1. Wen wi tingk bout ou Iebriyam did chos iina Gad, wa a som kwestiyan wi kyan aks wiself?

 IIVN duo wol iip a piipl ier bout Iebriyam, wol iip a dem no nuo nof sitn bout im. Bot yu nuo wol iip bout Iebriyam, laik yu nuo se dem did kaal im di “faada fi aal a di piipl dem we . . . biliiv iina [Jeuova].” (Ruo. 4:11) Bot yu mait-a a wanda se, ‘Mi kyan du laik Iebriyam an chos iina Jeuova laik ou Iebriyam did chos iina im?’ Ye man, yu kyan dwi’it.

2. Wa mek it impuotant fi wi stodi bout wa Iebriyam did du? (Jiemz 2:22, 23)

² Ef wi stodi an sidong an tingk bout di ting dem we Iebriyam did du, it wi mek wi kyan chos iina Jeuova laik im. Kaa Iebriyam aalwiez du wa Jeuova tel im fi du, laik im did du wa Jeuova se an muuv faar fram wich paat im liv an go liv iina tent fi wol iip a ier. An im did redi fi gi op im bwai pikni Aizak laif we im lov. An Iebriyam did redi fi du aal a dem sitn ya kaa im chos Jeuova. So dat did mek Jeuova api wid im, an it mek di tuu a dem ton gud fren. (Riid Jiemz 2:22, 23.) Jeuova waahn di wol a wi​—aal yu tu​—fi ton im gud gud fren, an im waahn fi api wid wa yu a du tu, so a das wai im mek Paal an Jiemz rait bout wa Iebriyam did du iina di Baibl. Mek wi luk iina Ruoman chapta 4 an Jiemz chapta 2 we a-go tel wi bout wa Iebriyam did du. Dem tuu chapta ya taak bout sopm impuotant we av fi du wid Iebriyam.

3. A wich vors iina di Baibl Jiemz an Paal did taak bout?

³ Paal an Jiemz did taak bout di siem ting we Jenisiz 15:6 se. It mek wi nuo se Iebriyam did chos iina Jeuova, an kaaz  a dat Jeuova si im az wan man we aalwiez a du wa rait. Yu si sumadi we a du wa rait, Gad naa go bliem dem fi notn. An dis a riili sopm nais kaa it mek wi nuo se Gad kyan si sumadi we no porfek an we a sina az sumadi we no gilti a notn. A so yu wuda waahn Gad fi fiil bout yu tu, no chuu? Fi fain out wa wi kyan du so dat Gad kyan se dat bout wi tu, wi niid fi andastan wa mek Gad did se dat bout Iebriyam.

4. Wa mek it aad fi wi du wa rait?

⁴ Wen Paal did rait di leta tu di Ruoman dem, im did se evribadi a sina. (Ruo. 3:23) Wa sumadi kyan du fi mek Gad se dem aalwiez a du wa rait an mek im api wid wa dem a du? Paal did yuuz wa Iebriyam did du fi elp aal a wi we waahn fi du wa Jeuova se wi fi du.

5. Wa mek Jeuova did se Iebriyam aalwiez a du wa rait? (Ruoman 4:2-4)

⁵ Wen Iebriyam did a liv iina Kienan, Jeuova did se im aalwiez a du wa rait. Bot dis a neehn kaa Iebriyam did a du wa Muoziz Laa se im fi du. (Ruo. 4:13) Jeuova did gi di piipl dem we liv iina Izrel da Laa de muo dan 400 ier afta im se Iebriyam aalwiez a du wa rait. So a kaaz Jeuova lov Iebriyam an kaa Iebriyam du tingz fi shuo se im chos iina Jeuova mek Jeuova kuda se Iebriyam a du wa rait.​—Riid Ruoman 4:2-4.

6. Wa mek Jeuova kyan se sumadi we a sina a du wa rait?

⁶ Wan neda ting Paal se a dat wen sumadi chos iina Gad, “Gad . . . tek we [dem] sin an se . . . dem kliin.” (Ruo. 4:5) Den im se: “Dat a wa David did miin wen im did a taak bout ou piipl wel api wen Gad mek tingz rait bitwiin im an dem. Dem wel api kaaz aal dem did afi du a chos iina Gad, dem neva afi du notn els. Dievid rait iina Saamz se: ‘Di piipl uufa sin Gad paadn, a dem riili api. Gad paadn dem fi aal a di rang we dem du. Di piipl we Gad luk pan an se im naa uol dem sin gens dem, a dem riili api.’” (Ruo. 4:6-8; Sa. 32:1, 2) So kaa dem Piipl ya chos iina im, iina fi’im yai dem aalwiez a du wa rait.

7. Wa mek wi kyan se di wan dem we did sorv Gad bifuo fi wi taim did aalwiez a du wa rait?

⁷ Iivn duo Gad did se Iebriyam an Dievid an som ada piipl we a worship im aalwiez a du wa rait, dem wan ya stil neehn porfek. Bot kaaz dem chos iina Gad, iina fi’im yai dem neehn gilti a notn, wos wen yu tingk bout di neda wan dem we neehn a du wa Gad waahn dem fi du. (Ifii. 2:12) Iina im leta, Paal mek it klier klier se yu afi chos iina Gad ef yu waahn fi bi im fren, an a dat Iebriyam an Dievid did du. So a dat wi fi du tu ef wi waahn fi bi im fren.

