1-2. Wa mek wi go a di Laad Sopa evri ier?

 A BOUT 2,000 ier a-go Jiizas kom ded fi wi, an a dat a-go kyan mek wi liv fi eva. Di nait bifuo Jiizas ded, im tel im falara dem se dem fi kip wan likl miitn an yuuz onggl bred an wain fi memba wa im du fi shuo dem se im lov dem.​—1 Kor. 11:23-26.

² Wi du aal a wa Jiizas se wi fi du kaa wi lov im so moch. (Jan 14:15) Evri ier iina di Laad Sopa taim, wi shuo Jiizas se wi tangk im fi wa im du fi wi wen wi prie an tingk bout wa mek im did afi ded fi wi. An wi api fi du muor iina di priichin wok so dat wi kyan invait uol iip a piipl fi kom a di Laad Sopa. An wi a-go mek shuor se wi du aal we wi kyan du so dat notn no tap wi fram go a di Laad Sopa.

3. Wa wi a-go luk pan iina da lesn ya?

³ Iina da lesn ya, wi a-go luk pan chrii sitn we Jeuova piipl dem du fi mek shuor se dem kip di Laad Sopa: (1) dem dwi’it di wie ou Jiizas did dwi’it, (2) dem invait ada piipl fi kom a di Laad Sopa tu, an (3) dem kip di Laad Sopa aal wen it aad fi dem dwi’it.

4. Wa a som a di sitn dem we wi lorn a di Laad Sopa evri ier, an wa mek wi fi api fi lorn bout dem sitn ya? (Luuk 22:19, 20)

⁴ Evri ier wen wi go a di Laad Sopa wi lisn tu wan Baibl taak we ansa som wol iip a kwestiyan. Iina di taak wi lorn  wa mek sumadi did afi kom ded fi wi an ou kaa wan sumadi ded fi wi uol iip a piipl kyan get paadn fi dem sin. An it mek wi memba wa di bred miin an wa di wain miin an uu fi nyam an jringk it. (Riid Luuk 22:19, 20.) An it mek wi tingk bout aal a di blesn dem we di wan dem we a-go liv fi eva pan di ort a-go get. (Aiz. 35:5, 6; 65:17, 21-23) Aal a dem sitn ya we wi lorn, wi fi api fi dem kaa wol iip a piipl no nuo dem, an dem no nuo bout di big ting we Jiizas du fi wi. An dem no kip di Laad Sopa di wie ou Jiizas did tiich wi fi dwi’it. Wa mek?

5. Afta muos a Jiizas apasl dem did ded aaf, ou piipl staat fi kip di Laad Sopa?

⁵ Afta muos a Jiizas apasl dem did ded aaf, som fiek Kristiyan did kom iina di kanggrigieshan. (Mat. 13:24-27, 37-39) Dem did staat fi “tiich som torbl sitn we go gens di chuut fi get som a [Gad piipl] fi fala dem.” (Aks 20:29, 30) Wan a di “torbl sitn” dem we di fiek Kristiyan dem did staat fi tiich a dat Jiizas neva “sakrifais imself onggl wan taim fi paadn uol iip a piipl sin” laik wa di Baibl se, bot dem fiil se im sakrifais afi gi op uova an uova agen. (Iib. 9:27, 28) An a nof piipl tide we waahn sorv Gad di rait wie biliiv dis. A uol iip a taim dem go a choch​—aal evri die som a di taim​—fi go kip komyuuniyan. b Bot a no evri choch kip it so aafn, an muos a di piipl dem we go a dem choch de no andastan wa it du fi wi kaa Jiizas ded fi wi. Som a dem mait-a aal a aks demself, ‘Kaa Jiizas ded fi mi, it riili miin se Gad kyan paadn mi sin dem?’ Wa mek yu tingk dem aks da kwestiyan ya? Dem mait-a a wanda bout it kaa a wa dem ier ada piipl se we no biliiv se kaa Jiizas kom ded fi wi, wi kyan get paadn fi wi sin dem. Bot a ou Jiizas falara dem did get di ansa fi da kwestiyan ya?

6. Wa di wan dem we did a stodi Gad Wod aad aad fain out bai 1872?

⁶ Iina 1870, Charles Taze Russell an di wan dem we im an dem did a stodi di Baibl did a stodi it aad aad. Dem did waahn fi nuo wa it miin se Jiizas kom ded fi wi an ou dem fi kip di Laad Sopa. Kaa dem did a stodi di Baibl aad aad, bai 1872 dem get fi si se Jiizas did ded fi evribadi. So dem rait bout wa dem fain out se iina som buk an nyuuzpiepa an magaziin so ada piipl kyan nuo bout it tu. An dem staat fi kip di Laad Sopa wan taim fi di ier laik ou di fos taim Kristiyan dem yuus tu dwi’it.

