1. Wen yu a tingk bout Jeuova, wa kom iina yu main?

 YU EVA sidong an tingk bout wa Jeuova komiin laik? An wa yu tingk bout wen yu a prie tu im? Kaa di Baibl tel wi se im “komiin laik di son we gi wi lait, an im komiin laik sitn we shiil wi an protek wi” an “laik wan faiya we bon op tingz.” (Sa. 84:11; Iib. 12:29) Di Baibl tel wi se wich paat Jeuova de komiin laik wan brait bluu stuon an wan piis a metal we a gluo, an laik wan nais priti rienbuo. (Izii. 1:26-28) Wen wi ier ou di Baibl taak bout Jeuova, it mait-a mek wi mout jrap a grong ar it mait-a mek wi fiil fried.

2. Wa mek som piipl mait-a fain it aad fi jraa kluos tu Jeuova?

² Kaa wi kyaahn si Jeuova, wi mait-a fain it aad fi biliiv se im lov wi. An nof piipl fiil laik se Jeuova kyaahn lov dem kaaz a di bad sitn dem we dem go chuu iina laif. An som piipl mait-a neva av wan faada we lov dem, so dem fain it aad fi si Jeuova az wan faada we lov dem. Jeuova nuo wa mek sumadi mait-a fiil dem wie ya. Das wai iina di Baibl im tel wi di kain-a sumadi we im bi.

3. Wa mek wi fi waahn lorn muor bout di lov we Jeuova av?

³ Di Baibl tel wi se Gad a lov. (1 Jan 4:8) A kaaz im lov wi mek im du evriting we im du. Dis mek im aal du tingz fi shuo piipl we no lov im se im lov dem. (Mat. 5:44, 45) So iina da lesn ya, wi a-go luk pan uu Jeuova bi an di sopm dem we im du fi shuo se im lov wi, kaa di muor wi lorn bout im a di muor wi a-go lov im.

 JEUOVA LOV WI KYAAHN DON

4. Kaa Jeuova a wan Gad we jengkl, ou dat mek yu fiil? (Luk pan di picha tu.)

⁴ “[Jeuova] jengkl an gud an kain.” (Jmz. 5:11) Iina di Baibl, Jeuova mek wi nuo se im komiin laik wan mada we lov im pikni kyaahn don. (Aiz. 66:12, 13) Jos tingk bout wan mada we lov dem pikni an a tek kier a im. Shi mait-a av di pikni iina ar an an a rak fram said tu said an a taak tu di pikni nais. An wen di pikni a baal ar a fiil pien, shi a-go du aal a wa shi kyan du fi mek di pikni fiil beta. A siem so wen sopm apm we mek wi a wori an fret, kaa Jeuova lov wi im a-go elp wi. Wan a di man dem we rait di buk a Saamz se: “Wen mi did a wori wori op miself bout uol iip a tingz, yu osh mi an kaam mi aat.”​—Sa. 94:19.

5. Ou it mek yu fiil fi nuo se Jeuova lov yu an aalwiez a-go de de fi yu?

⁵ Jeuova a-go aalwiez de de fi yu. (Sa. 103:8) An im naa go tap lov wi kaa wi du sitn rang. Wen wi tingk bout it, a nof taim di Izrelait piipl dem did du sitn fi ort Jeuova, bot wen dem tap du wa dem did a du, it shuo se dem sari an Jeuova paadn dem an mek dem nuo se im stil lov dem. Laik im did mek dem nuo se dem speshal tu im an im lov dem. (Aiz. 43:4, 5) An a siem so Jeuova lov piipl nou, so wi kyan aalwiez dipen pan im. So iivn ef wi du sitn rang, Jeuova naa go lef wi ef wi tap du di rang sitn. An wen wi shuo se wi sari fi wa wi du an staat fi du wa rait, wi a-go si se im stil lov wi. Jeuova mek wi nuo se im “eva redi fi figiv piipl, no mata wa dem du.” (Aiz. 55:7) Di Baibl mek wi nuo se wen Jeuova paadn wi im “tek we [wi] sin dem,” so dat mek wi fiil gud.​—Aks 3:19.

