1-2. Wa wi fi a du nou wen wi a wiet pan di nyuu worl fi kom?

 WI API se Jeuova pramis wi se im a-go get rid a da wikid worl ya an gi wi wan nyuu worl. (2 Pii. 3:13) Wi no nuo wen wi a-go get it, bot wi nuo se wi suun get it kaa di sitn dem we wi si a gwaan mek wi nuo se it suun kom.​—Mat. 24:32-34, 36; Aks 1:7.

² Aal a wi fi gwaan du tingz we a-go mek wi chos iina Jeuova muor an muor. Kaa aal ef wi iina di chuut fram lang taim, di apasl Paal mek wi nuo se ef wi no chos iina Jeuova “di sin we tai op wi fut iizi iizi” kyan kech wi. (Iib. 12:1) So fi mek shuor se wi gwaan chos iina Jeuova an no tap, wi fi aalwiez a luk pan di sitn dem we mek wi si se di nyuu worl suun kom.​—Iib. 11:1.

3. Wa wi a-go luk pan iina da lesn ya?

³ Iina da lesn ya, wi a-go luk pan dem chrii sitn ya we a-go kyan elp wi fi gwaan chos iina Jeuova se im a-go gi wi wan nyuu worl: (1) wen wi sidong an tingk bout ou Jeuova sen Jiizas fi kom ded fi wi, (2) wen wi tingk bout ou powaful Jeuova bi, an (3) wen wi spen taim an du di sitn dem we a-go mek wi chrang iina wa wi biliiv iina. An den wi a-go taak bout ou wa Jeuova did tel Abakok se kyan mek wi chrang iina wa wi biliiv iina ya nou. Bifuo wi du dat, mek wi luk pan som sitn we wi mait-a a go chuu rait ya nou we mait-a mek it aad fi wi gwaan biliiv se Gad a-go gi wi wan nyuu worl fi chuu.

 SOM A DI TAIM DEM WEN WI RIILI AFI CHOS IINA JEUOVA

4. Wa a som sitn we wi afi mek op wi main bout we a-go shuo ef wi riili a chos iina Gad?

⁴ Di ting dem we wi mek op wi main fi du, laik uu wi kip kompni wid, an di ting dem we wi du fi enjai wiself, an di kain-a skuulin we wi a-go du, an uu wi marid tu an ef wi a-go av no pikni, an di kain-a wok we wi a-go du, bies pan wa wi du wen it kom aan tu dem sitn ya, wi shuo ef wi riili a chos iina Jeuova. So yu kyan aks yuself: ‘Di sitn dem we mi mek op mi main fi du shuo se mi biliiv se Gad nyuu worl suun kom? Ar mi a fala di piipl dem we biliiv se wen sumadi ded a jos it dat?’ (Mat. 6:19, 20; Luuk 12:16-21) Ef wi du evriting we wi fi du fi gwaan chos iina Gad an nuo se di nyuu worl suun kom, wen it kom aan tu dem sitn ya wi a-go du di rait ting.

5-6. Wa mek wi fi chos iina Jeuova nof nof wen wi a go chuu wi chraiyal dem? An wa dis mait-a komiin laik?

⁵ Wi go chuu som uol iip a sitn we wi riili afi chos iina Gad ef wi waahn fi go chuu an api. Laik wen dem a mek tingz aad fi wi kaa wi a sorv Gad, ar wi get sik bad, ar wi mait-a fiil laik se wi kyaahn go aan no muor. Wen dem sitn ya dis staat fi apm, wi mait-a fiil laik se wi chrang an kyan go chuu. Bot wen dem komiin laik se dem naa tap, wi afi gwaan chos iina Jeuova fi im elp wi fi eng aan an api a worship im.​—Ruo. 12:12; 1 Pii. 1:6, 7.

