SOM a dem man ya we a neehn Izrelait we did de iina Dievid aami a man laik Ziilek we did a wan Amanait man, Yuuraiya we a did wan Itait man, an Itma we a did wan Mowabait man.  a (1 Kr. 11:39, 41, 46) Dievid did aal av som Keretait, Peletait, an Gitait man iina di aami. (2 Sam. 15:18) Som piipl did aal fiil se di Keretait an di Peletait dem an di Filistiin man dem a fambili. (Izii. 25:16) Di Gitait kom fram wan plies iina Filistiya we niem Gyat.​—Jash. 13:2, 3; 1 Sam. 6:17, 18.

Dievid did mek dem man ya bi paat a im aami kaa im did nuo se dem wuda stik tu im an Jeuova no mata wa. Laik The New Interpreter’s Dictionary of the Bible se dis bout di Keretait an di Peletait dem, it se: “Dem stik tu Dievid wen tingz did rof bad wid im.” An wi nuo dis kaa wen aal a di Izrelait man dem did go we lef im an go fala bak a Shiiba we did a gi Dievid bie chobl, dem man ya did stik tu Dievid an elp im fi get rid a Shiiba an di eda man dem we did a fala Shiiba. (2 Sam. 20:1, 2, 7) An wan neda taim yu did av Dievid uona son, Adonaija, we did a chrai fi tek uova an ton king. Bot di Keretait an di Peletait dem stik tu Dievid agen an mek im get fi mek Salaman ton king, kaaz a im Jeuova did pik fi ton king afta Dievid.​—1 Ki. 1:24-27, 38, 39.

Wan neda man we did stik tu Dievid a Itai we kom fram Gyat. Im an di 600 man dem we did de iina di aami did elp Dievid fi fait wen Dievid son Absalam did ton gens im an get di ada man dem fram Izrel fi a fait gens Dievid tu. Fos Dievid did mek Itai nuo se kaaz im a neehn wan Izrelait, im neehn afi kom elp im fait. Bot Itai mek im nuo se fi az lang az Jeuova a liv an im a king, no mata we im de an no mata ef im a-go ded ar im a-go liv, im a-go de de fi im.​—2 Sam. 15:6, 18-21.

Aalduo dem man ya a neehn wan Izrelait, dem did nuo se Jeuova a di chuu Gad an se a Dievid im did pik fi ton king. Dievid mos did api fi av dem man ya we did a stik tu im no mata wa.