1. Wa a som sitn we wi shuor se?

 KAA wi a Jeuova piipl, im lov wi an im waahn wi fi liv wan laif we a-go mek wi api. (Ruo. 8:35-39) An wi nuo se wans wi nuo ou fi riizn pan di sitn dem we de iina di Baibl an wi du wa di Baibl se wi fi du, it a-go elp wi. (Aiz. 48:17, 18) Bot wa ef prablem kom op iina wi laif we wi neva nuo se wuda apm?

2. Wa kain-a prablem mait-a kom op iina wi laif, an wen dem prablem ya kom op iina wi laif wa dem mait-a mek wi wanda se?

² Aal a Jeuova piipl go chuu prablem. A mait-a sumadi iina yu fambili du sitn we mek yu fiil a wie. Ar wi mait-a get sik bad we mek wi kyaahn du nof fi Jeuova agen. Ar wan orikien ar ortkwiek ar sitn laka dat mait-a apm we mash op wi plies an tingz. Ar piipl mait-a du wi som uol iip a bad sitn kaaz a wa wi biliiv iina. Wen wi go chuu dem sitn ya, it mait-a mek wi staat fi wanda se: ‘Wa a gwaan wid mi? Mi du sitn rang? Dem sitn ya a apm tu mi kaa Jeuova naa bles mi no muor?’ Yu eva fiil dem wie ya bifuo? Ef a so yu fiil somtaim, no fiil tuu bad, kaa uol iip a piipl we a sorv Jeuova fiil dem wie ya somtaim tu.​—Sa. 22:1, 2; Aba. 1:2, 3.

3. Wa wi kyan lorn fram Saam 34:19?

³ Riid Saam 34:19. Si tuu sitn ya we da vors ya tel wi se fi memba: (1) Di sumadi we a du wa Gad se rait a-go av uol iip a prablem an (2) Jeuova a-go siev wi fram wi prablem dem. Bot ou im a-go du dat? Wan ting a dat aalduo  im mek wi nuo se wen wi sorv im wi a-go api, im mek wi nuo se wi stil a-go av prablem iina wi laif iina dis ya worl ya. (Aiz. 66:14) Wa im waahn wi fi du a tingk bout wa a-go apm iina di fyuucha. Da taim de wi a-go liv di laif we im waahn wi fi liv fi eva. (2 Kor. 4:16-18) Bot rait ya nou ya im a elp wi fi go chuu wi prablem dem.​—Lam. 3:22-24.

4. Wa wi a-go luk pan iina da lesn ya?

⁴ Wi a-go luk pan ou Jeuova elp di piipl dem we did a sorv im iina di taim wen di Baibl did a rait an iina fi wi taim tu. Jos laik wa wi a si, prablem a-go kom op iina wi laif, bot wen a Jeuova wi a luk tu fi elp wi, im a-go elp wi fi go chuu wi prablem dem. (Sa. 55:22) Wen wi a luk pan ou Jeuova did elp dem piipl ya, aks yuself dem kwestiyan ya: ‘Wa mi wuda du ef a mi dis apm tu? Ou wa apm tu dem piipl ya elp mi fi chos iina Jeuova muor? A ou mi kyan du laik wa dem piipl ya du iina fi mi laif?’

5. Wa a som a di prablem dem we Jiekob did go chuu kaaz a Lieban? (Luk pan di picha pan di kova.)

⁵ Di piipl dem we did a sorv Jeuova bak iina di taim wen di Baibl did a rait, som prablem did kom op iina fi dem laif tu. Laik Jiekob faada did tel im se im fi go marid tu wan a Lieban pikni we a sorv Jeuova tu. An ef im du dat Jeuova wuda bles im. (Jen. 28:1-4) So a dat Jiekob du. Im lef Kienan an go wie a Lieban yaad. Lieban did av tuu gyal pikni de, wan did niem Liya an di neda wan di niem Riechel. Bot a di yong wan we niem Riechel Jiekob did lov aaf. So im se im wuda wok fi ar faada fi sevn ier fi get ar fi bi im waif. (Jen. 29:18) Bot yu no nuo wa Lieban du? Im chrik di man an mek im marid tu Liya. Den im tel Jiekob se ef im wok fi im fi sevn muor ier im wi mek im marid tu Riechel. So Jiekob se ye, an den wan wiik afta im marid tu Liya, Lieban mek im marid tu Riechel. (Jen. 29:25-27) Bot a no onggl dat Lieban did du, wen Jiekob did a wok wid Lieban, Lieban neehn chriit im fier. A 20 ier im did de de a chrik im op fa!​—Jen. 31:41, 42.

