1. Wa mek yu tangk Jeuova fi gi wi di Baibl?

 WI TANGK Jeuova fi gi wi im Wod di Baibl kaa wen wi riid it, it mek wi si ou wi kyan diil wid wi prablem dem. An it gi wi sitn gud fi luk faawod tu iina di fyuucha. Bot di bigis ting a se wen wi riid di Baibl wi get fi si di wiez dem we Jeuova av. An wen wi tingk bout di gud wiez dem we im av, it mek wi lov im muor an it mek wi an im ton gud gud fren.​—Sa. 25:14.

2. Wa a di difrant difrant wie we Jeuova did yuuz fi mek piipl nuo bout im?

² Iina taim gaan, Jeuova did mek piipl nuo bout im iina difrant difrant wie. Im jriim som a dem, an gi som a dem vijan, an im yuuz ienjel fi taak tu som a dem. (Nom. 12:6; Aks 10:3, 4) Bot ou wi wuda nuo aal a dem sitn ya we Jeuova waahn wi fi nuo ef Jeuova neehn mek dem ‘rait it iina wan buk’? (Jer. 30:2) Evriting we Jeuova du porfek, so dis mek wi nuo se wen Jeuova yuuz di Baibl fi mek wi nuo di ting dem we im waahn wi fi nuo, a di bes wie dat fi wi.​—Sa. 18:30.

3. Kaa wi av di Baibl tide, wa dat a tel wi bout Jeuova? (Aizaiya 40:8)

³ Riid Aizaiya 40:8. Di sitn dem we di Baibl did fos rait pan a sitn we kuda ratn an non a dem no de bout ya nou. Bot di sitn dem we rait dong iina di Baibl a elp piipl fram wie bak wen til nou fi du di sitn dem we Gad waahn dem fi du. A ou dat apm? Dat kuda apm kaa Jeuova did mek som uol iip a man rait uova di ting dem we did rait dong  iina di Baibl. An dem man de did chrai aad aad fi mek shuor se dem no mek no mistiek iina it aalduo dem neehn porfek. Sumadi we stodi nof an nuo nof bout di paat a di Baibl we rait iina Iibruu did rait se: “Yu av buk we de bout fram lang taim we piipl rait uova an tingz chienj op iina dem. Bot wi nuo fi shuor se a no dat apm tu di Baibl​—di siem ting we did iina it iina di fos plies a wa de iina it nou.” So aalduo a lang taim dem did rait di Baibl, an dem did rait it pan sitn we kuda ratn, an di man dem we rait it uova neehn porfek, wi nuo fi shuor se di sitn dem we iina it a wa Gad waahn wi fi nuo.

4. Wa wi a-go luk pan iina da lesn ya?

⁴ Di Baibl mek wi nuo se “evri gud sitn​—di sitn dem we no av notn bad bout dem,” kom fram Jeuova. (Jmz. 1:17) An di Baibl a wan a di bes sitn we Jeuova gi wi. An nof taim a wen sumadi gi wi sitn wi si umoch dem nuo wi an nuo wa wi niid. Wen wi tek di taim fi stodi di Baibl a siem so wi get fi si se Jeuova nuo wi an im nuo wa wi niid. Iina da lesn ya, wi a-go luk pan chrii a Jeuova wiez dem: wi a-go luk pan ou im waiz, ou im fier, an umoch im lov wi. Di fos ting wi a-go taak bout a ou Jeuova waiz.

5. Wa a wan neda ting bout di Baibl we mek wi nuo se Jeuova waiz?

⁵ Jeuova nuo se wi kudn mek it pan wi uon so im gi wi di Baibl fi mek wi waiz, an di sitn dem we rait dong iina di Baibl mek nof piipl chienj dem laif fi di beta. Wen Muoziz don rait di fos buk dem, im tel di Izrelait piipl dem se: “A no dis chat mi de chat kaa wen unu du di sitn dem we mi tel unu fi du, a dat a-go mek unu liv.” (Dyuu. 32:47) So di wan dem we du wa di Baibl se dem fi du, a dem wuda api an evriting we dem wuda du wuda wok out gud. (Sa. 1:2, 3) Wi nuo se di Baibl stil a elp piipl tide kaa wen wi go pan di jw.org websait an wi luk pan di paat we niem “Di Baibl Chienj Piipl Laif Fi Di Beta,” wi si som difrant difrant piipl we du wa di Baibl se, an dat elp dem fi chienj op dem laif fi di beta. So wi si se ‘Gad Wod a wok iina aal a unu we biliiv.’​—1 Tes. 2:13.

