1. Wa mek yu fi mek shuor se yu du tingz fi redi op yuself bifuo orikien an dem ting de gwaan?

 WEN sumadi du sitn fi mek shuor se dem redi bifuo sitn bad apm, it wi siev dem laif. Laik wen orikien an dem ting de a gwaan, di wan dem we did mek shuor se dem redi fi it wuda go chuu beta an kyan elp ada piipl tu. Wan aaganaizieshan we de iina Yuurop, we elp out piipl wen taim orikien an dem sitn de apm, se: “Wen yu du tingz fi mek shuor se yu redi op yuself bifuo sitn bad apm, dat kyan siev yu laif.”

2. Wa mek wi fi mek shuor se wi redi fi di wos sofarieshan we a-go gwaan? (Matyu 24:44)

² Wen di ‘wos sofarieshan’ staat, it a-go kom sodn. (Mat. 24:21) Bot di wos sofarieshan naa go komiin laik ortkwiek an dem ting de we evribadi no nuo se it a kom. An dis a kaa Jiizas did don tel im falara dem bout 2,000 ier ago se dem fi redi op demself fi da die de. (Riid Matyu 24:44.) Ef wi mek shuor se wi a du tingz fi mek shuor se wi redi fi di wos sofarieshan we a-go gwaan fram nou, den dat a-go mek it iiziya fi wi eng aan an no gi op wen wi a go chuu da rof taim de. An wi a-go kyan elp wi breda an sista dem fi go chuu an no gi op tu.​—Luuk 21:36.

3. Ou wen wi eng aan an no gi op, an wen wi lov wi breda an sista dem, an wen wi fiil it fi dem, it kyan mek wi redi fi di wos sofarieshan we a-go gwaan?

³ Wi a-go luk pan chrii sitn we wi kyan du fi mek shuor se wi redi fi di wos sofarieshan we a-go gwaan. Tingk bout dis, wa yu wuda du ef dem aks yu fi go priich an tel piipl se dem a-go ded kaa dem naa du wa Gad waahn dem fi du, an dem piipl de staat fi fait gens yu? (Rev. 16:21) Wan ting we a-go elp yu fi dwi’it a ef yu eng aan an no gi op, an du wa Jeuova se yu fi du kaa yu nuo fi shuor se Jeuova a-go de de fi yu. An wa yu wuda du ef wi breda ar wi sista dem luuz som a di sitn dem we dem av ar dem luuz aal a wa dem av iina di wos sofarieshan? (Aba. 3:17, 18) Dem taim de, fi elp wi breda an sista dem, wi afi fiil it fi  dem. Wa yu wuda du ef wan a di taim yu afi liv wid yu breda an sista dem iina wan likl plies kaaz di govament dem a fait gens wi? (Izii. 38:10-12) Wi afi go lov dem fi go chuu da rof taim de.

4. Ou di Baibl mek wi si se wi fi gwaan eng aan an no gi op, an mek wi breda an sista dem si se wi lov dem, an se wi fiil it fi dem?

⁴ Di Baibl mek wi nuo se wi fi gwaan eng aan an tan op chrang, an wi fi mek wi breda an sista dem si se wi lov dem, an se wi fiil it fi dem wen dem a go chuu wan rof taim. Laik Luuk 21:19 tel wi se: “Uu tan op chrang fi mi no mata wa, wi siev dem laif.” An Koloshan 3:12 se: “Unu aat mos muuv insaida unu fi ada piipl.” An 1 Tesaluoniyan 4:9, 10 se: “Gad imself don tiich unu ou fi lov unu wan aneda. . . . Bot mi breda an sista, wi a beg unu du dat muo an muo.” Aalduo Jiizas falara dem did a du dem sitn ya aredi, dem vors ya a did fi dem. So dem stil did afi a eng aan an no gi op, an du tingz fi mek dem breda an sista dem si se dem lov dem, an se dem fiil it fi dem wen dem a go chuu dem prablem dem. An a di siem ting wi fi a du. Fi elp wi fi du dat, wi a-go luk pan ou di fos taim Kristiyan dem did du dem sitn ya. An den wi a-go luk pan ou wi kyan du laik dem an si wa wi kyan du fi mek shuor se wi redi fi di wos sofarieshan we a-go gwaan.