6. Wa a som ada prablem we Jiekob did go chuu?

⁶ Jiekob did go chuu uol iip muor prablem tu. Im did av uol iip a pikni bot im bwai pikni dem neehn a chriit dem wan aneda gud. Dem aal sel dem breda Juozif fi go ton sliev. An tuu a im bwai pikni dem we niem Simiyan an Liivai did bring dong shiem pan di fambili an pan Jeuova. An pan tap a dat, im waif Riechel, we im lov so moch, ded wen shi did a av ar sekan pikni. An wen im get uol, wan bad bad staavieshan did a gwaan wich paat im liv so im did afi lef de an go a Iijip.​—Jen. 34:30; 35:16-19; 37:28; 45:9-11, 28.

7. Wa Jeuova did du fi mek Jiekob si se Im did api wid wa im did a du?

⁷ Aalduo Jiekob did go chuu so moch prablem, im did stil biliiv se Jeuova a-go du wa Im se Im did a-go du fi im. An Jeuova did du sitn fi mek Jiekob si se Im did api wid wa im did a du. Laik wen Lieban did a chrai fi tiif im, a da taim de Jeuova mek im get nof tingz. An Jiekob mos did api wen Jeuova did mek im si im son Juozif we im tingk se ded. So wi si se a kaa Jeuova an Jiekob a did big fren mek Jiekob kuda did eng aan an go chuu  im prablem dem an stil api. (Jen. 30:43; 32:9, 10; 46:28-30) Wen yu mek shuor se no mata wa yu an Jeuova a gud gud fren, a dat a-go elp yu fi eng aan an go chuu wen prablem kom op iina yu laif.

8. A wa Dievid did waahn fi du fi Jeuova?

⁸ Di king we did niem Dievid wudn get fi du evriting fi Jeuova we im did waahn fi du. Laik im did wel waahn fi bi di sumadi we mek Gad ous fi im. An a dat im did tel di prafit we niem Nietan se im waahn du. So Nietan tel im se im kuda du eniting we im waahn fi du fi Jeuova kaa Jeuova de de wid im. (1 Kr. 17:1, 2) We Nietan se mos did push im fi gwaan wok fi Jeuova iina da wie ya. So im mait-a did plan we im did a-go du siem taim.

9. Wa Dievid did du wen im ier se im neehn did a-go get fi du wa im did waahn fi du fi Jeuova?

⁹ Bot den da siem nait de Jeuova prafit kom bak kom tel Dievid se a no im wuda bil Gad ous, a wan a im bwai pikni dem wuda dwi’it. (1 Kr. 17:3, 4, 11, 12) Bot wen Nietan tel Dievid dis, im no mek it bada im, im jos du wa im kuda du. So im staat fi get di moni an di sitn dem we Salaman kuda yuuz fi mek Gad ous.​—1 Kr. 29:1-5.

10. Wa a wan gud sitn Jeuova did du fi Dievid?

¹⁰ Rait afta Jeuova tel Dievid se a no im a-go bil im ous, Jeuova did pramis im se wan a im pikni dem a-go ruul fi eva. (2 Sam. 7:16) Iina di nyuu worl, tingk bout ou api Dievid a-go bi wen im fain out se Jiizas we a ruul fi di Touzn Ier, a fi’im fambili im kom fram. So dis mek wi si se aalduo wi mait no kyaahn du aal a wa wi waahn fi du fi Jeuova, Jeuova av ada gud tingz we im waahn wi fi du fi im we wi nat iivn did si a kom.

11. Aalduo Gad Kindom neehn kom wen dem Kristiyan de did tingk it did a-go kom, ou Gad did gi dem nof blesn stil? (Aks 6:7)

¹¹ Di Kristiyan dem we did de bout iina di taim wen di Baibl did a rait, som tingz did kom op iina dem laif we dem neehn nuo ou fi diil wid it. Laik dem did waahn fi nuo wen Gad Kindom wuda kom, bot dem neehn nuo wen dat wuda apm. (Aks 1:6, 7) So wa dem du a dat dem gwaan du nof iina di priichin an tiichin wok kaa wen dem si se di gud nyuuz a pred muor an muor, it mek dem si se Jeuova a bles di wok we dem a du.​—Riid Aks 6:7.

12. Wa di Kristiyan dem did du wen wan torbl staavieshan did a gwaan?

¹² Wan a di taim “wan torbl staavieshan [did] tek di uol worl.” (Aks 11:28) So di Kristiyan dem we did de bout dem taim de neehn av no fuud niida so tingz did rof fi dem. So di wan dem we did a di ed fi dem fambili mos did a wori bout ou dem did a-go tek kier a dem fambili. An wa bout di yong piipl dem we did a plan fi du muor fi Jeuova? Dem mait-a did fiil se dem did fi tek dat aafa dem main. No mata wa did a gwaan, di Kristiyan dem did du wa dem fi du. Dem gwaan priich an dem shier wa dem did av wid di breda an sista dem we did de iina Judiya.​—Aks 11:29, 30.

