1. Azkaadn tu 1 Piita 5:2, a wich wok di elda dem api fi du?

 A DI elda dem Jeuova gi di jab fi tek kier a im piipl dem we im lov. An dem man ya lov di jab we Jeuova gi dem fi tek kier a di breda an sista dem, an dem wok aad fi bi “shepad uu . . . riili tek kier a [di shiip] dem.” (Jer. 23:4; riid 1 Piita 5:2.) Wi api fi av dem man ya iina di kanggrigieshan.

2. Wa a som a di prablem dem di elda dem afi diil wid?

² Fi tek kier a Jeuova shiip dem, di elda dem av nof wok fi du an nof taim it no iizi. Tony, wan elda we iina Merika, se im did afi nuo di mount a wok we im kuda manij fi du. Im tel wi se: “Wen KUOVID did staat, mi did av muor an muor wok fi du fi set op tingz fi di miitn dem an fiil sorvis. Bot wid aal a wa mi weehn a du, nof wok did stil de de fi mi du. Siek-a dat, mi neehn did a riid mi Baibl, ar du mi uona Baibl stodi, ar prie laik ou mi yuus tu du fos taim.” Wan neda elda we niem Ilir we kom fram Kosovo se sitn els did apm tu im. Kaa di piipl dem iina di konchri did a fait gens dem wan aneda, im did fain it aad fi du wa di breda dem a di branch afis did tel im fi du. Dem did tel im se fi go elp di breda an sista dem we liv iina wan a di plies dem we di piipl dem did a waar gens dem wan aneda. Im se: “Mi did fried, an wa di branch afis did tel mi neehn luk laik a sitn we mi did riili niid fi du.” Wan neda breda we niem Tim, we a wan mishineri iina Iezha, did se: “Evridie mi did fain it aad jos fi go chuu di die, som a di taim mi did fiil taiyad iina mi main an badi.” Wa a som a di sitn dem we kyan elp di elda dem wen taim sitn laik dis apm tu dem?

3. Wen wi luk pan aal a di sitn dem we Gidiyan did du, ou it kyan elp aal a wi?

³ Di elda dem kyan lorn nof fram di joj we did niem Gidiyan. (Iib. 6:12; 11:32) Im did a protek an a tek kier a Jeuova  piipl dem. (Joj. 2:16; 1 Kr. 17:6) Siem laik Gidiyan, Jeuova pik di elda dem fi tek kier a im piipl dem iina dem rof taim ya we wi liv iina. (Aks 20:28; 2 Tim. 3:1) Aal a wi kyan lorn fram ou Gidiyan did ombl an du wa Jeuova se im fi du, an ou im did nuo wa im kyan du fram wa im kyaahn du. A nof taim tingz wuda kom op we wuda tes fi si ef im wuda du wa Jeuova se im fi du ar ef im wuda tap. Weda wi a elda ar no wan elda, aal a wi kyan mek di elda dem si se wi tangk dem fi di wok we dem a du an wi fi du aal a wa wi kyan du fi elp dem.​—Iib. 13:17.

4. Ou Gidiyan did shuo se im ombl?

⁴ Gidiyan did nuo wa im kyan du fram wa im kyaahn du, im did ombl. b Wen Jeuova ienjel tel im se Jeuova did pik im fi siev di Izrel piipl dem fram di Midiyanait dem we did big an powaful, im se: “Outa aal a Manase fambili, fi mi wan a di liklis we no wot notn. An outa aal a mi faada pikni dem, mi wos no wot notn.” (Joj. 6:15) Im fiil laik se im kudn dwi’it, bot Jeuova did nuo se im kuda dwi’it an Jeuova elp im fi du di wok we Im gi’im fi du.

5. Wa kyan tes wan elda fi si ef im ombl an im nuo wa im kyan du fram wa im kyaahn du?

⁵ Di elda dem chrai aad fi ombl demself an fi no tek aan muor dan dem kyan manij. (Mai. 6:8; Aks 20:18, 19) An dem no big op demself bout wa dem du, an dem no gwaan laik se dem kyan du muor dan wa dem kyan du. An wen dem si se dem kyaahn du evriting rait, dem no kil op demself bout it. Somtaim tingz a-go kom op we a-go tes wan elda fi si ef im nuo wa im kyan du fram wa im kyaahn du. Laik ef im nuo di mount a wok we im kyan tek aan iina di kanggrigieshan, an ou im gwaan wen sumadi big im op kaaz a sopm we im du ar ef dem mek im fiil bad kaaz a wan wok we im neehn du gud. Ou im diil wid it a-go tes fi si ef im riili ombl. Wa di elda dem kyan lorn fram Gidiyan we kyan elp dem wen sitn laka dis apm?