7. Ou it a elp wi kaa Russell an di ada wan dem stodi di Baibl aad aad?

⁷ Kaa a di wok we Russell an dem wan de did du fi fain di chuut, a dat a elp wi nou. Ou it a elp wi? A so Jeuova elp wi fi nuo di chuut bout wa Jiizas du fi wi an ou it kyan elp wi. (1 Jan 2:1, 2) An wi get fi fain out se di Baibl taak bout tuu gruup a piipl we a du wa Gad waahn dem fi du​—wan set a-go get fi liv iina evn we kyaahn go ded an wan neda biga gruup a piipl a-go liv fi eva pan di ort. Wen wi tingk bout umoch Jeuova lov wi an wi tingk bout aal a di gud sitn dem we wi a-go get kaaz Jiizas ded fi wi, it mek wi an Jeuova get kluos kluos. (1 Pii. 3:18; 1 Jan 4:9) So jos laik wa wi ada breda  an sista dem yuus tu du, wi invait ada piipl fi kom a di Laad Sopa an wi dwi’it jos laik ou Jiizas se wi fi dwi’it.

8. A wa a som a di sitn dem we Jeuova piipl dem du fi invait ada piipl fi kom a di Laad Sopa? (Luk pan di picha.)

⁸ A fram lang taim Jeuova piipl a invait ada piipl fi kom a di Laad Sopa. Fram wie bak iina 1881, dem did invait di breda an sista dem iina Merika fi kom a di Laad Sopa we dem did a kip a sumadi yaad iina Aligeni, Pensilvieniya. Likl afta dat, di kanggrigieshan dem staat fi kip dem uona Laad Sopa. Iina Maach 1940, dem tel di wan dem we a priich se dem kyan invait enibadi we liv iina dem ieriya we waahn fi kom. An iina 1960, fi di fos taim di breda dem a Betel print som invitieshan fi di Laad Sopa fi di kanggrigieshan dem gi out. Fram dem taim de, a uol iip an uol iip a invitieshan dem fi di Laad Sopa di breda an sista dem gi out. A wa mek wi du evriting we wi kyan du fi invait ada piipl fi kom a di Laad Sopa?

9-10. A uu an uu wi elp wen wi invait dem fi kom a di Laad Sopa? (Jan 3:16)

⁹ Wi waahn ada piipl fi kom a di Laad Sopa wid wi kaa wi waahn dem fi lorn di chuut bout wa Jeuova an Jiizas du fi wi. (Riid Jan 3:16.) Wi a uop se wa dem si an ier a di Laad Sopa wi push dem fi lorn muor tingz so dat dem kyan staat sorv Jeuova.

¹⁰ Wi aal invait di breda an sista dem we tap priich an we tap kom a di miitn  dem kaa wi waahn dem fi memba se Jeuova lov dem an im kier bout dem. An uol iip a dem aalwiez kom wen wi invait dem an wi api fi si dem. An wen dem kom a di Laad Sopa, dem get fi memba ou it did nais fi sorv Jeuova. Luk pan wa apm wid Monica. c Iina KUOVID shi staat fi priich an kom baka miitn agen. Afta shi go a di Laad Sopa iina 2021, shi se: “Da Laad Sopa ya did a wan speshal wan fi mi kaa fram 20 ier til nou a di fos taim mi get fi priich tu piipl an invait dem fi kom a di Laad Sopa. An mi du evriting mi kuda du fi dwi’it, an mi tangk Jeuova an Jiizas fi wa dem du fi mi.” (Sa. 103:1-4) Weda piipl kom a di Laad Sopa ar dem no kom, wi du evriting wi kyan du fi invait dem, an wi nuo se a dat Jeuova waahn wi fi du an im api wen wi dwi’it.

11. Ou Jeuova bles di wok we wi du fi invait piipl fi kom a di Laad Sopa? (Agai 2:7)

¹¹ Jeuova bles we wi du fi invait piipl fi kom a di Laad Sopa. Iina 2021, aalduo KUOVID did a gwaan bad an di plies did anda lakdong, a 21,367,603 piipl kom a di Laad Sopa. Dis a di muos piipl wi eva av kom a di Laad Sopa, an dat a muor dan tuu taim di mount a Jeuova Witnis dem we de iina di worl. Bot wi nuo se di big ting tu Jeuova a no nomba, bot di big ting tu im a di piipl dem we waahn fi lorn muor bout im. (Luuk 15:7; 1 Tim. 2:3, 4) Wi nuo se wen wi go out go invait piipl fi go a di Laad Sopa, Jeuova yuuz wi fi elp wi fi fain piipl we wel waahn fi lorn muor bout im.​—Riid Agai 2:7.

