DI LESN FI STODI 16
“Yu Breda A-Go Kom Bak Alaiv”!
“Jiizas se tu [Maata] se, ‘Yu breda a-go kom bak alaiv.’”—JAN 11:23.
SANG 151 Im A-Go Kaal Dem
DIS A WA WI A-GO LUK PAN a
1. Wa da likl bwai ya did se we mek wi nuo se im did riili biliiv se ded piipl kyan kom bak alaiv agen?
WAN likl bwai we did niem Matyu did sik bad an im did afi du uol iip a aparieshan. Wan a di taim wen im did a jos sevn, im an im fambili did a wach di JW Broadcasting® pruogram we kom a mont taim. Iina di laas paat a di pruogram, it did av wan myuuzik vidiyo iina it we did a shuo som piipl we did api fi si dem piipl we ded kom bak alaiv agen. b Wen di pruogram don, Matyu uol im mada an faada an an se tu dem se: “So yu si Mumi an Dadi, aal ef mi ded mi a-go kom bak alaiv wen Jeuova mek ded piipl kom bak alaiv agen. So unu kyan wiet pan mi, evriting a-go aarait.” Dis did mos mek im mada an faada api wen dem si se dem bwai pikni riili biliiv se ded piipl kyan kom bak alaiv agen.
2-3. Wa mek a wan gud ting fi sidong an tingk bout ou Gad a-go mek ded piipl kom bak alaiv?
2 It a-go du wi gud wen wi tingk bout wa di Baibl se a-go apm iina di fyuucha, se ded piipl a-go kom bak alaiv. (Jan 5:28, 29) It a-go du wi gud kaa wi no nuo wen tingz mait-a chienj wid wi, laik sumadi mait-a ded fi wi ar wi mait-a get sik bad. (Iik. 9:11; Jmz. 4:13, 14) Kaa wi nuo se ded piipl a-go kom bak alaiv agen, it elp wi fi go chuu dem prablem de. (1 Tes. 4:13) Di Baibl mek wi nuo se Jeuova lov wi an im nuo evriting bout wi. (Luuk 12:7) So im mos afi nuo wi gud so das im kyan mek wi kom bak di siem wie ou wi did tan bifuo wi did ded, an fi mek wi memba uu wi bi an evriting we wi did nuo aredi. Fi gi wi di chaans fi kyan liv fi eva an fi kyan kom bak alaiv ef wi ded, a wan nais sitn dis Jeuova du fi wi!
3 Iina da lesn ya, di fos ting wi a-go luk pan a wa mek wi kyan riili biliiv se ded piipl kyan kom bak alaiv. An den wi a-go luk pan di tuori iina di Baibl we av fi du wid wi mien skripcha fi da lesn ya, we se: “Yu breda a-go kom bak alaiv.” (Jan 11:23) An di laas ting wi a-go luk pan a wa wi kyan du fi mek shuor se wi riili biliiv se ded piipl a-go kyan kom bak alaiv.
DI PRAMIS WE GAD MEK SE DED PIIPL A-GO KOM BAK ALAIV, WA MEK WI KYAN BILIIV IT?
4. Fi biliiv se sumadi a-go du sitn we dem pramis se dem a-go du, wa wi afi shuor se? Tel wi wa mek yu se so.
4 Ef wi a-go biliiv se sumadi a-go du sitn we dem pramis se dem a-go du fi wi, wi afi shuor se dem wel waahn fi dwi’it an se a sitn we dem kyan du. It wuda komiin laik dis: Se wan orikien mash op yu ous bad an wan a yu fren dem pramis yu se dem a-go elp yu fi mek it op bak an yu nuo se a sitn dis we im riili waahn fi du an im a wan chriedzman we kyan mek ous fi chuu an im av aal a di tuul dem fi dwi’it. A dat a-go mek yu kyan biliiv se im a-go du wa im pramis yu se im a-go du. So wen Gad pramis se im a-go mek ded piipl kom bak alaiv, wa yu tingk se? Yu tingk im riili waahn fi mek ded piipl kom bak alaiv an a sitn we im kyan du?
