1. Wa a som a di sitn dem we yu did lorn wen yu staat fi stodi di Baibl?

 YU MEMBA wen yu did staat fi stodi di Baibl, an ou yu mait-a did fraitn fi ier se Gad av wan niem? An yu mait-a did api tu fi lorn se Gad naa go bon piipl iina el faiya. An wat a wie yu did api fi nuo se yu kyan go si yu piipl dem we ded kom bak alaiv, an se yu kyan go liv wid dem rait ya-so pan ort iina Paradais.

2. Pan tap a di sitn dem we yu did lorn wen yu staat fi stodi di Baibl, wa a som ada sitn yu did du fi lov Jeuova muor an muor? (Ifiijan 5:1, 2)

² Di muor yu stodi Gad Wod a di muor yu get fi lov Jeuova. An kaa yu lov im, it push yu fi du di sitn dem we yu lorn. An kaaz a di sitn dem we yu lorn iina di Baibl, it mek yu bi wan beta sumadi kaaz yu staat fi du tingz di wie ou Gad waahn yu fi dwi’it. Jos laik ou wan likl pikni du tingz di wie ou dem mada an faada we lov dem dwi’it, a siem so yu a-go chrai fi du tingz jos laik yu Faada we op iina evn.​—Riid Ifiijan 5:1, 2.

3. Wa a som kwestiyan wi kyan aks wiself?

³ Wi kyan aks wiself: ‘Mi lov Jeuova muor dan wen mi did dis ton wan Kristiyan? Ar fram mi baptaiz til nou, mi a tingk bout tingz an a du tingz di wie ou Jeuova wuda waahn mi fi dwi’it​—laik mi a du tingz fi mek mi breda an sista dem si se mi lov dem?’ Ef yu fain se yu no lov Jeuova an yu breda an sista dem di wie ou yu did lov dem wen yu dis lorn di chuut, no fiil tuu bad. Sitn laka dat did apm tu di Kristiyan dem we did de bout iina Baibl taim. Bot Jiizas did nuo se dem kuda chienj, an a siem wie im nuo se wi kyan chienj tu an staat fi lov Jeuova an wi wan aneda muor an muor agen.​—Rev. 2:4, 7

4. Wa wi a-go luk pan iina da lesn ya?

 ⁴ Iina da lesn ya, wi a-go taak bout ou di lov we wi av fi Jeuova an fi ada piipl kyan gruo muor an muor. Den wi a-go luk pan som a di blesn dem we wi an ada piipl kyan get wen wi lov Jeuova an wi breda an sista dem muor.

5-6. Wa a som sitn we di apasl Paal did go chuu, an wa did push im fi gwaan sorv Jeuova?

⁵ Aalduo di apasl Paal did av wol iip a prablem a diil wid, im did api a sorv Jeuova. Laik im did afi chravl faar an it neehn iizi fi im chravl dem taim de. Som a di taim “riva nieli tek [im] laif” an “tiif chrai kil [im].” An som a di taim di piipl dem we did a fait gens im biit biit im op. (2 Kor. 11:23-27) An a no aal di wail di breda an sista dem mek Paal si se dem tangk im fi aal a wa im du fi elp dem.​—2 Kor. 10:10; Fil. 4:15.

⁶ Wa did elp Paal fi gwaan sorv Jeuova? A di sitn dem we Paal did go chuu an di sitn dem we im stodi iina Gad Wod did elp im. An dem sitn de mek im nuo se Jeuova lov im fi chuu. (Ruo. 8:38, 39; Ifii. 2:4, 5) An kaaz a dat, Paal get fi lov Jeuova. An im did shuo se im lov Jeuova wen im neehn tap “elp di breda an sista dem we biliiv iina Gad.”​—Iib. 6:10.

7. Wa wi kyan du fi lov Jeuova muor an muor?

⁷ Wen wi tek di taim fi stodi Gad Wod, it a-go mek wi lov im muor an muor. Wen wi a riid di Baibl, wi fi chrai an si wa it a tel wi bout Jeuova. Aks yuself: ‘Ou wa mi jos riid mek mi si se Jeuova lov mi? An ou it mek mi si se mi fi lov Jeuova tu?’