⁶ Wen wi a go chuu wi chraiyal dem wi mait-a fiil laik se di nyuu worl naa go kom. Kaa wi fiil so no mos miin tu se wi naa chos iina Gad. Tingk bout dis: Wen di taim at bad iina di soma, yu mait-a fiil laik se yu a-go ded ou di plies at, bot yu nuo se kopl mont dong di ruod it a-go get kuula. A siem so wen wi fiil a wie kaaz a aal a wa a apm wi mait-a fiil laik se di nyuu worl naa go kom. Bot ef wi chos iina Jeuova nof nof wi a-go nuo se eniting we im se im a-go du im a-go du it. So wi nuo se di nyuu worl a-go kom fi chuu. (Sa. 94:3, 14, 15; Iib. 6:17-19) Kaa wi nuo aal a dis, fi worship Jeuova a-go bi di big ting iina wi laif.

7. Wa kain-a wiez wi no fi mek rob aaf pan wi?

⁷ Fi du di priichin wok wi afi chos iina Gad nof nof. Nof piipl we wi priich tu fiil se da ‘gud nyuuz’ ya we se Gad nyuu worl suun kom, notn no go so. (Mat. 24:14; Izii. 33:32) Wi no waahn ou dem piipl de fiil fi rob aaf pan wi. So dat miin tu se wi a-go gwaan du tingz we a-go elp wi fi chos iina Jeuova muor. Si chrii sitn ya we a-go elp yu fi du dat.

TINGK BOUT OU JEUOVA SEN JIIZAS FI KOM DED FI WI

8-9. Wen wi tingk bout ou Jeuova sen im Bwai Pikni fi kom ded fi wi, ou dat kyan mek wi chos iina Jeuova muor?

⁸ Di fos ting we kyan elp wi fi chos iina Jeuova muor a fi tingk bout ou im sen im Bwai Pikni fi kom ded fi wi. An wen wi tingk bout evriting we av fi du wid it, it mek wi nuo se eniting im se im a-go du, a it im a-go du. So wi nuo se wen im pramis wi se im a-go gi wi wan nyuu worl we wi a-go kyan liv fi eva iina, im a-go du it fi chuu. Wa mek wi nuo im a-go du it fi chuu?

⁹ Tingk bout it: Jeuova sen im wan dege-dege Bwai Pikni we im lov so moch, we did di de wid im fos, fram evn fi kom baan dong ya pan di ort. An wen im did de ya pan di ort, nof taim im did av tingz aad. Pan tap a dat, dem mek im sofa an  dem kil im wan wikid wie. A wan big ting dis Jeuova mek im Bwai Pikni go chuu fi wi, no chuu? Yu tingk Jeuova wuda mek Jiizas go chuu aal a dis so das wi kyan liv nais fi jos wan likl bit a taim? Nuo sa! (Jan 3:16; 1 Pii. 1:18, 19) Yu si kaa Jeuova gi op so moch, im a-go mek shuor se wi get di chaans fi liv fi eva iina di nyuu worl.

TINGK BOUT OU POWAFUL JEUOVA BI

10. Azkaadn tu Ifiijan 3:20, wa Jeuova kyan du?

¹⁰ Wan neda ting we mek wi kyan chos Jeuova a wen wi tingk bout ou im powaful. Kaa tingk bout it: Wen sumadi tingk bout fi liv fi eva iina wan nyuu worl, dem mait-a tingk se notn kyaahn go so. Bot memba ino, a Gad av aal a di powa ino, so muor taim im a-go pramis wi tingz we luk laik se it kyaahn apm fi chuu. (Juob 42:2; Maak 10:27) So wi nuo se eniting we im pramis wi naa go naamal.​—Riid Ifiijan 3:20.

11. Tel wi wan a di big sitn dem we Jeuova pramis se wuda apm. (Luk pan di paat we niem “ Som A Di Big Sitn Dem We Jeuova Pramis Se Wuda Apm, Dem Apm Fi Chuu.”)