5-6. Wa mek wi shuor se Jeuova wel waahn fi mek ded piipl kom bak alaiv?
5 Yu tingk se Jeuova wel waahn fi mek ded piipl kom bak alaiv? Ye man! Im wel waahn fi dwi’it. Wi se dat kaa nof a di man dem we rait di Baibl, im mek dem rait bout wa im pramis wi se ded piipl a-go kom bak alaiv. (Aiz. 26:19; Oz. 13:14; Rev. 20:11-13) An eniting we Jeuova pramis se im a-go du im aalwiez dwi’it. (Jash. 23:14) Ye, Jeuova wel waahn fi mek ded piipl kom bak alaiv. Wa mek wi kyan se so?
6 Juob did shuor se aal ef im ded Jeuova wel waahn fi mek im kom bak alaiv. (Juob 14:14, 15) An a dat Jeuova waahn fi du fi evribadi we worship im we ded. Bot im no onggl wel waahn dem fi kom bak alaiv, im waahn dem fi kom bak api an aati tu. An aal di bad piipl dem we neehn get di chaans fi nuo bout im, im a-go mek dem kom bak alaiv tu. (Aks 24:15) Im waahn dem fi kom bak alaiv so das dem kyan ton im fren an get di chaans fi liv fi eva pan di ort. (Jan 3:16) So wi si se Jeuova wel waahn fi mek ded piipl kom bak alaiv.
7-8. Wa mek wi nuo fi shuor se Jeuova kyan mek ded piipl kom bak alaiv?
7 Jeuova kyan riili mek ded piipl kom bak alaiv? Ye man! Im kyan dwi’it kaa im “av aal a di powa.” (Rev. 1:8) An a im av di powa fi get rid a eni enimi we wi av, laik aal det. (1 Kor. 15:26) An wen wi nuo dis, it mek wi fiil beta an gi wi di chrent fi go aan. Dis a wa did apm tu wan sista we niem Emma Arnold. Wen Worl Waar 2 did a gwaan, shi an ar fambili go chuu som sitn we did tes dem an mek dem si ef dem did riili a chos iina Gad. Fi osh ar daata an mek shi fiil beta kaaz a di uol iip a piipl we did ded fi dem iina di Natsi prizn we dem mek dem did a wok aad, shi tel ar daata se: “Ef piipl did ded fi eva den dat wuda miin se det chrangga dan Gad, no chuu?” An wi nuo se notn no chrangga dan Jeuova. Fi wi Gad we av aal a di powa uu mek evriting we av laif kyan gi bak laif tu di wan dem we ded aredi.
8 Wan neda riizn wa mek wi nuo se Jeuova kyan mek ded piipl kom bak alaiv a dat im kyan memba evriting. Im kyan aal kaal aal a di staar dem bai dem niem. (Aiz. 40:26) A siem so im memba di wan dem we ded. (Juob 14:13; Luuk 20:37, 38) An it no aad fi im memba evriting bout di wan dem we im a-go mek kom bak alaiv, laik ou dem did luk an ou dem did gwaan an di ting dem we dem go chuu iina laif. An im a-go mek dem memba aal a di sitn dem we dem did nuo bifuo dem ded.
9. Wa mek yu biliiv wa Gad pramis wi se ded piipl a-go kom bak alaiv?
9 Aal a wa wi luk pan aredi mek wi si se wi kyan biliiv aal a wa Jeuova pramis se im a-go du wen im se ded piipl kyan kom bak alaiv kaa im wel waahn fi dwi’it an im kyan dwi’it tu. An wan neda riizn wa mek wi biliiv a kaa a sitn we im du aredi, kaa wen wi riid di Baibl wi si se im mek Jiizas an som ada man mek ded piipl kom bak alaiv aredi. Mek wi luk pan wan a di taim dem wen Jiizas did mek sumadi kom bak alaiv. Wi kyan fain it iina Jan chapta 11.
