Yu Did Nuo Dis?
Ou di brik dem we dem did fain we did de iina Babilan fram wie bak wen an di wie ou dem yuus tu mek di brik dem shuo se wa di Baibl se a chuu?
DI PIIPL dem we stodi bout di ting dem we dem dig op an fain fram uol taim diez did fain som uol iip a brik iina Babilan we di Babiluoniyan piipl dem did yuuz fi bil op di siti. Wan a dem man de we niem Robert Koldewey se di Babiluoniyan piipl dem did mek dem brik ya “outa di toun iina som big uovn, kaa de-so dem kuda get som gud klie fi mek di brik dem, an dem kuda fain uol iip a faiya tik fi yuuz de tu.”
Di piipl dem we stodi bout di ting dem we dem dig op an fain fram uol taim diez did fain tingz we shuo se di man dem we did a ron tingz iina Babilan did a yuuz di uovn dem fi du som wikid sitn tu. Paul-Alain Beaulieu, we stodi an nuo nof bout Asiriya an tiich bout it a di University of Toronto, se: “Som tingz we di Babiluoniyan dem did rait shuo se di king did se aal a uu neehn did a du wa im se an di wan dem we neehn av no rispek fi di Babiluoniyan gad dem, dem fi dash dem iina di uovn an bon dem op iin de.” An dis a sitn we Nebikadneza, di king, did rait dong fram dem uol taim diez de. Im rait se: “Don dem, bon dem op, ruos dem, . . . kya dem go a di uovn go bon dem. . . mek mi si sumuok a kom fram dem, chuo dem iina di faiya mek it kil dem.”
Dis we Nebikadneza se mek di wan dem we riid di Baibl tingk bout wa gwaan iina Daniyel chapta 3. Iina dem diez de, King Nebikadneza did mek wan big guol stachu, an im put it pan wan flat piis a lan, we no de iina Babilan, we niem Duura. Wen di chrii Iibruu bwai dem we niem Shajrak, Miishak an Abednigo neehn bou dong tu it, Nebikadneza did beks bad. So im tel di man dem fi mek di uovn sevn taim muor ata dan it wuda bi. An den im tel dem fi fling di chrii Iibruu bwai dem iina it. Bot Gad sen wan a im ienjel fi siev dem.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Wan brik we Nebikadneza niem rait dong pan
Di brik dem we dem fain iina Babilan shuo se wa di Baibl se a chuu. Uol iip a dem brik ya we dem fain did av sopm rait pan it we a big op di king. Dis a wa did rait pan som a dem: “Nebikadneza, di king a Babilan . . . Di palis we mi, di powaful king bil op . . . Mek di pikni dem we mi av ruul iina da palis ya fi eva.” Dis wa did rait dong pan di brik dem did soun laik sitn we Nebikadneza did se wen im a big op imself iina Daniyel 4:30. Im se: “No powaful Babilan dis we mi yuuz mi uona chrent fi mek wan speshal ous fi mi an mi fambili an fi shuo ou big an powaful mi bi?”