¹¹ Tingk bout som sitn we Jeuova pramis se im wuda du we piipl wuda tingk se kyaahn apm. Im mek Iebriyam an Siera nuo se aalduo dem op iina iej dem wuda av wan bwai pikni. (Jen. 17:15-17) An im did mek Iebriyam nuo se im jinarieshan wuda get di lan dong a Kienan. An it did luk laik sitn we kudn apm kaa fi uol iip a ier Iebriyam jinarieshan dem did a sliev dong iina Iijip, bot wi si se it did apm. Afta dat, Jeuova did tel Ilizibet we did op iina iej se shi wuda av wan pikni. Im aal tel Mieri, we neva sliip wid wan man yet, se shi wuda av wan bwai pikni. An da bwai pikni de wuda bi fi’im Pikni. An a uol iip a touzn a ier bifuo dat Jeuova did se iina di gyaadn a Iidn se im Bwai Pikni wuda kom pan di ort, an dis did apm fi chuu.​—Jen. 3:15.

12. Ou wa Jashwa 23:14 an Aizaiya 55:10, 11 se mek wi nuo ou powaful Jeuova bi?

¹² Wen wi sidong an tingk bout ou evriting we Jeuova se im a-go du im du it fi chuu, it mek wi chos im muor. (Riid Jashwa 23:14; Aizaiya 55:10, 11.) Wen wi du dat, wi a-go kyan elp ada piipl fi si se wen Jeuova tel wi se wi a-go liv iina wan nyuu worl, a no no mek op tuori, a sitn we a-go apm fi chuu. Wen it kom aan tu di nyuu evn an di nyuu ort, Jeuova se: “Wa mi a se a chuu an evribadi kyan biliiv it.”​—Rev. 21:1, 5.

SPEN TAIM AN DU DI SITN DEM WE A-GO MEK WI CHRANG IINA WA WI BILIIV IINA

13. Ou wi miitn dem kyan mek wi chos iina Jeuova muor?

¹³ Di tord ting we wi kyan du fi elp wi fi chos iina Gad muor a wen wi spen taim an du di sitn dem we mek wi chrang iina wa wi biliiv iina. Laik wen wi tingk bout wi miitn dem, wi si se dem kyan elp wi fi du dat. Anna we yuuz uol iip a ier a du nof iina Jeuova sorvis se: “Di miitn dem mek mi riili chos iina Gad fi chuu. Aal ef di breda we a du di paat kyaahn tiich so gud ar im no se notn we mi neva nuo aredi, im wuda stil se sitn we mek mi get wa di Baibl a se muor an dat mek mi chos iina Jeuova muor.” b An wan neda ting we elp wi a wi miitn dem a wen wi breda an sista dem ansa kwestiyan an wi si umoch dem a chos iina Jeuova tu.​—Ruo. 1:11, 12; 10:17.

14. Wen wi go a sorvis, ou it elp wi fi chos iina Gad muor?

 ¹⁴ Wen wi go a fiil sorvis, it mek wi chos iina Jeuova. (Iib. 10:23) Wan sista we niem Barbara we a sorv Jeuova fi muor dan 70 ier se: “Mi fain se di priichin wok mek mi chos iina Gad muor, kaa di muor mi taak tu ada piipl an tel dem bout di ting dem we Jeuova pramis wi a di muor mi chos iina im.”

15. Wen wi du wi uona Baibl stodi, ou it mek wi chos iina Jeuova muor? (Luk pan di picha dem tu.)

¹⁵ Si sitn els ya we wi kyan du we a-go mek wi chos iina Jeuova muor, an dat a wi uona Baibl stodi. Wan sista we niem Susan se di bes ting a wen shi set wan taim fi stodi. Shi se: “Pan Sonde mi stodi di Wachtowa fi di neda wiik, an pan Monde an Chuuzde mi go uova wa a-go gwaan fi di miitn iina di wiik. An fi di res a di die dem mi stodi bout som ada sitn we mi waahn fi stodi bout.” Wen shi du aal a dis, it elp ar fi gwaan chos iina Jeuova. An den wi av Irene we de a di Jeuova Witnis dem Ed Afis fi uol iip a ier. Shi se wen shi stodi bout tingz we di Baibl se wuda apm bifuo it apm, it mek ar chos iina Jeuova muor. Laik shi se: “Wen mi si se evri likl ting we Jeuova se wuda apm apm fi chuu, it mek mi si se Jeuova riili gud fi chuu.” c

