem jringk tu moch lika. Yu mait-a riid Pravorbz 23:29-35 we mek wi nuo bout som a di bad sitn dem we kyan apm tu sumadi wen dem jongk. a Wan elda iina Yuurop we niem Daniyel, tel wi bout di sitn dem we im yuus tu du bifuo im ton Kristiyan. Im se: “Kaa mi yuus tu jringk tu moch, mi did du som wol iip a sitn we neehn mek no sens. So it mek som bad sitn apm tu mi, an wen mi memba dem nou, dem stil mek mi fiil a wie.”

Ef wan Kristiyan no waahn fi av di wol iip a prablem dem we sumadi av we jringk tu moch lika, dem fi mek di sitn dem iina Gad Wod mek dem nuo wa fi du wen it kom aan tu umoch lika dem jringk.

Mek wi luk pan wa di Baibl se bout lika an wa mek som piipl jringk it.

Gad Wod no tel wi se wi no fi jringk lika. Matarafak, it tel wi se ef wi jringk wain it wi mek wi fiil api. (Iik. 9:7) Aal Jiizas an som ada piipl we worship Jeuova did jringk wain tu.​—Mat. 26:27-29; Luuk 7:34; 1 Tim. 5:23.

Bot di Baibl mek wi nuo klier klier se fi jringk lika an fi jringk lika til wi jongk a tuu difrant sitn. It se: “No bada jringk chrang jringk an get jongk.” (Ifii. 5:18) An it aal mek wi nuo se “piipl we eva a get jongk . . . no iivn wan a dem a-go tek paat iina Gad Kindom.” (1 Kor. 6:10) So wi si se Jeuova no waahn wi jringk tu moch an im no waahn wi get jongk niida. So insted-a fi a fala di sitn dem we wi si piipl roun wi a du, wi fi du wa Jeuova waahn wi fi du.

Som piipl fiil se dem kyan jringk wol iip a lika an no get jongk. Bot ef dem du dat it kyan ort dem. Di Baibl mek wi nuo se wi “no fi lov wain so til [wi] kyaahn tap jringk it,” kaa dat kyan mek sumadi du som wol iip a seks sin an ada tingz we Jeuova no waahn dem fi du. An dem an Jeuova naa go bi fren agen. (Taitos 2:3; Pr. 20:1) Jiizas mek wi nuo se wi no fi spen di wol a wi taim a jringk kaa dat kyan mek wi no get fi go iina Gad nyuu worl. (Luuk 21:34-36) So wa kyan elp wan Kristiyan  fi no jringk tu moch lika we kyan mek dem en op iina wol iip a prablem?

Ef di mount a lika we yu a jringk a kaaz a wa yu gruo op an si di piipl dem roun yu a jringk, it kyan ort yu an mek tingz ton out bad fi yu. Di Baibl mek wi nuo se, “weda yu a iit fuud ar jringk jringks​—evriting we yu du, yu fi du it iina wan wie we wi kaaz piipl fi priez Gad.” (1 Kor. 10:31) Si som kwestiyan ya we wi kyan aks wiself an som sitn we di Baibl se we kyan elp wi.

Di mount a lika mi a jringk a kaa mi waahn piipl fi laik mi? Eksidos 23:2 tel wi se: “Yu no fi fala [piipl] an du wa dem a du.” Wen Jeuova did tel di Izrelait dem dis, im did a waan dem se dem no fi fala di piipl dem we naa du wa im waahn dem fi du. An a di siem ting wi no fi du. Ef di riizn wa mek wi jringk lika an di mount a lika we wi jringk a kaaz a wa di piipl dem roun wi a du, it kyan mek wi an Jeuova no fren agen an mek wi en op naa du di sitn dem we im waahn wi fi du.​—Ruo. 12:2.

Mi a jringk lika kaa mi waahn ada piipl tingk se mi chrang? Iina som konchri, di wie ou som piipl gruo mek dem fiil se notn no rang fi jringk wol iip a lika. (1 Pii. 4:3) Bot luk pan wa 1 Korintiyan 16:13 tel wi se. It se: “Kip unu yai dem uopm, tan op chrang fi wa unu biliiv, no fried a notn an gwaan kip chrang.” Yu tingk lika kyan riili mek sumadi gwaan kip chrang? Nuo sa! Kaa wen sumadi jringk lika it kyan mek dem du tingz we dem wudn naamali du an mek dem kyaahn tingk chriet. So wen wi jringk wol iip a lika, a no chrang it shuo se wi chrang bot a wiik it shuo se wi wiik. Aizaiya 28:7 mek wi nuo se di sumadi we jringk tu moch lika a-go en op tap du di sitn dem we Gad waahn dem fi du, dem a-go a jrap wen dem a waak an kyaahn waak schriet.

A Jeuova a di wan we kyan riili mek wi chrang, an wi fi gwaan luk out fi mek shuor se wi a du di sitn dem we Jeuova waahn wi fi du an se wi a tan op chrang. (Sa. 18:32) So yu a-go chrai an no go nowe we tingz de we kyan ort yu. An yu a-go mek op yu main se yu naa go du notn we a-go mek yu an Jeuova no fren agen. Wen Jiizas did de pan di ort, im did  du tingz we shuo se im chrang kaa im did a du wa Jeuova waahn im fi du. An dis mek nof piipl rispek im kaa dem did si se im did briev.

