1. Tel wi bout wen Jiizas did wok im fos mirikl.

 TINGK bout wa did gwaan iina di laas paat a 29 C.E. wen Jiizas jos staat fi du di wok we im Faada gi’im fi du. Dem did invait im an im mada an som ada a im falara dem fi kom a wan wedn iina Kiena. Mieri did a elp dem out wid di wedn kaa shi an di fambili a did fren. Bot wen di wedn paati did a gwaan, dem fain out se di wain did don, an wen sitn laka dis apm a wan wedn it wuda mek di man an uman we a marid shiem. b Wi no nuo wa go dong ino, bot it luk laik se muor piipl kom dan we dem did invait. So Mieri ron go tu Jiizas an se: “Dem na’av no muor wain lef.” (Jan 2:1-3) Bot yu no nuo wa Jiizas did du? Im ton waata iina di “bes wain.”​—Jan 2:9, 10.

2-3. (a) Ou Jiizas did yuuz di powa we Gad gi’im fi wok mirikl? (b) Ou it kyan elp wi wen wi tingk bout di mirikl dem we Jiizas du?

² Bot di mirikl dem we Jiizas wok neva tap de-so. c Jiizas yuuz di powa we im did av fi elp uol iip a piipl. Laik im wok mirikl so dat im kuda gi 5,000 man fuud. An den afta dat, im gi 4,000 man fuud. An ef wi fi kount op aal  a di uman an pikni dem we did de de dem tuu taim de wi wuda get uova 27,000 piipl. (Mat. 14:15-21; 15:32-38) An im did mek uol iip a sik piipl get beta dem tuu taim de tu. (Mat. 14:14; 15:30, 31) It mos did shak dem piipl ya ou Jiizas did wok mirikl fi gi aal a dem fuud fi nyam an fi mek aal a di wan dem we sik get beta.

³ Di mirikl dem we Jiizas did du av nof fi du wid wi tide. So iina da lesn ya, wi a-go si ou dem mirikl ya elp wi fi chos iina Jeuova muor. An den wi a-go si ou wi kyan du laik Jiizas an ombl wiself an chriit piipl gud.

4. Di mirikl dem we Jiizas did du, a uu dem mek wi chos iina?

⁴ Wen wi luk pan di mirikl dem we Jiizas did wok, a no im wan dem mek wi chos iina, dem mek wi chos iina im Faada tu. An dis mek sens kaa Jeuova gi im di powa fi wok dem mirikl de. Aks 10:38 tel wi se: ‘Gad did gi Jiizas we kom fram Nazaret im uoli spirit an powa. Jiizas go aal bout a du gud sitn, an aal a di piipl we di devl did kanchuol, Jiizas frii dem kaaz Gad did de wid im.’ Memba se evriting we Jiizas did se an du an aal a di mirikl dem we im did wok, a siem ting im Faada wuda du ef a Im did de ya. (Jan 14:9) Wi a-go luk pan chrii tingz we wi kyan lorn fram di mirikl dem we Jiizas did du.

5. Wa mek Jiizas du di mirikl dem we im did du? (Matyu 20:30-34)

⁵ Di fos ting a dat Jiizas an im Faada lov wi bad. Wen Jiizas did de pan di ort, im mek piipl si umoch im lov dem wen im wok mirikl fi elp dem, laik wan a di taim wen tuu blain man beg im fi elp dem. (Riid Matyu 20:30-34.) An yu si se Jiizas did “fiil sari fi dem” so im mek dem kuda si agen. Di wod we dem yuuz iina di Griik langwij we miin fi ‘fiil sari fi sumadi’ miin se yu riili fiil it fi di sumadi an yu wel waahn fi elp dem. Di wie ou Jiizas did fiil it fi piipl wen dem did a sofa, a dat mek im did elp dem, laik wan taim wen im did fiid di piipl dem wen dem did onggri an im did mek wan man uufa skin did fasi-fasi get beta tu. Wen im du aal a dem sitn ya fi piipl, im mek dem si se im lov dem bad. (Mat. 15:32; Maak 1:41) Wi kyan nuo fi shuor se Jeuova, di Gad we “gud an kain tu wi,” an im Bwai Pikni lov wi kyaahn don, an dem fiil it fi wi wen wi a sofa. (Luuk 1:78; 1 Pii. 5:7) Dem wel waahn fi get rid a aal a di prablem dem we wi a go chuu.