5. Wa did elp di Kristiyan dem we did de bout iina Baibl taim fi diil wid dem prablem dem?

⁵ Dem Kristiyan de we did de bout bak iina Baibl taim did afi mek shuor se dem eng aan an no gi op. (Iib. 10:36) Kaa dem neehn onggl afi diil wid di prablem dem we evribadi els afi diil wid, bot dem did av ada prablem fi diil wid tu. Dem did av uol iip a piipl a fait gens dem an a mek tingz aad fi dem kaaz a wa dem biliiv, laik di Juu liida dem an di ruula dem we did de iina Ruom, an pan tap a dat, dem uona fambili tu. (Mat. 10:21) Dem did afi fait aad fi no fala di wan dem we did de iina di kanggrigieshan we did tap sorv Jeuova an a tiich aal kain-a lai an a chrai fi mek ada piipl tap sorv Jeuova tu. (Aks 20:29, 30) Bot dem breda an sista de did stil a eng aan. (Rev. 2:3) Wa did elp dem fi dwi’it? Wan ting we did elp dem a wen dem luk pan man laik Juob an si ou im did eng aan an neehn gi op. (Jmz. 5:10, 11) An dem prie an aks Jeuova fi gi dem di chrent fi eng aan. (Aks 4:29-31) An dem tingk bout di gud sitn dem we a-go apm kaa dem eng aan an no gi op.​—Aks 5:41.

6. Wa yu lorn fram wa Merita did du we did elp ar fi eng aan an go chuu?

⁶ Wen yu riid an stodi di Baibl an wi buk an pamplet dem an yu si ou ada piipl eng aan an go chuu dem prablem dem, it wi elp yu fi du di siem ting tu. An a dat wan sista we niem Merita we kom fram Albieniya did du wen ar fambili dem did a fait gens ar an biit biit ar op kaaz a wa shi biliiv iina. Shi se: “Wen mi riid iina di Baibl an si aal a di sitn dem we did apm tu Juob, it did riili elp mi. Kaa a uol iip im did go chuu, an im neehn nuo a uu did mek im a sofa so. Bot im se: ‘Mi rada ded fos dan ton mi bak pan Gad.’ (Juob 27:5) So mi get fi si se wa mi did a go chuu a neehn notn laik wa Juob did go chuu. Juob neehn nuo a uu did a mek im sofa, bot at liis mi nuo a uu a mek mi sofa.”

7. Aal ef wi naa go chuu som siiros prablem ya nou, wa wi fi stil a du?

⁷ Wen yu aalwiez a prie tu Jeuova an mek im nuo wa a gwaan wid yu, it a-go elp yu fi aalwiez tan op chrang an go chuu yu prablem dem. (Fil. 4:6; 1 Tes. 5:17) Yu mait-a naa go chuu no siiros prablem rait ya nou, bot wen yu beks bout sitn, ar yu fiil laik se yu no nuo wa fi du, ar yu fiil laik yu kyaahn manij evriting we a gwaan wid yu, yu prie tu Jeuova fi elp yu fi go chuu? Kaa ef yu aalwiez a prie tu Jeuova wen it kom aan tu dem likl prablem ya, wen yu a go chuu som biga prablem iina di fyuucha, it a-go iiziya fi yu aks im fi elp yu.  An den yu a-go nuo fi shuor se wen yu a go chuu yu prablem dem, im a-go nuo wen an ou fi elp yu.​—Sa. 27:1, 3.

8. Ou wa Mira did go chuu elp wi fi si se wen wi eng aan an go chuu wi prablem dem, it kyan elp wi fi eng aan an go chuu wi prablem dem iina di fyuucha? (Jiemz 1:2-4) (Luk pan di picha tu.)

