1. Wa mek wi fi put op wi an an ansa kwestiyan wen wi go a miitn?

 DI BIGIS riizn wa mek wi go a wi miitn dem a fi priez Jeuova. (Sa. 26:12; 111:1) Wi go a wi miitn dem tu fi elp wi wan aneda get chrangga iina dem rof taim ya we wi a liv iina. (1 Tes. 5:11) Wen wi put op wi an an ansa kwestiyan, wi a elp wi wan aneda fi du dem sitn ya.

2. Wa a som a di taim dem wi kyan put op wi an an ansa kwestiyan wen wi go a wi miitn dem?

² Wi kyan get fi put op wi an an ansa kwestiyan evri wiik wen wi go a wi miitn dem. Laik wi av di Wachtowa Stodi we kip pan di wiiken. An a di miitn we kip iina di wiik, wi kyan put op wi an an ansa kwestiyan iina di paat we niem Di Preshos Tingz Fram Di Baibl, an di Baibl Stodi Fi Wi Miitn, an eni ada paat we wi kyan ansa kwestiyan iina.

3. Wa kain-a prablem wi mait-a av fi ansa kwestiyan a wi miitn dem, an ou Iibruu 10:24, 25 kyan elp wi?

³ Aalduo aal a wi waahn fi priez Jeuova an mek wi wan aneda aat get chrangga wen wi go a wi miitn dem, wi mait-a no fain it iizi fi put op wi an an ansa kwestiyan stil. Som a wi mait-a fried fi ansa kwestiyan an som a wi mait-a fiil se dem naa kaal pan wi nof taim. Wa di apasl Paal did rait iina im leta tu di Iibruu Kristiyan dem kyan elp wi fi si se a wan big ting fi wi go a wi miitn dem, kaa im tel wi se wi fi “kom tugeda an taak so wi wan aneda aat kyan get chrangga.” (Riid Iibruu 10:24, 25.) An wen wi si se ada breda an sista we de a miitn fiil beta wen dem ier wi a ansa kwestiyan, aal ef a wan shaat ansa wi gi, it wi  mek wi waahn fi ansa kwestiyan. An ef dem no kaal pan wi nof, wi kyan stil api fi di wan dem we get di chaans fi ansa kwestiyan.​—1 Pii. 3:8.

4. Wa a di chrii sitn dem we wi a-go taak bout iina da lesn ya?

⁴ Wi a-go luk pan ou aal ef a wan likl kanggrigieshan wi iina wi kyan stil ansa kwestiyan an mek wi wan aneda aat get chrangga. Den wi a-go luk pan ou wi kyan elp wi wan aneda aat fi get chrangga wen wi iina wan big kanggrigieshan wid nof breda an sista we a ansa kwestiyan. An den wi a-go taak bout wa wi kyan se wen wi a ansa kwestiyan we kyan riili elp wi breda an sista dem aat fi get chrangga.

5. Ef nof piipl no de a wi miitn, wa wi kyan du fi elp wi wan aneda?

⁵ Ef yu iina wan likl kanggrigieshan ar wan likl gruup, yu naa go av nof piipl a ansa kwestiyan. So di breda we a aks di kwestiyan dem afi go a wiet pan piipl fi put op dem an, an it a-go mek it fiil laik se di miitn jos a galang an a galang so. Bot wa yu kyan du fi elp a put op yu an nof taim. An wen yu du dis, it wi elp ada piipl fi fiil laik fi put op fi dem an tu.

6-7. Wa kyan elp wi fi no so fried wen wi a ansa kwestiyan?

⁶ Ef jos fi tingk bout fi ansa wan kwestiyan a yu miitn mek yu fiil fried, no fiil bad kaa a no yu wan fiil so. Bot ef yu riili waahn fi elp yu breda an sista dem aat fi get chrangga, it wuda nais fi si wa yu kyan du so dat yu no so fried fi ansa kwestiyan. Mek wi luk pan som a di sitn dem we yu kyan du.

⁷ Wan a di sitn dem we yu kyan du a du wa som Wachtowa tel wi fi du aredi. b Wan a di sitn dem we it se wi kyan du a go chuu di sitn dem we wi a-go put op wi an an taak bout bifuo wi go a miitn. (Pr. 21:5) Di muor yu nuo bout wa yu a-go taak bout a di iiziya it a-go bi fi yu fi put op yu an an ansa kwestiyan bout it. Wan ada sitn we yu kyan du a mek yu ansa dem shaat an nais. (Pr. 15:23; 17:27) Wen yu ansa dem shaat, yu naa go av nof sitn fi fret bout. Yu si aal wen yu se wan likl shaat sitn, it a-go mek it iiziya fi yu breda an sista dem get wa yu a se dan wen yu a chat bout uol iip a difrant sitn. Wen yu ansa dem shaat an yu dis taak wa yu get fram di paragraaf, it a-go shuo se yu did go chuu di sitn gud an yu andastan wa di paragraaf a se.

