1. Wa mek nof piipl no chos wa di Baibl se?

 UOL iip a piipl tide no fiil laik dem kyan chos nobadi. Kaaz wen dem luk pan di piipl dem we piipl av nof rispek fa, laik di palitishan dem, di bizniz man dem, an di wan dem we stodi bout di ort an dem ting de, dem riili wanda ef dem piipl ya bizniz bout dem. An pan tap a dat, dem no riet di choch liida dem niida. An kaaz dem man ya kliem tu se dem a fala di Baibl wi no shak se nof piipl no biliiv wa di Baibl se.

2. Bies pan Saam 119:160, wa wi fi nuo fi shuor?

² Wi we a sorv Jeuova nuo se im a di Gad we no tel no lai an im eva waahn wa gud fi wi. (Sa. 31:5; Aiz. 48:17) So wi nuo se wi kyan chos di sitn dem we de iina di Baibl kaaz “evriting we [Gad] se iina [im] wod a di chuut.” (Riid Saam 119:160.) Wen wi luk pan wa wan man we stodi nof tingz bout di Baibl se, a so wi fiil tu. Im se: “Evriting we Gad se​—evri singgl wod a chuu, an evriting apm jos laka ou im se it wuda apm. Gad piipl nuo se dem kyan biliiv evriting we im se kaaz dem chos iina im.”

3. Wa wi a-go luk pan iina da lesn ya?

³ Ou wi kyan elp ada piipl fi chos iina Gad Wod laik ou wi chos iina it? Mek wi luk pan chrii riizn wa mek wi kyan chos di Baibl. Wi a-go luk pan ou wi nuo se wa rait dong iina it a dat fi de de fi chuu, an ou di sitn dem we di Baibl se wuda  apm bifuo dem apm a so dem apm fi chuu, an ou di Baibl elp piipl fi chienj dem laif fi di beta.

4. Wa mek som piipl no biliiv se wa de iina di Baibl nou a wa did de iina it iina di fos plies?

⁴ A bout 40 man Jeuova yuuz fi rait dong wa de iina di Baibl. Non a di piepa an ting we dem did rait di Baibl pan fos no de bout tide. Aal wi av a di wan dem we dem did rait uova fram di wan dem we dem did rait uova aredi. An kaaz a dat, som piipl wanda ef wa de iina di Baibl rait ya nou a wa did de iina it iina di fos plies. Yu eva wanda bout dat?

5. Wa dem did du wen dem did a rait uova di paat iina di Baibl we rait iina Iibruu? (Luk pan di picha pan di kova.)

⁵ Kaa Jeuova did waahn mek shuor se piipl get fi nuo wa im waahn dem fi nuo, im tel som man fi rait di skripcha dem uova an uova agen. Im tel di king dem iina Izrel se dem fi rait uova di Laa fi demself, an im did tel di Liivait dem se dem fi tiich di piipl dem da Laa de tu. (Dyuu. 17:18; 31:24-26; Nii. 8:7) Afta di Juu piipl dem did kom bak fram Babilan, yu did av som man we did nuo ou fi rait uova tingz gud gud, an a dem staat fi rait uova di paat a di Baibl we did rait iina Iibruu, an dem rait it uova nof taim. (Ezra 7:6, ftns.) An dem man ya neehn juok out di ting, dem mek shuor se dem did tek dem taim an rait uova wa dem did a rait. Fos dem yuus tu kount di wod dem we dem did rait uova, an yu waahn nuo se dem aal staat fi kount di leta dem fi mek shuor se wa dem a rait uova a dat dem did fi rait fi chuu. Bot iivn wid aal a dat, kaaz dem no porfek wan an tuu mistiek did kom iina di Baibl stil. Bot kaa a som moch difrant difrant taim dem rait it uova piipl kuda kech dem mistiek de. Ou dem did du dat?

6. Ou dem kuda did nuo ef no mistiek did de iina di Baibl dem we dem rait uova?

⁶ Di piipl dem we stodi nof tingz bout di Baibl fain wan wie ou dem kuda get fi nuo wen wan a di man dem we did a rait uova di Baibl mek wan mistiek. Luk pan da egzampl ya: Supuoz 100 man get wan wok fi rait uova aal a di wod dem we de pan wan piej, an wan a dem man de mek wan likl mistiek iina di wan we im a rait uova. Wa sumadi kuda du nou a luk pan di wan dem we di ada man dem rait uova an si wich paat di mistiek de iina di fos man uon. A siem ting di man dem we stodi nof bout di Baibl did du, dem luk pan di difrant difrant Baibl dem we di man dem did rait uova an dem kuda kyan si wich paat sumadi mek wan mistiek ar wich paat sumadi lef out sitn we did fi de de.

