PAN Wenzde Janiweri 18, 2023, dem mek evribadi pan jw.org nuo se Breda Gage Fleegle an Jeffrey Winder a-go bi paat a di Govanin Badi fi di Jeuova Witnis dem. Di tuu a dem a sorv Jeuova fram lang taim.

Breda Fleegle did gruo iina Merika iina di wes paat a Penslvieniya. Im mada an faada did a Jeuova Witnis. Wen im did a tiinieja, im fambili muuv go a wan likl ieriya we dem niid muor elp fi du di priichin wok. An likl afta dat, iina Novemba 20, 1988, im baptaiz.

Breda Fleegle mada an faada aalwiez a mek im nuo se di bes ting im kuda du wid im laif a fi yuuz muos a im taim iina Jeuova sorvis. So dem aalwiez av di sorkit uovasiya dem an di Betelait dem a dem yaad, an Breda Fleegle kuda si se dem breda an sista ya we did a yuuz muos a dem taim iina Jeuova sorvis did api bad. So likl afta im baptaiz pan Septemba 1, 1989, im staat fi regila paiyanier. An tuu ier afta dat iina Aktuoba 1991, im staat fi wok a Bruklin Betel, an dis a sitn we im aalwiez waahn fi du fram im a 12.

Wen Breda Fleegle did go a Betel, im wok iina di paat we dem kaal Bainjri fi iet ier, an afta dat im wok iina di Sorvis Dipaatment. An da taim de im did de iina wan kanggrigieshan we dem taak Roshan, an im stie de fi kopl ier. Den im marid tu Nadia iina 2006, an shi staat fi wok a Betel wid im tu. Di tuu a dem wok wid di Puotugiiz breda an sista dem an dem wok wid di Spanish breda an sista dem fi muor dan ten ier iina dem kanggrigieshan. Afta im did a wok wid di Sorvis Dipaatment fi uol iip a ier, dem sen im go a di Tiichin Komitii Afis, an den afta dat dem sen im go a di Sorvis Komitii Afis. Iina Maach 2022, dem pik im fi elp  out di Govanin Badi, so im staat elp di Sorvis Komitii breda dem.

Breda Winder gruo iina wan plies niem Murieta iina Kalifuoniya we de iina Merika, an im mada an faada did a wan Jeuova Witnis. An im baptaiz Maach 29, 1986. Wan mont afta im baptaiz, im staat fi agzilari paiyanier ,an im lov it so moch dat im neehn waahn fi tap, so im gwaan agzilari paiyanier, an kopl mont afta dat pan Aktuoba 1, 1986, im staat fi regila paiyanier.

Wen Breda Winder did a tiinieja, im go luk fi im tuu big breda dem we did de a Betel. An wen im go de, it mek im waahn fi go a Betel tu. So wen im get uolda, iina Mie 1990, im get fi go wok a Betel a Waakil.

Breda Winder get fi du uol iip a difrant difrant ting a Betel, laik im wok wid di wan dem we kliin di difrant difrant ting dem a Betel, an im wok wid di wan dem we wok pan di faam, an im wok iina Betel Afis tu. Iina 1997, im marid Angela, an di tuu a dem a wok a Betel fram da taim de. Iina 2014, dem muuv dem go a Waawik Betel, an wen im de de-so, im elp fi mek di worl ed afis. Iina 2016, dem muuv dem go a di Wachtowa Edikieshan Senta we de a Patisn, an a de-so im wok iina we dem kaal Aadiyo/Vidiyo Sorvis. Fuor ier afta dat, dem muuv dem go baka Waawik, an Breda Winder staat fi wok iina di Porsinel Komitii Afis. Iina Maach 2022, dem pik im fi elp out di Govanin Badi, so im staat fi elp di Porsinel Komitii breda dem.

Wi prie se Jeuova gwaan bles dem ‘gud breda’ ya we im gi wi we a wok aad fi im Kindom govament.​—Ifii. 4:8.