8. Ou Jeuova fiil wen wi chrai fi du wi bes fi ansa?

⁸ Wa ef yu du dem sitn ya an yu ansa wan ar tuu taim bot yu stil fried fi ansa muor taim? Jeuova stil api fi wa yu du aredi. (Luuk 21:1-4) Aalduo Jeuova waahn yu fi du aal a wa yu kyan du fi im, im no waahn yu fi kil aaf yuself fi dwi’it. (Fil. 4:5) A yu a-go kyan nuo wa yu kyan du, so plan fi du wa yu kyan du, an prie tu Jeuova fi elp yu fi iizi yuself so dat yu kyan ansa. Bot yu kyan jos plan fi gi wan likl ansa fi di fos.

9. Wa kain-a prablem yu kyan av wen yu a ansa kwestiyan wen yu iina wan big kanggrigieshan?

⁹ Ef a uol iip a piipl iina yu kanggrigieshan, yu mait-a fain se yu av wan  difrant prablem. Kaa nof a di breda an sista dem a put op dem an fi ansa, yu mait-a no get no chaans fi ansa. Laik luk pan wa did apm tu wan sista we niem Danielle. c Shi did aalwiez laik fi put op ar an an ansa kwestiyan a di miitn dem kaa shi luk pan it laik sitn we shi fi du wen shi a worship Jeuova, an shi nuo se wen shi dwi’it a sitn we a-go mek di breda an sista dem aat get chrangga, an it a-go mek ar chos iina wa di Baibl se muor. Bot wen shi muuv go a wan big kanggrigieshan, dem neehn yuus tu kaal pan ar aafn fi ansa no kwestiyan, somtaim nat iivn wan taim fi di miitn. Shi se: “Mi fiil laik mi neehn nuo wa fi du. Mi fiil laik se mi neehn get fi du sitn gud we mi did waahn fi du. An wen it apm uol iip a taim, yu staat fi fiil laik se a laik di breda no laik yu.”

10. Wa a som a di sitn dem we wi kyan du ef wi waahn fi mek shuor se wi get fi ansa kwestiyan wen wi go a miitn?

¹⁰ Yu fiil laik ou Danielle did fiil som a di taim? Ef yu fiil laik ou shi fiil som a di taim, yu mait-a fiil laik se yu no fi put op yu an an ansa no kwestiyan wen yu go a miitn. Bot ef a so yu fiil, yu no fi tap chrai ansa kwestiyan. Si som sitn ya we yu kyan du: Wa yu kyan du a no onggl chrai fi ansa wan kwestiyan, chrai fi av muor dan wan ansa. So ef dem no mek yu get fi ansa di fos taim yu put op yu an, yu kyan go av uol iip a ada ansa fi gi wen di miitn a gwaan. An laik wen yu stodi op fi di Wachtowa Stodi, yu fi chrai an tingk bout wa iich a di paragraaf dem av fi du wid da lesn de. An wen yu du dat, yu mait-a fain se yu av sopm fi se fi muos a di paragraaf dem. An wen di paragraaf no so iizi, yu kyan stil chrai fi fain di ansa. (1 Kor. 2:10) An yu mait-a fain se nobadi no put op dem an fi da kwestiyan de. Bot ef yu fain se fi uol iip a di miitn dem yu stil naa get no ansa, yu kyan go tu di sumadi we a du di paat bifuo di miitn an tel dem wich kwestiyan yu waahn fi ansa.

11. Wa Filipiyan 2:4 tel wi se wi no fi du?

 ¹¹ Riid Filipiyan 2:4. Jeuova did mek Paal rait an se wi no fi onggl luk out fi wiself bot wi fi luk out fi wi breda an sista dem tu. So a dat wi fi du wen wi de a wi miitn dem. An memba se di ada breda an sista dem waahn fi ansa tu.

12. Wen wi go a miitn, wa wi kyan lou wi breda an sista dem fi du so dat fi dem aat kyan get chrangga tu? (Luk pan di picha tu.)

¹² Wen yu an yu fren dem a chat, a yu wan chat ar yu mek dem taak tu? Yu mek dem taak tu, no chuu? A siem so wen wi de a wi miitn dem wi fi mek ada piipl put op dem an an ansa kwestiyan tu. Di bes ting we wi kyan du fi mek wi wan aneda aat get chrangga a fi mek dem get fi taak bout umoch dem a chos iina Jeuova tu. (1 Kor. 10:24) Wi a-go luk pan ou wi kyan du dat nou.

13. Wa wi no fi du so dat muor piipl kyan ansa kwestiyan a di miitn dem?

¹³ Wen wi a ansa wan kwestiyan, wi no fi chat tu moch so das ada piipl kyan ansa tu. An dis a sitn we di elda dem an di wan dem we de iina di chuut fi wan lang taim no fi du tu. An aal ef yu ansa shaat, yu no fi gi aal a di ansa dem we de iina di paragraaf. Kaa ef yu du dat, yu naa go lef notn els fi sumadi els ansa. Iina da paragraaf ya wi si se yu av tuu ansa, di fos wan a dat wi ansa fi shaat, an di neks wan a dat wi no fi gi di uol a di ansa dem. So ef a yu dem kaal pan fos, onggl gi wan a di ansa dem.