⁸ Wen wi go chuu wi prablem dem nou an no gi op, it wi elp wi fi go chuu di wos sofarieshan we a-go gwaan. (Ruo. 5:3) An wi nuo dis kaa uol iip a breda an sista riyalaiz se wen dem go chuu dem prablem dem an no gi op, dem fain se it elp dem fi go chuu di neks prablem we kom op. Wen yu eng aan an go chuu yu prablem dem, it mek yu chos iina Jeuova muor. An yu a-go nuo se Jeuova aalwiez a-go de de fi elp yu wid eni prablem we kom op iina yu laif. (Riid Jiemz 1:2-4.) An a dat wan paiyanier sista we niem Mira we liv iina Albieniya fain se. Shi fain out se chuu shi did go chuu som prablem we kom op iina ar laif an neehn gi op, a dat elp ar fi go chuu som ada prablem we kom op iina ar laif. Ye, shi se somtaim shi fiil laik se a shi wan av so moch prablem. Bot shi se wen shi memba aal a wa Jeuova du fi ar aredi fi 20 ier nou, shi jos se tu arself se: ‘Jos gwaan stik tu Jeuova an no gi op. No mek aal di elp we Jeuova elp yu aredi go dong di jrien.’ Yu kyan du laik Mira tu an tingk bout ou Jeuova did elp yu fi go chuu yu prablem dem aredi, an nuo fi shuor se evritaim yu eng an go chuu yu prablem dem an no gi op, im si wa yu du an im a-go bles yu fi it. (Mat. 5:10-12) So wen di wos sofarieshan staat, yu wuda lorn aredi ou fi eng aan an no gi op wen yu a go chuu yu prablem dem, so yu a-go mek op yu main fi eng aan an go chuu yu prablem dem no mata wa a gwaan.

9. Wa di breda an sista dem we did de iina Antiyak did du fi mek di wan dem we did a go chuu di torbl staavieshan si se dem did fiil it fi dem?

⁹ Luk pan wa did apm wen som breda an sista, we did de iina Judiya, did a go chuu som torbl staavieshan. Afta di breda an sista dem we did liv iina Antiyak, we did de iina Siriya, did ier bout wa a gwaan, dem did fiil it fi dem breda an sista dem we did de iina Judiya. Bot a neehn onggl fiil dem did fiil it fi dem, dem du sopm bout it tu. So evribadi “mek op dem main fi elp Gad piipl we de iina Judiya. Evribadi gi wa dem kuda gi an dem gi bies pan wa dem av.” (Aks 11:27-30) An aalduo di breda an sista dem we did a go chuu di torbl staavieshan did liv faar fram di breda dem we did de iina Antiyak, di breda an sista dem we did de iina Antiyak did stil mek op dem main fi elp dem.​—1 Jan 3:17, 18.

10. Wa wi kyan du fi shuo wi breda an sista dem se wi fiil it fi dem wen dem go chuu orikien an dem ting de? (Luk pan di picha tu.)

¹⁰ Wi kyan du laik di breda an sista dem we did de iina Antiyak an elp out wi breda an sista dem wen orikien an dem sitn de gwaan. An wi kyan aks di elda dem we de iina wi kanggrigieshan ef wi kyan go elp out, an wi kyan gi moni an ting fi elp out wid di wok we wi a du aal uova di worl, an wi kyan prie fi dem breda an sista ya tu. b (Pr. 17:17) Laik iina 2020, muor dan 950 gruup did set op fi elp out di breda an sista dem we KUOVID did mek tingz aad fa. Wi fi mek di breda an sista dem we iina dem gruup de si se wi tangk dem fi aal a wa dem du, kaa dem breda an sista de fiil it fi di wan dem we a go chuu wan rof taim, an dem elp dem fi mek op bak dem ous an dem Kindom Aal dem an som ada plies we dem worship Jeuova, an dem elp dem fi gwaan sorv Jeuova tu.​—Luk pan 2 Korintiyan 8:1-4.

