WEN di Baibl did jos rait, di wod we dem yuuz fi “aas an bogi kyaat” kudaana taak bout eniting we piipl raid iina dem taim de. (Aks 8:28, 29, 38) Bot it luk laik se di aas an bogi kyaat we di man fram Iitiyuopiya did iina did likl biga dan di wan we dem yuus tu chravl iina wen dem did a go a waar ar we dem yuus tu ries wid dem taim de. Mek wi luk pan som riizn wa mek wi se dis.

Di man fram Iitiyuopiya a did wan impuotant man we did a kom fram faar. “Im did inchaaj a aal a di moni fi Kyandiis, kwiin fi Iitiyuopiya.” (Aks 8:27) Iina fi wi taim ya nou, di plies we did niem Iitiyuopiya dem taim de a aal a Sudan an di batam paat a Iijip nou. Di fak se im did a chravl so faar miin se im mait-a did afi chravl iina difrant difrant aas an bogi kyaat, an im mos did a chravl wid wol iip a sitn. Iina dem taim de, di aas an bogi kyaat dem did av fuor wiil, an it did av wan kova uova it. Wan buk we dem rait tingz iina bout di buk a Aks se: “Wan bogi kyaat laka dat wuda mek dem kyan kya muo tingz, an mek di raid naisa so dat dem kuda chravl faara.”

Wen Filip go tu di man fram Iitiyuopiya, a riid im did a riid. “Filip ron op tu di bogi an ier di man a riid sitn we di prafit Aizaiya rait.” (Aks 8:30) Di aas an bogi kyaat dem taim de neehn mek fi chravl faas. So kaa dem did a muuv so sluo, dis did mek di man fram Iitiyuopiya kuda riid sitn aalduo im did a chravl, an it mek Filip kuda ron an kech dem.

Di man fram Iitiyuopiya “aks Filip fi kom op kom sidong wid im.” (Aks 8:31) Di man dem wuda tan op iina di bogi kyaat dem we dem yuus tu ries wid iina dem taim de. Bot di wan dem we dem wuda yuuz fi chravl iina dem taim de wuda av spies iina it fi di man fram Iitiyuopiya an Filip sidong iina it.

So bies pan wa Gad Wod se a Aks chapta 8 an di ting dem we dem did fain we did de bout fram dem taim de, wi chienj di saiz a di aas an bogi kyaat we di man fram Iitiyuopiya did de pan iina wi buk an pamplet dem. Wi jraa wan biga bogi kyaat dan di wan dem we dem yuus tu go a waar wid ar we dem wuda ries wid dem taim de.