6. Wa Zakaraiya 2:8 a tel wi bout Jeuova?

⁶ Riid Zakaraiya 2:8. Kaa Jeuova lov wi, im kier bout ou wi fiil an im wel waahn fi elp wi. So ef sopm bad apm tu wi, it mek Jeuova sad an a das wai wi kyan prie an se: “Protek mi laik ou yu protek yu yaibaal.” (Sa. 17:8) Jos laik ou yu protek yu ai an tek kier a it kaa it preshos an wot nof tu yu, a siem so it wuda komiin laik Jeuova a se ‘Ef nobadi chobl unu, it komiin laik a mi dem a chobl.’

7. Wa mek wi fi nuo fi shuor se Jeuova lov wi?

 ⁷ Jeuova waahn yu fi nuo fi shuor se im lov yu. Bot im nuo se kaaz a sortn tingz we mait-a apm tu yu, it mait-a mek yu fiil laik se im kyaahn lov yu. Ar kaaz a wa yu mait-a a go chuu ya nou, it mait-a mek yu wanda ef Jeuova riili lov yu. Yu kyan nuo se Jeuova lov yu fi chuu wen yu lorn bout ou im lov Jiizas an di wan dem we get pik fi liv iina evn, an ou im lov di uol a wi tu.

WA JEUOVA DU FI SHUO WI SE IM LOV WI?

8. Wa mek Jiizas did nuo fi shuor se im Faada lov im?

⁸ Fi uol iip a ier, Jeuova an im Bwai Pikni did kluos kluos, so dem riili lov dem wan aneda. Iina Matyu 17:5 Jeuova mek wi si umoch im lov Jiizas kaa im neehn jos se, ‘Im mek mi api.’ Im se, “Mi Bwai Pikni, mi lov im.” So Jeuova mek wi si se im did proud a Jiizas, an Im did api bout wa im did a-go du. (Ifii. 1:7) So Jiizas did nuo fi shuor se im Faada Jeuova lov im. An wi nuo dis kaa muor dan wan taim Jiizas did se im Faada lov im.​—Jan 3:35; 10:17; 17:24.

9. Ou Ruoman 5:5 mek wi si ou Jeuova fiil bout di wan dem we get pik fi go a evn?

⁹ Jeuova mek di wan dem we get pik fi go a evn si umoch im lov dem. (Riid Ruoman 5:5.) Di langwij we di Baibl did rait iina fos mek wi si se iina da vors ya di lov we Jeuova av fi di wan dem we get pik fi go a evn so chrang dat it komiin laik waata we jos a ron so. Di wan dem we get pik fi go a evn did nuo se dem a di wan dem “we im lov.” (Juud 1) An a di siem wie dem did fiil wen Jan did rait an se: “Luk umoch di Faada lov wi. Im kaal wi im uona pikni.” (1 Jan 3:1) Bot a no onggl di wan dem we get pik fi go a evn Jeuova lov, im du tingz fi shuo se im lov aal a wi tu.

10. Wa a di bigis ting Jeuova du fi shuo wi se im lov wi?

¹⁰ Di bigis ting we Jeuova du fi mek wi si se im lov wi a wen im sen im Bwai Pikni fi kom ded fi wi. (Jan 3:16; Ruo. 5:8) Jeuova mek im Bwai Pikni we im lov so moch kom ded fi aal a wi so dat wi kyan get paadn fi wi sin dem an ton Im fren. (1 Jan 4:10) Di muor wi tingk bout wa Jeuova an Jiizas gi op fi wi a di muor wi a-go si se dem lov wi. (Gya. 2:20) Jiizas neehn kom gi op im laif fi wi jos kaaz Jeuova a wan fier Gad. Bot Jeuova mek im Bwai Pikni we im lov so moch kom sofa an ded fi wi kaa im lov wi.

11. Wa wi kyan lorn bout Jeuova fram wa Jerimaiya 31:3 se?

¹¹ Bies pan wa wi taak bout aredi, wi si se Jeuova no jos lov wi bot im tel wi se im lov wi. (Riid Jerimaiya 31:3.) An it mek wi get kluos tu im kaa im lov wi. (Luk pan Dyuutaranami 7:7, 8.) An notn an nobadi kyaahn mek Jeuova tap lov wi. (Ruo. 8:38, 39) Ou dis mek yu fiil? Riid Saam 23 an si ou Dievid did fiil bout di lov we Jeuova av fi im an ou im did fiil se Jeuova did a tek kier a im. An luk an si ou it kyan mek aal a wi fiil tu.

