1. A ou wi nuo se Gad Wod did miin nof tu Jiizas?

 YU EVA tingk ou it wuda nais fi jos sidong an a lisn tu Jiizas a tiich piipl? Wi si se Jiizas did a se tingz we did rait dong iina Gad Wod aredi. Wi nuo se dat a chuu kaa wi si dis wen wi luk pan di fos set a wod dem we im did se afta im baptaiz we rait dong iina Gad Wod an di laas wod dem we im se bifuo im ded. b (Dyuu. 8:3; Sa. 31:5; Luuk 4:4; 23:46) So wi si se fram di taim Jiizas did baptaiz til di taim im ded im did a riid Gad Wod infronta piipl ar im wuda tel dem sitn we it se an mek dem nuo wa it miin.​—Mat. 5:17, 18, 21, 22, 27, 28; Luuk 4:16-20.

2. Fram Jiizas did a pikni til im get big, wa did elp im fi nuo di sitn dem we iina Gad Wod gud? (Luk pan di picha pan di kova.)

² A wol iip a ier Jiizas did a ier piipl riid Gad Wod an a riid it fi imself tu. Wen im de a im yaad, im wuda a ier im mada Mieri an im stepfaada we niem Juozif a se tingz we iina Gad Wod wen dem a taak tu dem wan aneda. c (Dyuu. 6:6, 7) An wi nuo se evri Sabat Jiizas wuda go a di Juu dem choch wid im fambili dem. (Luuk 4:16) An wi nuo se wen im did de de im did a lisn gud tu wa Gad Wod se. An im get fi kyan riid it fi imself tu, an a das wai im get fi nuo wa it a se. An a so kom im did get fi nuo Gad Wod so dat im kuda lov it an du di ting dem we it se. Laik wen im did  a jos 12 an im did iina Gad ous, di tiicha dem “kudn biliiv di wie ou im ansa kwestiyan an di sitn dem we im andastan.”​—Luuk 2:46, 47, 52.

3. Wa wi a-go luk pan iina da lesn ya?

³ Wen wi luk pan wa Jiizas did se tu di Farisii dem we did a riid Gad Wod nof, it a-go elp wi fi si ou wi kyan get muor outa it wen wi a riid Gad Wod evridie. Jiizas did tel dem chrii sitn we dem did fi a du so dat dem kuda get muor outa Gad Wod, an wen wi du dem sitn de it a-go elp wi fi nuo Gad Wod so dat wi kyan lov it. Di sitn dem we im tel dem kyan elp wi fi (1) get we di Baibl a se wen wi a riid it, (2) fain di preshos ting dem we de iina Gad Wod, an (3) mek di ting dem we wi a riid elp wi fi chienj op wi laif.

4. Wen it kom aan tu Gad Wod, wa Luuk 10:25-29 mek wi nuo?

⁴ It naa go elp wi ef wi a riid Gad Wod an naa get wa it a se. Wi si dat fram wa Jiizas did se tu “wan Laa tiicha.” (Riid Luuk 10:25-29.) Wen di man aks Jiizas wa im fi du fi liv fi eva, Jiizas aks im se: “Wa di Laa se? Wa yu get fram it?” Di man kuda tel Jiizas wa Gad Wod se, se im fi lov Gad an lov im nieba tu. (Liv. 19:18; Dyuu. 6:5) Bot den im go aks Jiizas se: “So, a uu a mi nieba?” Dat mek wi si se im neehn get wa im did a riid. An kaa a dat, im wudn nuo ou fi du di sitn dem we di Baibl se im fi du.

