Mi faada did a wan elda iina di United Church of Canada we de wich paat wi liv, so evri wiik im wuda sen mi an mi sista go a Sonde skuul. An den 11 aklak iina di maanin, wi wuda go wid im a di choch sorvis. Afta dat, mi an mi sista wuda go a di Kindom Aal wid wi mada. It did iizi fi wi fi si se wa dem tiich a di tuu plies dem did difrant.

Mi mada taak bout wa shi did a lorn fram di Baibl wid ar gud fren dem we niem Bob an Marion Hutcheson an so dem did ton Jeuova Witnis tu. Iina 1958, di Hutcheson dem kyari mi an dem chrii bwai pikni go a di Divine Will International Assembly iina Nyuu Yaak Siti we dem kip fi iet die. Wen mi a luk bak pan tingz nou, mi si se it neehn iizi fi dem kyari mi wid dem, bot da sorkit miitn de a wan a di bigis ting we apm iina mi laif.

Wen mi did a tiinieja, mi did liv pan wan faam an mi did lov fi tek kier a di animal dem, an so mi did a tingk bout fi ton wan animal dakta. Mi mada did tel wan a di elda dem iina di kanggrigieshan bout dis. So im elp mi fi memba se wi a liv iina “di laas die dem.” An den im aks mi se, ‘Ef yu spen ierz a yuunivorsiti a stodi, dat a-go mek yu jraa kluosa tu Jeuova?’ (2 Tim. 3:1) So afta mi tingk bout aal a wa im se, mi mek op mi main se mi wudn go a yuunivorsiti agen.

Mi stil neehn nuo wa mi did a-go du afta mi gradiyiet fram ai skuul. Kaa iivn du mi yuus tu go a fiil sorvis evri wiiken, mi neehn laik it, so mi  neehn waahn fi bi wan paiyanier. An mi faada an mi ongkl uu neehn did a Jeuova Witnis did a tel mi se mi fi wok wid wan a di big inshuorans bizniz dem iina Toranto. A de-so mi ongkl did a wok iina wan tap-a-tap pozishan so mi staat fi wok de tu.

Wen mi did iina Toranto, mi aalwiez a wok uovataim an a kip fren wid piipl we a no Witnis, an kaaz a dat, mi neehn did a go miitn an a priich so aafn agen. Mi did a liv wid mi granfaada we a no Witnis, so wen im ded, mi did afi luk somwe els fi liv.

Breda an Sista Hutcheson we mi did go a kanvenshan wid iina 1958 did komiin laik wan mada an faada tu mi. Dem tel mi se mi kuda kom liv wid dem, an dem elp mi fi get kluosa tu Jeuova. So iina 1960, mi an wan a dem bwai pikni we niem Jan did baptaiz. Jan staat fi paiyanier, an dat did push mi fi priich muor. Di breda dem we de iina mi kanggrigieshan did si se mi an Jeuova did a get kluosa an se mi a du muor fi im. So dem pik mi fi ton di Theocratic Ministry School sorvant. a

Iina 1966, mi did get marid tu wan nais paiyanier sista we niem Randi Berge. Shi did wel waahn fi priich we dem niid elp fi du di priichin wok. Wi sorkit uovasiya did kier bout wi, so im tel wi se wi kuda go elp out di kanggrigieshan we de iina Oriliya iina Antaariyo. So wi pak op wi ting dem an wi muuv go de.

Likl afta wi riich a Oriliya, mi staat regila paiyanier wid Randi. Shi did aalwiez api wen shi a du di priichin wok an dat did mek mi api tu. An yu si fram mi staat wok aad iina di paiyanier wok, mi staat fi fiil api fi yuuz di Baibl fi tiich piipl bout di chuut. It did nais yu si fi si ou wi did get fi elp wan ozban an waif iina Oriliya fi chienj op dem laif an staat sorv Jeuova.

