1. Wa wi fi mek op wi main fi du?

 YU AV nof piipl we a paat a Jeuova aaganaizieshan we a worship im an a du nof gud tingz fi dem wan aneda, an dem a wok tugeda az wan iina piis. An dem mek op dem main se dem naa go tap worship Jeuova. An dem a du aal a wa dem kyan du fi elp ada piipl fi kom liv iina piis wid Jeuova an dem wan aneda.

2. Wa a som a di blesn dem we di wan dem we a worship Jeuova wid im piipl dem a-go get?

² Aalduo Sietan a mek bie wikid sitn a gwaan iina da worl ya, Jeuova a mek im piipl dem wok tugeda az wan an a liv iina piis. (1 Jan 5:19; Rev. 12:12) Jeuova si se da worl ya kyan mash wi op, bot im gi wi wa wi niid so wi kyan fiil sief so dat wi kyan gwaan worship im an api stil. Jeuova pramis di piipl dem we a worship im se “[im] a-go kip dem sief” an im a-go tek kier a dem. (Aiz. 4:6; 58:11) An kaa Jeuova a bles di wan dem we a worship im, dem a-go go chuu di laas die dem an aarait.​—Aiz. 54:14; 2 Tim. 3:1.

3. A wen wa rait dong iina Aizaiya chapta 65 did apm fi di fos taim?

³ Jeuova mek im prafit Aizaiya rait bout wa laif wuda komiin laik fi im piipl dem we a worship im. Yu kyan fain it iina Aizaiya chapta 65. An wa Aizaiya rait did apm fi di fos taim iina 537 B.C.E., wen di wan dem we dem did kyapcha an kya go a Babilan did get fi go baka Jeruusilem. An Jeuova bles dem an im elp dem fi mek Jeruusilem wan priti plies agen, an fi fiks op bak im ous so dat dem kyan worship im de agen iina Izrel.​—Aiz. 51:11; Zak. 8:3.

4. A ou wa Aizaiya chapta 65 taak bout a apm ya nou?

 ⁴ Di sekan taim wen wa Aizaiya did rait dong did apm a iina 1919 C.E., wen Jeuova piipl dem did get frii fram Powaful Babilan an staat fi worship im di rait wie. So yu staat fi av uol iip a kanggrigieshan, kaa yu did av uol iip a breda an sista a priich aad, an man an uman staat fi chienj di wie ou dem liv. Laik piipl we yuus tu fait an gwaan laik animal “lorn fi liv laik wan nyuu sumadi we Gad mek aal uova agen. Gad mek [dem] fi tan jos laik im.” (Ifii. 4:24) Bot wi nuo se uol iip a dem sitn ya we Aizaiya se a-go apm, a-go apm iina evri wie iina di nyuu worl. Bot rait ya nou wi a si som a dem gud sitn ya a apm. Mek wi luk pan ou it a elp wi kaa wi a worship Jeuova wid im piipl dem, an wa mek wi no fi lef Jeuova an im piipl dem.

A OU DI PIIPL DEM WE A WORSHIP JEUOVA TAN?

5. Azkaadn tu Aizaiya 65:13, wa a som a di nais sitn dem we wi a get kaa wi a worship Jeuova?

⁵ Dem av wa dem niid fi tan op chrang an fiil gud. Aizaiya mek wi nuo wa laif a-go komiin laik fi di piipl dem we a sorv Jeuova an di wan dem we naa sorv im. (Riid Aizaiya 65:13.) Jeuova a-go mek di wan dem we a worship im get di ting dem we dem niid fi sorv im di rait wie. Dem av im uoli spirit, im Wod di Baibl, an uol iip a buk an pamplet an ada tingz so dat dem kyan ‘nyam nof, jringk, an ful op a jai.’ (Luk pan Revilieshan 22:17.) Bot yu si di wan dem we naa sorv Jeuova dem ‘a-go ded fi onggri, dem chuot a-go jrai bad, an dem a-go fiil shiem.’ Dem naa go get di sitn dem we dem niid fi sorv Jeuova di rait wie.​—Iemos 8:11.