6. Wa mek wi kyan se di Baibl no komiin laik no ada buk?

⁶ Wi si se di Baibl no komiin laik no ada buk kaa wol iip a piipl we rait ada buk ded lef dem buk, an di sitn dem we dem rait iina dem buk na’av no yuus tu piipl afta a wail kaa tingz a no di siem laik wan taim. Bot yu si Jeuova, we gi wi di Baibl, nobadi no muor powaful dan im, an im a-go de ya fi eva an eva, im kyaahn ded. An im waiz muor dan evribadi els. An di sitn dem we rait dong iina Gad Wod stil av yuus tu wi rait ya nou, an no mata wen wi a liv it a-go aalwiez av yuus tu wi. An wen wi riid it an sidong an tingk bout wa wi a riid, a so Jeuova, di wan we gi wi di Baibl, a-go kyan yuuz im uoli spirit fi elp wi fi du wa im Wod tel wi fi du. (Sa. 119:27; Mal. 3:16; Iib. 4:12) Ye man, wi nuo se Jeuova wel waahn fi elp di wan dem we a riid im Wod. Dat shuda mek yu waahn fi riid di Baibl aafn.

7. Ou di Baibl mek Gad piipl fram lang taim wok tugeda az wan?

⁷ Wan neda riizn wa mek wi nuo se di sitn dem we iina Gad Wod mek wi nuo se im waiz a dat it mek im piipl wok tugeda az wan. Wen di Izrelait dem go liv iina di  Lan we Jeuova did pramis dem, dem did liv iina difrant difrant paat a di lan, an som a dem ton fishaman, som a dem riez kou, an som a dem ton faama we plaant tingz. So it wuda iizi fi dem fi figet bout di ada res a Izrelait dem we liv iina ada paat a di konchri. So kaa a dat, Jeuova mek di Izrelait dem kom tugeda difrant difrant taim so dat dem kyan ier sumadi a riid im Wod an get fi andastan wa it a se. (Dyuu. 31:10-13; Nii. 8:2, 8, 18) Dem mos did fiil gud wen dem kom a Jeruusilem an si di uol iip a miliyan a ada Izrelait we a worship Jeuova tu. A so Jeuova elp dem fi wok tugeda az wan. Afta dat, wen di Kristiyan dem did kom bout, som a dem did taak difrant difrant langwij, som a dem did kom fram difrant difrant plies, an som rich an som puor. Bot kaa dem lov di sitn dem iina Gad Wod, dem worship Gad tugeda. Di wan dem we staat fi worship Gad kuda onggl nuo wa Gad waahn dem fi du kaaz dem kom worship wid di wan dem we did a sorv im aredi.​—Aks 2:42; 8:30, 31.

8. Ou di Baibl a mek Jeuova piipl sorv im tugeda az wan?

⁸ Jeuova, wi Gad we waiz, no tap yuuz im Wod fi mek im piipl dem nuo wa dem fi du an fi mek dem wok tugeda az wan. An a das wai wi go a wi miitn dem, an wi sorkit miitn dem, an di kanvenshan dem  fi ier dem riid Gad Wod an taak bout it an mek wi nuo wa it miin. So di Baibl mek wi nuo wa Jeuova waahn im piipl dem fi du, im waahn wi fi “sorv [im] tugeda az wan.”​—Zef. 3:9.

