1. Tel wi wa mek wi fi fala di wie we Jeuova a shuo wi fi go.

 TINGK bout dis: Yu a klaim op wan mountn we yu kyan jrap aaf ef yu no nuo wa yu a du, an it ful op a uol iip a makabush an kouwij an faati-leg an dem sitn de. Yu wuda fiil gud fi nuo se sumadi di de wid yu we kyan mek yu nuo wich paat fi waak so das yu no jrap aaf a di mountn ar waak go iina di kouwij an di makabush, no chuu? A siem so da worl ya we wi a liv iina komiin laik da mountn de, it av uol iip a sitn iina it we kyan ort wi an mek wi tap sorv Jeuova di rait wie. Bot wi no afi wori, kaa Jeuova di de fi shuo wi we wi fi go. Im a-go shuo wi di wie we wi fi go so dat wi no get ort an we a-go mek wi riich di nyuu worl an liv fi eva.

2. A ou Jeuova a shuo wi di rait wie fi go?

² Di mien ting we Jeuova a yuuz fi shuo wi we fi go a im Wod di Baibl. Bot im a yuuz som ada wie tu fi shuo wi di rait wie fi go. Laik im a yuuz “di waiz sorvant” we a gi wi uol iip a tingz laik wi buk an pamplet dem we mek wi nuo wa wi fi du wen wi a sorv Jeuova. (Mat. 24:45) An Jeuova aal yuuz som ada man tu fi shuo wi di rait wie fi go, laik di sorkit uovasiya dem an di elda dem. Dem man ya push wi fi gwaan sorv Jeuova an tel wi tingz we kyan elp wi wen wi a go chuu som rof taim. Wi tangk Jeuova fi aal a di elp we im gi wi iina dem laas die ya. It mek wi a gwaan du di ting dem we a-go mek Jeuova api wid wi so das wi kyan api nou an fi eva.

3. Wa a di chrii sitn dem wi a-go luk pan iina da lesn ya?

³ Aalduo wi nuo se Jeuova a shuo wi di rait wie fi go, a no aal di taim wi fain it iizi fi du wa im se wi fi du, wos wen im  yuuz di man dem we no porfek fi tel wi wa fi du. Kaa som a di taim di sitn dem we dem tel wi fi du a sitn we wi no laik fi du. Ar wi mait fiil se wa dem tel wi fi du no mek sens. So wi fiil se wa dem tel wi fi du a no Jeuova it a kom fram. Bot a wen wi fiil dem wie ya wi niid fi nuo fi shuor se a Jeuova a shuo wi di rait wie fi go, an se wen im tel wi wa wi fi du, a it a-go mek tingz wok out gud fi wi. Iina da lesn ya, wi a-go luk pan dem chrii sitn ya: (1) Di wie ou Jeuova shuo im piipl dem di rait wie fi go iina di taim wen di Baibl did a rait, (2) a ou Jeuova a shuo wi di rait wie fi go nou, an (3) a ou it a-go du wi gud wen wi gwaan mek Jeuova shuo wi di rait wie fi go.

OU JEUOVA DID SHUO DI IZRELAIT DEM DI RAIT WIE FI GO?

4-5. Wa Jeuova did du fi shuo di Izrelait dem se a Muoziz im did a yuuz fi shuo dem di rait wie fi go? (Luk pan di picha.)

⁴ A Muoziz Jeuova did pik fi liid di Izrelait dem outa Iijip, an Jeuova did shuo di Izrelait dem se a Im a mek Muoziz nuo wa fi du. Laik a die taim, Jeuova wuda mek di Izrelait dem si wan kloud we op iina di ier laik wan puos. An iina di nait, dem wuda si di faiya op iina di ier we luk laik wan puos. (Ek. 13:21) An a it Muoziz did fala wen im did liid di Izrelait dem go a di Red Sii. Bot wen di piipl dem riich a di Red Sii, dem staat fi wori-wori op demself kaa dem did si se di Iijipshan aami did a ron dem dong an dem neehn av no we els fi go. So dem did fiil se Muoziz neehn nuo wa im a du wen im kyari dem go a di Red Sii. Bot notn neehn go so. A Jeuova did mek Muoziz liid im piipl dem go de-so. (Ek. 14:2) An Jeuova siev dem iina wan wie we nobadi neehn de ekspek.​—Ek. 14:26-28.