5. Ou wen wi prie bifuo wi riid di Baibl an no riid it tuu faas it kyan elp wi get wa it a se?

⁵ Si som sitn ya we wi fi du wen wi a riid Gad Wod so dat wi kyan get wa it a se. Fos ting, bifuo wi staat fi riid wi fi prie. Wi du dis kaa Jeuova a-go elp wi fi get wa it a se. So wi fi aks im fi im uoli spirit fi elp wi so dat wi main no chrie wen wi a riid. Wan neda ting we kyan elp wi fi get wa wi a riid se a das wen wi a riid wi no fi riid tuu faas. Wen yu a riid di Baibl yu kyan get muor outa wa yu a riid wen yu ier wa yu a riid se. So wa yu kyan du wen yu a riid di Baibl a riid loud ar yu kyan lisn tu di Baibl rekaadin an fala iina yu Baibl. Wen yu du dat, it a-go muor komiin laik se yu de de, yu a ier di piipl dem vais, yu a si dem, an yu kyan fiil wa dem a go chuu. (Jash. 1:8) An wen yu don riid, yu fi memba fi prie agen an tangk Jeuova fi gi wi im Wod di Baibl an fi elp yu fi du di ting dem we yu a riid.

6. Wa mek wen yu a riid Gad Wod it kyan elp yu wen yu aks yuself som kwestiyan, an wa mek it kyan elp yu wen yu rait dong sitn bout wa yu riid? (Luk pan di picha tu.)

⁶ Si tuu muor sitn ya we yu kyan du fi riili get wa di Baibl a se. Di fos ting yu kyan du a aks yuself som kwestiyan bout wa yu a riid. Wen yu a riid wan tuori iina di Baibl, yu kyan aks yuself dem kwestiyan ya: ‘A uu an uu it riili a tel mi bout? Laik mi nuo a uu a taak, an uu dem a taak tu, an wa mek dem a se wa dem a se? A wich paat dem de a du wa dem a du?’ Wen yu aks yuself dem kwestiyan ya it a-go elp yu fi get wa di paat a di Baibl we yu a riid a se. Di sekan ting we yu kyan du a rait dong som likl sitn bout wa yu a riid. Wen yu riid sitn an yu rait it dong, it  mek yu tingk bout it muor, an it mek yu get wa it a se muor, an it mek it iiziya fi yu memba it. Wan neda ting we yu kyan du a rait dong som kwestiyan we yu waahn di ansa fa, an wen yu sorch an get di ansa fi dem, rait it dong. Afta dat, rait dong wan likl sitn bout wa yu jos lorn, an yu kyan rait bout ou yu fiil bout di sitn dem we yu a lorn ar ou yu kyan du dem. Wen yu du aal a dem sitn ya, it wi mek yu fiil laik se di sitn dem we de iina Gad Wod​—a yu dem de de fa.

7. Wen wi a riid di Baibl, wa wi fi mek shuor se wi du an wa mek? (Matyu 24:15)

⁷ Jiizas mek wi nuo se fi andastan di sitn dem we wi riid iina Gad Wod wi afi nuo ou fi luk pan tingz. (Riid Matyu 24:15.) Wen wi nuo ou fi luk pan tingz, it miin se wi andastan wa wi a lorn an wa it av fi du wid wa wi nuo aredi, an wi si ou wa wi a lorn difrant fram sitn els we wi nuo aredi. An it a-go elp wi fi andastan an pik op tingz we it no iizi fi si jos so. An Jiizas did mek wi nuo se wi afi andastan an si ou di sitn dem we di Baibl se wuda apm apm. Wa wi riid iina di Baibl kyaahn go elp wi ef wi no andastan wa it a se.

8. Wa wi fi du wen wi a riid di Baibl so dat wi kyan get wa it a se?

⁸ Jeuova mek di wan dem we a sorv im kyan andastan tingz. So wi fi prie tu im fi elp wi fi andastan tingz. (Pr. 2:6) Yu kyan gi Jeuova sitn fi bles wen yu riid sitn an yu tingk bout it, an chrai fi si ou wa yu riid av fi du wid ada tingz we yu nuo. Wan a di ting dem we kyan elp yu fi stodi a di Research Guide for Jehovah’s Witnesses. Wen yu yuuz dem sitn ya fi stodi, dem kyan elp yu fi andastan wa di Baibl a se so dat yu kyan nuo ou fi du di  rait ting. (Iib. 5:14) Wen yu riid an nuo ou fi luk pan tingz, yu a-go andastan wa di Baibl a se muor an muor.

