1. Wa mek Iebriyam did nuo fi shuor se Jeuova a-go gi im di sitn dem we im pramis im?

 JEUOVA did pramis Iebriyam se Im a-go mek aal a di piipl dem we kom fram di difrant difrant konchri dem get wan blesn kaaz a im. (Jen. 15:5; 22:18) Wen Iebriyam a 100 an im waif a 90 dem stil neehn av no bwai pikni, bot im stil did nuo fi shuor se Gad wuda gi im wa Im pramis im. (Jen. 21:1-7) Di Baibl se Iebriyam “biliiv se Gad wuda mek im di faada fi nof difrant piipl fram aal uova di worl an dat it wuda apm siem laik ou it se iina Gad wod.” (Ruo. 4:18) An wi nuo se Iebriyam did av di pikni we Jeuova did pramis im se im wuda av we niem Aizak. Wa mek yu tingk Iebriyam did stil a chos iina Jeuova aalduo im did a onjrid ier uol an stil neehn av no pikni?

2. Wa mek Iebriyam kuda stil fiil se Jeuova wuda gi im wan bwai pikni?

² Kaaz Iebriyam an Jeuova did so kluos, “im did shuor se Gad kuda du evriting we im pramis fi du.” (Ruo. 4:21) Jeuova did api wid wa Iebriyam du, das wai im did se Iebriyam eva a du di rait sitn. (Jmz. 2:23) Bies pan wa Ruoman 4:18 se, iivn duo Iebriyam neva av no riizn fi biliiv, im did stil biliiv se im wuda get di sitn dem we Jeuova pramis im. So wi a-go luk pan som a di sitn dem we Paal taak bout iina Ruoman chapta 5 we wi a luk faawod fi get.

3. A wa Paal tel wi se wi kyan go get fi du muor an muor?

³ Paal tel wi wa mek wi kyan nuo fi shuor se “kaaz wi nuo se Gad a-go gi wi we im pramis, wi no afi wori.” (Ruo. 5:5) An Paal mek wi nuo tu se wi kyan biliiv muor an muor se Gad a-go gi wi di sitn dem we im pramis wi. Wen wi luk pan di sitn dem we Paal taak bout a Ruoman 5:1-5, yu fi tingk  bout yuself. An wen yu du dat, yu mait-a si se muor an muor yu a biliiv se Gad a-go du di sitn dem we im pramis wi. Da lesn a-go elp yu fi si ou yu kyan get fi biliiv dem sitn ya muor. Bot bifuo wi luk pan dat, wi a-go luk pan wa mek wi no afi wori se Gad a-go gi wi wa im pramis wi.

4. A wa Paal did taak bout a Ruoman 5:1, 2?

⁴ Riid Ruoman 5:1, 2. Paal did rait dem wod ya tu di breda an sista dem we did de iina Ruom. Dem did lorn bout Jeuova an Jiizas an dem chos iina dem an ton Kristiyan. So ‘Gad put tingz rait bitwiin dem an im kaaz dem biliiv iina im.’ An im yuuz im uoli spirit fi pik dem fi go a evn, so dem did nuo fi shuor se dem av sitn nais fi get.

5. Di wan dem we get pik fi go a evn, a wa dem a luk faawod fi get?

⁵ Afta dem wan ya we did iina Efisos get pik fi go a evn, Paal rait dem bout “di sitn dem we Gad pramis fi gi im piipl dem.” (Ifii. 1:18) An wen im rait di breda an sista dem we did liv iina Kolasi im tel dem se: “unu a luk fi get wa Gad put op iina evn fi wi.” (Kol. 1:4, 5) So di wan dem we get pik fi go a evn we de pan di ort ya nou a luk faawod fi kom bak alaiv fi liv iina evn fi eva an fi ruul wid Jiizas Krais.​—1 Tes. 4:13-17; Rev. 20:6.