⁵ Fi di neks 40 ier, a di kloud Muoziz did yuuz fi nuo di rait wie we Jeuova did waahn im piipl dem fi go iina di wildanes. a An som a di taim, Jeuova did put di kloud uova Muoziz tent so evribadi kuda si’it. (Ek. 33:7, 9, 10) An a outa da kloud de Jeuova did taak tu Muoziz, an den Muoziz wuda mek di piipl dem nuo wa Jeuova waahn dem fi du. (Sa. 99:7) So di Izrelait dem kuda si klier klier se a Muoziz Jeuova did a yuuz fi shuo im piipl dem di rait wie fi go.

6. Wa di Izrelait dem did du wen Jeuova did a tel dem di rait wie fi go? (Nombaz 14:2, 10, 11)

⁶ Wid aal a wa Jeuova du fi shuo di Izrelait dem se im did a yuuz Muoziz fi liid im piipl dem, nof a dem stil neehn lisn wa Muoziz did a tel dem fi du. (Riid Nombaz 14:2, 10, 11.) An uova an uova agen, dem did shuo se dem neehn biliiv se a Muoziz Jeuova did a yuuz fi liid dem. An kaaz a dat, Jeuova neva mek non a dem piipl de get fi go iina di Lan we im did pramis dem.​—Nom. 14:30.

7. Tel wi bout som piipl we did du wa Jeuova tel dem fi du. (Nombaz 14:24) (Luk pan di picha tu.)

⁷ Bot som a di Izrelait dem did fala di rait wie we Jeuova did a shuo dem fi go. Laik Jeuova did se Kieleb did a fala im wid di wol a im aat. (Riid Nombaz 14:24.) An kaaz a dis, Gad did bles Kieleb an gi im di paat a di lan we im did waahn iina Kienan. (Jash. 14:12-14) An di Izrelait dem we did get fi go iina di Lan we Gad pramis dem did shuo se dem did redi fi lisn wen Jeuova tel dem wa fi du, kaa wen Jeuova did pik Jashwa fi tek uova afta Muoziz, di Izrelait dem did shuo se dem rispek Jashwa fi di wol a im laif. (Jash. 4:14) An kaaz a dat, Jeuova bles dem an mek dem get fi liv iina di Lan we im did pramis dem.​—Jash. 21:43, 44.

8. Iina di taim wen a di king dem did a ruul, tel wi ou Jeuova did shuo im piipl dem di rait wie fi go. (Luk pan di picha tu.)

 ⁸ Wol iip a ier afta dat, Jeuova gi im piipl dem som joj fi mek dem nuo wa fi du. An afta dat, wen di king dem did a ruul, Jeuova did pik som prafit fi mek im piipl dem nuo wa fi du. Di king dem we did waahn fi du wa Jeuova tel dem fi du did lisn tu di prafit dem. Laik yu did av Dievid we did a wan king. Im did ombl, an wen di prafit Nietan tel im se wa im a du rang, im lisn tu im. (2 Sam. 12:7, 13; 1 Kr. 17:3, 4) An Jeyoshafat, we did a king, did lou di prafit we niem Ja’aziyel fi mek im nuo di rait ting fi du, an Jeyoshafat push di piipl dem iina Juuda fi chos iina Gad prafit dem. (2 Kr. 20:14, 15, 20) An wen tingz did a bada di king we niem Ezikaiya, im mek di prafit we niem Aizaiya elp im. (Aiz. 37:1-6) Yu si evritaim wen di king dem du wa Jeuova se dem fi du, dem get uol iip a blesn, an Jeuova mek shuor se notn no apm tu di piipl dem. (2 Kr. 20:29, 30; 32:22) Evribadi shuda si se a Jeuova a yuuz di prafit dem fi mek dem nuo wa fi du. Bot nof a di king dem an di piipl dem neehn lisn tu Jeuova prafit dem.​—Jer. 35:12-15.

A OU JEUOVA DID SHUO DI KRISTIYAN DEM IINA BAIBL TAIM DI RAIT WIE FI GO?

9. A uu Jeuova did yuuz fi mek di Kristiyan dem iina Baibl taim nuo di rait wie fi go? (Luk pan di picha tu.)

⁹ Afta Jiizas did kom bak alaiv an gaan a evn, Jeuova did mek di Kristiyan kanggrigieshan, an im pik Jiizas fi bi di ed a di kanggrigieshan fi mek di Kristiyan dem nuo di rait wie fi go. (Ifii. 5:23) Bot a no laik se Jiizas did tel im difrant difrant falara dem wa fi du. Wa im du a yuuz di apasl dem, an di man dem we chrang iina wa dem biliiv iina we iina Jeruusilem fi mek di res a di breda an sista dem iina di kanggrigieshan nuo wa fi du. (Aks 15:1, 2) An dem pik di elda dem fi shuo di kanggrigieshan dem di rait wie fi go tu.​—1 Tes. 5:12; Taitos 1:5.