6. Ou wa Gidiyan did du did elp di elda dem fi si se dem fi nuo wa dem kyan du fram wa dem kyaahn du? (Luk pan di picha tu.)

⁶ Aks fi elp. Sumadi we nuo wa dem kyan du fram wa dem kyaahn du a-go aks fi elp jos laik Gidiyan. (Joj. 6:27, 35; 7:24) An a  di siem ting wid di elda dem tide. Tony, we wi did taak bout aredi, se: “Kaaz a ou mi gruo, mi aalwiez tek aan muor wok dan wa mi kyan manij. So mi plan se mi an mi waif wuda taak bout dis iina wi fambili Baibl stodi an mi wuda get fi fain out ou shi fiil bout it tu. An mi go pan di jw.org websait fi wach di vidiyo we niem Train, Trust, and Empower Others, as Jesus Does.” Afta im du aal a dis, im staat fi aks ada piipl fi elp im fi du di wok dem we im fi du. An kaaz im du dat, Tony se: “Wi a get fi du aal a di wok we fi du iina di kanggrigieshan an so dis mek mi kyan du ada tingz we a-go mek mi get kluosa tu Jeuova.”

7. Ou di elda dem kyan du laik Gidiyan ef piipl taak bad bout sitn bout we dem du? (Jiemz 3:13)

⁷ Ef sumadi chat bad bout sitn we yu du, stil chriit dem gud. Dis a sitn we kyan tes di elda dem, so dem kyan luk pan wa Gidiyan did du wen di Iifriemaits dem chat bad bout im; im neva chriit dem bad kaaz a dat. (Joj. 8:1-3) Wen dem du dat, Gidiyan neehn galang bad. Im shuo se im ombl wen im lisn tu dem, an im se tingz we mek di man dem iizi demself. Wen di elda dem lisn gud tu sumadi we a taak bad bout sitn we dem du, dem a shuo se dem a du laik Gidiyan. An wen dem du dis, it a-go mek tingz no get wosa. (Riid Jiemz 3:13.) Wen dem du dem sitn ya, it mek di breda an sista dem liv iina piis iina di kanggrigieshan.

8. Ef di breda an sista dem a big op di elda dem wen dem du tingz, wa dem fi du? Tel wi ou wan elda did du dis.

⁸ Mek Jeuova get di big op. Wen dem did a big op Gidiyan kaaz dem win di waar we dem did fait gens Midiyan, im mek Jeuova get di big op. (Joj. 8:22, 23) Di elda dem kyan du laik im. So wen dem du sitn we piipl big dem op fa, a Jeuova dem a-go mek get di big op. (1 Kor. 4:6, 7) Se piipl staat fi big op wan elda kaaz im a wan gud tiicha, wa im fi du a mek dem si se a kaaz a Gad Wod mek im kuda du wa im du ar a kaaz a ou Jeuova aaganaizieshan chrien im. Di elda dem fi luk an si ef wen dem du tingz a dem a get di big op ar a Jeuova a get di big op. Wan elda we niem Timoti did lov fi gi taak wen im jos ton elda. Im se: “A di fos paat a mi taak dem mi wuda taak lang, an mi wuda tel dem bout som uol iip a tuori an ting iina mi taak. An wen mi don, di breda dem wuda big mi op an se ou mi kyan gi taak gud. Bot mi fain se a neehn Jeuova ar im Wod a get di big op dem taim de.” So Timoti staat fi chienj di wie ou im gi taak so dat im no en op a big op imself insted-a Jeuova. (Pr. 27:21) An kaaz a dat nou, im se: “Difrant difrant breda an sista tel mi bout ou mi taak elp dem fi diil wid wan prablem, ar fi go chuu sitn, an ou it elp dem fi get kluosa tu Jeuova. Wen di breda an sista dem se dem sitn ya, it mek mi api dan wen a mi dem yuus tu big op.”

9. Wa did apm fi tes fi si ef Gidiyan did briev an ef im wuda du wa Jeuova tel im fi du? (Luk pan di picha pan di kova.)

⁹ Afta dem pik Gidiyan fi ton joj, tingz did apm fi tes fi si ou briev im bi an ef im a-go du wa Jeuova se im fi du, laik wen im did get di wok fi mash op di alta we im faada yuuz fi worship Bieyal. (Joj. 6:25, 26) An wan neda taim wen im did afi get som man fi fait iina wan waar, a tuu taim Jeuova tel im fi get rid a nof a di man dem. (Joj. 7:2-7) An den Jeuova tel im fi go a di ada suoja dem kyamp iina di migl a di nait fi fait gens dem.​—Joj. 7:9-11.