8. Wen wi prie tu Jeuova, ou it kyan mek wi lov im muor an muor?

⁸ Wen wi prie tu Jeuova aafn an tel im evriting we iina wi aat, it kyan mek wi lov im muor an muor tu. (Sa. 25:4, 5) An wen wi prie tu Jeuova, im a-go ansa wi. (1 Jan 3:21, 22) Wan sista iina Iezha we niem Khan se: “Mi did lov Jeuova kaaz mi did get fi nuo bout im, bot mi get fi lov im muor wen mi si ou im ansa mi prieya dem. Dis mek mi waahn fi du di ting dem we im waahn mi fi du.” b

9. Wa Timoti did du fi shuo se im a lov di breda an sista dem muor an muor?

⁹ Kopl ier afta Paal ton wan Kristiyan, im did miit wan yuut we did niem Timoti. Timoti did lov Jeuova an im did lov piipl tu. Wen Paal did a rait tu di breda dem iina Filipai, im tel dem se: “Mi no av nobadi els laik im we riili kier bout unu an ou unu du.” (Fil. 2:20) So wen Paal did a tel di breda dem bout Timoti, im neehn tel dem bout ou Timoti kuda gi taak gud ar bout ou im kuda set op tingz gud iina di kanggrigieshan, bot wa im did tel dem a ou Timoti did lov di breda an sista dem. So di kanggrigieshan dem we Paal did a sen Timoti fi go elp out mos did wel waahn fi si im kom.​—1 Kor. 4:17.

10. Wa Ana an ar ozban did du fi shuo se dem lov dem breda an sista dem?

¹⁰ Wi chrai an si ou wi kyan elp wi breda an sista dem tu. (Iib. 13:16) Luk pan wa Ana we wi did taak bout iina di lesn bifuo da wan ya did du. Afta wan bad  staam did gwaan, shi an ar ozban go luk fi wan fambili we a Jeuova Witnis, an dem fain se di ous tap jrap dong iina di ous. An kaaz a dis, dem neehn av no kliin kluoz fi wier. Ana se: “Wi tek dem kluoz dem an go wash dem an aiyan dem an fuol dem op kya bak go gi dem. Fi wi, it did komiin laik a jos wan likl sitn wi did du fi dem, bot it mek wi an dem ton fren til tide die.” Kaa Ana an ar ozban lov di breda an sista dem, it push dem fi elp dem.​—1 Jan 3:17, 18.

11. (a) Wen wi du tingz fi mek ada piipl si se wi lov dem, wa it du fi dem? (b) Azkaadn tu Pravorbz 19:17, wen wi du tingz fi mek ada piipl si se wi lov dem, wa Jeuova a-go du?

¹¹ Wen wi kain tu wi breda an sista dem an du tingz fi shuo dem se wi lov dem, dem si se wi a chrai fi du tingz di wie ou Jeuova wuda dwi’it. An dem mait-a api fi wa wi du muor dan wi mait-a iivn nuo. Khan, we wi taak bout aredi, memba di wan dem we did elp ar out. Shi se: “Mi did api fi di sista dem we kom a mi yaad fi mi fi kyari mi go sorvis. An dem kyari mi go iit wan likl sitn ar lonch som a di taim, an wen wi don, dem kyari mi rait baka mi yaad. A nou mi a si se dis did tek nof outa dem fi du. An mi kuda si se dem did api fi dwi’it.” Ye, nof taim wen wi du tingz fi piipl, a no aal a dem a-go tangk wi fi wa wi du. Dis a wa Khan se bout di wan dem we did elp ar out: “Mi wish mi kuda gi bak aal a dem sitn fi wa dem did du fi mi bot mi no nuo wich paat aal a dem liv. Bot mi nuo se Jeuova nuo wich paat dem liv, an mi a prie se Jeuova bles dem fi aal a wa dem du fi mi.” Khan did nuo wa shi a se, kaa eni likl ting wi du fi nobadi, Jeuova si an it wot nof tu im.  An im a-go bles wi fi wa wi a du.​—Riid Pravorbz 19:17.

12. Wa di breda dem kyan du fi shuo se dem lov di breda an sista dem iina di kanggrigieshan? (Luk pan di picha dem tu.)

¹² Ef yu a wan breda iina di kanggrigieshan, wa kyan elp yu fi du muor iina di kanggrigieshan? An wa yu kyan du fi shuo se yu lov di breda an sista dem? Wan yong breda we did niem Jordan did aks wan elda wa im kuda du fi elp out muor iina di kanggrigieshan. Di elda tel im se im api fi aal a wa im a du iina di kanggrigieshan aredi an den im tel im ou im kyan du muor. Laik im tel im se im fi chrai an kom a di miitn dem orli so dat im kyan se oudi tu di breda an sista dem bifuo di miitn staat, an im fi put op im an an ansa kwestiyan, an im fi go a sorvis wid di breda an sista dem iina im fiil sorvis gruup aafn, an im fi luk out fi ada wiez we im kyan elp ada piipl tu. Wen Jordan du aal a dis, im fain se im neehn jos did a lorn nyuu tingz, bot im did a get fi lov di breda an sista dem muor an muor. So im fain out se wen wan breda ton wan ministiiriyal sorvant, a no da taim de im staat fi elp di breda an sista dem, bot a sitn we im a du aredi, im wuda jos a gwaan elp dem muor.​—1 Tim. 3:8-10, 13.