10. (a) Wa uol iip a di Kristiyan dem dem taim de did redi fi du? (Aks 15:30, 31) (b) Wa mek som a di piipl dem dem taim de neehn lisn tu di wan dem we dem si se Jeuova did a yuuz fi liid dem? (Luk pan di paat we niem  “Wa Mek Som A Di Piipl Dem Neehn Lisn Tu Di Wan Dem We Dem Si Se Jeuova Did A Yuuz Fi Liid Dem?”)

¹⁰ Wol iip a di Kristiyan dem dem taim de  did redi fi du wa di wan dem we a liid dem tel dem fi du. Matarafak, “di piipl did api kaaz it elp bil dem op iina wa dem biliiv.” (Riid Aks 15:30, 31.) Bot a ou Jeuova a mek im piipl dem nuo di rait wie fi go iina fi wi taim?

A OU JEUOVA A MEK SHUOR WI NUO DI RAIT WIE FI GO NOU?

11. Tel wi wan riizn wa mek yu se Jeuova stil a mek im piipl dem nuo di rait wie fi go.

¹¹ Iina fi wi taim, Jeuova stil a mek im piipl dem nuo di rait wie fi go, an im a yuuz im Wod an im Son, uu a di ed a di kanggrigieshan, fi dwi’it. An wi kyan si se im stil a yuuz som man pan ort fi mek wi nuo wa fi du. Laik luk pan wa did apm afta di ier 1870, wen Charles Taze Russell an som ada man we did a wok wid im did si se sitn big wuda apm iina 1914​—dat a se Gad Kindom govament wuda staat fi ruul. (Dan. 4:25, 26) Dem did get fi nuo dis kaaz a tingz we di Baibl se wuda apm, an wi nuo se Jeuova did mek dem si dis kaa tingz apm iina 1914 we shuo se Gad Kindom govament did staat fi ruul. Laik yu did av Worl Waar 1, an aal kain-a siknis did a kil aaf piipl, wi did staat fi av wol iip a ortkwiek, an fuud did staat get shaat. (Luuk 21:10, 11) Wi si se Jeuova did riili a yuuz dem man de fi mek im piipl dem nuo di rait ting fi du.

12-13. Wa a som skuul we di breda dem did put aan wen Worl Waar 2 did a gwaan fi mek di breda an sista dem priich an tiich muor?

¹² An tingk bout wa did apm wen Worl Waar 2 did a gwaan. Afta di breda dem a di worl ed afis luk gud pan wa Revilieshan 17:8 a se, dem riyalaiz se Aamagedan naa go kom rait afta Worl Waar 2. Bot afta di waar, yu a-go av wan taim wen tingz a-go kain-a aarait an it wuda mek di breda an sista dem kyan du nof nof muo iina di priichin wok. An so dem staat wan skuul we dem kaal di Watchtower Bible College (School) of Gilead fi tiich som breda an sista fi ton mishineri so dat dem kyan go priich an tiich piipl aal uova di worl. Dem did a sen out som a di mishineri dem wen di waar did a gwaan, an aal a wa dem did a du mait-a luk laik se it neehn mek no sens dem taim de. Pan tap a dat, di waiz sorvant did staat op wan skuul iina di kanggrigieshan dem we did niem  Course in Theocratic Ministry b fi tiich di breda an sista dem fi priich an tiich beta. So wi si se dem did a redi op di breda an sista dem fi du di big priichin wok we wuda a gwaan.

¹³ Wi kyan si se Jeuova did a shuo im piipl dem di rait wie fi go iina dem taim de wen tingz did aad bad. Afta Worl Waar 2, Jeuova piipl kuda priich iina piis bout im iina nof konchri. Matarafak, wi si se a uol iip a piipl get fi nuo Jeuova kaaz a di priichin wok we a gwaan aal uova di worl.

14. Wa mek wi kyan nuo fi shuor se di sitn dem we Jeuova aaganaizieshan an di elda dem tel wi fi du a di rait ting? (Revilieshan 2:1) (Luk pan di picha tu.)

