DI LESN FI STODI 31
“Tan Op Chrang An No Mek Notn Mek Yu Tap Biliiv”
“Mi breda an sista tan op chrang an no mek notn mek yu tap biliiv.”—1 KOR. 15:58.
SANG 122 Wi Fi Stie Schrang
DIS A WA WI A-GO LUK PAN a
1-2. Ou wan Kristiyan kyan komiin laik wan ai ai bildin we go wie op iina di skai? (1 Korintiyan 15:58)
IINA 1979, dem mek wan big opstiez plies we de iina Tuokyo, we de iina Japan, we av 60 levl we luk laik se it a go wie op iina di skai. An piipl staat fi wanda, laik ou dem av uol iip a ortkwiek de-so ef it wuda kyan tan op wen di ortkwiek dem a gwaan. It kuda tan op kaa di piipl dem we mek it did mek it chrang iina wan wie so it kuda ben likl, so wen di ortkwiek shiek it, it no mash op. A so Kristiyan fi komiin laik da chrang bildin de we dem did mek. Bot ou wi kyan komiin laik it?
2 Wan Kristiyan fi kyan tan op chrang an no mek notn tap im fram du wa Jeuova waahn im fi du. (Riid 1 Korintiyan 15:58.) Wan Kristiyan “no aad-iez” an im no du wa ada piipl waahn im fi du, bot insted-a dat im du wa Jeuova waahn im fi du. An im tek taim wid ada piipl an du tingz fi shuo se im ‘kier bout dem.’ (Jmz. 3:17) So wan Kristiyan we lorn ou fi du dem sitn ya naa go gwaan laik se dem a du wa rait muor dan nobadi els, bot dem naa go put op wid rangz niida. Iina da lesn ya, wi a-go si ou wi kyan tan op chrang. An wi a-go si faiv difrant tingz we Sietan yuuz fi chrai mek wi no get fi tan op chrang, an wi a-go si wa wi kyan du fi tan op chrang gens im.
WA KYAN ELP WI FI TAN OP CHRANG?
3. Wa a som a di sitn dem we Jeuova tel wi fi du iina Aks 15:28, 29?
3 Jeuova a di wan we tel evribadi ou fi liv, an im aalwiez a tel im piipl dem plien plien wa dem fi du an wa dem no fi du. (Aiz. 33:22) Laik iina di taim wen di apasl dem did de pan di ort, di wan dem we did a wok tugeda fi liid di kanggrigieshan did tel di breda an sista dem chrii sitn we kyan elp dem fi tan op chrang. Dem tel dem se: (1) a Jeuova wan dem fi worship an dem no fi worship no faalz gad, (2) dem no fi nyam ar jringk no blod, an dis a sitn we dem fi tek siiros, an (3) dem fi du wa di Baibl se an kip we fram seks sin an dem ting de. (Riid Aks 15:28, 29.) Wen it kom aan tu dem chrii sitn ya, wa kyan elp wan Kristiyan fi tan op chrang an du wa Jeuova waahn dem fi du?
4. Ou wi shuo se a Jeuova wan wi a worship? (Revilieshan 4:11)
4 A Jeuova wan wi a-go worship an wi naa go worship no ada Gad. Jeuova did tel di Izrelait dem se a im wan dem fi worship. (Dyuu. 5:6-10) An wen di Devl did chrai fi mek Jiizas worship im, Jiizas tel im se a Jeuova wan yu fi sorv. (Mat. 4:8-10) So wi no tek notn an worship it fi Gad. So wi naa go yuuz no imij wen wi a worship Gad. An wi naa go gi nobadi di big op we Jeuova fi get, it no mata ef dem a choch liida, ar dem iina govament, ar dem kyan ron faas ar dem a big singga ar eniting laka dat—wi naa du notn fi mek dem fiil laik se dem a gad. Wi mek shuor se a Jeuova wan wi a worship we “mek evriting.”—Riid Revilieshan 4:11.