11. Wen wi du tingz fi elp out ada piipl, ou it mek ada piipl get fi nuo Jeuova?

¹¹ Afta wan orikien an dem ting de gwaan an wi du tingz fi elp wi breda an sista dem,  ada piipl si aal a wa wi du fi elp dem. Laik iina 2019, wen orikien Dorian did mash op wan Kindom Aal we de iina Ba’aamaz, wen di breda dem did a mek op bak di Kindom Aal, dem did aks wan kanchrakta we a neehn wan Jeuova Witnis umoch im wuda chaaj fi mek op bak di Kindom Aal. Im tel dem se: “Mi waahn fi gi unu evriting frii. Dis a sitn we mi waahn fi du fu’unu aaganaizieshan. Mi lov fi si ou unu tek kier a unu wan aneda.” Uol iip a piipl no nuo Jeuova, bot uol iip a dem a si wa di Jeuova Witnis dem a du fi elp ada piipl. A wan nais ting fi nuo se wen wi a du tingz fi elp ada piipl, it mek dem nuo Jeuova, di wan we “gud an kain kyaahn don”!​—Ifii. 2:4.

12. Wen wi wok aad nou fi elp out wi wan aneda, ou dat a-go elp wi wen di wos sofarieshan a gwaan? (Revilieshan 13:16, 17)

¹² Di Baibl mek wi nuo se rait ya nou an wen di wos sofarieshan a gwaan, di piipl dem we naa bak di govament dem a-go go chuu som rof taim, so wi afi go du tingz fi elp out wi wan aneda dem taim de. (Riid Revilieshan 13:16, 17.) So wi breda an sista dem a-go niid elp fi get fuud an kluoz an dem ting de. Wi waahn wen fi wi King Krais Jiizas kom fi get rid a im enimi dem, im si se wi a tek kier a wi wan aneda, an so im a-go tel wi se “kom kom tek Gad Kindom, a fu’unu uon.”​—Mat. 25:34-40.

13. Bies pan Ruoman 15:7, wa a som a di sitn dem we di Kristiyan dem yuus tu du fi shuo se dem lov dem wan aneda muor an muor?

¹³ Evribadi nuo se di Kristiyan dem iina Baibl taim did lov dem wan aneda. Bot it neehn iizi fi dem, laik di kanggrigieshan we did de iina Ruom did av difrant difrant kain-a piipl iina it. Laik yu did av di Juu piipl dem we did nuo Muoziz Laa, an yu did av ada piipl iina it tu we did gruo difrant we neehn nuo di Laa. Yu did av som we did a sliev, an som we neehn a sliev, an som we uon sliev. Bot ou aal a dem kuda stil gwaan lov dem wan aneda? Di apasl Paal did tel dem se, dem fi “tek [dem] wan aneda.” (Riid Ruoman 15:7.) A wa dis did riili miin? Fi “tek” sumadi miin se yu redi fi tek dem iina yu ous an yu a-go chriit dem gud, ar yu a-go mek dem bi wan a yu gud fren dem tu. Paal did tel Failiiman se im fi ‘tek bak im sliev Oniisimos iina im ous an welkom im.’(Failii. 17) An yu did av Apalos we neehn nuo nof bout wa Jiizas did tiich, so Prisila an Akwila “tek im wan said an tiich im.” (Aks 18:26) So dem Kristiyan de neehn mek di kanggrigieshan plit op plit op kaaz dem did difrant fram dem wan aneda bot dem yuus tu chriit dem wan aneda gud.

14. Wa Ana an ar ozban did du fi mek di breda an sista dem si se dem lov dem?

¹⁴ Wi kyan mek wi breda an sista dem si se wi lov dem tu wen wi mek dem bi wan a wi gud fren dem. An dis a-go mek dem du tingz fi shuo se dem lov wi tu. (2 Kor. 6:11-13) Luk pan wa did apm tu Ana an ar ozban wen dem did sen dem go a Wes Afrika fi go du mishineri wok. Bai di taim dem riich de, KUOVID brok out, so dem kudn get fi miit op wid di breda an sista dem iina di kanggrigieshan. Bot dem did stil waahn di breda an sista dem fi si se dem lov dem. So wa dem du a dat dem yuuz vidiyo kaal fi lingk op wid di breda an sista dem an mek dem nuo se dem waahn fi nuo dem beta. An so di fambili dem iina di kanggrigieshan staat fi kaal dem pan di fuon an sen mesij tu dem. Bot wa mek yu tingk Ana an ar ozban did du dis? Ana se, “Mi stil memba di lov we som breda an sista shuo mi an mi fambili wen tingz aarait wid mi an wen wi a go chuu som rof taim. Dat mek mi waahn fi du tingz fi mek mi breda an sista dem si se mi lov dem.”