OU DI KAIN-A LOV WE JEUOVA AV FI YU MEK YU FIIL?

12. Wa yu wuda se Saam 23 a taak bout?

¹² Riid Saam 23:1-6. Saam 23 a wan sang we mek Jeuova si se wi nuo se im lov wi an im a-go tek kier a wi. A Dievid rait da saam ya, an iina it im taak bout ou im an Jeuova, uu a im Shepad, kluos.  Im neehn fried fi mek Jeuova mek im nuo wa fi du, kaa im did nuo se Jeuova lov im an im did nuo se az lang az im liv Jeuova wuda aalwiez lov im an stik tu im. Bot wa yu tingk did mek Dievid nuo se Jeuova wuda du dis?

13. Wa mek Dievid did shuor se Jeuova wuda tek kier a im?

¹³ “Mi naa go shaat a notn.” Dievid did fiil se sumadi a tek kier a im kaa Jeuova aalwiez gi im di sitn dem we im niid. An Dievid did fiil se im an Jeuova a fren an im did nuo se Jeuova did api wid im tu. A das wai im did nuo se no mata wa apm iina di fyuucha, Jeuova wuda tek kier a im an gi im di sitn dem we im did niid. Kaa Dievid did nuo se Jeuova lov im so moch, it mek im no wori wori op imself. Bot it did mek im api an nuo fi shuor se im wuda aalwiez get di sitn dem we im niid.​—Sa. 16:11.

14. Wa Jeuova mait-a du fi shuo se im lov wi an a tek kier a wi?

¹⁴ Jeuova lov wi an a tek kier a wi wos wen sitn bad apm tu wi. Wan sista we niem Claire, a we de a Betel fi muor dan 20 ier nou, did fiil laik se shi kudn du notn fi elp out wen ar fambili did a go chuu wan prablem afta di ada. Ar faada get wan bad schruok, ar sista get put out a di kanggrigieshan, an di likl bizniz we ar fambili did a ron mash op an dem en op luuz dem ous. Bot wa Jeuova did du fi mek dem si se im lov dem an im a tek kier a dem? Claire se: “Jeuova did mek shuor se mi fambili did av di sitn dem we dem niid evridie. An  muor taim di sitn dem we im gi wi muor dan wi kuda eva tingk. Mi aalwiez tingk bout di taim dem wen Jeuova du tingz fi shuo se im lov wi. An mi api fi dem taim de tu kaa dem shuo mi se mi fi gwaan sorv Jeuova no mata wa mi a go chuu.”

15. Wen Dievid did taiyad, wa mek im did get chrang agen? (Luk pan di picha tu.)

¹⁵ “An wen mi fiil taiyad, im mek mi fiil chrang agen.”  Kaaz a aal a di prablem an chraiyal dem we Dievid did a go chuu, im fiil taiyad som a di taim. (Sa. 18:4-6) Bot kaa im did nuo se Jeuova lov im an a tek kier a im, it did mek im fiil chrang agen. Wen Dievid did fiil taiyad laik im kudn go aan no muor, Jeuova kya im go “wich paat nof griin graas de” so im kuda lai dong an res, an im kya im go stie “wich paat nof waata de” tu. An dat mek Dievid kuda get chrang agen an gwaan sorv Jeuova.​—Sa. 18:28-32.

16. Ou di lov we Jeuova av fi wi mek wi chrang agen?

¹⁶ A siem so tide, kaa Jeuova lov wi an a stik tu wi, a it mek wi kyan go chuu wi prablem dem. (Lam. 3:22; Kol. 1:11) Luk pan wa did apm tu Riechel. Shi did fiil mash op wen ar ozban did lef ar an Jeuova wen KUOVID did a go roun. A wa Jeuova did du fi elp ar? Shi se: “Jeuova mek shuor se mi nuo se ada piipl lov mi. So im mek mi fren dem kom spen taim wid mi, kuk fuud kya kom gi mi, sen mesij an skripcha kom gi mi, an som a dem jos sumail wid mi. An dem aalwiez tel mi fi memba se Jeuova a tek kier a mi. Mi no tap tangk Jeuova fi dem breda an sista ya we im gi mi we lov mi.”