6. A wa Jeuova gi Jiizas powa fi du?

⁶ Di sekan ting a dat Jeuova gi Jiizas di powa fi get rid a aal a wi prablem dem. Di mirikl dem we Jiizas du shuo se im av di powa fi get rid a di prablem dem we wi av we wi kyaahn get rid a pan wi uon. Laik im av di powa fi get rid a sin, an wi nuo se a it a kaaz aal a di prablem dem we wi av, an a it kaaz wi fi sik an ded. (Mat. 9:1-6; Ruo. 5:12, 18, 19) Di mirikl dem we Jiizas yuus tu du shuo se im av di powa fi mek piipl we av “aal kain-a” siknis get beta an im kuda mek piipl we ded kom bak alaiv. (Mat. 4:23; Jan 11:43, 44) An im aal av di powa fi kanchuol wan powaful staam an im av  di powa fi get rid a Sietan an im diiman dem. (Maak 4:37-39; Luuk 8:2) It riili nais fi nuo se Jeuova gi im Bwai Pikni di powa fi du aal a dem sitn ya!

7-8. (a) Di mirikl dem we Jiizas du mek wi shuor se wa a-go apm? (b) A wich wan a dem mirikl ya yu wel waahn fi si apm iina di nyuu worl?

⁷ Di tord ting a dat wi nuo se aal a di gud sitn dem we Gad a-go yuuz im Kindom fi gi wi a-go apm fi chuu. Di mirikl we Jiizas yuus tu du wen im de pan ort mek wi si se wen im staat ruul iina Gad Kindom govament im a-go du uol iip muor. Wen im a ruul uova wi, nobadi naa go sik agen, an nobadi naa go blain ar def, an non a dem bad sitn ya we a apm naa go apm agen. (Aiz. 33:24; 35:5, 6; Rev. 21:3, 4) An da taim de wi naa go ded fi onggri agen an wi naa go av no orikien ar ortkwiek an dem ting de agen niida. (Aiz. 25:6; Maak 4:41) An wi a-go api fi si wi piipl dem we ded kom bak alaiv “kaa Gad memba dem.” (Jan 5:28, 29, NWT ) A wich wan a dem sitn ya yu wel waahn fi si iina di nyuu worl?

⁸ Wen Jiizas did a wok di mirikl dem, im shuo se im did ombl an dat im fiil it fi di piipl dem we im did a elp, an wi kyan du laik im wen wi a elp piipl. Wi a-go luk pan tuu a dem mirikl ya we Jiizas did du. Di fos wan a wen im did de a wan wedn iina wan plies we dem kaal Kiena.

9. Wa Jiizas did du a di wedn? (Jan 2:6-10)

⁹ Riid Jan 2:6-10. Wen di wain did don a di wedn, Jiizas neehn afi du notn bout it kaa a no laik di Baibl did tel wi se di Mesaiya wuda ton waata iina wain. Bot tingk ou yu wuda fiil ef a did fi yu wedn an di jringks go don. Yu wuda fiil a wie, no chuu? So kaaz a dis, Jiizas did fiil sari fi di piipl dem we did a marid an dem fambili, so im ton 103 gyalan a waata iina di bes wain. An dis a did wol iip a wain. Bot wa mek yu tingk im did gi dem so moch wain? Im mait-a did dwi’it so das dem kuda av it fi wan neda taim ar di ozban an waif kuda did sel it so dat dem kuda did get som moni. Dem mos did api se Jiizas did tek di shiem outa dem yai.

