YOMARA an ar breda dem, we niem Marcelo an Hiver, liv iina wan likl plies we de iina Gwatemaala. Yomara did staat fi stodi di Baibl wid di Jeuova Witnis dem, an afta dat ar breda dem staat fi stodi tu. Bot wa apm a dat di chrii a dem blain an dem kudn riid briel, so di breda weehn a stodi di Baibl wid dem did afi riid di Baibl an di paragraaf dem iina di lesn.

Wan neda prablem a dat it did aad fi dem wan go a miitn, an a wuda 40 minit it wuda tek dem fi go a miitn. So wa di breda an sista dem du a saat out ou dem kyan kya dem go a di miitn dem. An wen dem staat fi gi taak a di miitn iina di wiik, di breda an sista dem elp dem fi memba wa dem fi se.

Iina Mie 2019, dem staat fi av miitn iina di ieriya we dem liv, an wan regila paiyanier ozban an waif muuv kom de tu. An da ozban an waif ya did se dem waahn fi tiich di chrii a dem ou fi riid an rait iina briel. So dem go a wan laibri fi get som buk fi lorn bout briel, an dem stodi an lorn ou fi tiich ada piipl fi riid an rait iina briel.

Iina kopl mont, di chrii a dem kuda riid iina briel, an dat did elp dem fi jraa kluosa tu Jeuova. a So rait ya nou, Yomara, Marcelo, an Hiver a regila paiyanier an Marcelo a wan ministiiriyal sorvant. An dem yuuz aal a di die dem iina di wiik fi du sitn fi Jeuova, an kaa a ou dem api a du it, it mek ada piipl waahn fi du nof fi Jeuova tu.

Di chrii a dem api an dem tangk Jeuova fi ou di breda an sista dem iina di kanggrigieshan shuo dem se dem lov dem. Yomara se: “Fram di fos taim di Jeuova Witnis dem kom taak tu wi, dem mek wi si se dem riili lov wi.” An Marcelo se: “Wi av som gud gud fren iina di kanggrigieshan, an wi a paat a Jeuova fambili we de aal uova di worl we lov dem wan aneda.” Yomara an ar breda dem kyaahn wiet fi di die wen dem a-go si di wol ort ton iina wan paradais.​—Sa. 37:10, 11; Aiz. 35:5.