14. Wa kyan elp wi fi nuo ou aafn wi fi put op wi an? (Luk pan di picha tu.)

¹⁴ Wen it kom aan tu di mount a taim we yu a put op yu an fa, yu fi yuuz yu kanchens. Kaa ef yu put op yu an tuu moch, it a-go mek di breda we a aks di kwestiyan fiil laik se im afi kaal pan yu nof taim, aal wen ada piipl no get no ansa yet. An dis mait-a mek ada piipl fried fi put op dem an.​—Iik. 3:7.

15. (a) Ou wi no fi fiil wen wi put op wi an an wi no get fi ansa? (b) Wa di breda dem we a aks kwestiyan a di miitn dem fi du fi shuo se dem a luk out fi evribadi? (Luk pan di paat we niem “ Ef A Yu A Du Di Miitn Paat An A Aks Kwestiyan.”)

 ¹⁵ Wen uol iip a piipl put op dem an fi ansa, wi mait-a no get fi ansa di mount a taim wi waahn fi ansa. So a no aal a di taim dem a-go kyan kaal pan wi, an dis mait-a mek wi fiil a wie. Bot wi no fi fiil laik se dem naa kaal pan wi kaa dem no laik wi.​—Iik. 7:9.

16. Wa wi kyan du fi elp di wan dem we get fi ansa kwestiyan a di miitn dem?

¹⁶ Aarait, yu neehn get fi ansa nof kwestiyan. Bot wa yu kyan du a lisn gud tu di wan dem we a ansa kwestiyan an den big dem op fi’it. Wen yu big op yu breda an sista dem kaaz a wa dem ansa se, yu kyan mek dem aat get chrangga jos laik wen yu wuda a ansa tu. (Pr. 10:21) Wen yu big dem op, a jos wan neda ting yu a du fi mek dem aat get chrangga.

17. (a) Ou di wan dem we av pikni kyan elp dem fi ansa kwestiyan we no mek it luk laik se dem big bifuo taim? (b) Azkaadn tu di vidiyo, wa a fuor sitn we wi fi du wen wi a saat out wa wi a-go put op wi an an ansa se? (Luk pan di said paint tu.)

¹⁷ Wen wi de a wi miitn dem, wa wi kyan du fi mek wi wan aneda aat get chrangga?  Ef yu av wan pikni, elp dem fi fain wan ansa we dem kyan gi a di miitn, bot no mek dem ansa no kwestiyan we mek it luk laik se dem big bifuo taim. (Mat. 21:16) Kaa som a di taim ino, a som big piipl tingz dem a-go taak bout a di miitn dem, laik ozban an waif prablem, an tingz we av fi du wid seks sin an dem ting de. Bot dem stil mait-a av wan paragraaf we di pikni dem kyan taak bout iina da siem lesn de. Pan tap a dat, yu fi elp yu pikni dem fi nuo se a no evritaim dem put op dem an di breda dem a-go kaal pan dem. Wen yu mek dem nuo dis, it wi elp dem fi no fiil laik di breda no laik dem kaa sumadi els get fi ansa.​—1 Tim. 6:18. d

18. Wen wi a ansa kwestiyan wa wi no fi du? (Pravorbz 27:2)

¹⁸ Eni kwestiyan we wi plan fi ansa, wi fi mek shuor se wa wi a-go se big op Jeuova an it a-go elp wi breda an sista dem aat fi get chrangga. (Pr. 25:11) Ye, somtaim wi mait tel dem wan likl sitn bout wa wi a go chuu, bot wi fi mek shuor se wi naa chat tu moch bout wiself. (Riid Pravorbz 27:2; 2 Kor. 10:18) Eniting we wi a se, wi fi mek shuor se a Jeuova it a mek di breda an sista dem tingk bout an im Wod di Baibl an wa a gwaan wid im piipl dem. (Rev. 4:11) Bot ef di kwestiyan tel wi se wi kyan taak likl bout wa a gwaan wid wi, wi fi du dat. Wi a-go si dis iina di neks paragraaf.

19. (a) Ef wi a tingk bout evribadi we de a di miitn, wa wi a-go du? (Ruoman 1:11, 12) (b) Wa mek yu laik fi ansa kwestiyan a di miitn dem?

¹⁹ Aalduo wi no av no ruul bout wa wi kyan se an wa wi no fi se wen wi a ansa kwestiyan a di miitn, wi fi stil mek shuor se wa wi a se a sitn we a-go mek wi wan aneda aat get chrangga. Fi du dat wi mait-a niid fi ansa muor kwestiyan, ar it mait-a miin se wi fi satisfai wid di mount a taim wi get fi ansa an glad se ada piipl api se dem get fi ansa tu. So wen wi no onggl a tingk bout wiself bot wi a tingk bout di breda an sista dem tu, aal a “wi kyan elp fi bil op wi wan aneda.”​—Riid Ruoman 1:11, 12.