13. Wa a som a di blesn dem we di Kristiyan dem did get wen di torbl staavieshan did a gwaan?

¹³ Di breda dem iina dem de taim de did get uol iip a blesn aalduo di torbl staavieshan did a gwaan. Di wan dem we get tingz get fi si se Jeuova a tek kier a dem. (Mat. 6:31-33) An dis did mos mek dem jraa niera tu di wan dem we did elp dem out. An di wan dem we did gi sitn fi elp out mos did api kaa dem gi  sopm. (Aks 20:35) Ye, a Jeuova bles di uol a dem kaa dem du wa dem did fi du iivn duo tingz did kom op iina dem laif.

14. Wa did apm tu Paal an Baanabas, an kaa dem neehn gi op wa did apm? (Aks 14:21, 22)

¹⁴ Dem yuus tu mek tingz aad fi di Kristiyan dem we did de bout dem taim de kaaz a wa dem did biliiv iina. An it apm nof taim wen dem neehn nuo se it wuda apm. Dis a wa did apm tu Paal an Baanabas wen dem did de a Lischra a priich. Fos, dem did a lisn tu dem an mek dem fiil se dem did api se dem de de, an den di wan dem we neehn laik dem “win uova di kroud.” So som a di siem piipl dem we did laik ier wa dem a se staat fi fling stuon pan Paal an lef im fi ded. (Aks 14:19) Bot Paal an Baanabas neehn mek dat tap dem, dem go somwe els go priich. An kaaz a dat, dem mek “uol iip a piipl biliiv iina Jiizas,” an dem elp di ada Kristiyan dem get chrangga iina wa dem biliiv iina. (Riid Aks 14:21, 22.) Wi si se uol iip a gud tingz apm kaaz Paal an Baanabas neehn tap priich aalduo aal av a sodn dem did staat fi mek tingz aad fi dem kaaz a wa dem biliiv iina. So wi si se so langks wi no tap du di wok we Jeuova gi wi fi du, im a-go bles wi.

15. Wa wi kyan lorn fram wa Breda A. H. Macmillan did du?

¹⁵ Iina di ier dem we did a kom op tu 1914, Jeuova piipl dem did fiil se big tingz did a-go gwaan. Breda A. H. Macmillan did a wan a dem kaa im did tingk se im suun go a evn. So wen im gi wan taak iina Septemba 1914, im se: “Dis guda bi di laas taak mi gi ino.” Bot wi nuo se a neehn im laas taak dat. Bot afta dat im siem wan rait se: “Som a wi mait-a did tuu kwik fi se wi a go a evn siem taim, bot we wi shuda a du a du aal we wi kyan du iina di Laad wok.” An a dat Breda Macmillan did du. Im aalwiez a priich, an im did get fi elp push di breda an sista dem we did de iina prizn kaa dem neehn tek no said iina palitiks fi tan op chrang. An aal wen im op iina iej im aalwiez a go a miitn. Wa a som a di gud sitn dem we did apm tu im kaaz im did a yuuz im taim fi du nof fi Jeuova an a wiet fi go a evn? Likl bifuo im ded iina 1966, im rait se: “Mi stil a chos iina Gad jos laka ou mi did a chos iina im dem taim de.” Aal a wi fi chrai an du laik Breda Macmillan aal ef sitn kom op iina wi laif an wi a go chuu it langga dan wi did tingk wi afi go chuu it.​—Iib. 13:7.

16. Wa did apm aal av a sodn tu Herbert Jennings an im waif? (Jiemz 4:14)

¹⁶ Nof a di taim siknis kom dong pan Jeuova piipl dem aal av a sodn. A dis did apm tu wan Breda we niem Herbert Jennings. b Iina di tuori bout im laif, im did tel wi ou im an im waif did api a du mishaneri wok iina Gaana. Bot den im fain out se im av wan siknis we piipl se im chienj kwik kwik laka griin lizad. Breda Jennings tingk bout wa Jiemz 4:14 se, an kaal wa did a apm tu im “wan ‘tumaro’ we im neva si a kom.” (Riid.) An den im rait se: “Wi did afi lef wi gud gud fren dem a Gaana an go bak a Kyanada so dat mi kuda did go a wan dakta go get elp.” So Jeuova elp im an im waif fi gwaan sorv im aalduo uol iip a prablem did kom op iina dem laif.