6. Wa a som a di ting dem we Jowel 2:21-24 se Jeuova gi wi we mek wi stie kluos tu im, an ou dem mek wi fiil?

⁶ Di prafit Jowel did taak bout tingz we di piipl dem did niid, laik wiit an dem ting de, wain, an aliv ail. An im taak bout ou Jeuova gi im piipl dem dem sitn ya we dem niid an ou im gi dem tingz we a-go mek dem stie kluos tu im. (Jowel 2:21-24) Laik Jeuova yuuz di Baibl, di buk an pamplet dem we bies aafa di Baibl, wi websait, an wi miitn dem, an di kanvenshan dem, an di sorkit miitn dem fi elp wi fi stie kluos tu im. Wi kyan get dem sitn ya we mek wi nuo muor bout Jeuova evridie, an dem kyan mek wi tan op chrang an fiil gud.

7. Wa mek wi nuo ‘iina wi aat se wi a du wa Jeuova waahn wi fi du’? (Aizaiya 65:14)

⁷ Dem api an aarait wid wa dem av. Jeuova piipl dem a-go “shout out kaaz dem api.” (Riid Aizaiya 65:14.) Kaaz a di chuut we iina Gad Wod, an di sitn dem we im pramis wi, an kaaz Jiizas kom ded fi wi, wi nuo se wi a-go get di sitn dem we Gad pramis wi. It mek wi nuo ‘iina wi aat se wi a du wa Jeuova waahn wi fi du.’ An wen wi taak bout dem sitn ya wid wi breda an sista dem, it mek wi api tu!​—Sa. 34:8; 133:1-3.

8. Wa a tuu mien ting wi nuo bout di piipl dem we a worship Jeuova?

⁸ Tuu mien ting bout di piipl dem we a worship Jeuova a dat dem lov dem wan aneda an dem a wok tugeda az wan. An “a lov bring di uol a dem tugeda laik se dem a onggl wan sitn.” Dis mek wi si wa laif gweehn komiin laik iina di nyuu worl wen Jeuova piipl dem a-go lov dem wan  aneda muor an a wok tugeda az wan. (Kol. 3:14) Wan sista tel wi bout wa did apm di fos taim shi go mongks di Jeuova Witnis dem, shi se: “Mi neehn nuo ou fi api, nat iivn wen mi de mongks mi fambili. Di fos taim wen mi si wa it riili miin fi shuo se yu av lov a wen mi go mongks di Jeuova Witnis dem.” So enibadi we waahn fi riili api an aarait wid dem laif afi a worship Jeuova wid im piipl dem. No mata wa piipl tingk bout di Jeuova Witnis dem, kaa wi lov wi wan aneda an a wok tugeda, wi nuo se wi a paat a Jeuova big fambili we mek im api, an wi a mek evribadi we a worship im api tu.​—Aiz. 65:15.

9. A wa Aizaiya 65:16, 17 se a-go apm iina di nyuu worl?

⁹ Dem a rak bak an iizi demself. Aizaiya 65:14 se di wan dem we mek op dem main fi no worship Jeuova wid im piipl dem a-go ‘shout out kaa dem aat a-go a bon dem an dem a-go ala an baal kaa notn naa go gwaan fi dem.’ Bot dat no miin tu se di wan dem we a sorv Jeuova naa go av no prablem iina dem laif. Bot wi nuo fi shuor se iina di nyuu worl, “nobadi naa go memba di bad sitn dem we yuus tu gwaan, an [Gad] naa go si dem sitn de agen.” (Riid Aizaiya 65:16, 17.) So Jeuova a-go mek shuor se wi no av no muor prablem, an likl bai likl wi naa go memba di bad sitn dem we did apm tu wi.

10. Wa mek yu fiil se a wan nais ting fi de mongks yu breda an sista dem? (Luk pan di picha tu.)

¹⁰ No mata di prablem dem we a gwaan iina wi laif, wen wi de a wi miitn dem wi fiil laik se wi kyan rak bak an iizi wiself. An wi kyan elp fi mek wi breda an sista dem fiil di siem wie tu. An wi du tingz fi shuo se wi av Gad spirit wen wi lov evribadi an aalwiez api no mata wa, an wen wi liv gud wid piipl, an wen wi kain an jengkl. (Gya. 5:22, 23) A wan nais sitn fi bi paat a Jeuova aaganaizieshan! An di wan dem we a worship Jeuova a-go get fi si di taim wen Jeuova pramis wi se im a-go “mek di evn dem an di ort” nyuu.