“IT A-GO APM”

16. Wa mek wi se wa Jeuova se tu Abakok av sitn fi du wid wi rait ya nou ya? (Iibruu 10:36, 37)

¹⁶ A lang taim nou som a di piipl dem we a sorv Jeuova a wiet fi da worl ya fi don. An tu som piipl it mait-a luk laik se Jeuova a lie-lie. Bot Jeuova mek wi si se a no so it go wen im tel di prafit we niem Abakok se: “Di vijan we mi gi yu, mi set di taim wen it a-go kom chuu, an it a-go  kom chuu kwik kwik kaa a no lai. Aal ef it no apm wen yu tingk it a-go apm, gwaan luk out fi it, kaa it a-go apm, an it a-go apm wen it fi apm!” (Aba. 2:3) Wa Jeuova did se tu Abakok, a im wan im did a se it tu, ar it av fi du wid wi tu? Jeuova did mek di apasl Paal yuuz di sitn dem we Im did tel Abakok fi elp di Kristiyan dem fi gwaan wiet pan di nyuu worl. (Riid Iibruu 10:36, 37.) Aal ef it luk laik di nyuu worl a tek lang fi kom rait ya nou ya, wi kyan nuo fi shuor se “it a-go apm, an it a-go apm wen it fi apm!”

17. Ou Louise did du laik wa Jeuova did tel Abakok fi du?

¹⁷ Uol iip a piipl we a sorv Jeuova nou a du wa im se fi uol iip a ier nou an a “gwaan luk out fi [di nyuu worl].” Tingk bout da sista ya we niem Louise we did a sorv Jeuova fram 1939. Shi se: “Dem taim de, mi did tingk se Aamagedan wuda kom bifuo mi don ai skuul, bot a no dat did gwaan. So wa elp mi fram dem taim de til nou a fi riid di tuori dem we iina di Baibl we tel wi bout piipl we wiet pan Jeuova, piipl laik Nowa, Iebriyam, Juozif, an som ada piipl we wiet pan Jeuova fi gi dem wa im pramis dem. Wen wi gwaan luk out fi wa Jeuova pramis wi, it elp wi fi nuo fi shuor se di nyuu worl suun kom.” Nof a di piipl dem we a worship Jeuova fram lang taim se a di siem ting a elp dem.

18. Wen wi luk pan di ting dem we Gad mek we de roun wi, ou dem kyan mek wi chos se di nyuu worl a-go kom fi chuu?

¹⁸ A chuu, di nyuu worl no de ya rait ya nou. Bot nof a di ting dem we wi av roun wi ya nou, yu did av wan taim wen dem neehn de ya, laik di staar dem, an di chrii dem, an di animal dem, an di piipl dem. Bot wi si se Gad mek aal a dem sitn ya de ya ya nou. (Jen. 1:1, 26, 27) An wi si se Jeuova tel wi se im a-go gi wi wan nyuu worl, an im a-go dwi’it. An da taim de, piipl a-go enjai laif fi eva. An yu si jos laik ou di staar dem an dem sitn ya de ya nou, a siem so di nyuu worl a-go kom, an it a-go kom wen Gad waahn it fi kom.​—Aiz. 65:17; Rev. 21:3, 4.

19. Wa yu kyan du fi gwaan chos iina Jeuova?

¹⁹ Bot til da taim de kom, yu fi du evriting we yu kyan du fi chos iina Gad muor. Du wa yu kyan du fi mek im si se yu tangk im fi sen im Bwai Pikni fi kom ded fi yu. An tingk bout ou powaful Jeuova bi. An gwaan du aal a di ting dem we kyan mek yu chrang iina wa yu biliiv iina. An wen yu du aal a dem sitn ya, yu a-go bi wan a “di piipl dem we . . . no gi op, an so dem get wa Gad did pramis fi gi dem.”​—Iib. 6:11, 12; Ruo. 5:5.