9. Wa Gad Wod tiich bout ded piipl we di Sadyusii dem neehn a get?

⁹ Di Sadyusii dem did nuo di fos faiv buk dem a di paat a di Baibl we rait iina Iibruu, bot dem neehn get wa it a se. Laik wen dem did a taak tu Jiizas an waahn mek it luk laik se ded piipl naa go kom bak alaiv, Jiizas aks dem se: “Unu neva riid wa Muoziz rait dong iina di paat bout di bush ou Gad se, ‘Mi a Iebriyam Gad, Aizak Gad, an Jiekob Gad’?” (Maak 12:18, 26) Aalduo di Sadyusii dem did riid da paat ya a di Baibl nof taim, di kwestiyan we Jiizas aks dem shuo dem op se dem neehn a get wa Gad Wod a se bout ou ded piipl a-go kom bak alaiv.​—Maak 12:27; Luuk 20:38. d

10. Wa wi fi mek shuor se wi a du wen wi a riid Gad Wod?

¹⁰ Wa aal a dis a tiich wi se? It a tiich wi se wen wi a riid di Baibl wi fi mek shuor se wi a chrai fi get aal a wa di vors we wi a riid a se ar aal a wa di tuori de tiich wi. Wi no fi onggl chrai fi get di chuut dem we iizi fi lorn, bot wi fi chrai an lorn di wan dem we no so iizi we wi afi wok aada fi get.

11. Wen yu tingk bout di fuor sitn dem we 2 Timoti 3:16, 17 taak bout, ou dem kyan elp yu fi fain di preshos ting dem we de iina di Baibl?

¹¹ Ou wi kyan fain di preshos ting dem we de iina Gad Wod? Wi kyan get di ansa wen wi luk pan 2 Timoti 3:16, 17. (Riid.) It tel wi se: “Evri wod we de iina Gad Wod . . . gud” fi (1) tiich piipl, (2) put piipl iina dem plies, (3) karek piipl, an (4) tiich piipl ou fi liv rait. So wen yu a riid di Baibl luk fi wa it a tiich yu se bout Jeuova an di ting dem we im a-go du fi wi, an luk fi si di ting dem we im waahn wi fi du. An luk ou it kyan elp fi put piipl iina dem plies. So dat miin tu se wen yu a riid yu fi luk fi di vors dem we kyan elp yu fi si di doti wiez dem we yu av so dat yu kyan get rid a dem an gwaan du wa Jeuova waahn yu fi du. An si ou wa yu a riid kyan elp yu fi karek piipl. Yu kyan tingk bout ou wan vors kyan elp yu laik wen yu de a sorvis an sumadi se sitn we no go so. An chrai fi si ou it kyan tiich yu ou fi liv rait an ou it kyan elp yu fi tingk di wie ou Jeuova waahn yu fi tingk. Wen yu tingk bout dem fuor sitn ya wen yu a riid di Baibl, dem a-go elp yu fi fain di preshos ting dem we de iina di Baibl aal wen yu a riid som buk iina di Baibl we yu no riid aafn.

12. Wa mek Jiizas did aks di Farisii dem se, “Unu no riid?”

¹² Fi shuo se di Farisii dem neehn did a get wa dem a riid se, Jiizas did aal aks dem se, “Unu no riid?” (Mat. 12:1-7) e Wen Jiizas did se so, di Farisii dem did a se Jiizas falara dem did a brok di Sabat. So fi mek dem si se dem neehn did a riili get wa dem did a riid se bout di Sabat, Jiizas tel dem bout tuu tuori we de iina di Baibl an bout wan skripcha we de iina Oziya fi mek dem si se wen dem a kip di Sabat a no dem sitn de dem fi a luk pan, dem fi gud an kain tu piipl. Wa mek aalduo dem man ya did a riid Gad Wod dem stil neehn a get wa it a se? Dis a kaa wen dem did a riid it, dem did onggl a riid it fi fain faalt wid it so dem kudn get wa it a se.​—Mat. 23:23; Jan 5:39, 40.