Mi jringk lika fi it elp mi fi no wori bout mi prablem dem? Wan a di man dem we rait di buk a Saamz rait an se: “Wen mi did a wori wori op miself bout uol iip a tingz, yu [Jeuova] osh mi an kaam mi aat.” (Sa. 94:19) So ef yu a go chuu uol iip a prablem iina yu laif, a Jeuova yu fi prie tu an aks im fi elp yu, a no lika yu fi a jringk. An nof piipl fain se wen dem taak tu sumadi iina di kanggrigieshan we chrang iina wa dem biliiv iina, dat elp dem. An yu si wen yu jringk nof lika an dem ting de wen yu a go chuu yu prablem dem, it wi mek yu no so chrang fi tan op an du wa rait. (Oz. 4:11) Daniyel, we wi taak bout aredi se: “Mi a sumadi we yuus tu wori an fret wol iip bout di sitn dem we mi du rang. So mi wuda jringk wol iip a lika fi mek mi no wori so moch. Bot wen mi du dat, wa mi fain se apm a se mi prablem dem get muor, mi fren dem tap diil wid mi, an mi staat fi no rispek miself no muor.” Bot wa Daniyel did se elp im? Im se: “Mi si se a neehn lika mi niid, a Jeuova mi niid. A im elp mi fi go chuu mi prablem dem.” Di ting a dat Jeuova aalwiez de de fi elp wi, aal wen it luk laik se notn kyaahn go elp wi outa di prablem dem we wi a go chuu.​—Fil. 4:6, 7; 1 Pii. 5:7.

Ef yu a sumadi we jringk lika som a di taim, yu kyan aks yuself dem kwestiyan ya: ‘Sumadi iina mi fambili ar mi fren tel mi se mi fi wach umoch lika mi a jringk?’ Ef dem du dat, dat mait-a miin se yu a staat fi jringk tu moch lika bot yu no riyalaiz se a dat yu a du. Wan neda kwestiyan yu kyan aks yuself a: ‘Mi a jringk muor lika dan mi yuus tu jringk?’ Ef yu se yes tu dis, it mait-a komiin laik se iivn duo yu aarait ya nou, yu suun kyaahn du widout di lika. Ar aks yuself dis: ‘Mi fain it aad fi go kopl die an no jringk no lika?’ Ef yu se yes tu dis, yu mait-a kyaahn du widout di lika aredi. An yu mait-a afi go a dakta ar get sumadi els laka dat fi elp yu.

Kaaz a di uol iip a prablem dem we kyan apm wen sumadi jringk lika, som Kristiyan jos no jringk non at aal. An yu av som ada piipl  we no jringk lika kaa dem no laik ou it ties. Ef wan a yu fren dem no jringk kaaz a wan a dem riizn ya, jos wok wid im an no mek im fiil no wie.

Yu mait-a fain se it mek sens se yu mek op yu main bout wa yu a-go du fram bifuo. Laik som piipl mek op dem main bout umoch dem a-go jringk an ef dem a-go jringk wan taim fi di wiik ar dem onggl a-go jringk likl lika wen dem a iit. An som piipl mek op dem main bout di kain-a lika we dem a-go jringk. Laik ef dem a-go jringk bier ar wain bot dem naa go jringk notn tuu chrang ar dem naa go jringk jringks we dem miks an put lika iina it. So wans sumadi mek op dem main bifuo bout wa dem a-go du, it a-go mek it iiziya fi im fi du wa im did plan fi du. An ef yu a sumadi we chrang iina wa yu biliiv iina, no fiil no wie bout wa yu mek op yu main fi du wen it kom aan tu lika.

Wen yu a mek op yu main bout lika, tingk bout ou ada piipl fiil bout it. Ruoman 14:21 se: “It gud fi no iit miit ar jringk wain ar fi du notn we wuda kaaz yu breda ar sista fi sin.” So dis miin se kaa yu lov yu breda an sista dem, ef yu fiil se ef dem si se yu a jringk lika it a-go mek dem fiil a wie, yu naa go jringk it. An dis wuda a shuo se yu kier bout ou dem fiil an se yu naa luk out fi yuself wan, bot yu a luk out fi ada piipl tu.​—1 Kor. 10:24.

Wan neda ting a dat di govament iina di konchri we yu liv a-go av dem uona laa bout lika. Laik dem mait-a se ef yu no riich wan sortn iej yu no fi jringk lika. Ar ef yu a jraiv ar a wok pan sortn mashiin yu no fi a jringk lika. So kaa wi a du wa Jeuova waahn wi fi du wi a-go du wa di govament dem se wi fi du tu.​—Ruo. 13:1-5.

A wol iip a nais tingz Jeuova gi wi, an wan a dem a dat im mek wi iina wan wie we wi kyan mek op wi main fi wiself bout wa fi iit an wa fi jringk. So wen yu mek op yu main fi du wa Jeuova waahn yu fi du, a so yu shuo im se yu tangk im fi da prezent de.