17. Ou wa did apm tu Breda Jennings did elp wan breda an wan sista?

 ¹⁷ Wen uol iip a piipl riid bout wa Breda Jennings did se apm tu im, dem se it elp dem. Laik wan sista se: “Mi neva riid bout no tuori bout we sumadi we did a du nof fi Jeuova get sik an afi tap we elp mi so moch.” An a sitn laik dis wan neda breda did se. Im se: “Mi did a wan elda iina wan kanggrigieshan fi ten ier, an den mi kudn bi wan elda no muor kaa mi did av wan siknis we mek mi get aaf likl som a di taim. An kaaz a dis, mi fiil laik se mi neehn wot notn, an so it did aad fi mi riid di tuori dem bout wa a gwaan iina wi breda an sista dem laif. Bot wen mi riid wa did apm tu Breda Jennings, it mek mi fiil beta.” So dis mek wi memba se wen prablem kom op iina wi laif an ada piipl si se wi a go chuu dem, it kyan elp dem. Aal wen tingz no ton out di wie ou wi wuda waahn dem fi ton out, it kyan stil elp wi fi si se wi kyan go chuu wi prablem dem an stil tan op chrang.​—1 Pii. 5:9.

18. Wen yu luk pan dem picha ya, wa yu lorn fram wa apm tu wan sista we kom fram Naijiiriya?

¹⁸ Som bad siknis we go roun laik KUOVID-19 did mek it aad fi nof a Jeuova piipl. Laik wan sista iina Naijiiriya we ozban ded did fain se ar fuud an moni a ron out. Wan maanin ar gyal pikni aks ar afta dem kuk di laas kop a rais wa dem a-go nyam. Shi tel ar pikni se dem na’av no muor fuud ar moni iina di ous bot dem fi du laik di uman we ozban ded we kom fram Zarifat an kuk wa dem av an chos iina Jeuova. (1 Ki. 17:8-16) Bifuo dem iivn staat fi tingk bout wa dem did a-go nyam fi lonch da die de, som bredaz kyari som fuud fi dem, an da fuud de kuda kip dem fi muor dan tuu wiik. Di sista se shi neva did nuo se Jeuova wuda du sitn fi ar so kwik. Ye man, wen wi luk tu Jeuova fi elp wi,  aal wen wi no nuo wa a-go apm tu wi iina laif, dat kyan mek wi jraa niera tu Jeuova.​—1 Pii. 5:6, 7.

19. Wa a som a di sitn dem we Breda Aleksey Yershov did afi go chuu?

¹⁹ Dem a chriit nof a wi breda an sista dem bad kaaz a wa dem biliiv iina, an a nof taim it apm aal av a sodn. A dat did apm tu wan breda we niem Aleksey Yershov we liv iina Rosha. Wen im baptaiz iina 1994 iina Rosha, di breda an sista dem iina Rosha neehn anda lakdong, dem kuda sorv Jeuova ou dem waahn sorv im. Bot kopl ier afta dat, tingz did chienj iina Rosha. Iina 2020, di poliis dem go iina Breda Yershov ous an go sorch op sorch op im sitn dem an tek we nof a im sitn dem. An kopl mont afta dat, dem chaaj im an se im a kriminal. An di wos ting bout it ino, a dat di vidiyo dem we dem did yuuz gens im, a wan man we Breda Yershov did a stodi wid fi muor dan wan ier we did a gwaan laik im waahn nuo muor bout di Baibl did mek di vidiyo dem. Dat did wikid, no chuu?

20. Wa Breda Yershov did du we mek im an Jeuova get kluosa?

²⁰ Wid evriting we did gwaan wid Breda Yershov, yu tingk notn gud did kom outa it? Ye man! It mek im get kluosa tu Jeuova, an im se: “Mi an mi waif prie tu Jeuova aafn. An ef Jeuova neehn did a elp mi, mi wudn kyaahn manij aal a dis. An wan neda ting we elp mi wen taim mi fiil laik se mi kyaahn go aan no muor a wen mi du mi uona Baibl stodi an mi tingk bout di piipl dem iina di Baibl we did tan op fi wa rait no mata wa. A uol iip a tuori iina di Baibl mek wi si se di bes ting a fi wi iizi wiself an chos iina Jeuova wen wi a go chuu wan rof taim.”

21. Wa wi lorn fram da lesn ya?

²¹ Iina da lesn ya, wi get fi si se eni prablem kyan kom op pan wi iina da worl ya, bot so langks wi dipen pan Jeuova im a-go elp wi. Jos laik wa di mien skripcha fi da lesn ya se: “Di sumadi we a du wa Gad se rait a-go av uol iip a prablem, bot Jeuova a-go siev im fram aal a dem.” (Sa. 34:19) So no mek wi kip wi main pan di ting dem we kom op iina wi laif, bot mek wi kip wi main pan di elp we wi get fram Jeuova fi diil wid dem. Den wi kyan go se laik wa di apasl Paal did se: “Evribadi wuda nuo se a no wi av di powa, bot a [Jeuova] riili av aal a di powa.”​—2 Kor. 4:7.