JIIZAS FREN DED
10. Wen Jiizas did de kraas di Jaadn Riva a priich, wa did apm an wa im did du? (Jan 11:1-3)
10 Riid Jan 11:1-3. Tingk bout wa did gwaan iina di laas paat a di ier 32 C.E, iina wan plies we dem kaal Betani we Jiizas chrii fren dem did liv—Lazaros an im tuu sista dem, Mieri an Maata. (Luuk 10:38-42) Lazaros get sik bad, an im sista dem staat fi fret, so dem sen go tel Jiizas uu did de kraas di Jaadn Riva, an a bout tuu die it wuda tek yu fi waak fram de-so fi go a Betani. (Jan 10:40) Bot bai di taim di man we dem sen tu im kech de, Lazaros ded. Aalduo Jiizas fren Lazaros did ded, Jiizas neehn go siem taim. Im tan de fi tuu muor die bifuo im staat fi waak fi go a Betani. So bai di taim im did kech a Betani, Lazaros did ded fi fuor die aredi. So Jiizas did plan fi du sitn we wuda elp im fren dem an big op Gad tu.—Jan 11:4, 6, 11, 17.
11. Da tuori ya we de iina di Baibl, ou it elp wi fi si di kain-a fren wi fi bi?
11 Da tuori ya mek wi si di kain-a fren we wi fi bi. Wen Mieri an Maata did sen di man go tu Jiizas, dem neehn afi aks Jiizas fi kom, dem jos tel im se im fren sik. (Jan 11:3) An wen im fren Lazaros ded, Jiizas kuda tan we im de an mek im kom bak alaiv. Bot a no dat im du, im go a Betani we im fren Mieri an Maata de. Yu av wan fren laka Jiizas we wi kom elp yu widout yu afi aks dem fi kom elp yu? Ef yu av wan fren laka dat yu nuo se yu av sumadi we a-go de de fi yu “wen yu a go chuu aad taim.” (Pr. 17:17) It wuda gud fi aal a wi fi chrai fi bi wan gud fren laik ou Jiizas did a wan gud fren. Mek wi go bak iina di Baibl an si wa apm afta dat.
12. A wa Jiizas did tel Maata se im a-go du, an wa mek wi nuo se a chuu im did a taak? (Jan 11:23-26)
12 Riid Jan 11:23-26. Wen Maata ier se Jiizas did de nier Betani, shi go miit im an se: “Laad, . . . ef yu did de ya, mi breda wudn ded.” (Jan 11:21) A chuu ef im did de de im kuda did mek Lazaros get beta bot Jiizas tel ar se: “Yu breda a-go kom bak alaiv.” An dis wuda bi sitn big. An fi mek Maata riili biliiv wa im a se, im tel ar se: “Mi a di wan we mek piipl kom bak alaiv; a mi mek piipl liv.” Ye man, a Gad gi’im di powa fi mek ded piipl kom bak alaiv. An yu si di likl gyal pikni we Jiizas did mek kom bak alaiv, a likl afta shi ded im mek ar kom bak alaiv. An di ada man we Jiizas did mek kom bak alaiv, it luk laik se Jiizas did mek im kom bak alaiv di siem die wen im did ded. (Luuk 7:11-15; 8:49-55) Bot yu tingk im kuda mek Lazaros we ded fi fuor die nou an we mait-a aal staat fi ratn kom bak alaiv?
“LAZAROS, KUM OUT!”
Jiizas did fiil it fi im fren dem we did a baal kaa sumadi fi dem ded (Luk iina paragraaf 13-14)
13. Azkaadn tu Jan 11:32-35, wa Jiizas did du wen im si Mieri an di ada piipl dem a baal? (Luk pan di picha tu.)
13 Riid Jan 11:32-35. Afta dat, Lazaros sista we niem Mieri go miit Jiizas tu an se di siem ting we Maata did se. Shi se: “Laad, ef yu did onggl de ya, mi breda wudn ded.” Evribadi we did de de wid dem did sad bad an a baal. So wen Jiizas ier ou dem sad an a baal, im fiil it fi dem tu an im staat fi baal tu. Dis mek wi si se Jiizas nuo ou it at wen sumadi fi wi ded. So im wel waahn fi get rid a wa did a mek dem baal.