6. Wa wan breda we get pik fi go evn se bout di sitn dem we im a luk faawod fi get?

⁶ Di breda an sista dem we get pik fi go a evn api se dem get pik fi go a evn. Breda Frederick Franz, a wan a dem an im did se: “Wi nuo fi shuor se aal a di 144,000 we get pik fi go a evn, a-go get fi go liv de. An it a-go naisa dan wa wi kuda eva tingk bout.” An aal afta Breda Franz a sorv Jeuova fi wol iip a ier, iina 1991 im se: [Wi] stil a luk faawod fi go liv fi eva iina evn. . . . An di langga wi wiet fi it, a di muor wi tangk Jeuova fi it. An aal ef a  wan miliyan ier wi afi wiet fa, it stil a-go wot it. So rait ya nou, mi a luk faawod fi get it muor dan bifuo.”

7-8. A wich paat nof a wi a luk faawod fi liv? (Ruoman 8:20, 21)

⁷ Nof a wi we a worship Jeuova tide a luk faawod fi liv fi eva pan di ort wen Gad Kindom govament a ruul uova wi. An a di siem ting Iebriyam did a luk faawod fi get. (Iib. 11:8-10, 13) A da nais sitn ya Paal did rait bout. (Riid Ruoman 8:20, 21.) Wen yu did lorn bout aal a di nais sitn dem we Jeuova a-go du fi yu iina di fyuucha, a wich wan a dem yu did lov di muos? Laik wen yu did lorn se di taim a-go kom wen yu a-go porfek an yu naa go sin no muor, ou yu did fiil? An wen yu did lorn se yu piipl dem we ded a-go kom bak alaiv an liv fi eva pan di ort, ou dat did mek yu fiil? Di sitn dem we Gad pramis wi mek wi av sitn nais fi luk faawod fi get, no chuu?

⁸ No mata ef wi a luk faawod fi liv fi eva iina evn ar pan di ort, it mek wi api. An Paal rait an mek wi nuo wa kyan elp wi fi luk faawod fi dis apm muor an muor. So mek wi luk pan wa im did rait bout di sitn dem we wi a luk faawod fi get. Wen wi luk pan wa im rait se, it kyan mek wi nuo fi shuor se wa wi a luk faawod fi apm a-go apm fi chuu.

9-10. Bies pan wa Paal did go chuu, a wa aal a wi we a fala Jiizas kyan ekspek fi apm? (Ruoman 5:3) (Luk pan di picha dem tu.)

⁹ Riid Ruoman 5:3. Wi fi nuo se ef wi a fala Jiizas Krais, wi a-go sofa chuu nof sitn. An wen wi go chuu dem sitn ya it a-go elp wi muor an muor fi luk faawod fi di sitn dem we Jeuova a-go gi wi. Luk pan wa Paal did se tu di breda an sista dem we did de iina Tesalonaika. Im tel dem se: “ Wen wi did de wich paat unu de, wi did waan unu lang bifuo it apm se  wi did a go sofa. An si de​—a dat apm!” (1 Tes. 3:4) An im did rait di wan dem we iina Korint an tel dem se: “Breda an sista wi waahn unu fi nuo di chuut bout aal a di sitn dem we wi did afi sofa chuu. . . It did so bad wi did shuor se a ded wi did a go ded.”​—2 Kor. 1:8; 11:23-27.

¹⁰ So langks yu a fala Jiizas, yu kyan ekspek se wi a-go sofa chuu nof sitn tu. (2 Tim. 3:12) Yu fain se sins yu staat fi chos iina Jiizas an fala im yu staat go chuu nof sitn tu? Yu mait-a fain se yu fren dem ar yu fambili staat fi mak yu, ar dem mait-a aal staat rof yu op an chriit yu bad tu. An kaa yu waahn fi bi anis an liv rait iina evri wie, yu mait-a fain se yu staat fi av prablem wich paat yu a wok tu. (Iib. 13:18) Ar kaaz yu a tel piipl bout di sitn dem we yu biliiv di govament mait-a staat fait gens yu. Bot no mata wa wi a sofa chuu, Paal tel wi se wi fi api. Bot wa mek im se wi fi stil api?