5. Wa mek wi fi du tingz we shuo se laif an blod wot nof tu wi laik ou it wot nof tu Jeuova?
5 Kaa laif an blod wot nof tu Jeuova, wi du tingz fi shuo se dem wot nof tu wi tu. An wi du dat kaa Jeuova mek wi nuo se di laif de iina di blod, an dis a wan nais gif we Jeuova gi wi. (Liv. 17:14) An wen Jeuova tel piipl se dem kuda nyam miit, im did tel dem se dem no fi nyam di blod. (Jen. 9:4) An a di siem ting im tel di Izrelait dem se iina di Laa we im did gi Muoziz fi gi dem. (Liv. 17:10) An im did tel di man dem we wok tugeda fi liid di Kristiyan dem se dem fi tel di piipl dem se dem “no fi nyam . . . ar jringk no blod.” (Aks 15:28, 29) An wi du wa Gad se aal ef wi sik an di dakta se wi fi tek blod. b
6. Wa wi fi du fi mek shuor se wi no du no seks sin an dem ting de?
6 Wi mek shuor se wi du wa Jeuova se wi fi du an kip we fram seks sin an dem ting de. (Iib. 13:4) Di apasl Paal tel wi se eniting we de insaida wi we bilang tu da worl ya laik seks sin an dem ting de, wi fi “dash it we!” Dat miin tu se, wi naa go luk pan notn ar du notn we a-go mek wi waahn fi du no kain-a seks sin. (Kol. 3:5; Juob 31:1) So wen notn kom op we mait-a mek wi staat fi tingk bout sitn ar fi du sitn we Jeuova no laik, wi a-go get rid a it siem taim.
7. A wa wi fi mek op wi main fi du, an wa mek?
7 Jeuova waahn wi fi ‘fala im wid aal a wi aat.’ (Ruo. 6:17) An di sitn dem we im tel wi fi du a fi wi uona gud, an wi kyaahn dis git op an chienj im laa dem. (Aiz. 48:17, 18; 1 Kor. 6:9, 10) An wi chrai aad fi du di sitn dem we Jeuova se wi fi du, jos laik wan a di man dem we did rait wan a di Saam dem. Im se: “Mi mek op mi main se fi di res a mi laif, mi a-go du evriting we yu tel mi fi du.” (Sa. 119:112) Bot Sietan a-go chrai aad fi mek wi no du dat. Wa a som sitn im mait-a yuuz fi chrai mek wi tap sorv Jeuova wid aal a wi aat?
TINGZ WE SIETAN YUUZ FI CHRAI FI MEK WI NO SORV JEUOVA WID AAL A WI AAT
8. Ou wen Sietan yuuz piipl fi fait gens wi it kyan mek wi no waahn sorv Jeuova wid aal a wi aat?
8 Im mek piipl fait gens wi an mek tingz aad fi wi kaaz a wa wi biliiv iina. Sietan di Devl mek piipl biit biit wi op an du tingz we mek wi fiil a wie, fi mek wi tap sorv Jeuova wid aal a wi aat. Im du dat kaa im a “luk sumadi fi nyam” kaa im no waahn wi an Jeuova fi bi fren no muor. (1 Pii. 5:8) A siem so dem did chretn an biit an kil som a di Kristiyan dem we did de bout likl afta Jiizas ded. Kaa dem did mek op dem main se dem a-go tan op chrang an sorv Jeuova wid aal a dem aat. (Aks 5:27, 28, 40; 7:54-60) An wen wi si di wikid sitn dem we dem a du tu wi breda an sista dem we de a Rosha an som ada konchri, it mek wi si se Sietan stil a yuuz piipl fi fait gens wi an mek tingz aad fi wi fi mek wi tap sorv Jeuova.
9. Tel wi wa did apm tu Bob we mek wi si se wi fi chrai an nuo wen Sietan a du tingz iina wan dikaayin wie?
9 Im du tingz iina wan dikaayin wie. Sietan no aalwiez kom chriet an mek wi nuo wa im a du, som a di taim im kom wid som “wikid chrik” tu. (Ifii. 6:11) Laik wen wan breda we niem Bob did iina aspital fi go du wan big aparieshan, im tel di dakta dem se dem no fi gi im no blod no mata wa. Di dakta dem se ye, dem a-go du wa im se. Bot yu no nuo wa apm? Di nait bifuo di aparieshan, di dakta we fi gi im di sitn fi mek im sliip fi du di aparieshan go luk fi im iina di nait wen aal a im fambili dem gaan. An im tel Bob se dem naa go gi im di blod ino, bot dem a-go av it de, so das ef dem fain out se im a-go niid it, dem kyan gi im it. Di dakta mait-a did fiil se Bob wuda chienj im main kaa im fambili dem no de de. Bot Bob tan op fi wa im biliiv iina. Im mek dem nuo se no mata wa apm tu im, dem no fi gi im no blod.