10. Wa a som a di sitn dem we Jan chapta 2 tel wi we wi kyan lorn fram? (Luk pan di picha tu.)

¹⁰ Mek wi luk pan wa wi kyan lorn fram wa did rait dong iina Jan chapta 2 bout wa did go dong wen Jiizas did ton di waata iina wain. Wan ting yu si a das a no Jiizas did ful op di waata jaar dem, a di sorvant dem im did mek dwi’it. (Vors 6, 7) Afta im ton di waata iina wain, a no im did kyari di wain go gi di fuud manija, bot a di sorvant dem im mek dwi’it. (Vors 8) An im neehn tek wan kop a di wain an uol it op infronta evribadi an big op imself an se, ‘Luk wa mi dis du, jringk som a di nais wain we mi jos mek!’

11. Wa wi kyan lorn fram di mirikl we Jiizas did du?

¹¹ Wa wi kyan lorn fram di mirikl we Jiizas did wok wen im ton waata iina wain a das wi fi ombl, kaa wi si se wen im did dwi’it im neehn big op imself. So no taim at aal Jiizas neehn big op imself. Bot insted-a dat, no mata wa im du a im Faada im aalwiez mek get di big op. (Jan 5:19, 30; 8:28) So ef wi ombl laik Jiizas, wen wi du notn gud wi naa go big op wiself. So no mata di kain-a wok we wi a du fi Jeuova, wi no fi a big op wiself bot a Jeuova wi fi mek get di big op. (Jer. 9:23, 24) Kaa eniting gud we wi du a Jeuova elp wi fi dwi’it.​—1 Kor. 1:26-31.

12. Tel wi sitn we kyan apm we wi kyan shuo se wi ombl laik Jiizas.

¹² Si sitn els ya we kyan apm we wi kyan shuo se wi ombl laik Jiizas: Se wan elda did spen uol iip a taim a elp wan ministiiriyal sorvant fi du im fos taak, an di breda an sista dem lov di taak. An wen di taak don, sumadi go tu di elda we elp im an tel im ou im lov di taak. Yu tingk di elda fi se: ‘Ye man, a mi elp im dwi’it ino’? Ar im fi se: ‘Im gwaan gud fi chuu’? So yu si wen wi ombl, ef wi du sitn gud fi sumadi wi naa go mek evribadi nuo bout it. Wi fi jos api fi nuo se Jeuova si an nuo wa wi a du an se wa wi a du wot nof tu im. (Luk pan Matyu 6:2-4; Iib. 13:16) So wen wi du laik Jiizas an ombl wiself, Jeuova a-go api wid wi.​—1 Pii. 5:6.

13. A wa Jiizas did si a gwaan wen im kech nier Nien, an wa im did du? (Luuk 7:11-15)

¹³ Riid Luuk 7:11-15. Tingk bout wa did gwaan wen Jiizas a du di wok we Jeuova sen im kom du. Im did a chravl go a wan toun iina Gyalalii we niem Nien we no tuu faar fram Shuunem. A  de-so bout 900 ier bifuo dat Ilaisha mek wan uman bwai pikni we ded kom bak alaiv. (2 Ki. 4:32-37) Wen Jiizas did nier fi riich de, im si som piipl a kyari wan badi fi go beri. Da bwai pikni de a did di onggl bwai pikni fi wan uman we ozban ded. Bot a no onggl shi wan did fiil it, aal a dem piipl ya we did de de wid ar did fiil it tu. Den wen yu luk, Jiizas tap di kroud an wok wan mirikl an mek ar bwai pikni kom bak alaiv. Outa di chrii piipl dem we di Baibl tel wi bout we Jiizas did mek kom bak alaiv, dis a di fos wan.