Wan a di taim wen wi did go a Toranto, mi did miit wan breda we niem Arnold MacNamara. Im  a did wan a di uovasiya dem we did de a Betel. Im aks mi ef mi wuda waahn fi bi wan speshal paiyanier, so mi se tu im sed taim se: “Ye man! Mi redi fi go eniwe, az lang az a no Kwibek!” Mi did se so kaa di piipl dem iina Kyanada we taak Ingglish aalwiez a taak bad bout di piipl dem we liv iina Kwibek, wan plies iina Kyanada we di piipl dem taak French, an a se a bie prablem de iina Kwibek. An iina da taim de, som palitishan iina Kwibek did waahn Kwibek fi ton wan konchri we difrant fram Kyanada.

Arnold tel mi se, “Kwibek a di onggl plies we di branch a sen speshal paiyanier go ya nou.” So siem taim mi tel im se, ye, mi wuda go, an mi did nuo aredi se Randi did waahn fi go de tu. It neehn tek mi lang fi si se dis a did wan a di bes ting we wi kuda eva du wid wi laif!

Afta wi go a wan French klaas fi bout faiv wiik, mi an Randi an wan neda ozban an waif go a wan plies we niem Rimuski. Dat did a bout 336 mail fram Manchriyaal. Bot wen wi riich de, wi si se wi did stil av nof fi lorn. Kaa wen mi go a wan miitn, an mi did a riid som sitn we di breda an sista dem fi nuo, mi go se a di neks kanvenshan we a kom, nof “aschrij bod a-go kom de,” bot mi did waahn fi se nof piipl “fram Aschriya a-go kom de.”

Wen wi did de a Rimuski, fuor sista we neehn marid, we did lov fiil sorvis, did kom de tu. An wan ozban an waif we niem Huberdeaus an dem tuu daata did kom liv de tu. Breda an Sista Huberdeaus did rent wan ous we did av sevn bed ruum, an aal a di paiyanier dem we did liv de elp fi pie di rent tu. Wi did kaal it di Wait Ous kaa it did av som wait kalom a di front, an di front a di ous did wait tu. Wi did aalwiez av bout 12 tu 14 piipl a liv iina di ous. Kaa mi an Randi did a speshal paiyanier an wi did aalwiez de iina fiil sorvis fram maanin til iivnin, it did nais fi aalwiez av sumadi we wuda kom out iina sorvis wid wi. Aal wen a winta taim an di iivin dem kuol bad, dem wuda stil kom out wid wi.

Wi an di ada paiyanier dem did get kluos kluos, so it komiin laik se wi an dem did a fambili. So som a di taim wi wuda sidong roun wan big faiya ar wi wuda av wan die wen wi wuda mek domplin wid difrant difrant sitn iina it. An wan a di breda dem kuda plie myuuzik gud, so Satde nait taim wi wuda sing sang an daans.

Nof piipl iina Rimuski did waahn fi lorn bout di Baibl. Iina jos faiv ier, wi did api fi si se nof a wi Baibl stodi dem baptaiz an di kanggrigieshan did av bout 35 breda an sista iina it we a priich.

Iina Kwibek, wi did lorn ou fi tiich piipl bout di chuut gud gud. An wi si ou Jeuova elp wi wen wi did a priich an tiich, an ou im did gi wi di sitn dem we wi did niid fi liv. Pan tap a dat, wi lorn ou fi lov di piipl dem we taak French we liv de, an wi get fi lov dem langwij an ou dem du tingz tu, an dat tiich wi fi lov ou difrant difrant piipl du tingz.​—2 Kor. 6:13.

Aal av a sodn di branch aks wi fi muuv go a wan toun we niem Chrakadi we de a di iis paat a Nyuu Bronzwik. Fi muuv neehn iizi fi wi kaa wi did jos sain op som piepaz fi muuv iina wan apaatment, an mi did jos get wan wok fi tiich fi kopl owa a wiik. Pan tap a dat, som a wi Baibl stodi dem did jos ton poblisha, an di Kindom Aal we wi did a mek op neehn don yet.