15. Wen it kom aan tu ou wi fi lov wi breda an sista dem, wa wi lorn fram Vanessa? (Luk pan di picha tu.)

¹⁵ Di kanggrigieshan dem we uol iip a wi iina av breda an sista we gruo difrant an we av difrant wiez. Wi kyan lov aal a dem muor  wen wi luk pan di gud wiez dem we dem av. Wan sorkit uovasiya waif we niem Vanessa, we de iina Nyuu Ziilan, neehn fain it iizi fi ton fren wid di breda an sista dem we did de iina ar kanggrigieshan. Bot shi mek op ar main se shi naa go kip we fram dem kaa shi no laik ou dem tan bot shi a-go spen muor taim wid dem. An wen shi du dat, it elp ar fi si wa Jeuova lov bout dem. Shi se: “Fram mi ozban ton wan sorkit uovasiya, wi get fi spen uol iip a taim wid difrant breda an sista we av difrant difrant wiez, an nou mi fain it iiziya fi de roun dem. Mi lov se dem difrant an Jeuova lov dat tu. An a das wai im jraa aal a wi tugeda, iivn duo wi difrant.” Wen wi staat fi luk pan piipl di wie ou Jeuova luk pan dem, a so wi shuo se wi lov dem.​—2 Kor. 8:24.

16. Wa mek it a-go bi wan big ting fi wi lov wi wan aneda wen di wos sofarieshan a gwaan? (Luk pan di picha tu.)

¹⁶ Wen di wos sofarieshan a gwaan, it a-go bi wan big ting fi wi lov wi wan aneda. Kaa ef wi no lov wi wan aneda wen di wos sofarieshan a gwaan, a wich paat wi a-go go fi kip sief? Tingk bout wa Jeuova tel im piipl dem fi du wen dem did a fait gens Babilan bak iina di die. Im se: “Aal a unu mi piipl, gwaan iina unu ruum dem go aid. An lak di duor dem baka unu, an wiet likl bit til di jojment don.” (Aiz. 26:20) An it luk laik se wa Jeuova se ya-so a-go miin nof tu wi wen di wos sofarieshan a gwaan. Di “ruum dem” dem taim de mait-a bi wi kanggrigieshan dem. Wen di wos sofarieshan a gwaan, wi a-go fain se a wen wi a wok tugeda wid wi breda an sista dem iina di kanggrigieshan wi a-go kip sief, jos laik wa Jeuova pramis wi. So wi afi wok aad fi no jos a gwaan wid wi breda an sista dem kaa wi kyaahn du no beta, bot wi fi lov dem tu. Kaa wen wi lov dem, a it mait-a siev wi laif an mek wi no ded.

17. Ef wi gwaan redi op wiself nou fi di wos sofarieshan, wa wi a-go kyan du wen it kom?

¹⁷ Wen Jeuova big die kom, it a-go kaaz uol iip a prablem fi piipl. (Zef. 1:14, 15) Dem taim de, tingz a-go rof fi Jeuova piipl tu. Bot ef wi gwaan du tingz fi mek shuor se wi redi nou, wi a-go kyan kip kaam an elp ada piipl tu, an wi a-go kyan eng aan an go chuu eni prablem we kom op iina wi laif. An wen wi breda an sista dem a sofa, wi a-go kyan du tingz fi elp dem an mek dem si se wi fiil it fi dem. So ef wi gwaan lov wi breda an sista dem ya nou, it a-go iiziya wen di wos sofarieshan a gwaan fi mek dem si se wi lov dem. A so wen wi du dat, Jeuova a-go mek wi liv iina wan worl we wi naa go memba wa it komiin laik fi av orikien an dem sitn de. An wi naa go memba notn bout di prablem dem we wi av ya nou.​—Aiz. 65:17.