1. Wa mek di Laad Sopa die a di muos impuotant die fi di ier fi Jeuova piipl dem? (Luuk 22:19, 20)

 DI LAAD Sopa die a di muos impuotant die fi di ier fi Jeuova piipl dem. An a di onggl ting we Jiizas did tel im falara dem fi du fi memba im. (Riid Luuk 22:19, 20.) Mek wi luk pan som a di riizn dem we mek wi lov fi go a di Laad Sopa.

2. Wa a som a di riizn dem we mek wi lov fi go a di Laad Sopa?

² Di Laad Sopa elp wi fi memba wa mek it did impuotant fi Jiizas kom ded fi wi an aal a di gud sitn dem we wi a-go get kaaz a wa im du fi wi. It mek wi memba di ting dem we wi kyan du fi mek im si se wi tangk im fi wa im du. (2 Kor. 5:14, 15) An it gi wi di chaans fi elp “bil op wi wan aneda” tu. (Ruo. 1:12) A uol iip a wi breda an sista dem we tap go a miitn an fiil sorvis kom a di Laad Sopa evri ier. An som a dem aal mek op dem main fi staat sorv Jeuova agen kaaz a ou di breda an sista dem mek dem fiil gud wen dem kom. An uol iip a ada piipl we kom a di Laad Sopa staat fi stodi di Baibl kaaz a di sitn dem we dem si an ier wen dem kom. So wi kyan si wa mek di Laad Sopa so speshal tu wi.

3. Wa mek wi se di Laad Sopa mek di wol a wi wok tugeda az wan? (Luk pan di picha tu.)

³ Di Laad Sopa we wi kip a shuo se Jeuova piipl fram aal uova di worl a wok tugeda az wan. Kaa wen di son a go dong aal uova di worl da die de, aal a Jeuova piipl a-go kip di Laad Sopa, an wi a-go ier wan taak we tel wi wa mek a wan big ting se Jiizas kom ded fi wi. An aal a wi sing tuu sang an paas roun di bred an di wain an se “Iemen” wen di fuor prieya dem don. So bai da nait de fi don, aal a wi wuda du di siem ting. Jeuova an Jiizas mos fiil gud wen dem si di wol a wi fram aal uova di worl a wok tugeda az wan fi big dem op.

4. Wa wi a-go luk pan iina da lesn ya?

 ⁴ Iina da lesn ya, wi a-go get di ansa fi dem kwestiyan ya: Ou wi kyan get wi aat redi fi wa a-go gwaan a di Laad Sopa? Ou wi kyan elp ada piipl fi kom? An wa wi kyan du fi elp di breda an sista dem we tap go a miitn an fiil sorvis wid wi? Wen wi get di ansa fi dem kwestiyan ya, it a-go elp wi fi redi fi di Laad Sopa.

OU WI KYAN GET WI AAT REDI FI WA A-GO GWAAN A DI LAAD SOPA?

5. (a) Wa mek wi fi tingk bout di sitn dem we wi a-go get kaaz Jiizas kom ded fi wi? (Saam 49:7, 8) (b) Wa yu lorn fram di vidiyo we niem Wa Mek Jiizas Kom Ded Fi Wi?

⁵ Di bes wie wi kyan redi op wi aat fi go a di Laad Sopa a fi tingk bout di sitn dem we wi a-go get kaa Jiizas kom ded fi wi. Wi afi memba se wi kyaahn tap wiself fram sin we kaaz wi fi ded. (Riid Saam 49:7, 8; luk pan di vidiyo we niem Wa Mek Jiizas Kom Ded Fi Wi? tu) a A wol iip Jeuova an Jiizas du fi wi wen Jiizas kom ded fi wi sin dem. (Ruo. 6:23) Di muor wi tingk bout aal a wa dem du fi wi, dat a-go mek wi tangk dem fi wa dem du. Mek wi luk pan som a di sitn dem we Jeuova an Jiizas du so das Jiizas kuda kom ded fi wi. Bot bifuo wi du dat, wi a-go luk pan wa mek Jiizas did afi kom ded fi wi.