13. Kaa wan breda we niem Kristiyan did lov Jeuova an di breda an sista dem, ou dat did elp im fi ton wan elda agen?

¹³ Wa ef yu yuus tu bi wan ministiiriyal sorvant ar wan elda bot yu a no wan no muor? Jos nuo se Jeuova memba aal a wa yu yuus tu du fi im kaa yu lov im an di breda an sista dem. (1 Kor. 15:58) An im si umoch yu stil lov di breda an sista  dem. Wan breda we niem Kristiyan did fiil bad kaa im a neehn wan elda no muor. Bot im se: “Mi did mek op mi main fi du evriting we mi kyan du fi Jeuova kaa mi lov im aalduo mi a neehn wan elda no muor.” An iina no taim im ton wan elda agen. Kristiyan se: “Mi did likl fried fi ton wan elda agen, bot mi mek op mi main se sins Jeuova paadn mi an mek mi ton wan elda agen, mi a-go du wa im tel mi fi du kaa mi lov im an di breda an sista dem.”

14. Wa wi kyan lorn fram wa Elena did se?

¹⁴ Jeuova piipl dem du tingz fi mek dem nieba dem si se dem lov dem. (Mat. 22:37-39) Laik yu av wan sista we niem Elena we kom fram wan konchri we niem Jaajiya. Shi se: “Fos mi did onggl a priich kaa mi lov Jeuova. Bot den kaa mi staat fi lov Jeuova muor an muor, mi staat fi lov piipl muor an muor tu. An mi chrai fi tingk bout di prablem dem we dem mait-a av an wa mi kyan se tu dem bout Jeuova fi elp dem. Di muor mi tingk bout dem a di muor mi waahn fi elp dem.”​—Ruo. 10:13-15.

15-16. Bies pan wa wi a si iina di picha dem, wa a som a di blesn dem we wi kyan get wen wi du tingz fi mek piipl si se wi lov dem?

¹⁵ Wen yu du tingz fi mek yu breda an sista dem si se yu lov dem, yu a elp  ada piipl tu. Laik luk wa did gwaan afta KUOVID-19 staat go roun. Wan breda we niem Paolo an im waif did elp uol iip a sista we op iina iej fi yuuz dem tablit an fuon an dem ting de fi priich. Wan a di sista dem we did fain it aad fi yuuz dem sitn de fi priich get fi nuo ou fi yuuz it gud. An kaaz a dis, shi kuda did invait uol iip a ar fambili fi kom a di Laad Sopa, an so bout siksti a dem get fi wach it pan dem tablit an ting. An aal a dis apm kaaz a di wok we Paolo an im waif did du. Afta dat, di sista rait Paolo an se: “Tangk yu fi tiich wi ou fi yuuz dem ting ya, an mi naa go figet umoch Jeuova kier bout wi an ou yu wok aad fi elp wi.”

¹⁶ Dis mek Paolo get fi nuo se di big ting a no umoch yu nuo ar ou gud yu kyan du sitn. Bot di big ting a umoch yu lov piipl. Im se: “Mi yuus tu bi wan sorkit uovasiya ino, bot nou mi get fi si se di breda an sista dem mait no memba di taak dem we mi gi, bot dem a-go memba wa mi du fi dem.”

17. Uu els it a-go elp wen wi du tingz fi mek piipl si se wi lov dem?

¹⁷ Wen wi du tingz fi mek ada piipl si se wi lov dem, it mek tingz ton out gud fi wi tu iina som wiez we wi nat iivn did a tingk bout it. Luk pan Janatan we liv iina Nyuu Ziilan. Im se wan Satde wen di son did at bad, im si wan paiyanier a priich pan di ruod. So im disaid se im a-go wok wid im iina sorvis. An im staat fi du dat evri Satde afta dat. Wen im did a dwi’it, im neehn nuo ou it wuda elp im out. Janatan se: “Wen mi staat fi dwi’it, mi neehn riili lov fiil sorvis. Bot wen mi lisn an si ou di paiyanier du di priichin wok an si ou im a get piipl fi lorn bout Jeuova, it mek mi staat fi lov di priichin wok. An it mek mi an im ton gud fren. An im elp mi fi get chrang iina wa mi biliiv iina, an im mek mi jraa kluosa an kluosa tu Jeuova.”

18. Wa Jeuova waahn wi fi du?

¹⁸ Jeuova waahn aal a wi fi lov im an ada piipl muor an muor. So wi si se wi kyan get fi lov im muor an muor wen wi prie tu im aafn, an wen wi riid im Wod, an wen wi sidong an tingk bout wa wi riid. An wi kyan get fi lov wi breda an sista dem muor an muor wen wi du tingz fi elp dem out. An wen wi du aal a dis, it a-go elp wi fi jraa kluosa tu Jeuova an tu wi breda an sista dem tu an wi a-go bi dem fren fi eva.