8-9. Wa som paasta man did fiil se Paal an Jiemz a se we neehn go so, an wa mek dem did fiil so?

⁸ Fi wol iip a ier nou, som a di choch liida dem a tiich se aal yu afi du fi get siev a biliiv iina di Laad Jiizas Krais. An yu mait-a ier dem se, “Tek di Laad az yu sieviya an yu wi get siev.” Dem choch liida de mait-a aal taak bout wa Paal did se wen im se: “Gad mek tingz rait bitwiin im an dem. Dem wel api kaaz aal dem did afi du a chos iina Gad, dem neva afi du notn els.” (Ruo. 4:6) Bot yu av som ada choch liida we se yu kyan “siev yuself” wen yu go a di difrant difrant plies dem we di choch dem se uoli an wen yu du som gud sitn we di choch se yu fi du tu. Dem mait-a aal se wa Jiemz 2:24 se, wen it se: “Gad . . . se sumadi a liv rait, no jos chuu dem se dem biliiv iina im, bot kaaz dem du wa im se dem fi du.”

 ⁹ An a das wai som man we rait som buk bout di Baibl neehn fiil se Paal an Jiemz did a se di siem ting bout wa wuda siev wi. So dem choch man ya mait-a did biliiv se Paal did biliiv se so langks sumadi chos iina Gad, Gad wuda se dem a du wa rait an dem na’afi du notn els. An dem biliiv se Jiemz did a se fi Gad se sumadi a du wa rait, dem afi a du sortn tingz. Wan paasta man we tiich piipl bout di Baibl se: “Jiemz neva andastan wa mek Paal did a se yu onggl niid fi chos iina Gad fi Gad se yu a du wa rait, yu na’afi du no speshal kain-a wok.” Bot a Jeuova did mek di tuu a dem rait wa dem rait. (2 Tim. 3:16) So fi get wa di tuu a dem a se, mek wi luk pan wa dem did a taak bout.

10. Wa ‘kain-a wok’ Paal did a taak bout iina Ruoman 3:21, 28? (Luk pan di picha tu.)

¹⁰ Di kain-a ‘wok’ we Paal did a taak bout iina Ruoman 3 an 4 a di ‘wok we piipl du wen dem a fala di Laa’ we Muoziz did get wen im de pan Mount Sainai. (Riid Ruoman 3:21, 28.) It did luk laik se iina di taim wen Paal did de bout, di Juu dem we ton Kristiyan did fain it aad fi biliiv se dem na’afi fala di Laa we Muoziz did get agen. Bot Paal mek dem memba se Iebriyam neehn av no laa fi fala bot Gad stil se Iebriyam did a du wa rait. So a kaa sumadi chos iina Gad mek dem du wa rait. An dis mek wi fiil gud kaa it mek wi nuo se ef wi chos iina Jeuova an Jiizas Krais, dat a-go mek Jeuova api wid wa wi a du.

11. Iina Jiemz chapta 2, a wa kain-a ‘wok’ Jiemz did a taak bout?

¹¹ So di ‘wok’ we Jiemz did taak bout iina Jiemz chapta 2 a no di ‘wok we sumadi du wen dem a fala di Laa’ we Paal did a taak bout. Jiemz did a taak bout di sitn  dem we wan Kristiyan fi du evridie iina dem laif. So wen wan Kristiyan du dem sitn ya, it wuda shuo ef im riili chos iina Gad. Mek wi luk pan tuu a dem sitn ya we Jiemz did a taak bout we wan Kristiyan fi du.

12. Wa Jiemz did se we shuo se sumadi we riili chos iina Gad afi du sitn we shuo se dem riili a chos iina Gad? (Luk pan di picha tu.)

¹² Iina di fos paat a di skripcha, Jiemz did elp wi fi si se wi no fi chriit som piipl beta dan som piipl. Laik wen im tel wi bout wan man we chriit di rich piipl dem speshal an chriit puor piipl bad. Jiemz mek wi si se da man ya mait-a fiil se im a chos iina Gad bot im naa du no wok fi shuo se im riili a chos iina Gad. (Jmz. 2:1-5, 9) An di sekan wan we Jiemz did taak bout a wen ‘sumadi si se dem breda ar sista naa no kluoz fi wier ar no fuud fi nyam’ bot dem no du notn fi elp dem. So aal ef di wan we no elp dem kliem se dem a chos iina Gad, dem naa du notn fi shuo se dem riili a chos iina Gad. So it no mek no sens fi dem se dem a chos iina Gad. So jos laik wa Jiemz rait an se, “Ef unu se unu biliiv sopm an no av no akshan fi bak it op, wa unu se unu biliiv no wot notn​—it no mek no sens.”​—Jmz. 2:14-17.