9. Ou di wan dem we riid di Baibl fi stie so dat dem kyan andastan wa it a se? (Luuk 10:21)

⁹ Wan ada riizn wa mek wi se Jeuova waiz a das im mek di man dem rait di Baibl iina wan wie we a no di wan dem we tingk dem brait an av nof sens andastan it, bot a di wan dem we ombl an komiin laik likl pikni andastan it. (Riid Luuk 10:21.) No mata wich paat yu de yu kyan get di Baibl fi riid. Das wai wan man we stodi nof bout tingz se: “A no jos se nof muor piipl get fi riid di Baibl muor dan eni ada buk, bot di piipl dem we riid it mek shuor dem chrai fi get wa it a se.” Bot a di wan dem we riili ombl an komiin laik likl pikni a-go get wa it a se an du wa it a se.​—2 Kor. 3:15, 16.

10. Wa a wan neda ting bout di Baibl we mek wi nuo se Jeuova waiz?

¹⁰ Wan neda ting bout di Baibl we mek wi si se Jeuova riili waiz, a das iivn duo nof a wi sidong an a lorn fram it wan taim, evribadi kyan get sitn out a it fi demself tu. So wen wi riid di Baibl wi kyan si se Jeuova kier bout wi. (Aiz. 30:21) Laik som a di taim yu mait-a go chuu uol iip a prablem an yu riid sitn iina di Baibl an yu se, ‘Man, it komiin laik se dem did rait dis ya fi mi.’ Ye man, uol iip a miliyan a piipl kyan andastan di sitn dem we de iina di Baibl. Bot iivn duo di Baibl did rait fram lang taim, ou yu kyan stil fiil se di sitn dem we rait iina it a yu it rait dong fa? Yu kyan fiil so kaa nobadi no waiz laik di sumadi we gi wi di Baibl.​—2 Tim. 3:16, 17.

11. Wen Gad did mek di man dem rait di Baibl, wa im mek dem du we mek wi si se im no paashal?

¹¹ Wan neda ting bout Jeuova a dat im fier. (Dyuu. 32:4) Wen sumadi fier dem no paashal, an wi si se Jeuova no paashal. (Aks 10:34, 35; Ruo. 2:11) Wen wi luk pan di langwij dem we im mek dem rait di Baibl iina, wi si se im no paashal kaa muos a di fos 39 buk dem a di Baibl did rait iina di Iibruu langwij kaa a dat piipl kuda andastan dem taim de. Bot bai di taim di fos set a Kristiyan dem kom bout, muos a di piipl dem taim de did a taak iina Griik, so im mek dem rait muos a di laas 27 buk a di Baibl iina da langwij de. Nou a bout iet biliyan piipl de pan di ort an dem taak difrant difrant langwij. So ou aal a dem piipl ya we taak difrant difrant langwij kyan go get fi lorn bout Jeuova?

12. Ou wa Daniyel 12:4 se wuda apm a apm ya nou iina di laas die dem?

¹² Jeuova did yuuz Daniyel fi mek wi nuo se iina di laas die dem di “chuut . . . we de iina Gad Wod, uol iip a piipl a-go get fi nuo it.” (Riid Daniyel 12:4.) Wan ting we mek uol iip a piipl get fi nuo di chuut a dat di Baibl an di buk an pamplet dem rait iina wan langwij we dem kyan andastan. Yu na’av no ada buk iina di worl laik di Baibl we piipl kyan get iina dem uona langwij fi riid. Wen ada piipl rait uova di Baibl iina wan langwij we piipl kyan andastan an dem a sel it, a uol iip a moni dem sel it fa. Bot yu si Jeuova piipl, dem rait uova di uol a di Baibl ar paat a it iina muor dan 240 difrant langwij, an nobadi na’afi fi pie no moni fi it ef dem waahn it. An kaa a dat, piipl fram  aal uova di worl a get fi ier di “gud nyuuz . . . bout Gad Kindom” an a get fi du wa it se bifuo di worl don. (Mat. 24:14) Wi Gad we fier waahn uol iip a piipl fi riid di Baibl so dat dem kyan get fi nuo it. Dis a kaa im lov aal a wi.

13. Wa mek wi kyan se di ting dem we Jeuova put iina di Baibl mek wi si umoch im lov wi? (Jan 21:25)

¹³ Outa aal a di wiez dem we Jeuova av, di mien wan a im lov. (1 Jan 4:8) Wen wi luk pan di Baibl wi si se Jeuova lov wi kaa im no put muor tingz iina it dan wi kyan manij. Im put wa wi niid iina it so wi an im kyan ton gud gud fren an so dat wi kyan api nou an nuo wa wi fi du so dat wi kyan go liv fi eva.​—Riid Jan 21:25.