10. Wa mek di wie ou piipl luk pan tingz komiin laik wan chrap? (1 Korintiyan 3:19, 20)
10 Di wie ou piipl luk pan tingz. Ef wi onggl luk pan tingz di wie ou piipl luk pan tingz, wi mait-a fain se wi naa tingk bout tingz di wie ou Jeuova waahn wi fi tingk bout tingz an wi naa du di ting dem we im waahn wi fi du. (Riid 1 Korintiyan 3:19, 20.) Di ting dem we “dem piipl de se waiz” mek piipl no waahn fi du di sopm dem we Gad waahn dem fi du. Som a di Kristiyan dem iina Porgamom an Taiyataira staat fi du tingz laik di piipl dem we liv iina dem plies de. Laik dem did staat fi worship faalz gad, an dem staat fi du aal kain-a seks sin tu. So Jiizas jraa op di Kristiyan dem iina dem kanggrigieshan de kaa dem did a put op wid slaknis. (Rev. 2:14, 20) An a siem so wi anda uol iip a presha tide fi no tingk bout tingz di wie ou Jeuova waahn wi fi tingk bout tingz. Wi fambili an wi fren dem mait-a chrai fi mek wi fiil se di ting dem we Jeuova waahn wi fi du tu moch fi wi. So dem mait-a presha wi fi du sitn we Jeuova no waahn wi fi du. Laik dem mait-a se di Baibl a wan oul buk an di sitn dem we de iina it no mek no sens, so wi kyan du wa wi waahn fi du wen it kom aan tu seks sin an dem ting de.
11. Wen wi a tan op fi di sitn dem we Jeuova se rait, wa wi fi mek shuor se wi no du?
11 Som a di taim wi mait-a fiil se di ting dem we Jeuova tel wi fi du no so klier. An wi mait-a fiil laik se wi fi du muor dan di sitn dem we Gad Wod tel wi fi du. (1 Kor. 4:6) A dat di choch liida dem we did de bout iina Jiizas taim did a du an a sin gens Gad. Kaa dem did a gi di piipl dem som uol iip a ruul fi dem fala we neehn iina Gad Laa we di piipl dem kudn manij fi du. (Mat. 23:4) Jeuova yuuz im Wod an im aaganaizieshan fi tel wi klier klier di sitn dem we im waahn wi fi du. So wi no niid fi ad notn tu it. (Pr. 3:5-7) So wen it kom aan tu ou wi an wi breda an sista dem fi liv wi laif, wi no niid fi mek op no ruul kaa wi av Gad Wod fi tel wi wa wi fi du an wa wi no fi du.
12. Ou Sietan a mek piipl chat tingz we ‘soun laik it mek sens, bot it no riili mek no sens at aal’?
12 Im tel bie lai. Sietan yuuz difrant tingz fi chrik piipl an plit plit dem op, laik im yuuz “aagiment we onggl soun laik se dem mek sens, bot we no riili mek no sens at aal.” An im yuuz di wie ou ‘piipl fiil bout tingz iina di worl’ fi chrik dem an plit plit dem op tu. (Kol. 2:8) Iina Baibl taim wen di Kristiyan dem did de bout, yu did av som man we a tiich som difrant difrant sitn we bies pan wa piipl tingk se. An yu did av som man we did a tiich som sitn we di Juu piipl dem biliiv we no iina Gad Wod an se Kristiyan did fi stil kip di Laa we Gad gi Muoziz. Dem sitn ya we dem did a tiich di piipl dem a did a lai, kaaz dem mek piipl staat fi biliiv wa man se insted-a di sitn dem we Jeuova se we mek sens. Iina fi wi taim, Sietan a yuuz nof a di palitishan dem fi kom pan TV, an riediyo, an kompyuuta an dem ting de fi taak tingz we no go so, an wi si dis wen KUOVID-19 did a gwaan bad. c A uol iip a lai did a go roun wen KUOVID-19 did a gwaan bad, bot di breda an sista dem we did a lisn tu wa Jeuova aaganaizieshan a se neehn av di uol iip a schres an prablem laik we di wan dem we did a lisn tu dem lai de did av.—Mat. 24:45.