10. Wa mait-a apm fi si ef wan elda riili a du wa Jeuova se im fi du?

 ¹⁰ Di elda dem ‘no fi aad iez.’ (Jmz. 3:17) Wan elda we no aad iez a-go kwik fi du wa Gad Wod tel im fi du an im a-go du wa Jeuova aaganaizieshan se im fi du tu. An wen dem du dat, dem a du tingz we di ada breda an sista dem kyan fala. Bot wa a-go tes dem som a di taim a wen Jeuova aaganaizieshan se dem fi du tingz we dem no tingk mek sens ar we dem fain aad fi du. Ar dem mait-a aks im fi du sitn fi elp di breda an sista dem, we ef dem kech im dem mait-a lak im op. Ou di elda dem kyan du laik Gidiyan an du wa Jeuova se dem fi du wen tingz laik dem ya apm?

11. Wa kyan elp di elda dem fi du wa Jeuova aaganaizieshan tel dem fi du?

¹¹ Lisn gud tu wa dem tel unu fi du an dwi’it. Jeuova did tel Gidiyan ou fi mash op di alta we im faada did mek op, an wich paat fi mek op wan nyuu wan fi Im, an wich wan a di animal dem fi sakrifais. Gidiyan neehn if-an-bot bout ef im fi du wa Jeuova tel im fi du, im jos dwi’it. A siem so wen Jeuova aaganaizieshan tel di elda dem wa fi du, dem no if-an-bot, dem fi dwi’it. Laik wen dem rait an tel dem wa fi du, an wen dem rait an tel dem sortn tingz we dem fi mek di kanggrigieshan nuo, an wen dem tel dem wa fi du fi tek kier a wi, dem fi dwi’it tu. Wi lov wi elda dem kaa dem a du wa Jeuova aaganaizieshan tel dem fi du, an kaaz a dat, it mek tingz wok out gud fi evribadi iina di kanggrigieshan.​—Sa. 119:112.

12. Ou di elda dem kyan du wa Iibruu 13:17 se ef Jeuova aaganaizieshan se dem fi chienj op tingz?

¹² Redi fi chienj op ou yu a du tingz. Memba Jeuova did tel Gidiyan fi sen uom aalmuos aal a di man dem. (Joj. 7:8) Gidiyan mait-a did a wanda ef dis wuda riili mek sens. Bot im stil du wa Jeuova tel im fi du. Jos laik ou Gidiyan did du wa Jeuova did tel im fi du, a siem so di elda dem tide chienj op eniting we dem did a du we Jeuova aaganaizieshan tel dem fi chienj op. (Riid Iibruu 13:17.) Laik tingk bout wa did staat fi apm iina 2014 wen di waiz sorvant did chienj op di wie ou dem yuus tu pie fi mek di Asembli Aal dem an di Kindom Aal dem. (2 Kor. 8:12-14) Fos taim, di aaganaizieshan wuda len di kanggrigieshan di moni fi bil di Kindom Aal an den di kanggrigieshan wuda pie it bak likl likl. Insted-a dat, dem chienj op di wie dem du dat an yuuz di moni we dem get fram aal uova di worl fi mek op Kindom Aal an Asembli Aal eni we dem niid dem, aal ef we dem mek it di breda an sista dem de onggl av likl bit a moni fi gi. Wen wan breda we niem José ier dis, im neehn tingk se dis kuda did wok at aal. Im se tu imself se, ‘Nat iivn wan Kindom Aal a-go get fi mek op kaaz a no so wi du tingz iina dis ya paat a di worl ya.’ Dis a wa José did se did elp im fi wok wid di chienj we Jeuova  aaganaizieshan did mek. Im se: “Wa Pravorbz 3:5, 6 se mek mi memba se a Jeuova mi fi chos. Wi get fi mek op uol iip muor Kindom Aal, bot no onggl dat, wi lorn ou wi kyan gi difrant difrant sitn so das evribadi kyan av wa dem niid.”

13. (a) Wa Gidiyan did shuor se? (b) Ou di elda dem kyan du laik Gidiyan? (Luk pan di picha tu.)