Wi spen di uol wiiken a prie tu Jeuova an a aks im ef wi fi muuv go a Chrakadi. An wi go luk pan di plies an wi si se it difrant fram Rimuski, bot wi mek op wi main se sins Jeuova waahn wi fi go de wi a-go go de. Ye man, wi disaid fi du tingz Jeuova wie fi si ou im wuda elp wi, an wi si ou im elp wi fi diil wid di difrant prablem  dem we wi did a wori an fret bout. (Mal. 3:10) An kaa Randi did a chos iina Jeuova , an shi a no sumadi we aalwiez a tingk bout arself wan, an shi nuo ou fi laaf bout tingz, dat did mek it iiziya fi wi muuv go a di nyuu plies.

Robert Ross a did di onggl elda iina wi nyuu kanggrigieshan. Im an im waif we niem Linda did kom de fi paiyanier, an dem mek op dem main fi stie de afta dem fos pikni baan. Bot iivn duo dem did a tek kier a dem likl bwai, dem did riili elp mi an Randi kaa dem tek wi iin nais nais iina di kanggrigieshan an dem did a du nof iina di priichin wok tu.

Wi did a paiyanier iina Chrakadi fi bout tuu ier wen wi get wan leta a se dem pik wi fi go iina di sorkit wok. Bwai, mi a tel yu di chuut, wi did shak bad. Wi did de iina di sorkit wok fi sevn ier fi di Ingglish kanggrigieshan dem. An den dem sen wi go a Kwibek fi mi bi di sorkit uovasiya fi som a di French kanggrigieshan dem uova de. Wi dischrik uovasiya we de iina Kwibek we neim Léonce Crépeault aalwiez big mi op wen mi gi wan taak. Bot afta a wail im wuda aalwiez aks mi se: “Yu tingk yu kyan du notn muor fi mek yu taak dem kanek tu di piipl dem?” b Yu si wen mi ier dis, it did elp mi fi wok aad fi tiich beta an mek shuor se mi taak dem a toch di piipl dem aat kaa dem get wa mi a se.

Wan a di wok we mi get fi du fi Jeuova we mi memba til tide die a di wan we mi get fi du a di “Victorious Faith” International Convention we did gwaan iina 1978 iina Manchriyaal. Mi did a wok iina di kichin. Wi did a plan fi 80,000 piipl kom, an wi did afi fiid dem piipl ya difrant fram ou wi wuda naamali fiid piipl a kanvenshan. Evriting iina di kichin did nyuu, laik di stuov an dem ting de, aal di kain-a fuud we wi wuda kuk an di wie ou wi wuda kuk it did difrant​—evriting did nyuu fi wi. Wi did av bout 20 big frij we did a gi bie chobl somtaim. Di die bifuo di kanvenshan staat, dem did a av wan mach a di stiediyom so wi kudn iivn go iina di stiediyom fi set op tingz til bout midnait. An bifuo maanin lait, wi did fi staat op di uovn dem fi mek brekfas. Wi did taiyad laik daag mi a tel yu man, bot mi lorn nof fram di breda an sista dem we did a elp out. Dem did wok aad, dem did nuo ou fi diil wid tingz, an dem did nuo ou fi laaf bout tingz tu. Kaaz a wa wi go chuu, wi ton gud gud fren til tide die. Wi did api so til fi de a da kanvenshan ya iina Kwibek, di siem plies we dem  did a fait gens di Jeuova Witnis dem aad aad iina di 1940’z an di 1950’z.

A uol iip a tingz mi lorn fram di breda dem we mek shuor se tingz a go gud a dem big kanvenshan ya iina Manchriyaal. Wan a di ier dem, David Splane, uu a wan a di breda dem we de pan di Govanin Badi ya nou, did a di uovasiya fi di kanvenshan. Bot wan neda taim, a mi dem did pik fi bi di uovasiya fi di kanvenshan, an David did de de fi mi.