7. Ou wi nuo se di man dem we did a rait uova di Baibl did tek dem taim an du dem wok gud?

⁷ Di man dem we did a rait uova di Baibl did wok aad aad fi mek shuor se dem rait uova evriting di wie ou dem fi rait it. Wi kyan se so wen wi luk pan sitn we dem kaal di Leningrad Codex. It a di oulis sitn we av di wol a di Iibruu skripcha dem, an da sitn ya de bout fram 1008 ar 1009 C.E. Bot a no tuu lang nou dem fain som paat a di Baibl we did rait uova an som ada likl piis piis tu, an dem wan ya de bout fi bout 1,000 ier bifuo di Leningrad Codex did kom bout. Kaaz a fi bout 1,000 ier dem did a rait uova dem wan de, sumadi mait-a tingk se di sitn dem we de iina it wuda difrant fram wa de iina di Leningrad Codex, bot it neehn difrant at aal. Kaa wen di piipl dem we stodi bout di Baibl luk pan di fos set a skripcha dem we dem did rait uova an wen dem luk pan di wan dem we rait uova afta dem wan de, dem fain se iivn duo yu mait-a av som likl tingz we kain-a difrant, wa di Baibl riili a se no chienj at aal at aal.

8. Ou di paat a di Baibl we did rait iina Griik difrant fram som uol buk we dem did rait roun dem taim de?

 ⁸ Wen di Kristiyan dem bak iina Baibl taim did a rait uova di skripcha dem we did de iina di Griik langwij, dem did du jos laik ou di man dem we did rait uova di paat a di Baibl we did iina Iibruu did du. Dem Kristiyan de did wok aad fi rait uova di 27 buk dem, an dem yuuz dem wen dem de a dem miitn dem an wen dem a priich tu piipl. Wan man we stodi bout di Baibl an ada tingz, wen im luk pan di paat a di Baibl we rait iina di Griik langwij an pan som ada sitn we rait roun dem taim de im se: “Di sitn dem we dem rait di Baibl uova pan iina Griik, dem fain nof muor a dem de dan eni ada buk we did rait iina dem taim de. An dem fain se dem did fain muos a di paat a di Baibl we did rait dong iina Griik.” Di buk we niem Anatomy of the New Testament se dis: “Ef yu a yuuz wan Baibl we dem did wok aad pan it fi put it iina fi yu langwij an yu a riid di paat we did rait dong iina Griik, yu kyan nuo se wa yu a riid a wa did de de iina di fos plies.”

9. Azkaadn tu Aizaiya 40:8, wen it kom aan tu di Baibl wa wi nuo fi shuor?

⁹ Fi di uol iip a ier dem we di man dem did a rait di Baibl, wi si se dem tek dem taim fi rait it uova, an a dat mek wi nuo se wa iina it a dat fi iina it fi chuu, an a dat mek wi av it fi kyan riid an stodi nou. b Wi nuo se a Jeuova mek shuor se wi av di Baibl ya nou an wa iin de a wa im waahn wi fi get. (Riid Aizaiya 40:8.) Bot som piipl mait-a se a no kaa wa did iina di Baibl iina di fos plies stil de iina it dat miin se a Gad it kom fram. So mek wi luk pan sitn els we mek wi nuo se di Baibl kom fram Gad fi chuu.

10. Tel wi bout sitn we di Baibl se did a-go apm we shuo wi se wa 2 Piita 1:21 se a chuu. (Luk pan di picha dem.)

¹⁰ Nof tingz we di Baibl se did a-go apm, a it apm fi chuu. An som a dem sitn ya a nof nof ier bifuo dem apm it did rait dong se dem wuda apm. An wen wi luk pan tingz we  apm fram lang taim, wi se wa di Baibl se wuda apm a dat apm. An dis no fraitn wi kaa wi nuo se a Jeuova tel di wan dem we rait dong di tingz iina di Baibl wa dem fi rait dong. (Riid 2 Piita 1:21.) Mek wi luk pan wa di Baibl se bout ou di siti we niem Babilan did a-go get mash op. Bitwiin 778 an 732 B.C.E, Jeuova did mek di prafit we niem Aizaiya tel wi bout ou dem wuda kyapcha wan powaful siti we did niem Babilan. Aizaiya did aal rait an se di man we wuda tek uova Babilan wuda niem Sairos, an im did rait dong wa Sairos wuda du fi kyapcha di siti. (Aiz. 44:27–45:2) An Aizaiya did se Babilan wuda get mash op an nobadi naa go eva liv de agen. (Aiz. 13:19, 20) An a dat did apm fi chuu. Iina 539 B.C.E., di piipl dem fram Miidiya an Porja did kom tek uova Babilan, an rait ya nou da powaful siti de mash op an nobadi no liv de.​—Wach di vidiyo we niem Di Baibl Did Mek Wi Nuo Ou Babilan Wuda Get Mash Dong iina di buk we niem Yu Kyan Bi Api Nou An Fi Eva!, Lesn 3 paint 5.