¹³ No fried fi du wa Jeuova waahn yu fi du. Aal wen Gidiyan did fried, im did stil du wa Jeuova waahn im fi du. (Joj. 9:17) An afta Jeuova did mek Gidiyan nuo se Im did a-go de de wid im, Jeuova did mek Gidiyan nuo se Im a-go de de fi Im piipl dem tu. A siem so di elda dem we liv wich paat di wok anda lakdong kyan nuo se aal ef dem rof dem op an se dem a-go ares dem, an se dem a-go mek dem luuz dem wok ar se dem a-go du dem sitn, Jeuova a-go de de wid dem fi elp dem liid di breda an sista dem iina di priichin wok an a di miitn dem. c Aal wen di wos sofarieshan a gwaan, di elda dem afi mek shuor se dem no fried a notn so dat dem kyan du di sitn dem we Jeuova aaganaizieshan tel dem fi du aal wen sitn mait-a apm tu dem ef dem dwi’it. Aal ef di mesij we dem get fi priich komiin laka ielstuon, dem stil a-go priich, an wen Gag we kom fram Miegag kom fait gens wi, dem a-go elp wi fi du di sitn dem we wi niid fi du fi go chuu.​—Izii. 38:18; Rev. 16:21.

14. Wa did apm we mek Gidiyan fiil se im kyaahn go aan no muor?

¹⁴ Wen Gidiyan a did wan joj, a nof wok im did av fi du ino. Wan nait wen im did a fait gens di Midiyanait dem an dem ron, im an im suoja dem ron dem dong go faar faar fram wan plies we dem kaal Jezriil go wie dong a di Jaadn Riva, a uol iip a makabush mait-a did de de-so. (Joj. 7:22) An aalduo im did taiyad, Gidiyan stil neehn tap a di Jaadn Riva. Im an im 300 man dem ron kraas di riva baka di man dem, til dem kech op wid dem an don dem.​—Joj. 8:4-12.

15. Wa mek wan elda mait-a fiil laik se im kyaahn go aan no muor?

 ¹⁵ Wan elda mait-a fiil se im kyaahn go aan no muor kaa a aal a di sitn dem we im av fi du fi tek kier a im fambili an di breda an sista dem we de iina di kanggrigieshan. Ef dem sitn ya mek im fiil so, ou im kyan du laik Gidiyan?

16-17. Wa did elp Gidiyan fi go aan, an wa di elda dem kyan nuo fi shuor se? (Aizaiya 40:28-31) (Luk pan di picha tu.)

¹⁶ Nuo fi shuor se Jeuova a-go gi yu di chrent we yu niid fi go chuu. Gidiyan did nuo se Jeuova wuda gi im di chrent we im did niid, an a dat Jeuova did du. (Joj. 6:14, 34) Laik wan a di taim dem, Gidiyan an im man dem did a ron dong tuu king fram Midiyan we mait-a did a raid kyamil, an dem neehn did a raid notn. (Joj. 8:12, 21) Bot Jeuova elp dem fi go chuu an win. A siem so di elda dem kyan nuo se Jeuova a-go elp dem, kaa Jeuova “naa go eva get taiyad ar fiil laik im kyaahn du no muo.” Im a-go gi dem di chrent fi go aan.​—Riid Aizaiya 40:28-31.

¹⁷ Laik tingk bout wan breda we niem Matyu. Im a did wan a di elda dem we dem pik fi elp wi wen wi go a aspital. Im tel wi wa elp im wen taim im fiil laik im kyaahn go aan no muor. Im se: “A nof taim mi fain se wa Filipiyan 4:13 se a chuu, kaa nof taim wen mi taiyad an mi fiil laik se mi kyaahn go aan no muor, mi prie tu Jeuova an aks im fi gi mi di chrent we mi niid fi elp mi breda an sista dem. An nof taim wen mi du dat, mi fiil Jeuova a gi mi im uoli spirit.” Jos laik Gidiyan, wi elda dem a go chuu nof sitn, bot dem stil a wok aad fi tek kier a wi. A chuu se dem niid fi tingk bout umoch dem riili kyan du an dwi’it. Bot dem kyan nuo fi shuor se Jeuova a-go ier dem wen dem aks im fi elp dem, an im a-go gi dem di chrent fi go aan.​—Sa. 116:1; Fil. 2:13.

18. Ou di elda dem kyan du laik Gidiyan?

¹⁸ Di elda dem kyan lorn uol iip a gud sitn fram wa Gidiyan did du. Dem kyan lorn ou fi bi ombl an nuo di mount a wok we dem kyan du an wa dem kyaahn du. An dem fi ombl stil wen piipl taak sitn bad bout wa dem du an wen piipl big dem op tu. An iina dem laas die ya, dem afi lorn fi du wa Jeuova Gad se dem fi du an no fried. An di elda dem fi nuo fi shuor se Jeuova a-go de de fi dem no mata wa wen taim dem fies notn we mek it aad fi dem. Wi riili tangk dem shepad ya fi di aad wok we dem a du. So dem fi get “di kain-a rispek we piipl laik [dem] fi get.”​—Fil. 2:29.