12. Wa a som a di sitn dem we mait-a mek it aad fi wi kip di Laad Sopa? (Luk pan di picha.)

¹² Jiizas did tel wi se iina di laas die dem wi a-go go chuu wol iip a prablem​—laik im mek wi nuo se sumadi wos enimi a-go bi paat a fi dem uona fambili, an piipl a-go chriit wi bad kaa wi a fala Jiizas, bie waar a-go a gwaan, aal kain-a siknis a-go kil aaf piipl, an nof muor wikid sitn a-go a gwaan. (Mat. 10:36; Maak 13:9; Luuk 21:10, 11) Somtaim dem sitn ya mek it aad fi wi fi go a di Laad Sopa. Bot wa a som a di sitn dem we wi breda an sista dem du fi mek shuor se dem kip di Laad Sopa aalduo tingz mait-a did aad fi dem, an ou Jeuova elp dem fi dwi’it?

13. Kaa Artem did briev an im neehn mek notn tap im fram kip di Laad Sopa wen im did de iina prizn, ou Jeuova bles im?

¹³ Iina prizn. Wi breda an sista dem we de iina prizn kaaz a wa dem biliiv iina du evriting we dem kyan du fi kip di Laad Sopa. Iina 2020 roun di taim wen di Laad Sopa fi gwaan, dem did put wan a wi breda dem we niem Artem iina wan likl prizn sel, an som a di taim aal faiv man dem av iin de wan taim. Iivn duo im did de iina prizn im get tingz we im kuda yuuz fi di bred an di wain fi di Laad Sopa. An im did plan fi gi di Laad Sopa taak fi imself. Bot di ada man dem we did de iina di sel wid im sumuok an kos uol iip a bad wod, so im aks dem se ef dem kuda no kos no bad wod an sumuok fi jos wan owa. Artem did fraitn fi si se di man dem se ye, dem naa go sumuok ar kos no bad wod wen di Laad  Sopa a gwaan. Artem se: “Mi tel dem se mi kuda tel dem bout di Laad Sopa.” Dem tel im se dem neehn waahn fi ier bout it, bot afta dem si wa im du an ier di taak we Artem gi, dem staat fi aks im wol iip a kwestiyan bout it.

14. Wa a som a di sitn dem di breda dem du so dat di breda an sista dem kuda kip di Laad Sopa aal wen KUOVID a kip?

¹⁴ Wen KUOVID-19 did a go roun. Wen KUOVID-19 staat go roun, Jeuova piipl dem kudn go a di Laad Sopa wid dem wan aneda. Bot dat neva tap dem fram kip di Laad Sopa. d Iina di kanggrigieshan dem we did av intanet, di breda an sista dem yuuz vidiyo kaal fi kom iin pan di miitn. Bot wa bout di wol iip a breda an sista dem we neehn av intanet? Iina som a dem konchri de di breda dem saat out tingz fi gi di taak pan di TV ar pan di riediyo. Pan tap a dat, som branch afis rekaad di taak iina muor dan 500 langwij so dat di breda an sista dem an ada piipl we liv faar faar kuda stil kip di Laad  Sopa, an di breda dem saat out tingz so dat di piipl dem we fi get di taak get it.

15. Wa wi kyan lorn fram wa did apm tu Sue?

¹⁵ Wen wi fambili a fait gens wi. Fi uol iip a piipl, di bigis prablem we dem av fi kip di Laad Sopa a das dem uona fambili a fait gens dem kaaz a wa dem biliiv iina. Luk pan wa did apm tu Sue we did a stodi di Baibl. Iina 2021, di die bifuo di Laad Sopa fi gwaan, Sue tel di sista we did a stodi di Baibl wid ar se kaa ar fambili a fait gens ar shi naa go get fi kom a di Laad Sopa. So di sista we did a stodi wid ar riid Luuk 22:44 fi ar. Den shi riizn wid ar an mek ar nuo se wen wi a go chuu wi prablem dem wi fi du laik Jiizas an prie tu Jeuova an chos iina im wid aal a wi aat. So di neks die, Sue saat out di bred an di wain an shi go pan jw.org go wach di Maanin Worship fi di Laad Sopa. Da sed iivn de shi go iina ar ruum so dat shi kuda lisn tu di Laad Sopa pan ar fuon. Afta dat, Sue rait di sista we a stodi di Baibl wid ar an tel se: “Wa yu tel mi yeside did riili elp mi. Mi did du evriting we mi kuda du fi go a di Laad Sopa an Jeuova mek evriting wok out gud. Bwai, mi kyaahn tel yu umoch mi tangk yu fi wa yu du an ou it riili mek mi api!” Ef yu a go chuu sopm laik wa Sue did go chuu, yu tingk Jeuova kyan elp yu?

16. Wa mek wi nuo fi shuor se Jeuova a-go bles wi wen wi du aal we wi kyan du fi go a di Laad Sopa? (Ruoman 8:31, 32)

¹⁶ Jeuova lov it wen wi du evriting we wi kyan du fi go a di Laad Sopa. Wi nuo se Jeuova a-go bles wi wen wi mek im si se wi tangk im fi aal a wa im du fi wi. (Riid Ruoman 8:31, 32.) Wi fi mek op wi main se wi naa go mek notn tap wi fram go a di Laad Sopa da ier ya, an roun di taim wen di Laad Sopa fi gwaan wi waahn fi du muor fi Jeuova.