11. Wa mek wi fi mek op wi main se wi a-go eng an no gi op no mata wa wi a sofa chuu?

¹¹ Kaaz a wa wi a-go get, wi fi stil api no mata wa wi a sofa chuu. Ruoman 5:3 tel wi se, “wen wi sofa . . . wi wi get chrangga, an kaaz wi get chrangga wi kyan go chuu nof muor sopm an no gi op.” Aal a wi we a Kristiyan a-go sofa chuu nof sitn, so wi fi chrai aad fi go chuu an no gi op. Wi fi mek op wi main se wi naa go gi op no mata wa, an a da taim de wi a-go get di sitn dem we Gad pramis fi gi wi. Wi no waahn fi bi laik di piipl dem we Jiizas did taak bout wen im taak bout di siid we jrap wich paat bier rakstuon de. Wen wi priich tu dem piipl de an dem lorn dem api bot “wen tof taim lik im siek-a Gad wod” im gi op an tap sorv Gad. (Mat. 13:5, 6, 20, 21) Wi nuo se wen piipl a fait gens wi kaa wi a sorv Gad ar wi a go chuu som wol iip a tingz, it no iizi, bot wen wi go chuu dem it a-go mek tingz beta fi wi. Wa mek wi se so?

12. Ou it kyan elp wi wen wi go chuu wi chraiyal dem an no gi op?

¹² Di apasl Jiemz mek wi nuo di gud we a-go apm wen wi go chuu wi chraiyal dem an no gi op. Im se: “Unu fi gwaan uol aan chrang no mata wa apm an chos iina Gad so unu kyan bi aal we Gad waahn unu fi bi, an so unu wi no shaat a notn.” (Jmz. 1:2-4) So Jiemz a mek wi si se wen wi gwaan uol aan chrang no mata wa, it wi elp wi fi av som gud wiez. Laik it wi elp wi fi si ou wi kyan tek taim wid piipl muor, an fi chos iina Gad an dipen pan im muor an muor tu. Bot wan neda gud sitn a-go apm tu wi kaaz wi go chuu an no gi op.

13-14. Wen wi go chuu wi chraiyal dem an no gi op, wa dat a-go mek apm, an wa dat av fi du wid di sitn dem we wi a luk faawod fi get? (Ruoman 5:4)

¹³ Riid Ruoman 5:4. Paal mek wi nuo se wen wi go chuu wi chraiyal dem an no gi op “Gad wi proud a wi.” Bot dis no miin tu se Jeuova api se yu a sofa chuu nof sitn. Wa it miin a se im api se yu go chuu an no gi op. So a yu im api wid. It nais fi nuo se wen wi eng aan an no gi op it a-go mek Jeuova api wid wi!​—Sa. 5:12.

¹⁴ Iebriyam did go chuu im chraiyal dem an no gi op. An dat did mek Jeuova api wid im, an im se Iebriyam did du wa rait, an im an im a did gud fren. (Jen. 15:6; Ruo. 4:13, 22) A di siem ting wid wi, a no di mount a wok we wi a du fi im, ar di big wok dem we wi get fi du iina di aaganaizieshan we a-go mek im api wid wi, Jeuova a-go api wid wi kaa wi a du wa rait  an a go chuu wi chraiyal dem. So no mata ou uol wi bi, ar wa wi a go chuu iina laif, ar wa wi kyan du fram wa wi kyaahn du, aal a wi kyan eng aan an no gi op. Ef yu a go chuu wan chraiyal nou an naa gi op, yu kyan fiil gud fi nuo se Jeuova api wid wa yu a du. An wen wi nuo se Jeuova api wid wa wi a du, it a-go elp wi fi gwaan luk faawod fi get di sitn dem we im pramis fi gi wi.

15. A wa els Paal did se, an wa mek som piipl mait-a wanda bout it?

¹⁵ Jos laik wa Paal mek wi nuo se, Jeuova a-go api wid wi wen wi go chuu wi chraiyal dem an no gi op. An im se: “Wen wi si se Gad proud a wi, wi wi nuo se im wi gi wi aal wa im pramis wi. An kaaz wi nuo se Gad a-go gi wi we im pramis, wi no afi wori.” (Ruo. 5:4, 5) Som piipl mait-a a wanda wa mek Paal se dis agen kaa bifuo dat iina Ruoman 5:2 im did se di Kristiyan dem we liv iina Ruom a luk faawod fi go liv iina evn aredi. So sumadi mait-a aks se, ‘Ef dem Kristiyan de av sitn a luk faawod fi get aredi, wa mek Paal se dem av sitn a luk faawod fi get agen?’