13. A wich tuori iina di Baibl Jiemz did tel dem bout fi shuo se ef wi riili biliiv iina Gad wi afi du sitn bout it? (Jiemz 2:25, 26)

¹³ An Jiemz tel dem bout Rieyab we did du sopm fi shuo se shi riili chos iina Gad. (Riid Jiemz 2:25, 26.) Shi did ier bout Jeuova an aal a di sitn dem we im did du fi di Izrelait dem. (Jash. 2:9-11) An shi du sitn fi shuo se shi biliiv wa shi did ier. So wen di tuu Izrelait spai dem did a luk somwe fi aid wen dem did waahn fi kil dem, shi aid dem. An kaaz a wa Rieyab did du, aalduo  shi a neehn wan Izrelait, Jeuova did se jos laik Iebriyam shi du wa rait tu. So wa shi du mek wi si se ef wi riili biliiv iina Gad, wi fi a du tingz fi shuo se wi riili biliiv iina im fi chuu.

14. Ou wi nuo se Paal an Jiemz neehn de se sitn difrant fram dem wan aneda?

¹⁴ So a no laik se Paal an Jiemz did a se sitn difrant fram dem wan aneda. A jos se dem did a taak bout it iina wan difrant wie. So wa Paal did a tel di Juu piipl dem we ton Kristiyan se a dat Jeuova naa go api wid dem onggl ef dem a du di sitn dem we di Laa we Muoziz did get tel dem fi du. An Jiemz did a mek di Kristiyan dem nuo se ef dem riili chos iina Gad, dem afi du tingz fi elp ada piipl.

15. Wa a som sitn we wi kyan du fi mek Jeuova si se wi riili chos im? (Luk pan di picha dem tu.)

¹⁵ Jeuova neehn se ef wi waahn im fi se wi a du wa rait wi afi du di siem sitn dem we Iebriyam did du, kaaz a wol iip a sitn wi kyan du fi shuo se wi riili chos iina im. Laik wen difrant piipl kom a wi miitn dem, wi kyan mek dem si se wi api fi av dem de. An wen wi si se wi breda an sista dem niid elp, wi redi fi elp dem, an wi fi mek shuor se wi a chriit wi fambili gud tu. A dem sitn ya Jeuova waahn wi fi du we a-go mek im bles wi. (Ruo. 15:7; 1 Tim. 5:4, 8; 1 Jan 3:18) Wan big ting we wi kyan du fi shuo se wi a chos iina Gad a wen wi priich tu piipl an tiich dem bout di gud nyuuz. (1 Tim. 4:16) So wi riili biliiv se Jeuova a-go du wa im se im a-go du an se wa im waahn wi fi du a di bes ting fi wi du? An wen wi du aal a dem sitn ya, wi kyan nuo fi shuor se Jeuova wi luk pan wi an se, ye, wi a du wa rait an wi an im a fren.

16. Kaa Iebriyam did chos iina Jeuova, ou dat did mek im a luk faawod fi get di sitn dem we Jeuova pramis im?

¹⁶ Iina Ruoman chapta 4, wi si som tingz we wi kyan lorn fram Iebriyam. Laik ou wi fi biliiv se Jeuova a-go gi wi di sitn dem we im pramis wi se im a-go gi wi, kaa Jeuova did pramis se siek-a Iebriyam “nof difrant piipl fram aal uova di worl” wuda get blesn, an dat did a sitn nais we Iebriyam did a luk fi apm. (Jen. 12:3; 15:5; 17:4; Ruo. 4:17) Bot aal wen Iebriyam riich 100 ier uol an Siera did a 90, dem stil neehn av no pikni yet, so tu piipl it wuda luk laik se dem kyaahn go av no pikni. Dis wuda tes fi si ef Iebriyam wuda gwaan biliiv se Jeuova wuda du wa im pramis se im a-go du. Paal did rait an tel di breda an sista dem iina Ruom se: “Iivn duo im neva av no riizn fi biliiv se im wuda get we Gad pramis im, Iebriyam did biliiv siem wie. Im biliiv se Gad wuda mek im di faada fi nof difrant piipl fram aal uova di worl.” (Ruo. 4:18, 19) An dat get fi apm kaaz Iebriyam did get fi av di pikni we im did wel waahn fi av, we niem Aizak.​—Ruo. 4:20-22.

17. Ou wi nuo se wi kyan du wa rait an bi Jeuova fren?

¹⁷ Jos laik Iebriyam, wi kyan du di sitn dem we Jeuova se rait so dat wi kyan ton im fren. An Paal did rait bout dis wen im se: “Di paat iina Gad wod we it se, ‘Gad mek tingz rait bitwiin dem,’ dat neva rait dong fi Iebriyam wan, it rait fi wi tu. It rait dong fi aal a wi we Gad a-go mek tingz rait wid kaaz wi biliiv iina im. Wi biliiv iina di Gad we mek wi Laad Jiizas kom bak alaiv.” (Ruo. 4:23, 24) So jos laik Iebriyam wi fi chos iina Jeuova an du di sitn dem we im se wi fi du an biliiv se im a-go gi wi di sitn dem we im pramis wi se im a-go gi wi. Paal taak bout di sitn dem we wi a luk faawod fi get iina Ruoman chapta 5, a dem sitn de wi a-go luk pan iina di neks lesn.