11. Azkaadn tu Aizaiya 65:18, 19, kaa wi a worship Jeuova wid im piipl dem, wa dat mek wi waahn fi du?

¹¹ Dem gi tangks fi wa dem av an dem api. Aizaiya mek wi nuo wa mek di wan dem we a sorv Jeuova “api . . . an fiil glad.” A Jeuova mek wi kyan worship wid im piipl dem da wie ya. (Riid Aizaiya 65:18, 19.) An a das wai im a mek wi  priich tu piipl so dat dem kyan kom outa da wikid worl ya an kom sorv im wid im piipl dem. Wi api an wi tangk im fi aal a di blesn dem we wi a get kaa wi de iina im aaganaizieshan, an dat push wi fi tel ada piipl bout dem blesn de.​—Jer. 31:12.

12. Ou di sitn dem we Aizaiya 65:20-24 se a-go apm mek yu fiil, an wa mek?

¹² Kaa wi a sorv Jeuova wid im piipl dem, wi a luk faawod fi si nof tingz an fi du nof tingz iina di nyuu worl. An a dem sitn de mek wi gi tangks an api tu. Di Baibl mek wi nuo se “yu naa go av no biebi we jos liv fi wan likl taim an ded, an yu naa go av wan uol man we no liv out im taim.” Wi a-go ‘bil ous an liv iina dem, an wi a-go plaant op wi griep faam an wi a-go enjai we wi wok fa.’ Wi “naa go wok aad fi notn” kaa ‘Jeuova a-go bles aal a wi.’ Jeuova pramis wi se im a-go kip wi sief an mek wi api wid wi laif an av sitn fi liv fa. Im se, “Aal bifuo dem baal out, mi a-go ansa dem,” an im a-go nuo wa dem niid, an im a-go “gi evriting we a liv wa dem waahn.”​—Aiz. 65:20-24; Sa. 145:16.

13. Wen piipl chienj op dem laif an staat sorv Jeuova, wa Aizaiya 65:25 tel wi se it komiin laik?

¹³ Dem liv iina piis wid dem wan aneda an dem fiil sief. Gad spirit mek uol iip a piipl we yuus tu gwaan laik dem a wail daag chienj di wie dem liv dem laif. (Riid Aizaiya 65:25.) Dem don we wid di wikid sitn dem we dem yuus tu du. (Ruo. 12:2; Ifii. 4:22-24) Kaa Jeuova piipl no porfek, dem stil a-go mek mistiek. Bot Jeuova a mek aal saat a “piipl” lov dem wan aneda an liv iina piis. (Taitos 2:11) An dis a sitn we onggl Gad kuda du!

14. Ou wa did apm wid wan breda mek wi nuo se wa Aizaiya 65:25 se a chuu?

¹⁴ Piipl riili kyan chienj dem wiez? Luk pan wa did apm tu wan yong man we bai di taim im a 20 a nof taim im go a prizn. Im yuus tu du aal kain-a seks sin an dem ting de, an im did kwik fi fait piipl. Im did go a jiel kaa im tiif kyaar, brok iina piipl ous, an im du som ada bad sitn tu. Wen im staat fi lorn di chuut an go a di miitn dem wid Jeuova piipl, im did nuo fi shuor se im fain sitn gud fi liv fa. An so afta im baptaiz, a nof taim im se Aizaiya 65:25 did a taak bout im. Kaa aalduo im yuus tu gwaan laik laiyan, im komiin laik wan biebi shiip ya nou.