Wi did lov di sorkit wok we wi did a du fi 36 ier. Bot iina 2011, dem aks mi fi go tiich a di School for Congregation Elders. A 75 difrant bed mi an Randi sliip iina fi tuu ier ino, bot it did wot it. Evri wiik wen skuul don, di elda dem did riili api kaa dem si se di Govanin Badi kier bout dem an dem waahn dem fi bi kluos kluos tu Jeuova.

Afta dat, mi did staat fi tiich a di School for Kingdom Evangelizers. Di breda an sista dem we did de de did av uol iip a wok fi du. An nof taim dem did fiil laik se dem kyaahn manij kaaz a di uol iip a wok we dem did av fi du. Laik dem wuda afi sidong iina di klaas fi uol a sevn owa a die. Den afta dat, iina di iivnin dem wuda afi spen chrii muor owa a du dem uomwok, an dem did afi du bout fuor ar faiv taak evri wiik. Mi an di ada breda we did a tiich did mek dem nuo se dem wudn iebl fi du aal a dis ef Jeuova neehn a elp dem fi dwi’it. Mi kyan aalwiez memba ou dem wuda fraitn fi si ou kaa dem a chos iina Jeuova, im elp dem fi du muor dan we dem tingk dem kuda du.

Kaa mi mada aalwiez shuo piipl se shi kier bout dem, a dat elp ar Baibl stodi dem fi jraa kluos tu Jeuova, an a dat elp mi faada tu fi chienj ou im fiil bout di chuut. Chrii die afta mi mada ded, wi did shak fi si se mi faada kom lisn tu wan Baibl sorman a di Kindom Aal, an im neva tap kom a miitn fi di neks 26 ier. Mi faada neva baptaiz bot di elda dem tel mi se im a di fos wan fi riich a di miitn dem evri wiik.

Di wie ou mi mada did liv ar laif did elp mi an mi sista dem nof nof. Mi chrii sista dem an dem ozban a sorv Jeuova. Wan a mi sista dem de a di branch afis iina Puotigal an di neks wan de a di branch afis iina Ieti.

Rait ya nou, mi an Randi a speshal paiyanier iina wan plies we niem Amiltan we de iina Antaariyo. Wen wi did de iina di sorkit wok, wi did api fi wok wid wi breda an sista dem wen dem go bak go taak tu piipl we dem did taak tu aredi iina sorvis an fi go a dem Baibl stodi wid dem tu. Bot nou wi glad fi a du wi uona Baibl stodi dem an fi si ou dem a jraa kluosa an kluosa tu Jeuova. An wi a get di chaans nou fi ton gud gud fren wid di breda an sista dem iina wi nyuu kanggrigieshan. An wen wi si ou Jeuova a elp dem no mata wa dem a go chuu, it mek wi fiil gud laik wi kyan push chuu tu.

Wen mi sidong an tingk bout aal a wa wi did go chuu, wi riili api fi si ou di difrant breda an sista dem did riili shuo se dem ‘kier bout wi.’ So wi aalwiez chrai fi du tingz fi mek wi breda an sista dem si se wi kier bout dem, an wi chrai fi elp dem fi du aal we dem kyan du fi Jeuova. (2 Kor. 7:6, 7) Laik yu did av wan fambili we di waif, an di son, an di daata did a paiyanier. So mi did aks di ozban se ef im eva tingk se im kuda paiyanier tu an im se im a sopuot chrii paiyanier aredi. So mi aks im se, “Yu tingk yu kyan elp dem muor dan ou Jeuova kyan elp dem?” An so mi chrai fi shuo im se im kyan paiyanier an api tu jos laik ou dem a paiyanier an api fi dwi’it tu. An jos siks mont afta dat, im staat fi paiyanier tu.

Mi an Randi a-go gwaan mek di yongga jinarieshan dem nuo bout Jeuova an aal a wa im du. An wi uop se dem a-go api a du Jeuova wok jos laik ou wi eva api fi dwi’it tu.​—Sa. 71:17, 18.