13. Wa kain-a wiez wi fi av wen wi a riid di Baibl, an wa mek?

¹³ Wen wi luk pan wa Jiizas did se, it mek wi si se wen wi a riid di Baibl wi no fi komiin laik di Farisii dem, bot wen wi a riid it wi fi “ombl [wiself] an tek iin di mesij we Gad put iina [wi] aat.” (Jmz. 1:21) So ef wi riili waahn fi get wa di Baibl a tiich wi bout ou fi gud an kain, an ou fi fiil it fi piipl, an ou wi kyan du tingz fi mek piipl si se wi lov dem, wi afi ombl wen wi a riid it.

14. Ou wi kyan nuo ef wi a mek di Baibl elp wi fi chienj op wi laif? (Luk pan di picha dem tu.)

¹⁴ Wan gud wie fi nuo ef wi a mek wa wi a riid iina Gad Wod chienj op wi laif a fi luk pan di wie ou wi chriit ada piipl. Di  Farisii dem neehn mek di sitn dem iina Gad Wod riich dem aat, so kaa a dat, dem “rait aaf piipl we no du notn rang an gwaan laik se dem a sina.” (Mat. 12:7) A siem so ou wi chriit ada piipl shuo wa a gwaan iina wi aat an ef wi a mek Gad Wod chienj wi. So wi kyan aks wiself, ‘Mi lov fi chat gud sitn bout piipl ar a onggl bad sitn mi lov fi chat bout dem? An wen sumadi du mi sitn, mi kwik fi paadn dem ar mi av dem op iina mi aat?’ Wen wi aks wiself dem kwestiyan ya, dem wi mek wi si wa a gwaan iina wi aat, an dem wi mek wi si ef wi riili a mek di sitn dem we de iina Gad Wod a chienj op di wie ou wi tingk an di wie ou wi fiil bout tingz an di ting dem we wi a du.​—1 Tim. 4:12, 15; Iib. 4:12.

15. Ou Jiizas did fiil bout Gad Wod?

¹⁵ Saam 40:8 tel wi ou Jiizas did fiil bout Gad Wod, it se: “Uo Gad, mi wel api fi du wa yu waahn mi fi du, an yu laa de diip dong iina mi aat.” Kaa Jiizas did lov Gad Wod, it did mek im api an it mek im kuda du wa Jeuova waahn im fi du. A siem so wi kyan api rait ya nou an tingz wi wok out gud fi wi ef wi mek Gad Wod riich diip dong iina wi aat.​—Sa. 1:1-3.

16. Wa yu plan fi du fi get muor outa di Baibl wen yu a riid it? (Luk pan di paat we niem “ Di Sitn Dem We Jiizas Se Kyan Elp Yu Fi Andastan Wa Yu A Riid Iina Di Baibl.”)

¹⁶ Jos laik Jiizas, wi kyan get nof outa di Baibl wen wi a riid it an wen wi du dem sitn ya: Bifuo wi staat riid wi fi prie, an wi no fi riid it tuu faas niida, an wi fi aks wiself som kwestiyan wen wi a riid it, an wi fi rait dong di sitn dem we wi lorn, an wi fi yuuz di buk an pamplet dem fi elp wi fi get fi nuo wa wi a riid iina di Baibl. Iivn wen wi a riid som paat iina di Baibl we wi no riid aafn, wi fi chrai fi fain di preshos sitn dem we de iina dem paat de tu. An wen wi a riid di Baibl wi fi ombl, wi no fi de chrai fain faalt wid it, da wie de di Baibl a-go elp wi fi chienj op wi laif. An wen wi du aal a dem sitn ya wi a-go jraa niera an niera tu wi Gad Jeuova.​—Sa. 119:17, 18; Jmz. 4:8.