15. Wa mek wi waahn ada piipl fi kom kom sorv Jeuova wid wi, an ou wi kyan elp dem fi du dat?

¹⁵ Aizaiya 65:13 staat wid dem wod ya: “Dis a wa Jeuova, di Wan we av di rait fi ruul uova evribadi an evriting se.” An vors 25 don wid dem wod ya: “A dat Jeuova se.” An wi nuo se eniting we Jeuova se a-go apm, a dat a-go apm. (Aiz. 55:10, 11) An Jeuova a mek im piipl dem liv iina piis wid dem wan aneda, an dem fiil api an sief wen dem de mongks dem wan aneda aalduo a bie wikidnis a gwaan iina di worl. (Sa. 72:7) An a das wai wi waahn fi du evriting we wi kyan du fi elp uol iip a piipl fi kom kom sorv Jeuova wid wi, an wi kyan du dat wen wi elp piipl fi ton Jiizas falara.​—Mat. 28:19, 20.

WA WI KYAN DU FI MEK ADA PIIPL WAAHN KOM SORV JEUOVA WID WI?

16. A wa mek piipl waahn fi kom sorv Jeuova wid im piipl dem?

¹⁶ Aal a wi kyan du sitn fi mek piipl waahn fi kom sorv Jeuova, an wi kyan du dis ef wi chrai fi du tingz laik Jeuova. Im no fuos piipl fi kom sorv im, bot im tek im taim an “jraa” dem tu im. (Jan 6:44; Jer. 31:3) Wen piipl we av wan gud  aat lorn bout Jeuova nais wiez dem, dem kyaahn du notn bot waahn fi sorv im. Ou wen wi gwaan gud an av som gud wiez it kyan mek ada piipl waahn fi kom sorv Jeuova wid wi?

17. Wa wi kyan du fi mek ada piipl waahn fi kom sorv Jeuova wid wi?

¹⁷ Wan neda ting we wi kyan du fi mek ada piipl waahn fi kom sorv Jeuova wid wi a wen wi chriit wi wan aneda kain an du tingz fi shuo se wi lov wi wan aneda. Wen piipl kom a wi miitn fi di fos taim, wi waahn dem fi se di siem ting we di piipl dem se wen dem go a di miitn dem a Korint fi di fos taim. Dem se: “Gad riili de mongks unu.” (1 Kor. 14:24, 25; Zak. 8:23) So wi fi chrai aad fi du wa di Baibl se an gwaan “liv iina piis mongks [wi] wan aneda.”​—1 Tes. 5:13.

18. Wa mait-a mek ada piipl waahn fi kom sorv Jeuova wid wi tu?

¹⁸ Wi fi aalwiez chrai fi luk pan wi breda an sista dem laik ou Jeuova luk pan dem. So wi fi chrai an luk pan di gud wiez dem we dem av, an no di likl bad wiez dem we dem mait-a av, we wi nuo se dem naa go av iina di nyuu worl. So ef yu av no prablem wid non a wi breda ar wi sista dem, wen yu a diil wid it, chrai fi dwi’it iina wan wie we shuo se yu lov dem. So wi fi aalwiez ‘kain an gud tu wi wan aneda an wi no fi kip op wan aneda iina wi aat, an wi fi paadn wi wan aneda tu.’ (Ifii. 4:32) An wen wi du dat, wi a-go mek ada piipl waahn fi kom sorv Jeuova wid wi kaaz a so dem waahn piipl fi chriit dem tu. a

 NO TAP SORV JEUOVA WID IM PIIPL DEM

19. (a) Wa som a di breda an sista dem se iina di paat we niem “ Dem Tap Worship Jeuova Wid Im Piipl Dem, An Den Dem Kom Bak”? (b) Wa wi fi mek op wi main fi du? (Luk pan di picha tu.)

¹⁹ Wi fi aalwiez tangk Jeuova fi mek wi get di chaans fi worship im wid im piipl dem. An a nof muor piipl a worship im nou muor dan no ada taim. An ef sumadi waahn fi fiil gud an aarait wid wa dem av an waahn fi kyan rak bak an iizi demself an fiil sief, dem fi staat sorv Jeuova an no tap. Bot memba se Sietan a chrai evriting we im kyan du fi chrik wi op fi mek wi tap sorv Jeuova. (1 Pii. 5:8; Rev. 12:9) Bot wi no fi mek im kech wi. So mek wi du evriting we wi kyan du fi kip Jeuova aaganaizieshan kliin an nais, an du tingz so dat wi kyan liv iina piis wid wi breda an sista dem.