17. Wa mek Dievid neehn fried se ‘notn bad did a-go apm tu im’?

¹⁷ “Mi stil no fried se notn bad a-go apm tu mi kaa yu di de wid mi.” A nof taim Dievid did afi a ron fi im laif. An a nof a di man dem we did waahn fi kil im did av nof powa. Kaa Dievid did nuo se Jeuova lov im, it did mek im fiil sief. Im did nuo se Jeuova di de wid im. Das wai im kuda sing se: “No mata wa apm fi mek mi fried, im di de fi elp mi siem wie so dat mi no fried agen.” (Sa. 34:4) Tingz did riili a apm we mek Dievid fried bad, bot  kaa im nuo se Jeuova lov im so moch, it elp im fi go chuu.

18. Wen tingz a apm we mek yu wori an fret, ou it kyan elp yu kaa yu nuo se Jeuova lov yu?

¹⁸ Kaa wi nuo se Jeuova lov wi, ou dat elp wi wen wi a go chuu som sitn we mek wi fried bad? Wan sista we niem Susi, we a wan paiyanier, tel wi ou shi an ar ozban did fiil afta ar bwai pikni kil imself. Shi se: “Wen sitn bad apm aal av a sodn iina sumadi laif, it mek dem fiil laik se dem kyaahn elp demself. Bot kaa wi nuo se Jeuova lov wi, dat mek wi fiil sief.” An Riechel we wi taak bout aredi se: “Wan nait wen mi sad an a wori an a fret, mi gruon an baal out tu Jeuova. An siem taim Jeuova jos mek mi fiil wan kaam iina mi aat an im osh mi laik ou wan mada wuda osh ar biebi. An afta dat mi jrap asliip. Mi naa go eva figat da taim de iina mi laif.” Ou wan elda we niem Tasos, we did de iina prizn fi fuor ier kaa im neehn waahn jain di aami, did si se Jeuova lov im an a tek kier a im? Im se: “Jeuova mek shuor se mi get evriting we mi niid an muor dan dat tu. Dis mek mi si se mi kyan riili chos im. An im yuuz im spirit fi mek mi api aalduo mi did de a prizn we nof piipl sad bad. Dis mek mi si se di muor mi chos iina Jeuova a di muor mi si se im lov mi. So mi staat fi regila paiyanier wen mi de iina prizn.”

JRAA NIER TU JEUOVA WE JENGKL

19. (a) Kaa wi nuo se Jeuova lov wi, wa dat av fi du wid di sitn dem we wi prie bout? (b) Wich wan a dem vors ya yu lov di muos? (Luk pan di paat we niem “ Som Vors We Elp Wi Fi Si Se Jeuova Lov Wi Kyaahn Don.”)

¹⁹ Di sitn dem we dem breda an sista ya go chuu mek wi si se Jeuova a di “Gad we lov wi” an im a-go di de fi wi. (2 Kor. 13:11) Jeuova kier bout wa a gwaan wid yu, an wi nuo fi shuor se ‘im a-go lov wi an stik tu wi no mata wa.’ (Sa. 32:10) So di muor wi tingk bout di sitn dem we Jeuova du fi shuo wi se im lov wi a di muor wi a-go get kluosa an kluosa tu im. Wi kyan tel im bout di sitn dem we a gwaan iina wi laif an ou wi kyaahn du widout im lov. An wi nuo se wen wi tel im bout di ting dem we wi a wori an a fret bout, im andastan we wi a go chuu an im wel waahn fi elp wi tu.​—Sa. 145:18, 19.

20. A ou di lov we Jeuova av fi wi mek wi waahn jraa nier tu im?

²⁰ Jos laik ou sumadi wuda waahn go nier wan faiya wen di die kuol bad, a siem so wi waahn jraa nier tu Jeuova kaa im lov wi. Di lov we Jeuova av fi wi kyan mek wi get chrang wen wi fiil wiik. An da lov de mek im chriit wi jengkl tu. So du tingz we a-go mek Jeuova lov yu. An wen wi si se Jeuova lov wi, aal a wi a-go se, ‘Mi lov Jeuova!’​—Sa. 116:1.