13. Wa mek wi fi de pan di luk out fi tingz we kyan tek wi main aafa di sitn dem we impuotant?
13 Tingz we kyan tek wi main aafa wa impuotant. Wi fi aalwiez kip wi main pan “di sitn dem we rait.” (Fil. 1:9, 10) Wi av uol iip a tingz roun wi we kyan tek op wi taim an we kyan tek wi main aafa di sitn dem we rait. An wi a taak bout som likl sitn we wi du, laik fi iit, an jringk, an tingz we wi du fi enjai wiself, an laik di kain-a wok we wi du fi tek kier a wi fambili. Ef wi no nuo wa wi a du, wi kuda mek dem sitn ya ton di big ting iina wi laif. (Luuk 21:34, 35) An pan tap a dat, evridie wi ier nyuuz we av fi du wid tingz we piipl a aagyu an fait bout, an we av fi du wid palitiks an dem ting de. Wi kyaahn mek dem sitn ya tek wi main aafa di sitn dem we fi bi di big ting iina wi laif. Ar els wi mait-a fain se wi staat fi tek said wid dem iina wi aat an main. Sietan yuuz aal a dem sitn ya fi chrai fi mek wi no sorv Jeuova wid aal a wi aat. Wi a-go luk pan som sitn we kyan elp wi fi tan op chrang an no du wa Sietan waahn wi fi du.
WA KYAN ELP WI FI TAN OP CHRANG?
Ef yu tingk bout di taim wen yu did gi yu laif tu Jeuova an get baptaiz, an stodi im Wod an tingk bout di sitn dem we yu riid, an du tingz fi mek shuor se notn no tap yu fram du wa Jeuova waahn yu fi du, an gwaan chos iina Jeuova, den yu a-go kyan gwaan tan op chrang (Luk iina paragraaf 14-18)
14. Wa a wan ting we kyan elp wi fi tan op chrang an du wa Jeuova waahn wi fi du?
14 Tingk bout wa mek yu gi yu laif tu Jeuova an baptaiz. Yu did du aal a dem sitn ya kaa yu waahn tan op chrang an du wa Jeuova waahn yu fi du. Tingk bout wa did mek yu nuo se ye, dis a di chuut. Yu did nuo se dis a di chuut kaaz yu did stodi an get fi lov an rispek Jeuova. An dat did mek yu staat fi chos iina Jeuova an sari bout di bad sitn dem we yu a du an tap du dem, an yu staat fi du di sitn dem we Jeuova waahn yu fi du. An duohn it mek yu fiil gud wen yu si se Jeuova paadn yu fi yu sin dem? (Sa. 32:1, 2) An yu go a yu miitn dem an staat fi tel ada piipl bout di sitn dem we yu a lorn. An nou dat yu gi yu laif tu Jeuova an baptaiz, yu de pan di ruod we kyan mek yu liv fi eva. An yu naa go mek notn mek yu kom aafa it.—Mat. 7:13, 14.
15. Ou it kyan elp wi wen wi stodi di Baibl an tingk bout di sitn dem we wi riid?
15 Stodi Gad Wod an tingk bout di sitn dem we yu riid. Siem wie laik ou wan chrii kyan tan op chrang ef di ruut dem go faar faar dong iina di grong, a siem so wen wi stodi Gad Wod wi kyan go tan op chrang tu. An wen di chrii a gruo, di ruut dem go dong diipa an diipa an spred out tu. A siem so wen wi stodi Gad Wod an tingk bout di sitn dem we wi riid, wi a-go staat fi chos im muor an wi a-go nuo fi shuor se di sitn dem we im se a di bes ting fi wi du. (Kol. 2:6, 7) Tingk bout ou wa Jeuova did tel im piipl dem iina Baibl taim fi du an no fi du did elp dem. Laik wen Iziikel did get wan vijan an si wan ienjel a tek uol iip a mejament a Gad ous, im did tek iin wa di ienjel did a du gud gud. An wa im did si did elp im, an it kyan elp wi tu fi worship Jeuova di rait wie. d (Izii. 40:1-4; 43:10-12) So wen wi tek di taim fi stodi di Baibl an tingk bout di sitn dem we wi lorn we mait-a no so iizi fi wi andastan, it a-go du wi gud.
16. Kaa Bob did mek op im main se im naa mek notn tap im fram du wa Jeuova waahn im fi du, ou it did elp im? (Saam 112:7)
16 Du tingz fi mek shuor se notn no tap yu fram du wa Jeuova waahn yu fi du. Wen Dievid did sing se: “Mi Gad, mi mek op mi main fi du wa yu waahn mi fi du,” it did shuo se notn kudn mek Dievid no lov Jeuova wid aal a im aat. (Sa. 57:7) A siem so wi kyan shuor se wi kyan chos Jeuova an se wi kyan mek op wi main fi du wa im waahn wi fi du no mata wa. (Riid Saam 112:7.) Memba Bob we wi did taak bout aredi, we di dakta did tel se dem did a-go av som blod pudong de fi im ef im niid it, bot im mek dem nuo se ef dem a-go gi im di blod im a-go kom outa dem aspital. Bob se: “An mi neehn did a if-an-bot an wori wori op miself niida.”