6. Wa mek Jiizas did afi kom ded fi wi?

⁶ Wen Jeuova did mek Adam, im did mek im porfek. Bot wen im sin gens Gad, im an aal a im pikni dem wudn kyan liv fi eva agen. So fi Adam pikni dem get porfek an kyan liv fi eva agen, Jiizas kom ded fi wi an gi op fi im porfek laif. Wen Jiizas did de pan di ort “im neva sin, an im neva se notn fi chrai an chrik nobadi.” (1 Pii. 2:22) So wen Jiizas ded, im did porfek jos laik ou Adam did porfek, an a das wai im kuda kom ded fi wi.​—1 Kor. 15:45; 1 Tim. 2:6.

7. Wa a som a di sitn dem we Jiizas did go chuu wen im did de pan di ort?

⁷ Aalduo Jiizas did go chuu wol iip a sitn wen im did de pan di ort, im neva du notn rang. Im aalwiez du wa im Faada Jeuova se im fi du. An wen im weehn a pikni, aalduo im did porfek an im mada an faada neehn porfek, im stil du wa dem tel im fi du. (Luuk 2:51) An wen im weehn a tiinieja, im did afi mek shuor se im neehn mek nobadi presha im fi du notn rang niida. An wen im get big an Sietan chrai fi mek im du wa rang, im neehn fala im, im stik tu Jeuova an du wa Im waahn im fi du. (Mat. 4:1-11) Sietan did wel waahn Jiizas fi du sitn we rang so dat im kudn ded fi wi sin dem.

8. Wa a som ada sopm we Jiizas did afi go chuu?

⁸ Wen Jiizas did staat fi priich an tiich, im did go chuu som wol iip a ada sitn tu. Laik piipl did a fait gens im an a mek tingz aad fi im kaaz a di sitn dem we im did a tiich, an dem did waahn fi kil im tu. (Luuk 4:28, 29; 13:31) An im did afi diil wid di sitn dem we im falara dem did a du tu. (Maak 9:33, 34) Wen dem did a chrai im bifuo dem kil im, im go chuu nof sofarieshan. Dem chriit im bad an chat nof bad sitn bout im, an dem kil im iina wan wie we mek im fiil nof pien an we wuda mek im shiem tu. (Iib. 12:1-3) Jeuova neehn du notn fi protek im, so im did afi go chuu dis pan im uon. b​—Mat. 27:46.

9. Di fak se Jiizas kom ded fi wi, ou dat mek yu fiil? (1 Piita 1:8)

 ⁹ Wen Jiizas did kom ded fi wi im did sofa nof. Wen yu tingk bout dat an ou im did redi fi kom ded fi wi, duohn it mek yu api an mek yu lov im iivn muor?​—Riid 1 Piita 1:8.

10. Wa Jeuova did redi fi go chuu so dat im son kuda kom ded fi wi?

¹⁰ Wa Jeuova did redi fi go chuu so dat im son kuda kom ded fi wi? Di tuu a dem did kluos bad, an dem did lov dem wan aneda. (Pr. 8:30) No faada an son kudn kluos laik dem. So wen Jeuova did si Jiizas a go chuu di wol iip a chraiyal dem wen im did de pan ort, it mos did ort im bad.

11. Tel wi wa it komiin laik wen Jeuova si im son a ded.

¹¹ Aalduo wi nuo se Jeuova a-go mek wi piipl dem we ded kom bak alaiv, eni mada an faada uufa pikni ded nuo se it stil at bad. An evribadi nuo ou it pien wi iina wi aat wen sumadi fi wi ded. Dis mek wi si se it mos did pien Jeuova pan da die de iina 33 C.E. wen im si im son we im lov so moch a sofa an a ded. c​—Mat. 3:17.