11. Tel wi ou wa Daniyel 2:41-43 se a-go apm a apm iina fi wi taim.

¹¹ An no jos di sitn dem we di Baibl se did a-go apm fram lang taim apm, bot wa it se did a-go apm iina fi wi taim a apm rait ya nou. Laik luk pan wa Daniyel did tel wi bout Britn an Merika we a ron tingz iina di worl ya nou. (Riid Daniyel 2:41-43.) Di Baibl mek wi nuo se wen dem tuu govament ya kom tugeda laka wan govament fi ron tingz iina di worl, dem a-go chrang laka aiyan bot dem a-go wiik laka klie tu. An a dat a apm nou. Britn an Merika komiin laik dem chrang laik aiyan fi chuu kaa dem elp di konchri dem we did a fait iina di tuu Worl Waar dem fi win di waar dem, an rait ya nou dem stil av som big an powaful aami. Bot di piipl dem we dem a ruul uova aalwiez a fait gens di govament an a demanschriet an ting. Sieka dis Britn an Merika no av di powa we dem wuda riili waahn fi av. Wan man we stodi an nuo nof buot palitiks se: “Yu no av no muo konchri iina di worl we a di piipl dem chuuz di ruula we muor plit op plit op kaaz a palitiks dan Merika.” An Britn no difrant fram Merika niida kaa dem piipl dem plit op plit op wen it kom aan tu ef Britn fi stie iina di Yuuropiyan Yuuniyan ar dem fi lef it. Kaa a dem sitn ya Britn an Merika kyaahn ron tingz di wie ou dem wuda waahn fi ron it.

12. Wen wi luk pan di sitn dem we di Baibl se wuda apm bifuo dem apm, wa dat mek wi nuo fi shuor?

¹² Di sitn dem we di Baibl se wuda apm we apm fi chuu mek wi nuo fi shuor se di sitn dem we Gad se a-go apm iina di fyuucha gweehn apm fi chuu. So wi fiil jos laik di sumadi we rait da Saam ya, we did se dis wen im did a prie tu Jeuova: “Mi wel waahn yu fi kom siev mi, di sitn dem we yu se, a dat mi a wiet pan.” (Sa. 119:81) Wen wi riid di Baibl wi si se Jeuova mek wi nuo se “tingz a-go get beta fi [wi].” (Jer. 29:11) Di sitn dem we wi a luk faawod fi get, wi nuo se a no man gweehn gi wi dem sitn de, bot a Jeuova pramis fi gi wi dem sitn de. Di Baibl tel wi uol iip a sitn we a-go apm bifuo dem apm. So mek wi gwaan luk pan dem sitn de an stodi dem, an dat wi mek wi gwaan chos iina Gad Wod.

13. Bies pan Saam119:66, 138, wa a wan neda ting we mek wi nuo se wi kyan chos di Baibl?

¹³ Wan neda ting we mek wi nuo se wi kyan chos di Baibl a wen wi luk pan di gud ting dem we apm fi di piipl dem we du wa di Baibl se dem fi du. (Riid Saam 119:66, 138.) Laik wan ozban an waif we bout fi lef dem wan aneda a liv tugeda api nou, an kaa  dem a du wa di Baibl se dem fi du di pikni dem kyan get fi gruo iina wan fambili wid piipl we lov an kier fi dem.​—Ifii. 5:22-29.