14. Wen wi si wa Jiizas du wen im si Mieri a baal, wa dat mek wi nuo bout Jeuova?
14 Di fak se wen Jiizas si Mieri a baal im did fiil it fi ar an baal tu mek wi si se a siem so Jeuova fiil it fi wi tu. An wi nuo dat kaa iina di lesn bifuo da wan ya wi si se eniting we Jiizas du a wa im Faada wuda du tu. (Jan 12:45) So wen wi riid an si se Jiizas si im fren dem sad an a baal, it mek im fiil sad tu an staat fi baal. Dis mek wi si se a siem so Jeuova fiil it tu wen im si wi sad an a baal. (Sa. 56:8) Fi nuo se Gad fiil it fi wi an kier bout wi so moch no mek yu waahn jraa niera tu im?
Jiizas mek wi si se det na’av notn uova im (Luk iina paragraaf 15-16)
15. Azkaadn tu Jan 11:41-44, wen dem go a Lazaros griev, wa did gwaan? (Luk pan di picha tu.)
15 Riid Jan 11:41-44. Wen Jiizas did riich wich paat Lazaros griev did de, im aks dem fi muuv we di stuon. Maata se di plies mos sumel bad bad so shi neehn waahn dem fi muuv we di stuon, bot Jiizas tel ar se: “Duohn mi tel yu se ef yu biliiv, yu wuda si ou Gad big an powaful?” (Jan 11:39, 40) Den Jiizas luk op iina di skai an prie infronta dem kaa im waahn fi big op Jeuova. Den Jiizas se: “Lazaros, kum out!” An Lazaros kom out. So Jiizas du sitn we piipl tingk kuda neva apm.—Luk pan di stodi nuot fi Jan 11:17, NWT.
16. Ou da tuori ya iina Jan chapta 11 kyan elp wi fi biliiv se ded piipl kyan kom bak alaiv agen?
16 Yu si da tuori ya we wi jos luk pan iina Jan chapta 11, it mek wi kyan riili biliiv se Jiizas kyan mek ded piipl kom bak alaiv agen. Kaa memba ino, Jiizas did tel Maata se: “Yu breda a-go kom bak alaiv.” (Jan 11:23) So wi si se Jiizas komiin laik im Faada kaa wen im did a baal im mek wi si se im wel waahn ded piipl fi kom bak alaiv an im no waahn nobadi fi a baal kaa sumadi fi dem ded. An dis a sitn we im kyan du. An fram Lazaros kom outa di griev it mek wi si se Jiizas kyan mek ded piipl kom bak alaiv agen. An memba Jiizas did tel Maata se: “Duohn mi tel yu se ef yu biliiv, yu wuda si ou Gad big an powaful?” (Jan 11:40) So wi av uol iip a riizn fi biliiv se wen Gad pramis wi se im a-go mek ded piipl kom bak alaiv im a-go dwi’it. Wa wi kyan du fi chos iina Gad muor an muor se im kyan mek ded piipl kom bak alaiv?
WA WI KYAN DU FI CHOS IINA GAD MUOR SE IM KYAN MEK DED PIIPL KOM BAK ALAIV?
17. Wa wi fi memba wen wi a riid di tuori dem iina di Baibl bout wen ded piipl kom bak alaiv?
17 Riid di tuori dem we tel wi bout wen piipl did kom bak alaiv, an sidong an tingk bout dem. A iet piipl di Baibl tel wi bout we kom bak alaiv pan da ort ya. c An wen yu riid dem tuori ya, memba se a riil piipl dem a tel wi bout. Tingk bout wa dem tuori ya a tiich wi se an tingk bout ou dem mek wi si se Gad wel waahn fi mek ded piipl kom bak alaiv an se im kyan dwi’it tu. An outa aal dem, tingk bout di wan we fi miin di muos tu wi—dat a di wan bout Jiizas. Kaa memba se a wol iip a piipl did si se Jiizas did kom bak alaiv. So wi kyan riili biliiv se ded piipl a-go kom bak alaiv fi chuu.—1 Kor. 15:3-6, 20-22.