¹⁴ Di breda dem we de pan di Govanin Badi stil a mek Jiizas Krais shuo dem di rait wie fi go. Dem waahn fi mek shuor se eniting dem tel di breda an sista dem fi du a wa Jeuova waahn dem fi du. Di sorkit uovasiya dem an di elda dem mek di breda an sista dem iina di kanggrigieshan dem nuo di rait wie fi go. c Di elda dem we get pik iina Jiizas Krais “rait an.” (Riid Revilieshan 2:1.) Dat no miin tu se dem porfek. Muoziz an Jashwa did mek mistiek som a di taim. (Nom. 20:12; Jash. 9:14, 15; Ruo. 3:23) Bot Jiizas Krais stil a mek di waiz sorvant an di elda dem nuo di rait wie fi go, an im naa go tap dwi’it “til taim don.” (Mat. 28:20) So wi fi aalwiez chos di wan dem we get pik fi tel wi di rait wie fi go.

IT A-GO DU WI GUD WEN WI GWAAN MEK JEUOVA SHUO WI DI RAIT WIE FI GO

15-16. Wa wi lorn fram dem breda an sista ya we did mek Jeuova shuo dem di rait wie fi go?

¹⁵ Wen wi go di rait wie we Jeuova a shuo wi fi go, wi a-go get nof blesn. Laik Andy an Robyn did du wa di Baibl se an satisfai wid wa dem av. (Iib. 13:5.) An dis mek dem kuda yuuz nof a dem taim fi elp fi bil Kindom Aal an dem ting de. Robyn se: “Som a di taim, wi liv iina som likl plies, aal som plies we no av no kichin. An mi did lov fi tek picha, so mi baal wen mi did afi sel di sitn dem we mi yuuz fi tek picha. Bot jos laik Iebriyam waif, Siera, mi mek op mi main se mi naa go bak tu dem sitn de.” (Iib. 11:15) Wa a som a di blesn dem we dem get kaa dem did redi fi gi op dem sitn ya?  Robyn se: “Wi fiil gud fi nuo se wi a gi Jeuova evriting we wi av. Yu si wen wi du Jeuova wok, wi get fi si ou laif a-go stie iina di nyuu worl.” An Andy se: “Ye man, wi fiil gud fi yuuz di wol a wi taim an evriting we wi av fi wok fi Gad Kindom govament.”

¹⁶ Wen wi fala di rait wie we Jeuova a shuo wi fi go, a ou it kyan elp wi tu? Som breda an sista did elp wan sista we niem Marcia fi si se di bes ting shi kyan du afta shi lef ai skuul a fi paiyanier, an a dat shi did plan fi du. (Mat. 6:33; Ruo. 12:11) Shi se: “Dem se dem wuda pie fi mi ga’a yuunivorsiti fi fuor ier, bot mi did waahn fi du muo fi Jeuova. So mi mek op mi main se mi wuda go a wan skuul we tiich chried an lorn wan chried we wuda mek mi av likl moni fi tek kier a miself fi du Jeuova wok. A di bes ting mi kuda eva mek op mi main fi du. Mi a wan regila paiyanier ya nou, an di wok we mi a du mek mi kyan elp out a Betel som a di taim an get fi du som ada nais tingz fi Jeuova.”

17. Kaa wi a fala di wie we Jeuova se wi fi go, wa a som ada gud sitn it du fi wi? (Aizaiya 48:17, 18)

¹⁷ Muo taim Jeuova aaganaizieshan tel wi tingz we kyan kip wi outa chobl, laik fi no lov moni an dem ting de, an it elp wi fi no du ada tingz we Jeuova no waahn wi fi du. Wen wi no du dem sitn ya, it mek wi kanchens no bada wi, an it mek wi no av sortn kain-a schres iina wi laif we wi no afi av. (1 Tim. 6:9, 10) So dis mek wi kyan sorv Jeuova wid aal a wi aat, an dat a-go mek wi api bad an av piis iina wi aat an main.​—Riid Aizaiya 48:17, 18.

18. Wa mek yu a-go mek Jeuova shuo yu di rait wie fi go no mata wa?

¹⁸ Iina di wos sofarieshan chriet op tu di taim wen Jiizas a ruul iina di Touzn Ier, Jeuova a-go gwaan yuuz di breda dem fi tel wi di rait wie fi go. (Sa. 45:16) So ef wi gwaan du wa di breda dem se wi fi du nou, it a-go iiziya dem taim de fi du wa dem se wi fi du aal wen a sitn we wi mait-a no waahn fi du. So mek wi chrai wi bes fi go di rait wie we Jeuova a shuo wi fi go rait ya nou, aal wen im a yuuz di man dem we no porfek fi mek wi nuo wa fi du. (Aiz. 32:1, 2; Iib. 13:17) An wen wi du dat, wi kyan chos se Jeuova a-go shuo wi di rait wie fi go. Im naa go mek wi du notn we naa go mek wi get fi liv fi eva iina di nyuu worl.