14. Tel wi bout sumadi we mek wi si se wen piipl du wa di Baibl se dem fi du it kyan chienj dem laif fi di beta.

¹⁴ Iivn som wikid wikid piipl get fi chienj dem laif fi di beta wen dem du wa di Baibl se dem fi du. Mek wi luk pan ou di Baibl did elp wan man we did iina prizn we niem Jack. c Outa aal a di man dem we dem did sentans fi ded iina da prizn de, Jack did a wan a di wikidis wan. Bot wan die wen di breda dem did a stodi wid sumadi, Jack did sidong iina di stodi tu. Wen im luk an si ou di breda dem did nais an a tek dem taim wid di sumadi, dat did toch im aat, an im staat fi stodi di Baibl tu. Di muo Jack staat fi du wa di Baibl se im fi du a di muo im chienj im wiez fi di beta. So kaaz im did a get fi chienj im wiez, Jack did get fi staat priich tu piipl an likl afta dat im get baptaiz. Jack did a priich laka Paal tu di ada prizna dem bout Gad Kindom, an kaaz a dat fuor a dem staat fi sorv Jeuova. Wen di die kom fi dem kil Jack, Jack did komiin laka wan nyuu sumadi. Wan a im laaya se: “Jack a no di siem sumadi we mi did nuo 20 ier a bak. Di sitn dem we im lorn fram di Jeuova Witnis dem chienj im laif fi di beta.” Iivn duo dem kil Jack, wa im did du mek wi si se wi kyan nuo fi shuor se wa de iina di Baibl kyan chienj piipl laif fi di beta.​—Aiz. 11:6-9.

15. Kaaz di wan dem we a sorv Jeuova a du wa di Baibl se, ou dat mek dem difrant fram ada piipl? (Luk pan di picha.)

¹⁵ Kaa dem a du wa di Baibl se dem fi du, Jeuova piipl a wok tugeda az wan. (Jan 13:35; 1 Kor. 1:10) An wen wi luk ou di worl plit op plit op kaa a wich paat piipl kom fram, ar kaa a di kola a dem skin, ar wich paati dem a bak, a wan big ting se Jeuova piipl a liv iina piis an a wok tugeda az wan.  An a dat mek wan man we niem Jean chienj op im laif fi di beta. Im did gruo op iina wan konchri a Afrika. An wen piipl did staat waar gens dem wan aneda, im did jain di aami, an likl afta dat im did afi ron we go a wan konchri we de nier wich paat im did kom fram. A de so im get fi nuo di Jeuova Witnis dem. Ier wa im se: “Mi get fi si se di wan dem we riili a du wa Gad waahn dem fi du, dem naa get miks op miks op iina palitiks an dem no plit op plit op, insted-a dat dem riili lov dem wan aneda”. An im se: “Mi did a yuuz mi laif a fait fi mi konchri, bot wen mi lorn bout di Baibl mi mek op mi main fi gi mi laif tu Jeuova.” Jean a wan nyuu sumadi nou. Insted-a fi a fait piipl we difrant fram im, rait ya nou im a tel dem bout di sitn dem we di Baibl tiich, an dat a elp dem fi wok tugeda az wan. Kaaz wi si se di sitn dem we di Baibl tel wi fi du elp piipl no mata wich paat dem kom fram, dat mek wi nuo fi shuor se di Baibl a Gad Wod fi chuu.

16. Wa mek wi fi a du tingz rait ya nou we a-go mek shuor se wi a chos iina Gad Wod muor an muor?

¹⁶ Tingz iina da worl ya a-go get fram bad tu wos, an so it a-go get aada an aada fi wi gwaan chos iina Gad Wod. Piipl mait-a chrai fi mek wi staat if-an-bot an wanda-wanda ef di sitn dem iina di Baibl a riili so dem go fi chuu ar ef Jeuova riili a yuuz di waiz sorvant fi mek im piipl dem nuo wa fi du nowadiez. Bot ef wi nuo fi shuor se Jeuova Wod a di chuut den notn we dem se kyaahn go mek wi tap chos iina Gad an im Wod. Wi a-go mek op wi main fi du evri singgl ting we Jeuova se wi fi du. (Sa. 119:112) An wi naa go shiem fi tel ada piipl bout di chuut we de iina Gad Wod an elp dem fi si wa mek dem fi du wa di Baibl se dem fi du tu. (Sa. 119:46) An iivn wen tingz get aad aad, laik aal wen dem a fait gens wi kaaz a wa wi biliiv iina, wi a-go ‘kyan uol aan no mata wa, an no grombl grombl, bot wi a-go a sing sang iina wi aat.’​—Kol. 1:11; Sa. 119:143, 157.

17. Wen wi luk pan di skripcha we fi gaid wi iina 2023, a wa wi fi memba se?

¹⁷ Wi tangk Jeuova se im mek wi nuo di chuut! Kaaz wi nuo di chuut, it mek wi av sitn a liv fa, an it mek wi nuo wa wi fi du iina da worl ya we piipl no nuo wa fi du an we fi ton. It mek wi nuo se tingz a-go get beta wen Gad Kindom a ruul uova di ort. Wen yu luk pan di skripcha we fi gaid wi iina 2023 it fi elp wi fi nuo fi shuor se evriting we de iina Gad Wod a di chuut!​—Sa. 119:160.