18. Wa yu fi du wid di sang dem we taak bout wen ded piipl a-go kom bak alaiv? (Luk pan di said paint tu.)
18 Mek wi sing di ‘sang dem we bies pan di Baibl’ we mek wi nuo se ded piipl a-go kom bak alaiv. d (Ifii. 5:19) Wen wi sing dem sang ya, dem mek wi chos iina Gad muor an muor se im kyan mek ded piipl kom bak alaiv. Lisn tu dem, an sing dem uova an uova agen, an wen yu go a yu fambili Baibl stodi taak bout wa dem a se an chrai fi nuo dem bai aat. Wen yu du dat, ef yu a go chuu wan rof taim iina laif ar ef sumadi fi yu ded, Jeuova uoli spirit a-go elp yu fi memba di sang dem. An wen yu memba dem, dem a-go elp yu fi fiil beta an fi go chuu.
19. Wa a som a di sitn dem we wi kyan sidong an tingk bout wa a-go apm wen ded piipl kom bak alaiv? (Luk pan di paat we niem “ Wa Yu Wuda Aks Dem Se?”)
19 Fiil laik se yu de de. Jeuova mek wi iina wan wie we wi kyan sidong an fiil laik se wi de iina di nyuu worl. Wan sista se: “Mi sidong an tingk bout wa laif wuda komiin laik iina di nyuu worl til it komiin laik mi kyan sumel di flowaz dem we de de.” Jos tingk bout ou it a-go nais wen yu get fi miit di man an uman dem we did de bout wen di Baibl did a rait we did a sorv Gad. Wich wan a dem yu wuda wel waahn fi si? An wa yu wuda aks dem? Tingk bout ou it a-go nais wen yu get fi si yu piipl dem we ded kom bak alaiv, an tingk bout di fos ting we yu a-go se tu sumadi fi yu we kom bak alaiv an ou yu a-go og dem op, an tingk bout ou wi a-go baal, no kaa wi mis dem bot kaa wi api fi si dem.
20. Wa wi fi mek op wi main fi du?
20 Wi tangk Jeuova fi nuo se im a-go mek ded piipl kom bak alaiv an wi nuo se im a-go dwi’it fi chuu kaaz im wel waahn fi dwi’it an im kyan dwi’it tu. Wa wi fi du a mek op wi main fi chos muor an muor iina wa Jeuova pramis wi se im a-go du. Wen wi du dat wi a-go jraa niera an niera tu Gad, an a im pramis evri singgl wan a wi se, ‘Yu piipl we ded a-go kom bak alaiv!’
SANG 147 Wi Kyan Liv Fi Eva!
a Ef sumadi fi yu ded, it mek yu fiil beta fi nuo se ded piipl kyan kom bak alaiv agen, no chuu? Bot yu wuda kyan tel sumadi wa mek yu biliiv se ded piipl kyan kom bak alaiv? Wa wi kyan du so dat wa wi biliiv kyan get chrangga? Da lesn ya a-go elp aal a wi fi nuo fi shuor se ded piipl kyan kom bak alaiv.
b Di myuuzik vidiyo did niem Just Around The Corner an it did kom iina di Novemba 2016 braadkyaas pan JW Broadcasting.
c Luk pan di paat we niem “Eight Resurrections Described in the Bible” we de iina The Watchtower fi Aagos 1, 2015, p. 4.
d Luk pan dem sang ya iina di sang buk we niem “Sing Out” Tu Jeuova Wid Jai Iina Yu Aat: Sang 139—“Imajin Yuself Iina Paradais”, Sang 144—“Kip Yu Main Pan Paradais”, an Sang 151— “Im A-Go Kaal Dem.” An yu kyan sing di orijinal sang dem we de pan jw.org we niem “Just Around the Corner,” an “The New World to Come,” an di wan we niem “You Will See.”