14. Wen wi luk som muor pan wa Luuk chapta 7 did tel wi, wa wi lorn fram it? (Luk pan di picha tu.)

¹⁴ Mek wi luk som muor pan wa Luuk chapta 7 did tel wi bout wa did apm. Yu si se wen Jiizas “si ar, im [did] sari fi ar.” (Vors 13) Ye man, wen im did si di uman a waak infronta di kafn an a baal, im fiil sari fi ar. Bot a no onggl fiil im did fiil sari fi ar, im du sitn bout it tu. Im taak tu ar iina wan nais wie an tel ar se: “Osh! No bada baal!” Den Jiizas du sitn bout it. Im mek ar bwai pikni kom bak alaiv an den im “gi im bak tu im mada.”​—Vors 14, 15.

15. Wa wi kyan lorn fram di mirikl we Jiizas did du?

¹⁵ Wa Jiizas du wen im mek da uman ya bwai pikni kom bak alaiv mek wi si se wi fi du tingz fi mek piipl si se wi fiil it fi dem wen sumadi fi dem ded. Ye, wi kyaahn mek piipl we ded kom bak alaiv laik we Jiizas did du, bot wi kyan luk out fi di wan dem we sumadi fi dem ded an chrai fi fain sitn we yu kyan se ar du fi elp dem fi fiil beta jos laik wa Jiizas did du. d (Pr. 17:17; 2 Kor. 1:3, 4; 1 Pii. 3:8) An muor taim a no notn big wi afi du fi elp dem.

16. Wen yu luk pan di picha we a shuo wa di sista did du tu wan sista we ar daata did ded, wa yu kyan lorn fram dat?

¹⁶ Kopl ier ago, wan sista did de a  miitn, an wen di sang a sing shi si wan ada sista we shi nuo se ar daata did ded a baal. So siem taim shi go saida ar go og ar op an sing di sang wid ar. Di mada se: “Mi lov di breda an sista dem fi aal a wa dem du fi mi.” Shi did glad shi go a miitn. Shi se: “A rait de-so a di Kindom Aal wi kyan go fi get elp.” Wi nuo fi shuor se eniting we wi du fi elp wi breda an sista dem wen sumadi fi dem ded fi mek dem nuo se wi fiil it fi dem, Jeuova si it an it wot nof tu im tu.​—Sa. 34:18.

17. Wa a som a di sitn dem we wi lorn fram di mirikl dem we Jiizas du?

¹⁷ It a-go du wi gud ef wi sidong an stodi bout di mirikl dem we Jiizas du we rait dong iina Matyu, Maak, Luuk, an Jan. Kaa wen wi riid bout di mirikl dem iina dem buk de, wi get fi si se Jeuova an Jiizas lov wi bad bad an se Jiizas av di powa fi get rid a aal a wi prablem dem. An wi kyan nuo fi shuor se aal a di gud ting dem we Gad Kindom govament a-go du fi wi suun apm. Wa yu kyan du a set wan taim fi du yu uona Baibl stodi ar fi du wan Fambili Worship pan di mirikl dem we Jiizas du an si aal a wa yu kyan get fram it so yu kyan du tingz laik Jiizas. An chrai an si wa yu kyan tel ada piipl bout wa yu lorn. An yu a-go fain se unu a-go kyan av wol iip a gud tingz fi taak bout!​—Ruo. 1:11, 12.

18. Wa wi a-go luk pan iina di neks lesn?

¹⁸ Wen di taim did suun kom fi Jiizas don di wok we Jeuova gi im fi du, a da taim de im did mek im fren kom bak alaiv, an im did a di tord sumadi we Jiizas mek kom bak alaiv. An da mirikl ya did difrant fram di ada wan dem. Wa wi kyan lorn fram da mirikl de? An ou it kyan mek wi riili biliiv se Gad a-go mek ded piipl kom bak alaiv? Wi a-go get di ansa fi dem kwestiyan ya iina di neks lesn.