12. Wa a som a di sitn dem we wi kyan du bifuo wi go a di Laad Sopa?

¹² Fram nou til di taim wen wi a-go kip di Laad Sopa, yu kyan stodi bout tingz we a tel wi bout wa mek Jiizas kom ded fi wi iina yu uona Baibl stodi ar yu fambili Baibl stodi. Yu kyan yuuz di Sitn We Di Jeuova Witnis Dem Kyan Yuuz Fi Luk Op Tingz ar eni wan a wi ada buk an pamplet dem fi stodi muor bout dis. d An chrai fi du di Baibl riidin fi di Laad Sopa we kom iina di Ou Kristiyan Fi Liv An Priich Stodibuk Fi Di Miitn. Pan di die wen wi a-go kip di Laad Sopa, memba fi wach di Maanin Worship fi di Laad Sopa. Wen wi du aal a dem sitn ya bifuo wi go a di Laad Sopa, it a-go elp wi an it a-go mek wi kyan elp di wan dem we wi invait fi kom tu.​—Ezra 7:10.

ELP ADA PIIPL FI KOM A DI LAAD SOPA

13. Wa a di fos ting we wi kyan du fi elp ada piipl fi kom a di Laad Sopa?

¹³ Wan a di fos ting we wi kyan du fi elp piipl fi kom a di Laad Sopa a fi invait dem. A no onggl di wan dem we wi taak tu wen  wi go iina sorvis wi fi invait, bot wi kyan rait dong di niem a som ada piipl we wi nuo we wi waahn fi invait tu. Laik wi fambili dem, di piipl dem we wi wok wid, piipl we wi go a skuul wid, an ada piipl tu. Aal ef wi na’av wol iip a di invitieshan dem we dem print out, wi kyan sen dem wan a di invitieshan pan dem fuon ar pan dem tablit an dem ting de. Wi mait-a fraitn fi si umoch sumadi kom!​—Iik. 11:6.

14. Tel wi wa kyan apm wen sumadi get wan invitieshan fi demself.

¹⁴ Yu neva nuo wa kyan apm wen yu gi sumadi we yu nuo wan a di invitieshan fi demself. Wan taim wan sista did fraitn wen ar ozban we a neehn wan Jeuova Witnis tel ar se im a-go kom a di Laad Sopa. Shi did fraitn kaa shi aalwiez a tel im fi kom a di Laad Sopa bot im neva kom yet. Bot im did a-go kom da taim ya kaa im se: “Mi get wan invitieshan fi miself.” Im tel ar se a wan a di elda dem fram di kanggrigieshan we im nuo invait im. Im go a di Laad Sopa da ier de an fi wol iip a ier afta dat.

15. Wen wi a invait piipl fi kom a di Laad Sopa, wa a sopm we wi kyan tingk bout?

¹⁵ Memba se ino, di piipl dem we wi invait fi kom a di Laad Sopa mait-a av som kwestiyan we dem waahn di ansa fa. So wi kyan tingk bout di kwestiyan dem we dem mait-a aks an ou wi wuda ansa dem. (Kol. 4:6) Laik som a dem mait-a a wanda: ‘Wa apm a di Laad Sopa?’ ‘A ou lang it a-go kip fa?’ ‘Wa kain-a kluoz mi fi wier?’ ‘Mi afi pie no moni fi go iin?’ ar ‘Dem a-go tek op kalekshan?’ So wen wi a-go invait nobadi fi kom a di Laad Sopa, wi kyan aks dem ef dem av no kwestiyan we dem waahn di ansa fa. An den wi kyan chrai an ansa dem kwestiyan dem bifuo. Wi kyan aal yuuz di vidiyo dem laik di wan we niem Shuo Se Wi Memba Se Jiizas Did Kom Ded Fi Wi an Wa apm a wan Kindom Aal? fi mek dem nuo wa gwaan a di miitn dem. Yu kyan yuuz lesn 28 iina di  Yu Kyan Bi Api Nou An Fi Eva buk fi si tingz we yu kyan tel dem bout di Laad Sopa.