14. Wa a som ada sitn iina di Baibl we mek wi nuo se Jeuova lov wi?

¹⁴ Jeuova mek wi si umoch im lov wi iina di wie ou im taak tu wi iina di Baibl. Im shuo se im rispek wi kaa im no gi wi wan bag a ruul fi fala iina evriting we wi fi du iina wi laif. Insted-a dat, im mek wi lorn fram difrant difrant tingz we did apm tu piipl, an wi kyan riid bout tingz we im se a-go apm iina di fyuucha, an im tel wi ou fi du di rait ting dem we a-go elp wi. Aal a dem difrant ting ya mek wi lov Jeuova an mek wi du wa im se wi fi du.

15. (a) Ou Jeuova shuo se im kier bout di piipl dem we riid di Baibl? (b) Iina di picha, a wich sumadi iina di Baibl di likl gorl, di yong breda, an di sista we op iina iej a tingk bout? (Jen. 39:1, 10-12; 2 Ki. 5:1-3; Luuk 2:25-38)

¹⁵ Di Baibl mek wi nuo se Jeuova kier  bout wi nof nof kaa wen wi riid di Baibl, nof taim wi si piipl jos a taak bout ou dem fiil. Dat mek wi si se di piipl dem we di Baibl tel wi bout a “laik enibadi els,” dem tan jos laka wi. (Jmz. 5:17) Bot muor dan dat, wen wi si ou Jeuova diil wid di piipl we komiin laka wi, wi si se “im jengkl an gud an kain.”​—Jmz. 5:11.

16. Wen wi riid iina di Baibl bout piipl we did du sitn rang, wa dat tiich wi bout Jeuova? (Aizaiya 55:7)

¹⁶ Wan neda wie ou di Baibl mek wi si se Jeuova lov wi a dat it mek wi nuo se Jeuova naa go lef wi wen wi du sitn rang. Luk pan di Izrelait dem, dem did sin gens Jeuova uol iip a taim. An wen dem mek Jeuova si se dem sari fi wa dem du an dem ton we fram dem sin dem, Jeuova paadn dem. (Riid Aizaiya 55:7.) Di Kristiyan dem we did de bout iina Baibl taim did get fi nuo se Gad lov piipl tu. Kaa wen wan man did sin bad gens Gad an den im fiil sari fi wa im du an ton we fram im sin, Jeuova did mek Paal rait an tel di breda an sista dem “fi paadn im an kain tu im.” (2 Kor. 2:6, 7; 1 Kor. 5:1-5) An it nais fi nuo se kaa sumadi sin gens Jeuova it no miin tu se im a-go don wid dem, bot wa im a-go du a chrai fi elp dem, an mek dem nuo di rait sitn dem we fi du, an im a-go beg dem fi kom bak tu im. An a dat im a-go du fi evribadi iina fi wi taim we ton we fram dem sin dem.​—Jmz. 4:8-10.

17. Wa mek wi se di Baibl a wan gud sitn we Jeuova gi wi?

¹⁷ Di Baibl a wan nais sitn we Jeuova gi wi. Wa mek wi se so? Wi se so kaa iina it wi si ou Jeuova waiz, an ou im fier, an ou im lov wi. An im mek wi si se im waahn wi fi nuo im so dat wi kyan ton im fren.

18. Wa wi fi du fi mek Jeuova si se wi tangk im fi di Baibl?

¹⁸ Sins di Baibl a wan “gud sitn” we Jeuova gi wi, wi fi mek im si se wi tangk im fi it. (Jmz. 1:17) An wi no fi tap mek im si se wi tangk im fi it. Wi kyan du dat wen wi prie bifuo wi riid di Baibl an tingk bout di sitn dem we wi riid iina it. An wen wi du dat, Jeuova, we gi wi di Baibl, a-go mek shuor se im bles wi an wi “a-go get fi nuo bout [im].”​—Pr. 2:5.