Ef wi a gwaan chos iina Jeuova nof nof, wi a-go tan op chrang an du di sitn dem we Jeuova waahn wi fi du no mata wa wi a go chuu (Luk iina paragraaf 17)
17. Wa wi kyan lorn fram wa did gwaan wid Bob? (Luk pan di picha tu.)
17 Bob kuda tan op chrang an du wa Jeuova waahn im fi du wen im did go iina di aspital, kaa lang bifuo dat im did mek op im main se a dat im a-go du. Di fos ting im did waahn fi du a fi mek Jeuova api an a dat im did mek op im main fi du. Den di sekan ting we im did du a stodi di Baibl an di buk an pamplet dem fi si wa dem did se bout laif an blod. An di tord ting, a dat im did nuo fi shuor se az lang az im du wa Jeuova se im fi du evriting wuda aarait. A siem so wi kyan mek op wi main fi tan op chrang an du wa Jeuova se no mata di kain-a prablem we wi mait-a av.
Barak an di man dem we did a elp im fi fait did briev, an dem ron go fait gens Sisera aami (Luk iina paragraaf 18)
18. Ou wa Barak did du tiich wi se wi fi chos iina Jeuova? (Luk pan di picha pan di kova.)
18 Yu fi chos iina Jeuova. Barak did win di waar kaa im did chos iina Jeuova an du wa Jeuova did tel im fi du. Iina dem taim de, dem neehn av no shiil ar ada tingz fi fait waar iina Izrel, bot Jeuova did tel Barak fi go fait gens Sisera an im aami we kom fram Kienan. (Joj. 5:8) An Debra, wan uman we did a wan prafit, tel Barak se im fi go dong pan di flat paat a di lan fi go fait gens Sisera we did av 900 bogi kyaat. An Barak did du wa shi se aalduo it mait-a did luk laik se it wuda aada fi dem win dong de-so. Wen dem staat fi go dong aafa Mount Tiebuor, Jeuova sen wan piis a rien we mek Sisera bogi kyaat dem stok op stok op iina di mod an a so Jeuova mek Barak win. (Joj. 4:1-7, 10, 13-16) A siem so Jeuova wi mek wi win ef wi chos iina im an chos di sitn dem we im aaganaizieshan tel wi fi du.—Dyuu. 31:6.
MEK OP YU MAIN SE YU A-GO TAN OP CHRANG NO MATA WA
19. Wa mek yu waahn fi tan op chrang?
19 Az lang az wi liv iina da worl ya, wi aalwiez afi go de fait fi tan op chrang. (1 Tim. 6:11, 12; 2 Pii. 3:17) Wi fi mek op wi main se wi naa go mek di piipl dem we a fait gens wi mek wi tap sorv Jeuova, an wen Sietan kom wid im dikaayin wie fi chrik wi op, wi naa go mek im kech wi, an wi naa go mek di wie ou piipl luk pan tingz tap wi fram sorv Jeuova. An wen im yuuz piipl fi tel wan bag a lai, wi stil naa go fala im. An wi no mek notn tek wi main aafa di sitn dem we impuotant. (Ifii. 4:14) Bot wi a-go tan op chrang an du wa Jeuova waahn wi fi du. Iina di neks lesn, wi a-go si ou wi kyan fala Jeuova an Jiizas an tek taim wid piipl.
SANG 129 Eng Aan, An Tan Op Chrang
a Fram Adam an Iiv taim til nou, Sietan waahn piipl fi fiil se a dem fi mek op dem main bout wa rait fram wa rang. An a di siem wie im waahn wi fi fiil bout wa Jeuova tel wi fi du an wa im aaganaizieshan tel wi fi du tu. Da lesn ya a-go elp wi fi no fiil laik se wi fi a du wi uona ting, laik ou piipl iina Sietan worl fiil. An it a-go elp wi fi tan op chrang an no mek notn tap wi fram du wa Jeuova waahn wi fi du.
b Fi fain out muor bout wa Jeuova waahn yu fi du wen it kom aan tu blod, luk iina lesn 39 a di buk we niem Yu Kyan Bi Api Nou An Fi Eva!
c Luk pan di paat pan jw.org we niem “Protect Yourself From Misinformation.”
d Fi lorn muor bout dis, riid chapta 13 an 14 a di buk we niem Pure Worship of Jehovah—Restored At Last!