16. Wa kyan elp sumadi fi biliiv muor an muor se Gad a-go gi dem di sitn dem we im pramis dem? (Luk pan di picha dem tu.)

¹⁶ Wen wi memba se wi kyan luk faawod fi get sitn muor an muor, wi kyan andastan wa Paal did miin. Laik tingk bout wen yu did dis lorn bout di nais sitn dem we di Baibl tel wi se Gad a-go du fi wi iina di fyuucha, da taim de yu mait-a did fiil se yu kyaahn go liv fi eva iina Paradais pan ort fi chuu. Bot di muor yu stodi an lorn bout Jeuova an wa im pramis fi gi wi, it mek yu nuo fi shuor se fi kyan liv fi eva iina Paradais pan ort a sitn we a-go apm fi chuu.

17. Afta yu gi yu laif tu Gad an baptaiz, wa a-go elp yu fi waahn get di sitn dem we Gad pramis yu muor an muor?

 ¹⁷ Aal afta yu prie tu Gad an tel im se yu a gi yu laif tu im an baptaiz, yu a-go stil a lorn muor bout im an get chrang iina di sitn dem we yu biliiv iina. So yu a-go a luk muor an muor fi get di sitn dem we Gad pramis wi. (Iib. 5:13–6:1) Miebi yu go chuu wa Paal did taak bout iina Ruoman 5:2-4. Ye, yu sofa chuu nof sitn, bot yu eng an no gi op, an yu si se Gad api wid yu. An kaa yu nuo se Jeuova api wid yu, it mek yu nuo se im a-go gi yu di sitn dem we im pramis yu. So yu a-go fain se rait ya nou, yu a luk faawod fi get di sitn dem we Gad pramis wi muor an muor; dem a-go komiin laik wan speshal prezent fi yu. An dis a-go mek yu chienj di wie ou yu a liv yu laif, an yu a-go fain se yu a-go staat fi chriit di piipl dem iina yu fambili beta, an yu a-go yuuz yu taim fi du di ting dem we Jeuova waahn yu fi du.

18. A wa Jeuova mek wi nuo se im a-go du fi wi?

¹⁸ Afta Jeuova aarait wid di sitn dem we wi a du, im mek wi nuo se im a-go gi wi di sitn dem we wi a luk faawod fi get. An nuo se dis a-go apm fi chuu kaa Paal se: “Wi nuo se Gad a-go gi wi we im pramis, wi no afi wori. Wi no afi wori kaaz wi nuo se Gad lov wi. Im shuo wi umoch im lov wi wen im gi wi di Uoli Spirit.” (Ruo. 5:5) So yu kyan nuo fi shuor se yu a-go get di sitn dem we yu a luk faawod fi get.

19. Wa mek yu kyan nuo fi shuor se yu a-go get di sitn dem we yu a luk faawod fi get?

¹⁹ Tingk bout wa Jeuova did pramis Iebriyam an ou im did api wid di sitn dem we Iebriyam du, an ou im se Iebriyam a Im fren. Di Baibl mek wi nuo se: “Afta Iebriyam wiet ou lang an gwaan chos Gad, im get wa Gad pramis im.” (Iib. 6:15; 11:9, 18; Ruo. 4:20-22) Iebriyam did get di sitn dem we Gad pramis im. An a siem so yu kyan nuo fi shuor se ef yu gwaan du di sitn dem we Jeuova se yu fi du, yu a-go get di sitn dem we im pramis yu tu. Yu na’afi wori bout dat! (Ruo. 12:12) Paal se: “Mi prie se Gad, Gad we kaaz piipl fi luk fa an nuo fi shuor se dem wi get wa im pramis, mi prie se im wi gi unu piis iina unu aat an mek unu aat api, api kyaahn don kaaz unu biliiv iina im. Mi prie se im du dat, so dat di [uoli spirit wi kaaz unu muor an muor fi luk fi get di sitn dem we Gad pramis an nuo fi shuor se yu wi get dem.”​—Ruo. 15:13.