Yu did riid Di Wachtowa dem fi da ier ya gud? Wel si ef yu kyan ansa dem kwestiyan ya:

Wa it miin fi ‘mek Gad chienj di wie ou wi a tingk’?(Ruo. 12:2)

Dat no miin tu se wi kyan dis du som gud sitn an a it dat, nuo, wi afi luk iina wiself an si uu wi riili bi an si ef notn de de we wi afi chienj so dat wi kyan liv di wie ou Jeuova waahn wi fi liv.​—w23.01, p. 8-9.

Wen wi a luk pan wa a gwaan iina di worl, ou wi kyan shuo se wi naa tek it aan pan wiself fi fain out wen di worl a-go don?

Notn no rang fi chrai fi si wa di sitn dem we a gwaan iina di worl ya nou av fi du wid di sitn dem we di Baibl se wuda apm iina fi wi taim. Bot wi no fi tek it op pan wiself fi se wa it miin kaa dat kyan mek di kanggrigieshan plit op plit op. Wa wi fi du a kip op wid di sitn dem we Jeuova aaganaizieshan a gi wi, an a dem sitn de wi fi taak bout. (1 Kor. 1:10)​—w23.02, p. 16.

Ou di riizn we mek Jiizas baptaiz difrant fram som a di riizn dem we mek im falara dem baptaiz?

Jiizas neehn did afi gi im laif tu Gad an baptaiz kaa im did a wan Izrelait an di Izrelait piipl dem did bilang tu Gad. Jiizas did porfek, so im neehn av no sin fi ton we fram an fi beg Gad paadn fa.​—w23.03, p. 5.

Wa wi kyan du fi elp ada piipl fi put op dem an an ansa kwestiyan a di miitn dem?

Wi no fi chat tu moch so das ada piipl kyan ansa tu. An yu no fi gi aal a di ansa dem we de iina di paragraaf, kaa ef yu du dat yu naa go lef notn els fi sumadi els ansa.​—w23.04, p. 23.

Wa a “di Uoli Ruod” we Aizaiya 35:8 taak bout?

Di fos taim di Baibl taak bout da ruod ya, it did a taak bout di ruod we di Juu piipl dem did afi chravl pan fram Babilan fi go baka Jeruusilem we dem kom fram. Wol iip a ier bifuo 1919, som piipl did staat fi fiks op da ruod de wen dem staat fi put di Baibl iina difrant difrant langwij an fi du som ada tingz. Jeuova piipl dem a chravl pan da Uoli Ruod de an wi afi tan pan da ruod de kaa a dat a-go elp wi nou an iina di fyuucha wen Gad Kindom a-go bring aal a di blesn dem we Gad pramis wi.​—w23.05, p. 15-19.

A wich tuu uman Pravorbz chapta 9 did tel wi bout?

Pravorbz tel wi bout wan fu-fuul uman we ef wi fala ar an go roun ar, it a-go kaaz wi fi ded. An den it tel wi bout wan neda uman we waiz, we ef wi fala ar, wi a-go waiz an wi a-go du wa rait an wi a-go get fi liv fi eva. (Pr. 9:1, 6, 13, 18)​—w23.06, p. 22-24.

Di wie ou Jeuova diil wid Lat, ou dat mek wi si se im ombl an se im tek taim wid piipl an im kier bout dem?

Jeuova did tel Lat se im fi lef Sadam an go op iina di mountn dem. Bot Lat beg Jeuova fi im an im fambili go a Zowaar insted, an Jeuova lou im fi go de.​—w23.07, p. 21.

Wa wan waif kyan du ef ar ozban laik fi wach bluu muuvi an dem ting de?

Shi fi memba se shi no fi bliem arself. Wa shi fi du a tingk bout di sitn dem we shi kyan du we wi elp ar fi jraa niera an niera tu Jeuova. An shi fi riid bout som uman iina di Baibl we wen tingz did a bada dem an dem prie tu Jeuova, it mek dem fiil beta. An shi kyan elp ar ozban fi no du som a di ting dem we wuda kaaz im fi go dong da ruod de agen.​—w23.08, p. 14-17.

Wen sumadi tingk se wa wi biliiv no mek no sens an dem aks wi bout it, ou it kyan elp wi fi ansa dem iina wan jengkl an kain wie wen wi andastan wa mek dem fiil di wie ou dem fiil?

Wen sumadi aks wi wan kwestiyan bout wa wi biliiv iina, wi fi chrai an fain out wa mek dem aks wi di kwestiyan we dem aks. Dat a-go mek wi kyan ansa di kwestiyan iina wan nais wie.​—w23.09, p. 17.

Ou Mieri did get di chrent we shi niid, an wa wi kyan lorn fram dat?

Afta Mieri fain out se shi a-go bi di mada fi di Mesaiya, shi mek ada piipl elp ar so dat shi kuda get di chrent fi du di wok we shi get fi du. Giebrel an Ilizibet yuuz Gad Wod fi gi Mieri di chrent we shi did niid. Wi kyan get di chrent we wi niid fi go chuu fram wi breda an sista dem tu.​—w23.10, p. 15.

A ou Jeuova mait-a ansa wi prieya dem?

Jeuova luk pan wa di sitn dem we wi a aks fa av fi du wid wa im waahn fi apm. (Jer. 29:12) Tuu sumadi mait-a aks Jeuova fi di siem ting an im gi dem tuu difrant ansa, bot wi nuo se im aalwiez a-go di de fi wi.​—w23.11, p. 21-22.

Ruoman 5:2 taak bout di gud sitn dem we wi a-go get fram Gad, so wa mek dem taak bout it iina vors 4 agen?

Wen sumadi ier di gud nyuuz, dem mait-a staat fi luk faawod fi liv fi eva iina Paradais pan ort. Bot wen im staat fi go chuu wol iip a prablem an im eng aan an no gi op an im si se Gad api wid wa im a du, a da taim de di sitn dem we Gad pramis fi gi im a-go fiil riil tu im.​—w23.12, p. 12-13.