16. Wa a som ada kwestiyan we di wan dem we kom a di Laad Sopa mait waahn di ansa fa?

¹⁶ Afta sumadi kom a di Laad Sopa, dem mait-a av kwestiyan we dem waahn di ansa fa. Laik dem mait-a a wanda wa mek nobadi neehn iit di bred an jringk di wain. Ar ef a onggl wan ar tuu sumadi did dwi’it, wa mek a onggl dem wan did dwi’it. Ar dem mait-a a wanda ou aafn wi kip di Laad Sopa ar ef a dat wi du aal a wi miitn dem. Aalduo dem taak bout dem sitn ya iina di Laad Sopa taak, di wan dem we jos a kom fi di fos taim mait-a niid muor elp fi andastan. So fi fain tingz we yu kyan yuuz fi elp dem, yu kyan go pan jw.org anda di paat we niem “Som Tingz We Yu Kyan Get Pan Di Websait” an luk pan di paat we niem, “Wa Mek Wen Di Jeuova Witnis Dem Kip Di Laad Sopa, It Difrant Fram Ou Di Ada Choch Dem Kip It?” So wi waahn fi du evriting we wi kyan du bifuo di Laad Sopa, wen it a gwaan, an afta it don fi elp di wan dem we Gad “pik fi liv fi eva.”​—Aks 13:48.

ELP DI WAN DEM WE TAP GO A MIITN, FIIL SORVIS, AN DEM TING DE

17. Wa di elda dem kyan du fi elp di wan dem we tap go a miitn an fiil sorvis an dem ting de? (Iziikel 34:12, 16)

¹⁷ Roun di taim wen wi a-go kip di Laad Sopa, di elda dem kyan du tingz fi shuo se dem kier bout di wan dem we tap kom a miitn an fiil sorvis an dem ting de fi staat agen. (Riid Iziikel 34:12, 16.) So bifuo di Laad Sopa, dem fi chrai an kaal nof a dem breda an sista de. Mek dem nuo se yu a tingk bout dem an yu waahn fi du wa yu kyan du fi elp dem. Tel dem se yu a invait dem fi kom a di Laad Sopa. An ef dem kom a di Laad Sopa, mek dem nuo se yu api fi si dem. No tap chek op pan dem an du wa yu kyan du fi elp dem staat sorv Jeuova agen.​—1 Pii. 2:25.

18. Wa aal a wi kyan du fi elp di wan dem we tap kom a miitn an dem ting de? (Ruoman 12:10)

 ¹⁸ Aal a wi iina di kanggrigieshan kyan du tingz fi elp di wan dem we tap kom a miitn an fiil sorvis an dem ting de fi kom a di Laad Sopa. Wi kyan du dis wen wi du tingz fi mek dem si se wi lov dem an wen wi chriit dem gud. An wi fi du tingz fi mek dem si se wi rispek dem tu. (Riid Ruoman 12:10.) Memba ino, dem breda an sista ya we Jeuova lov mait-a fried fi kom a miitn kaa dem fiil se wi naa go api fi si dem. e So wen dem kom, no bada du ar se notn we a-go mek dem fiil a wie. (1 Tes. 5:11) Memba tu se dem breda an sista ya a wan a wi, an wi api fi a sorv Jeuova wid dem agen!​—Sa. 119:176; Aks 20:35.

19. Ou it elp wi wen wi memba se Jiizas did kom ded fi wi?

¹⁹ Wi kyan si wa mek wi afi tangk Jiizas fi tel wi fi kip di Laad Sopa evri ier, kaa wen wi du dat it elp wi an ada piipl tu. (Aiz. 48:17, 18) It mek wi lov Jeuova an Jiizas muor an mek wi tangk dem fi wa dem du fi wi. It mek wi jraa nier tu wi breda an sista dem tu, an wi kyan elp ada piipl fi kom si som a di nais sitn we dem kyan kom get tu kaaz a wa Jiizas did du fi wi. So mek wi du evriting we wi kyan du fi mek shuor se wi redi fi di muos impuotant die fi di ier!